Ad-adda a maawatantayo ti kaipapanan ti “Sheol” ken “Hades” no usigentayo ti isursuro ti Biblia maipapan iti panagungar. Ipakita ti Sao ti Dios nga agungarto dagiti natay nga adda iti Sheol ken Hades.a (Job 14:13; Aramid 2:31; Apocalipsis 20:13) Ipakita pay ti Sao ti Dios a saan laeng a dagidiay nagserbi ken ni Jehova ti adda iti Sheol wenno Hades no di pay ket dagiti adu a saan a nagserbi kenkuana. (Genesis 37:35; Salmo 55:15) Gapuna, isursuro ti Biblia nga addanto “panagungar agpadpada dagiti nalinteg ken dagiti nakillo.”​—Aramid 24:15.

ANIA ti ammom maipapan iti Aldaw ti Panangukom? Adu ti mamati a saggaysa kano a dumatagto iti sanguanan ti trono ti Dios dagiti binilion a kararua. Maukom sadiay ti tunggal maysa. Magunggonaan kano dagiti dadduma iti nailangitan a biag, ket dagiti dadduma makednganda nga agtutuok iti agnanayon. Nupay kasta, naiduma unay ti panangiladawan ti Biblia iti Aldaw ti Panangukom. Ipakita ti Sao ti Dios a saan a nakabutbuteng dayta a panawen, no di ket panawen ti namnama ken panangpabaro.

Iti Apocalipsis 20:11, 12, mabasatayo ti panangiladawan ni apostol Juan iti Aldaw ti Panangukom: “Nakitak ti maysa a naindaklan a puraw a trono ken daydiay situtugaw iti dayta. Manipud iti sanguananna nagtalaw ti daga ken ti langit, ket awan disso a nasarakan maipaay kadakuada. Ket nakitak dagiti natay, dagiti dadakkel ken dagiti babassit, a sitatakder iti sanguanan ti trono, ket naukrad dagiti lukot. Ngem sabali pay a lukot ti naukrad; dayta ti lukot ti biag. Ket naukom dagiti natay manipud kadagidiay banag a naisurat kadagiti lukot sigun kadagiti aramidda.” Siasino ti Ukom a nailadawan ditoy?

Ni Jehova ti kangatuan nga Ukom ti sangatauan. Nupay kasta, adda dinutokanna a mangukom. Sigun iti Aramid 17:31, kinuna ni apostol Pablo a ti Dios “nangituding iti aldaw nga iti dayta panggepna nga ukomen ti mapagnaedan a daga buyogen ti kinalinteg babaen ti maysa a lalaki a dinutokanna.” Ni napagungar a Jesu-Kristo daytoy nadutokan nga Ukom. (Juan 5:22) Ngem kaano a mangrugi ti Aldaw ti Panangukom? Kasano ti kapautna?

Ipakita ti libro nga Apocalipsis a mangrugi ti Aldaw ti Panangukom kalpasan ti gubat ti Armagedon, inton nadadaelen ti sistema ni Satanas ditoy daga.a (Apocalipsis 16:14, 16; 19:19–20:3) Kalpasan ti Armagedon, maipupokto ni Satanas ken dagiti demoniona iti mangliwengliweng nga abut iti sangaribu a tawen. Iti dayta a panawen, dagiti 144,000 agbalinda nga uk-ukom ken ‘makipagturaydanto ken ni Kristo idiay langit iti sangaribu a tawen.’ (Apocalipsis 14:1-3; 20:1-4; Roma 8:17) Ti Aldaw ti Panangukom ket saan nga apagbiit a pasamak nga agpaut laeng iti 24 nga oras. Agpaut dayta iti sangaribu a tawen.

