1. Ania ti panggep ti Dios iti daga?

PUDNO a nagsayaat ti panggep ni Jehova iti daga. Kayatna a mapno ti daga kadagiti naragsak ken nasalun-at a tattao. Kuna ti Biblia a ‘nangimula ti Dios iti maysa a minuyongan idiay Eden’ ket ‘pinagtubona sadiay ti tunggal kayo a makaay-ayo a kitaen ken nasayaat a pagtaraon.’ Kalpasan a pinarsua ti Dios ti immuna a lalaki ken babai, da Adan ken Eva, insaadna ida iti dayta a makaay-ayo a pagtaengan ket kinunana kadakuada: “Agbungakayo ken agadukayo ket punnuenyo ti daga ken parukmaenyo.” (Genesis 1:28; 2:8, 9, 15) No kasta, pinanggep ti Dios a maaddaan dagiti tattao iti annak, palawaenda ti minuyongan a pagtaenganda agingga nga agsaknap iti intero a daga, ken aywananda dagiti animal.

2. (a) Kasano ti pannakaammotayo a matungpalto ti panggep ti Dios iti daga? (b) Sigun iti Biblia, ania a kita dagiti tattao ti agbiag iti agnanayon?

² Panagkunam, matungpalto ngata ti panggep ni Jehova a Dios nga agnaed dagiti tattao iti paraiso a daga? “Sinaok a mismo dayta,” kuna ti Dios, “aramidekto met.” (Isaias 46:9-11; 55:11) Wen, di bumurong a tungpalento ti Dios ti panggepna! Kunana a ‘saanna a pinarsua ti daga nga awan kapapay-anna’ no di ket ‘binukelna dayta tapno mapagnaedan.’ (Isaias 45:18) Ania a kita dagiti tattao ti kayat ti Dios nga agnaed iti daga? Ken kasano kapaut ti kayatna a panagbiagda ditoy? Kastoy ti sungbat ti Biblia: “Dagiti nalinteg tagikuaendanto ti daga, ket agtaengdanto nga agnanayon iti dayta.”​—Salmo 37:29; Apocalipsis 21:3, 4.

3. Ania dagiti nakalkaldaang a kasasaad ditoy daga ita, ket ania dagiti saludsod a patauden daytoy?

³ Nalawag a saan pay a napasamak daytoy. Agsakit ken matay dagiti tattao ita; agdadangadang ken agpipinnatayda pay. Adda di nasayaat a napasamak. Nupay kasta, awan duadua a ti panggep ti Dios iti daga ket saan a kas iti makitatayo a kasasaadna ita! Ania aya ti napasamak? Apay a saan pay laeng a natungpal ti panggep ti Dios? Saan a mailawlawag daytoy ti aniaman a libro ti historia nga insurat ti tao agsipud ta nangrugi ti parikut idiay langit.

NO KASANO A TIMMAUD TI KABUSOR

4, 5. (a) Siasino a talaga ti nakisao ken ni Eva babaen ti maysa a serpiente? (b) Kasano nga agbalin a mannanakaw ti dati a nasingpet ken mapagtalkan a tao?

⁴ Salaysayen ti umuna a libro ti Biblia ti maipapan iti kabusor ti Dios a nagparang idiay minuyongan ti Eden. Naawagan iti “serpiente,” ngem saan laeng a maysa nga animal. Iti maudi a libro ti Biblia, naipabigbig daytoy a kabusor kas “daydiay naawagan iti Diablo ken Satanas, a mangyaw-awan iti intero a mapagnaedan a daga.” Maawagan met iti “kadaanan a serpiente.” (Genesis 3:1; Apocalipsis 12:9) Kas iti maysa a nasigo a tao a kabaelanna a pagparangen nga aggapu ti timekna iti kaabayna a munieka, maysa a serpiente ti inusar daytoy a mannakabalin nga anghel, wenno di makita nga espiritu a parsua, a nakisao ken ni Eva. Awan duadua nga adda dayta nga espiritu a persona idi insagana ti Dios ti daga a pagnaedan ti tao.​—Job 38:4, 7.

⁵ Ngem yantangay perpekto ti amin a parsua ni Jehova, siasino ngarud ti nangaramid iti daytoy a “Diablo,” iti daytoy a “Satanas”? Iti ababa a pannao, ti maysa kadagiti mannakabalin nga espiritu nga annak ti Dios pinagbalinna ti bagina a Diablo. Kasano a napasamak daytoy? Bueno, posible nga agbalin a mannanakaw ti maysa a nasingpet ken mapagtalkan a tao. Kasano a mapasamak dayta? Mabalin nga ipalubosna a rumusing iti pusona ti dakes a tarigagay. No sangkapanunotna dayta, mabalin a marubroban dayta a dakes a tarigagay. Ket no adda gundawayna, mabalin nga itungpalna ti dakes a tarigagay a pampanunotenna.​—Santiago 1:13-15.

