Agannad Kadagiti Silo ti Diablo!

“[Lumapsut] manipud iti silo ti Diablo.”​—2 TIM. 2:26.

ANIA TI SUNGBATMO?

Ania ti nasayaat nga usigem no manangkritikarka iti sabsabali?

Kas ipakita ti napasamak kada Pilato ken Pedro, ania ti maadalmo maipapan iti panangsaranget iti buteng ken panangpilit ti sabsabali?

Ania ti aramidem tapno maliklikam ti nalabes a panangkondenar iti bagim?

1, 2. Aniada a palab-og ti Diablo ti usigentayo iti daytoy nga artikulo?

SISIIMEN ti Diablo dagiti adipen ni Jehova tapno siluanna ida. Saan a kanayon a mangpapatay ti panggepna, saan a kas iti mangnganup a mangpapatay iti dadakkel nga animal. Imbes ketdi, panggep ti Diablo a tiliwen a sibibiag ti biktimana ken usarenna dayta sigun iti kayatna.​—Basaen ti 2 Timoteo 2:24-26.

² Tapno matiliwna a sibibiag ti anupenna, agaramat ti mannilo iti maysa a kita ti silo. Paruarenna ti aglemlemmeng nga animal tapno masiluanna. Wenno agaramat iti di makita a palab-og tapno matiliwna ti di nasiput nga animal. Agar-aramat ti Diablo kadagiti umasping a silo tapno matiliwna a sibibiag dagiti adipen ti Dios. No ditay kayat ti masiluan, masapul nga alertotayo ken ipangagtayo dagiti pagilasinan iti adu a naipakat a silo wenno palab-og ni Satanas. Mausig iti daytoy nga artikulo no kasano a masalaknibantayo manipud iti tallo a palab-og ti Diablo a sibaballigin nga inaramatna: (1) di mamedmedan a panagsao, (2) buteng ken pannakapilit, ken (3) nalabes a panangkondenar iti bagi. Dua pay a kanayonan a palab-og wenno silo ni Satanas ti mausig iti sumaruno nga artikulo.

IDDEPEN TI APUY TI DI MAMEDMEDAN A PANAGSAO

3, 4. Ania ti resultana no ditay medmedan ti dilatayo? Mangted iti pagarigan.

³ Tapno mabuak dagiti animal iti paglemlemmenganda, uramen ti mangnganup ti maysa a paset ti bakir, sana kemmegen dagiti animal bayat nga aglibasda. No ar-arigen, mangpaspasged ti Diablo iti apuy iti kongregasion Kristiano. No agballigi, mayadayona dagiti kakabsat manipud iti dayta a natalged a lugar sana kemmegen ida. Kasano a mabalin a ditay madmadlaw nga agpapausartayo kenkuana ket makemmegnatayo?

⁴ Inyarig ni adalan a Santiago ti dila iti maysa nga apuy. (Basaen ti Santiago 3:6-8.) No ditay mamedmedan ti dilatayo, mabalin a mangpaspasgedtayo iti piguratibo nga apuy iti kongregasion. Ipapantayon a naipakaammo iti gimong a naaprobaran kas regular pioneer ti maysa a kabsat a babai. Kalpasan ti gimong, nagtungtongan ti dua nga agibumbunannag ti pakaammo. Maragsakan ti maysa ket imbagana a sapay koma ta agballigi ti baro a payunir. Ngem kueskuestionaran ti sabali a kabsat ti motibo ti nagpayunir ket ibagbagana a kayat laeng ti kabsat ti agbalin a prominente iti kongregasion. Siasino kadagitoy a dua ti kayatyo nga agbalin a gayyem? Nalaka laeng a maibaga no siasino kadakuada ti mangpaspasged iti apuy iti kongregasion babaen ti panagsaona.

5. Tapno maiddep ti apuy a resulta ti di mamedmedan a panagsao, ania ti nasayaat nga usigentayo?

⁵ Kasanotay a maiddep ti apuy a resulta ti di mamedmedan a panagsao? Kinuna ni Jesus: “Ti naruay iti puso sawen ti ngiwat.” (Mat. 12:34) Umuna ngarud a sukimatentayo ti pusotayo. Iwakwaksitayo met laeng kadi ti sakit ti nakem a mangrubrob iti makadadael a panagsao? Kas pagarigan, no madamagtayo a rumagragpat iti pribilehio ti maysa a kabsat a lalaki, agtalektayo kadi a nadalus ti motibona, wenno ipapantayo a pagimbaganna laeng ti pampanunotenna? No managsuspetsatayo, nasayaat no laglagipentayo a kinuestionaran met ti Diablo ti motibo ti matalek nga adipen ti Dios a ni Job. (Job 1:9-11) Imbes a pagsuspetsaantayo ti kabsat, nasayaat nga usigentayo no apay a kasta ti riknatayo. Talaga kadi a nainkalintegan ti kasta a reaksiontayo? Wenno nasabidongan ti pusotayo iti di naayat nga espiritu nga agraraira kadagitoy maudi nga al-aldaw?​—2 Tim. 3:1-4.

6, 7. (a) Ania ti dadduma a rason no apay a kritkritikarentayo ti sabsabali? (b) Ania ti rumbeng a reaksiontayo no laisendatayo ti sabsabali?