Iti las-ud dayta a sangaribu a tawen, ni Jesu-Kristo ‘ukomennanto dagiti sibibiag ken dagiti natay.’ (2 Timoteo 4:1) “Dagiti sibibiag” ket isu ti “dakkel a bunggoy” a makalasat inton Armagedon. (Apocalipsis 7:9-17) Nakita met ni apostol Juan “dagiti natay . . . a sitatakder iti sanguanan ti trono” a pakaukomanda. Kas inkari ni Jesus, ‘amin dagidiay adda kadagiti pakalaglagipan a tanem mangngegdanto ti timek ni Kristo ket rummuarda’ babaen ti pannakapagungarda. (Juan 5:28, 29; Aramid 24:15) Ngem anianto ti pangibatayan iti pannakaukom ti amin a tao?

Sigun iti sirmata ni apostol Juan, “naukrad dagiti lukot,” ket “naukom dagiti natay manipud kadagidiay banag a naisurat kadagiti lukot sigun kadagiti aramidda.” Ti aya rekord maipapan kadagiti napalabas nga aramid dagiti tattao ti tuktukoyen dagitoy a lukot? Saan, ta saan a maukom dagiti tattao sigun kadagiti inaramidda sakbay a natayda. Kasano ti pannakaammotayo iti dayta? Kuna ti Biblia: “Ti natayen naluk-atanen iti basolna.” (Roma 6:7) No kasta, napunaston dagiti basol dagidiay mapagungar. Nalawag ngarud a dagiti lukot iladladawanda dagiti kanayonan a bilin ti Dios. Tapno agpada nga agbiag nga agnanayon dagiti nakalasat iti Armagedon ken dagiti napagungar, masapul a tungpalenda dagiti bilin ti Dios, agraman dagiti aniaman a baro a bilin a nalabit ipalgak ni Jehova bayat ti sangaribu a tawen. Maukomto ngarud dagiti tattao maibatay kadagiti aramidda bayat ti Aldaw ti Panangukom.

Iti Aldaw ti Panangukom, dagiti binilion a tattao maipaayandanto iti damo a gundaway nga agsursuro maipapan iti pagayatan ti Dios ken agbiag a mayannurot iti dayta. Kayat a sawen daytoy nga addanto maaramid a nasaknap a trabaho a panangisuro. Kinapudnona, “ti kinalinteg isu ti sigurado a masursuronto dagiti agnanaed iti nabunga a daga.” (Isaias 26:9) Nupay kasta, saan nga amin ket situtulok nga agbiag a mayannurot iti pagayatan ti Dios. Kuna ti Isaias 26:10: “Uray no daydiay nadangkes maipakitaan koma iti pabor, saannanto latta a masursuro ti kinalinteg. Iti daga ti kinaumiso isu agtignayto a di nainkalintegan ket saannanto a makita ti kinatan-ok ni Jehova.” Bayat ti Aldaw ti Panangukom, mapapatay ken saanton a pulos mapagungar dagitoy a nadangkes a tattao.​—Isaias 65:20.

Iti ngudo ti Aldaw ti Panangukom, ‘nagbiagton’ a naan-anay dagiti nakalasat kas perpekto a tattao. (Apocalipsis 20:5) No kasta, maisublinto ti orihinal a perpekto a kasasaad ti sangatauan bayat ti Aldaw ti Panangukom. (1 Corinto 15:24-28) Kalpasanna, addanto maudi a pannubok. Maruk-atanto ni Satanas iti nakaipupokanna ket mapalubosan a mangpadas a mangyaw-awan iti sangatauan iti maudi a gundaway. (Apocalipsis 20:3, 7-10) Dagidiay saan nga agpaallilaw kenkuana ti mangtagiragsakto iti naan-anay a kaitungpalan ti kari ti Biblia a: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Wen, pakabendisionanto ti intero a matalek a sangatauan ti Aldaw ti Panangukom!

PINULLO a tawen sakbay ti 1914, inwaragawag dagiti estudiante ti Biblia nga adda dagiti mapasamak a napateg a panagbalbaliw iti dayta a tawen. Ania dagitoy a panagbalbaliw, ken ania ti pammaneknek a napateg a tawen ti 1914?

Kas nailanad iti Lucas 21:24, kinuna ni Jesus: “Ti Jerusalem ibaddebaddekto dagiti nasion, agingga a matungpal ti naituding a pampanawen dagiti nasion [“panawen dagiti Gentil,” King James