6. Kasano a nagbalin a Satanas a Diablo ti maysa a mannakabalin nga espiritu nga anak ti Dios?

⁶ Kasta ti napasamak ken ni Satanas a Diablo. Dumdumngeg la ketdi idi imbaga ti Dios kada Adan ken Eva nga aganakda ket punnuenda ti daga kadagiti kaputotanda. (Genesis 1:27, 28) ‘Nagsayaat ketdin no siak, saan ket a ti Dios, ti pagdayawan amin dagitoy a tattao!’ nalabit nakuna ni Satanas iti bagina. No kasta, timmanor iti pusona ti dakes a tarigagay. Nagbanaganna, inallilawna ni Eva babaen ti panagulbodna maipapan iti Dios. (Genesis 3:1-5) Dayta ti gapuna a nagbalin a “Diablo,” kayatna a sawen, “Mammardaya.” Sa nagbalin pay a “Satanas,” kayatna a sawen, “Bumusbusor.”

7. (a) Apay a natay da Adan ken Eva? (b) Apay a lumakay ken matay dagiti amin a kaputotan ni Adan?

⁷ Babaen ti panagulbod ken panangallilaw ni Satanas a Diablo, pinagsukirna da Adan ken Eva iti Dios. (Genesis 2:17; 3:6) Patay ti nagtungpalanda, kas imbaga ti Dios a mapasamak kadakuada no agsukirda. (Genesis 3:17-19) Yantangay nagbalin nga imperpekto ni Adan idi nagbasol, naipatawidna ti basol kadagiti amin a kaputotanna. (Roma 5:12) Mabalintay nga iyarig ti kasasaad iti maysa a paghormaan a mausar iti panagluto iti tinapay. Ania ti mapasamak iti tunggal tinapay a mailuto iti adda kuppitna a paghormaan? Adda kuppit ti tunggal tinapay. Kasta met, addaan amin a tao iti “kuppit” ti kinaimperpekto a natawidda ken ni Adan. Dayta ti gapuna a lumakay ken matay amin a tao.​—Roma 3:23.

8, 9. (a) Ania ti nalawag a kinarit ni Satanas? (b) Apay a ti Dios saanna nga inkisap a dagus dagiti rebelde?

⁸ Mangidadaulo ni Satanas iti rebelion idi inallukoyna da Adan ken Eva nga agbasol iti Dios. Kinaritna ti wagas ti panangituray ni Jehova. Kas man la kastoy ti ibagbaga ni Satanas: ‘Saan a nasayaat ti panangituray ti Dios. Naulbod ken papaidamanna dagiti iturayanna kadagiti naimbag a banag. Saan a kasapulan nga iturayan ti Dios dagiti tattao. Mabalinda nga ikeddeng a mismo no ania ti naimbag ken dakes. Ken nasaysayaat ti kasasaadda no siak ti mangituray kadakuada.’ Kasano a tinaming ti Dios ti kasta a makainsulto a karit? Adda dagiti agkuna nga inkisap la koman ti Dios dagiti rebelde. Ngem no inaramidna dayta, masungbatan ngata ti karit ni Satanas? Mapaneknekan ngata nga umiso ti wagas ti panangituray ti Dios?

⁹ Gapu ta awan pagkurangan ti hustisia ni Jehova, saanna nga inkisap a dagus dagiti rebelde. Nangted iti umdas a panawen tapno masungbatan ti karit ni Satanas iti makapnek a pamay-an ken mapaneknekan nga ulbod ti Diablo. Iti las-ud dayta a panawen, pinalubosanna dagiti tattao a mangituray iti bagbagida iti babaen ti impluensia ni Satanas. Ilawlawag ti Kapitulo 11 daytoy a libro no apay a kasta ti inaramid ni Jehova ken no apay a naunday ti panawen nga impalubosna a pannakarisut dagitoy nga isyu. Ngem ita, nasayaat a panunoten daytoy: Rebbeng kadi a pinati da Adan ken Eva ni Satanas idinto ta awan a pulos ti naaramidanna a naimbag para kadakuada? Rebbeng kadi a pinatida a naulpit ken ulbod ni Jehova idinto ta isu ti nangted iti amin nga adda kadakuada? Ania ngata koma ti inaramidmo?

10. Tapno masungbatan ti karit ni Satanas, kasano a maipakitam nga addaka iti dasig ni Jehova?

¹⁰ Nasayaat a panunoten dagitoy a saludsod agsipud ta maipaspasango ti tunggal maysa kadatayo ita kadagiti kasta met laeng nga isyu. Wen, addaanka iti gundaway a dumasig ken ni Jehova tapno masungbatan ti karit ni Satanas. Mabalinmo nga awaten ni Jehova kas Agturay ken saranaymo tapno mapaneknekan nga ulbod ni Satanas. (Salmo 73:28; Proverbio 27:11) Nakalkaldaang ta manmano kadagiti binilion a tattao ditoy lubong ti mangar-aramid iti kasta. Mangpataud daytoy iti napateg a saludsod, Talaga kadi nga isursuro ti Biblia a ni Satanas ti agturay iti daytoy a lubong?

SIASINO TI AGTURAY ITI DAYTOY A LUBONG?

11, 12. (a) Kasano a ti sulisog a naipasango ken Jesus ipakitana a ni Satanas ti agturay iti daytoy a lubong? (b) Ania pay ti mangpaneknek a ni Satanas ti agturay iti daytoy a lubong?

¹¹ Pulos a di pinagduaduaan ni Jesus a ni Satanas ti agturay iti daytoy a lubong. Iti datdatlag a pamay-an, naminsan impakita ni Satanas ken ni Jesus “dagiti amin a pagarian ti lubong ken ti dayagda.” Kalpasanna, inkarina ken ni Jesus: “Amin dagitoy a banag itedkonto kenka no agruknoyka ken mangaramidka iti maysa a tignay a panagdayaw kaniak.” (Mateo 4:8, 9; Lucas 4:5, 6) Panunotem daytoy. Maysa kadi a sulisog ken ni Jesus dayta a diaya no saan a ni Satanas ti agturay kadagita a pagarian? Saan nga inlibak ni Jesus a kukua ni Satanas amin dagitoy a gobierno iti lubong. Inlibak koma dayta ni Jesus no saan a ni Satanas ti agturay kadagitoy.

¹² Siempre, ni Jehova ti mannakabalin-amin a Dios, ti Namarsua iti nakaskasdaaw nga uniberso. (Apocalipsis 4:11) Ngem awan a pulos ti ibagbaga ti Biblia a ni Jehova a Dios wenno ni Jesu-Kristo ti agturay iti daytoy a lubong. Kinapudnona, ni Jesus espesipiko nga inawaganna ni Satanas kas ti “agturay iti daytoy a lubong.” (Juan 12:31; 14:30; 16:11) Iti Biblia, maawagan pay ni Satanas a Diablo kas “ti dios daytoy a sistema ti bambanag.” (2 Corinto 4:3, 4) Maipapan iti daytoy a bumusbusor, wenno Satanas, insurat ti Kristiano nga apostol a ni Juan: “Ti intero a lubong adda iti pannakabalin daydiay nadangkes.”​—1 Juan 5:19.

NO KASANO A MAIKKAT TI LUBONG NI SATANAS

13. Apay a nasken ti baro a lubong?

¹³ Iti panaglabas ti tunggal tawen, ad-adda a pumegpeggad ti lubong. Napno daytoy kadagiti aggugubat a buyot, nakusit a politiko, aginsisingpet a panguluen ti relihion, ken napeklan a kriminal. Saanen a mabalbaliwan pay ti lubong. Ipalgak ti Biblia nga asidegen nga ikkaten ti Dios ti dakes a lubong inton dumteng ti gubatna, ti Armagedon. Daytoyto ti mangiruangan iti nalinteg a baro a lubong.​—Apocalipsis 16:14-16.

14. Asino ti pinili ti Dios nga Agturay iti Pagarianna, ket kasano a naipadto daytoy?

¹⁴ Ni Jesu-Kristo ti pinili ni Jehova a Dios nga Agturay iti nailangitan a Pagarian wenno gobiernona. Idi un-unana, impakauna ti Biblia: “Nayanak ti maysa nga ubing kadatayo, maysa nga anak a lalaki ti naited kadatayo: ket ti panangituray maiparabawto iti abagana: ket mapanagananto iti . . . Prinsipe ti Kappia. Ti idadakkel ti panangiturayna ken ti kappia awanto ti inggana.” (Isaias 9:6, 7, King James Version) Maipanggep iti dayta a gobierno, insuro ni Jesus dagiti pasurotna nga ikararagda daytoy: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Kas makitatayonto iti maysa a kapitulo daytoy a libro, iti saanen a mabayag ikkatento ti Pagarian ti Dios dagiti amin a gobierno iti daytoy a lubong, ket sukatannanto amin dagitoy. (Daniel 2:44) Kalpasanna, ipasdekto ti Pagarian ti Dios ti paraiso a daga.

ASIDEGEN TI BARO A LUBONG!

15. Ania ti “baro a daga”?

¹⁵ Ipanamnama kadatayo ti Biblia: ‘Adda baro a langlangit ken baro a daga nga ur-urayentayo sigun iti kari ti Dios, ket kadagitoy agtaeng ti kinalinteg.’ (2 Pedro 3:13; Isaias 65:17) No dadduma, no dakamaten ti Biblia ti “daga,” dagiti tattao nga agnanaed iti dayta ti kayatna a sawen. (Genesis 11:1) No kasta, dagiti tattao nga inanamongan ti Dios ti mangbukel iti “baro a daga.”

16. Ania a di magatadan a sagut ti ited ti Dios kadagidiay anamonganna, ket ania ti masapul nga aramidentayo tapno magun-odtayo dayta a sagut?

¹⁶ Inkari ni Jesus nga iti umad-adani a baro a lubong, dagidiay inanamongan ti Dios awatendanto ti sagut nga “agnanayon a biag.” (Marcos 10:30) Pangngaasim ta ukagem ti Bibliam iti Juan 3:16 ken 17:3, ket basaem no ania ti kinuna ni Jesus a masapul nga aramidentayo tapno agbiagtayo iti agnanayon. Ita, usigem manipud iti Biblia dagiti bendision a sagrapento dagidiay maikari nga umawat iti dayta a nagsayaat a sagut ti Dios inton dumteng ti Paraiso a daga.

17, 18. Kasano a masiguradotayo nga addanto talna ken kinatalged iti uray sadino ditoy daga?

¹⁷ Awanton ti kinadakes, gubat, krimen, ken kinaranggas. “Daydiay nadangkes awanton . . . Ngem dagidiay naemma tagikuaendanto ti daga.” (Salmo 37:10, 11) Addanto talna agsipud ta ti ‘Dios pagsardengenna dagiti gubat agingga iti ungto ti daga.’ (Salmo 46:9; Isaias 2:4) Ket “agtubonto [wenno, rumangpaya] daydiay nalinteg, ken ti kinaruay ti talna agingga nga awanen ti bulan”​—kayatna a sawen, agnanayon!​—Salmo 72:7.

¹⁸ Natalgedto ti panagbiag dagiti agdaydayaw ken ni Jehova. Natalged ti panagbiag dagiti Israelita idi tiempo ti Biblia idi nagtulnogda iti Dios. (Levitico 25:18, 19) Anian a nagsayaatto met ti agbiag a sitatalged idiay Paraiso!​—Isaias 32:18; Mikias 4:4.

19. Apay nga ammotayo a nawadwadto ti taraon iti baro a lubong ti Dios?

¹⁹ Saanton nga agkirang ti taraon. “Maaddanto ti naruay a bukbukel iti daga,” inkanta ti salmista. “Iti tapaw dagiti bantay addanto ti panaglaplapusanan.” (Salmo 72:16) Ni Jehova a Dios bendisionannanto dagiti nalinteg, ket “ti met laeng daga sigurado nga ipaaynanto ti bungana.”​—Salmo 67:6.

20. Apay a masiguradotayo nga agbalinto a paraiso ti intero a daga?

²⁰ Agbalinto a paraiso ti intero a daga. Agkakapintas a baro a pagtaengan ken hardin ti addanto iti daga a daddadaelen ita dagiti managbasol a tattao. (Isaias 65:21-24; Apocalipsis 11:18) Iti panaglabas ti panawen, lumawanto dagiti nasakupen a paset ti daga agingga nga agbalin a makaay-ayo ken nabunga ti intero a daga a kas iti minuyongan ti Eden. Ket ti Dios ‘ukradennanto ti imana ket pennekenna ti tarigagay ti tunggal sibibiag a banag.’​—Salmo 145:16.

21. Ania ti mangipakita nga aglalangento a sikakappia dagiti tattao ken dagiti animal?

²¹ Aglalangento a sikakappia dagiti tattao ken dagiti animal. Agkakapanganto dagiti atap ken naamo nga animal. Uray ti bassit nga ubing, saannanto a kabuteng dagiti animal a napeggad ita.​—Isaias 11:6-9; 65:25.

22. Anianto ti mapasamak iti sakit?

²² Awanton ti sakit. Kas Agturay iti nailangitan a Pagarian ti Dios, nasaksaknapto a panangagas ti aramiden ni Jesus ngem iti inaramidna idi adda ditoy daga. (Mateo 9:35; Marcos 1:40-42; Juan 5:5-9) “Awanto ti agtataeng nga agkuna: ‘Masakitak.’”​—Isaias 33:24; 35:5, 6.

23. Apay a ti panagungar pagrag-oenna ti pusotayo?

²³ Agungarto nga addaan gundaway nga agbiag iti agnanayon dagiti pimmusay nga ipatpategtayo iti biag. Agungarto amin dagidiay matmaturog ken patay nga adda iti lagip ti Dios. Kinapudnona, “addanto panagungar agpadpada dagiti nalinteg ken dagiti nakillo.”​—Aramid 24:15; Juan 5:28, 29.

24. Ania ti makunam maipapan iti panagbiag iti Paraiso ditoy daga?

²⁴ Anian a nagsayaat a masanguanan ti agur-uray kadagidiay situtulok nga agsursuro maipapan ken ni Jehova a Dios, ti Naindaklan a Namarsua kadatayo, ken agserbi kenkuana! Ti masanguanan a Paraiso ditoy daga ti kayat a sawen ni Jesus idi inkarina iti managdakdakes a natay iti sibayna: “Makikaduakanto kaniak idiay Paraiso.” (Lucas 23:43) Nasken nga ammuentayo ti ad-adu pay maipapan ken ni Jesu-Kristo, ta babaen kenkuana posible amin dagitoy a bendision.

1. Ania a nalatak a kararag ti usigentayo ita?

MINILION a tattao iti sangalubongan ti makaammo iti kararag nga aw-awagan ti adu kas Amami, wenno ti Kararag ti Apo. Agpada a tuktukoyen dagita ti nalatak a kararag nga inted a mismo ni Jesu-Kristo kas pagtuladan. Nabagas dayta a kararag, ket ti panangusig iti umuna a tallo a dawat a nadakamat iti dayta tulongannaka a mangammo iti ad-adu pay maipapan iti pudno nga isursuro ti Biblia.

2. Ania ti tallo kadagiti banag nga insuro ni Jesus nga ikararag dagiti adalanna?

² Iti rugi daytoy a pagtuladan a kararag, kinuna ni Jesus kadagiti dumdumngeg idi kenkuana: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.’” (Mateo 6:9-13) Ania ti kaipapanan dagitoy a tallo a dawat?

3. Ania ti nasken nga ammuentayo maipapan iti Pagarian ti Dios?

³ Adun ti naadaltayo maipapan iti nagan ti Dios a Jehova. Ken adda metten nasursurotayo maipapan iti pagayatan ti Dios​—no ania ti naaramidannan ken no anianto pay ti aramidenna maipaay iti sangatauan. Ngem ania ti tuktukoyen ni Jesus idi imbagana nga ikararagtayo ti kastoy: “Umay koma ti pagariam”? Ania ti Pagarian ti Dios? Kasano a ti iyaayna santipikaren wenno pagbalinenna a nasantuan ti nagan ti Dios? Ken kasano a nainaig ti iyaay ti Pagarian iti pannakaibanag ti pagayatan ti Dios?

NO ANIA TI PAGARIAN TI DIOS

4. Ania ti Pagarian ti Dios, ken siasino ti Ari iti dayta?

⁴ Ti Pagarian ti Dios ket maysa a gobierno nga impasdek ni Jehova a Dios nga addaan iti Ari a pinilina. Siasino ti Ari iti Pagarian ti Dios? Ni Jesu-Kristo. Kas Ari, natantan-ok ni Jesus ngem kadagiti amin nga agtuturay a tao ken maawagan iti “Ari dagidiay agturay kas ar-ari ken Apo dagidiay agturay kas ap-appo.” (1 Timoteo 6:15) Ad-adu nga amang ti pagimbagan a maaramidanna ngem iti siasinoman nga agturay a tao, uray ti kasayaatan kadakuada.

5. Manipud sadino nga agturay ti Pagarian ti Dios, ken ania ti iturayanna?

⁵ Manipud sadino nga agturay ti Pagarian ti Dios? Bueno, sadino aya ti ayan ni Jesus? Kas naadalmon, natay ni Jesus iti kayo a pagtutuokan, sa napagungar. Di nagbayag kalpasanna, immuli sadi langit. (Aramid 2:33) No kasta, adda idiay langit ti Pagarian ti Dios. Isu a ‘nailangitan a pagarian’ ti awag ti Biblia iti dayta. (2 Timoteo 4:18) Nupay adda idiay langit ti Pagarian ti Dios, iturayanna ti daga.​—Apocalipsis 11:15.

6, 7. Apay a naisangsangayan nga Ari ni Jesus?

⁶ Apay a naisangsangayan nga Ari ni Jesus? Ti maysa a makagapu, saan a matay. Iti panangidiligna ken ni Jesus kadagiti ari ditoy daga, kuna ti Biblia a ni Jesus “daydiay kakaisuna nga agik-ikut iti imortalidad, nga agnanaed iti di maasitgan a lawag.” (1 Timoteo 6:16) Kayat a sawen daytoy nga agpaut dagiti amin a naimbag a banag nga aramiden ni Jesus. Ket adu nga agkakaimbag a banag ti aramidenna.

⁷ Usigem daytoy a padto ti Biblia maipapan ken ni Jesus: “Agtaengto kenkuana ti espiritu ni Jehova, ti espiritu ti kinasirib ken ti pannakaawat, ti espiritu ti pammatigmaan ken ti kinamannakabalin, ti espiritu ti pannakaammo ken ti panagbuteng ken Jehova; ket addaanto iti ragsak iti panagbuteng ken Jehova. Ket isu saanto a mangukom babaen iti aniaman a makita laeng dagiti matana, wenno uray mangtubngar sigun laeng iti banag a nangngeg dagiti lapayagna. Ket buyogen ti kinalinteg ukomennanto dagidiay nanumo, ket buyogen ti kinapalungdo mangipaayto iti pannubngar maigapu kadagidiay naemma iti daga.” (Isaias 11:2-4) Ipakita dagita a sasao a ni Jesus ket nalinteg ken naasi nga Ari a mangituray kadagiti tattao ditoy daga. Kayatmo kadi ti kasta nga agturay?

8. Siasino dagiti makipagturay ken ni Jesus?

⁸ Adtoy ti maysa pay a kinapudno maipapan iti Pagarian ti Dios: Saan nga agmaymaysa nga agturay ni Jesus. Adda dagiti kaduana nga agturay. Kas pagarigan, ni apostol Pablo kinunana ken ni Timoteo: “No agtultuloytayo nga agibtur, agturaytayo met a sangsangkamaysa kas ar-ari.” (2 Timoteo 2:12) Wen, da Pablo, Timoteo, ken dadduma pay a matalek a pinili ti Dios makipagturayda ken ni Jesus iti nailangitan a Pagarian. Mano ti addaan iti dayta a pribilehio?

9. Mano ti makipagturay ken ni Jesus, ken kaano a nangrugi ti panangpili ti Dios kadakuada?

⁹ Kas nadakamat iti Kapitulo 7 daytoy a libro, iti maysa a sirmata nakita ni apostol Juan “ti Kordero [ni Jesu-Kristo] nga agtaktakder iti Bantay Sion [ti saadna kas ari idiay langit], ket kaduana ti sangagasut uppat a pulo ket uppat a ribu nga addaan iti naganna ken iti nagan ni Amana a naisurat kadagiti mugingda.” Siasino dagitoy 144,000? Kuna kadatayo a mismo ni Juan: “Dagitoy isuda dagidiay agtultuloy a sumursurot iti Kordero iti uray sadino a papananna. Nagatang dagitoy manipud iti sangatauan kas umuna a bungbunga iti Dios ken iti Kordero.” (Apocalipsis 14:1, 4) Wen, dagitoy ket matalek a pasurot ni Jesu-Kristo a napili a makipagturay kenkuana idiay langit. Iti pannakapagungarda idiay langit kalpasan ti ipapatayda, ‘makipagturayda ken ni Jesus a kas ar-ari iti daga.’ (Apocalipsis 5:10) Manipud pay idi kaaldawan dagiti apostol a rinugian ti Dios ti agpili kadagiti matalek a Kristiano a mangkompleto iti bilang a 144,000.

10. Apay a naayat nga urnos ti pannakapili ni Jesus ken dagiti 144,000 a mangituray iti sangatauan?

¹⁰ Maysa a naayat unay nga urnos ti pannakapili ni Jesus ken dagiti 144,000 a mangituray iti sangatauan. Gapu ta nagbalin idi a tao ken napadasan ni Jesus ti nagsagaba, ammona ti kasasaad ti tao. Kinuna ni Pablo a ni Jesus ket ‘saan a maysa a saanna a mabalin ti makipagrikna kadagiti kinakapuytayo, no di ket maysa a nasuboken iti amin a bambanag kas kadatayo, ngem awanan basol.’ (Hebreo 4:15; 5:8) Dagiti kaduana nga agturay napadasanda met ti nagsagaba ken nagibtur kas tattao. Maysa pay, sinarangetda dagiti pagkapuyanda ken inibturanda ti amin a kita ti sakit. Awan duadua a maawatanda dagiti parikut a mapaspasaran dagiti tattao!

ANIA TI ARAMIDEN TI PAGARIAN TI DIOS?

11. Apay a kinuna ni Jesus a rumbeng nga ikararag dagiti adalanna a maaramid koma ti pagayatan ti Dios idiay langit?

¹¹ Idi imbaga ni Jesus a rumbeng nga ikararag dagiti adalanna ti iyaay ti Pagarian ti Dios, kinunana pay a rumbeng nga ikararagda a maaramid koma ti pagayatan ti Dios “kas sadi langit, kasta met iti daga.” Adda idiay langit ti Dios, ket dagiti matalek nga anghel kanayon nga ar-aramidenda ti pagayatanna sadiay. Ngem iti Kapitulo 3 daytoy a libro, naadaltayo nga adda maysa a dakes nga anghel a simmardeng a mangaramid iti pagayatan ti Dios ken pinagbasolna da Adan ken Eva. Iti Kapitulo 10, adunto pay ti maadaltayo no ania ti isursuro ti Biblia maipapan iti dayta a dakes nga anghel a maawagan iti Satanas a Diablo. Adda panawen a napalubosan nga agyan idiay langit ni Satanas ken dagiti demonio, wenno dagiti anghel nga espiritu a parsua a simmurot kenkuana. No kasta, idiay langit adda idi dagiti saan a mangar-aramid iti pagayatan ti Dios. Ngem nagbaliw ti kasasaad idi nangrugi nga agturay ti Pagarian ti Dios. Nakigubat ken ni Satanas ti kaisasaad nga Ari a ni Jesu-Kristo.​—Apocalipsis 12:7-9.

12. Ania a dua a napateg a pasamak ti nailadawan iti Apocalipsis 12:10?

¹² Maipapan iti napasamak, kastoy ti kuna ti naimpadtuan a sasao: “Nangngegko ti maysa a natbag a timek idiay langit a kunana: ‘Ita napasamaken ti pannakaisalakan ken ti pannakabalin ken ti pagarian ti Diostayo ken ti autoridad ni Kristona, agsipud ta naitapuaken ti manangakusar kadagiti kakabsattayo [ni Satanas], daydiay mangak-akusar kadakuada iti aldaw ken rabii iti sanguanan ti Diostayo!’” (Apocalipsis 12:10) Nasiputam kadi ti dua a nagpateg a pasamak a nailadawan iti dayta a bersikulo iti Biblia? Umuna, nangrugin nga agturay ti Pagarian ti Dios iti sidong ni Jesu-Kristo. Maikadua, napapanaw ni Satanas idiay langit ket naitapuak ditoy daga.

13. Ania ti resulta ti pannakapapanaw ni Satanas idiay langit?

¹³ Ania ti resulta dagita a dua a pasamak? Maipapan iti napasamak idiay langit, kastoy ti mabasatayo: “Gapu itoy agragsakkayo, dakayo a langlangit ken dakayo nga agnaed kadakuada!” (Apocalipsis 12:12) Wen, ita ta awanen idiay langit ni Satanas ken dagiti demoniona, agragragsak dagiti matalek nga anghel agsipud ta bin-igen a matalek ken ni Jehova a Dios ti adda idiay langit. Adda naan-anay, di masingsinga a talna ken panagkaykaysa sadiay. Maar-aramiden ti pagayatan ti Dios idiay langit.

14. Ania ti mapaspasamak manipud idi naitapuak ni Satanas ditoy daga?

¹⁴ Ngem komusta ngay ti daga? Kuna ti Biblia: “Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” (Apocalipsis 12:12) Makapungtot ni Satanas gapu ta napapanaw idiay langit ken bassit laengen ti natda a tiempona. Sipupungtot a mangrirriribuk ditoy daga. Adunto pay ti maammuantayo maipapan iti dayta a nariribuk a kasasaad iti sumaganad a kapitulo. Ngem gapu iti kasta a kasasaad, maisaludsodtayo, Kasano a maibanag ti Pagarian ti pagayatan ti Dios ditoy daga?

15. Ania ti pagayatan ti Dios iti daga?

¹⁵ Bueno, lagipem no ania ti pagayatan ti Dios iti daga. Naadalmo dayta iti Kapitulo 3. Idiay Eden, impakita ti Dios a pagayatanna nga agbalin a paraiso ti daga a napno kadagiti nalinteg ken saan a matay a tattao. Pinagbasol ni Satanas da Adan ken Eva, ket gapu iti dayta, naapektaran ti pannakaibanag ti pagayatan ti Dios iti daga ngem saan a nabaliwan dayta a pagayatanna. Panggep latta ni Jehova a “dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Ket ti Pagarian ti Dios ti mangibanag iti dayta. Kasano?

16, 17. Ania ti kuna ti Daniel 2:44 maipapan iti Pagarian ti Dios?

¹⁶ Usigem ti padto a masarakan iti Daniel 2:44, a pakabasaantayo iti kastoy: “Iti kaaldawan dagidiay nga ar-ari mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” Ania ti ibagbaga daytoy kadatayo maipapan iti Pagarian ti Dios?

¹⁷ Umuna, maipasdek ti Pagarian ti Dios “iti kaaldawan dagidiay nga ar-ari,” wenno bayat nga adda pay laeng dagiti sabali a pagarian. Maikadua, agpaut iti agnanayon dayta a Pagarian. Awan ti sabali a gobierno a makaparmek ken mangsukat iti dayta. Maikatlo, addanto mapasamak a gubat iti nagbaetan ti Pagarian ti Dios ken dagiti pagarian iti daytoy a lubong. Agballiginto ti Pagarian ti Dios. Daytanto laeng ti gobierno a mangituray iti sangatauan. Tagiragsakento dagiti tattao ti kasayaatan a turay.

18. Ania ti awag iti ultimo a gubat iti nagbaetan ti Pagarian ti Dios ken dagiti gobierno iti daytoy a lubong?

¹⁸ Adu ti ibagbaga ti Biblia maipapan iti dayta nga ultimo a gubat iti nagbaetan ti Pagarian ti Dios ken dagiti gobierno iti daytoy a lubong. Kas pagarigan, isursuro ti Biblia a bayat nga umad-adani ti panungpalan, dagiti dakes nga espiritu mangisaknapda kadagiti kinaulbod tapno allilawenda dagiti “ar-ari iti intero a mapagnaedan a daga.” Ania ti panggepda? “Tapno urnongenda ida [dagiti ari] a sangsangkamaysa iti gubat ti naindaklan nga aldaw ti Dios a Mannakabalin-amin.” Maurnongto dagiti ari ditoy daga “iti disso nga iti Hebreo maaw-awagan iti Har–Magedon.” (Apocalipsis 16:14, 16) Gapu iti nadakamat kadagita a dua a bersikulo, ti ultimo a dangadang, wenno gubat, iti nagbaetan dagiti gobierno ti tao ken ti Pagarian ti Dios ket maawagan iti Har–Magedon, wenno Armagedon.

19, 20. Apay a saan a maar-aramid ita ti pagayatan ti Dios ditoy daga?

¹⁹ Ania ti ibanag ti Pagarian ti Dios babaen ti Armagedon? Panunotem manen ti pagayatan ti Dios iti daga. Panggep ni Jehova a Dios a mapno ti daga kadagiti nalinteg ken perpekto a tattao nga agserserbi kenkuana iti Paraiso. Apay a saan a kasta ti mapaspasamak ita? Umuna, managbasoltayo, ket agsakit ken mataytayo. Ngem naadaltayo iti Kapitulo 5 a natay ni Jesus gapu kadatayo tapno mabalintayo ti agbiag nga agnanayon. Mabalin a malagipmo ti sasao a nailanad iti Ebanghelio ni Juan: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

²⁰ Ti maysa pay a parikut isu ti kaadu dagiti tattao nga agar-aramid iti dakes. Agulbod, agkusit, ken agaramidda iti imoralidad. Saanda a kayat nga aramiden ti pagayatan ti Dios. Inton dumteng ti Armagedon a gubat ti Dios, madadaelto dagiti managdakdakes. (Salmo 37:10) Ti sabali pay a makagapu no apay a saan a maar-aramid ita ti pagayatan ti Dios ditoy daga ket isu ti saan a panangparegta dagiti gobierno kadagiti tattao a mangaramid iti pagayatan ti Dios. Adu a gobierno ti awan gawayna, naulpit, wenno rinuker. Sipaprangka a kuna ti Biblia: “Ti tao dinominaranna ti tao iti pakadangrananna.”​—Eclesiastes 8:9.

21. Kasano nga ibanag ti Pagarian ti pagayatan ti Dios ditoy daga?

²¹ Kalpasan ti Armagedon, maysanto laeng a gobierno ti mangituray iti sangatauan, ti Pagarian ti Dios. Dayta a Pagarian ti mangibanag iti pagayatan ti Dios ken mangyeg kadagiti nagsayaat a kasasaad. Kas pagarigan, ikkatennanto ni Satanas ken dagiti demoniona. (Apocalipsis 20:1-3) Maipakatto ti bileg ti daton ni Jesus tapno saanton nga agsakit ken matay dagiti matalek a tattao. Imbes ketdi, agbiagdanto iti agnanayon iti sidong ti turay ti Pagarian. (Apocalipsis 22:1-3) Agbalinto a paraiso ti daga. No kasta, ti Pagarian ti mangibanag iti pagayatan ti Dios ditoy daga, ken santipikarenna ti nagan ti Dios. Ania ti kaipapanan daytoy? Kayatna a sawen nga iti sidong ti Pagarian ti Dios, amin a nabiag raemendanto ti nagan ni Jehova.

KAANO NGA AGTIGNAY TI PAGARIAN TI DIOS?

22. Apay nga ammotayo a saan a dimteng ti Pagarian ti Dios idi adda ditoy daga ni Jesus wenno kalpasan la unay ti panagungarna?

²² Idi insuro ni Jesus dagiti pasurotna nga ikararagda nga, “Umay koma ti pagariam,” nalawag a saan pay idi a dimteng ti Pagarian. Dimteng kadi idi immuli ni Jesus idiay langit? Saan, agsipud ta agpada a kinuna da Pedro ken Pablo a kalpasan ti panagungar ni Jesus, natungpal kenkuana ti padto iti Salmo 110:1: “Ti sao ni Jehova iti Apok ket: ‘Agtugawka iti makannawanko agingga nga ikabilko dagiti kabusormo a pagbatayan dagiti sakam.’” (Aramid 2:32-35; Hebreo 10:12, 13) Adda panawen ti panaguray.

23. (a) Kaano a nangrugi nga agturay ti Pagarian ti Dios? (b) Ania ti mausig iti sumaganad a kapitulo?

²³ Kasano kapaut? Idi maika-19 ken maika-20 a siglo, dagiti napasnek nga agad-adal iti Biblia in-inut a naawatanda nga agpatingga iti tawen 1914 ti panawen ti panaguray. (Maipapan iti daytoy a tawen, kitaem ti Apendise, iti artikulo a “1914​—Napateg a Tawen iti Padto ti Biblia.”) Dagiti pasamak ditoy lubong a nangrugi idi 1914 pasingkedanda nga umiso ti kuenta dagidi a napasnek nga agad-adal iti Biblia. Ipakita ti kaitungpalan dagiti padto iti Biblia nga idi 1914, nagbalinen nga Ari ni Kristo ken nangrugin nga agturay ti nailangitan a Pagarian ti Dios. No kasta, agbibiagtayon iti natda nga ‘ababa a tiempo’ ni Satanas. (Apocalipsis 12:12; Salmo 110:2) Masiguradotayo met nga iti saanen a mabayag, agtignayto ti Pagarian ti Dios tapno maaramid ti pagayatan ti Dios ditoy daga. Saan kadi a makaparagsak a damag daytoy? Mamatika kadi a pudno daytoy? Ti sumaganad a kapitulo ipakitana kenka a talaga a kasta ti isursuro ti Biblia.