⁶ Usigentayo ti dadduma pay a rason no apay a kritkritikarentayo ti sabsabali. Mabalin a kayattayo nga ipadlaw dagiti maar-aramidantayo. Arigna padpadasentayo ti agbalin a nangatngato babaen ti panangipababatayo iti sabsabali. Wenno mabalin a padpadasentayo nga irasonan ti di umiso nga inaramidtayo. Ti man makagapu ket kinapasindayag, apal, wenno kurang a kompiansa iti bagi, agbanag dayta iti pagdaksan.

⁷ Mabalin nga ipagaruptayo a nainkalintegan ti panangkritikartayo iti maysa a kabsat ta nalabit maysatayo idi a biktima ti nadarasudos a panagsaona. No kasta ti napasamak, saan a solusion ti panagibales. Mangrubrob laeng dayta iti apuy ken serbianna ti pagayatan ti Diablo, saan a ti pagayatan ti Dios. (2 Tim. 2:26) Nasayaat a tuladentayo ni Jesus iti daytoy a banag. Dina sinubadan ti pananglais kenkuana ti sabsabali. Imbes ketdi, “intultuloyna nga intalek ti bagina iti daydiay mangukom a sililinteg.” (1 Ped. 2:21-23) Nagtalek ni Jesus a tamingen ni Jehova ti bambanag iti bukodna a pamay-an ken iti umiso a tiempo. Kasta koma met ti panagtalektayo iti Dios. No usarentayo ti panagsaotayo a mangpabileg iti sabsabali, tumultulongtayo a mangtaginayon iti “mamagkaykaysa a singgalut ti talna” iti kongregasiontayo.​—Basaen ti Efeso 4:1-3.

LIKLIKAN TI SILO TI BUTENG KEN PANNAKAPILIT

8, 9. Apay a kinondenar ni Pilato ni Jesus?

⁸ Saanen a nawaya nga aggaraw ti nasiluan nga animal. Umasping iti dayta, ti tao a tumulok iti buteng ken panangpilit ti sabsabali palpalubosanna nga adda sabali a mangkontrol kenkuana. (Basaen ti Proverbio 29:25.) Usigentayo ti napasamak iti dua a nagduma a lallaki a timmulok iti buteng ken panangpilit ti sabsabali, ket kitaentayo no ania ti maadaltayo iti kapadasanda.

⁹ Ammo ti Romano a gobernador a ni Poncio Pilato nga awan basol ni Jesus ken nalawag a dina kayat a dangran. Kinapudnona, imbaga ni Pilato nga “awan naaramidan [ni Jesus] a maikari iti ipapatay.” Ngem kaskasdi a kinondenarna a matay ni Jesus. Apay? Agsipud ta timmulok ni Pilato iti panangpilit ti bunggoy. (Luc. 23:15, 21-25) “No luk-atam daytoy a tao, saannaka a gayyem ni Cesar,” impukkaw dagiti bumusbusor a tattao tapno maipapilitda ti kayatda. (Juan 19:12) Mabalin a nagbuteng ni Pilato a mapukawna ti posisionna​—wenno ti biagna pay ketdi​— no dasiganna ni Kristo. Isu a timmulok iti pagayatan ti Diablo.

10. Apay nga inlibak ni Pedro ni Kristo?

¹⁰ Maysa ni apostol Pedro kadagiti kasingedan a kadua ni Jesus. Indeklarana iti publiko a ni Jesus ti Mesias. (Mat. 16:16) Nagtalinaed a nasungdo ni Pedro uray idi saan a natarusan ti dadduma nga adalan ti kaipapanan ti kinuna ni Jesus ken binaybay-anda. (Juan 6:66-69) Ken idi immay dagiti kabusor a mangaresto ken Jesus, nagaramat ni Pedro iti kampilan tapno salaknibanna ti Apona. (Juan 18:10, 11) Ngem idi agangay, nalapunos ni Pedro iti buteng ket inlibakna nga am-ammona ni Jesu-Kristo. Iti apagdarikmat, nasiluan ti apostol iti butengna iti tao ket napukawna ti turedna.​—Mat. 26:74, 75.

11. Aniada a dakes nga impluensia ti masapul a labanantayo?

¹¹ Kas Kristiano, ditay koma tumulok no ti dadduma pilitendatayo nga agaramid iti bambanag a mamagladingit iti Dios. Mabalin a pilitennatayo ti boss-tayo wenno ti dadduma pay nga agkusit wenno gargariendatayo nga agaramid iti seksual nga imoralidad. Mabalin a dagiti estudiante ket piliten dagiti kaeskuelaanda nga agkusit iti eksaminasion, agbuya iti pornograpia, agsigarilio, agdroga, agbartek, wenno agaramid iti seksual nga imoralidad. Ania ngarud ti makatulong kadatayo a mangliklik iti silo ti buteng ken pannakapilit nga agaramid iti di makaay-ayo ken Jehova?

12. Ania dagiti maadaltayo kada Pilato ken Pedro?

¹² Kitaentayo no ania ti maadaltayo kada Pilato ken Pedro. Bassit ti pannakaammo ni Pilato maipapan ken Kristo. Nupay kasta, ammona nga inosente ni Jesus ken saan a gagangay a tao. Ngem saan a napakumbaba ni Pilato ken awan panagayatna iti pudno a Dios. Silalaka a natiliw a sibibiag iti silo ti Diablo. Iti sabali a bangir, addaan ni Pedro iti umiso a pannakaammo ken ay-ayatenna ti Dios. Sakbay a naaresto ni Jesus, impasindayag ni Pedro: “Uray pay no maitibkol amin dagiti dadduma, ngem saanto kaniak.” (Mar. 14:29) Mabalin koma a nagsagana ti apostol iti dumteng a pannubok a kas iti inaramid ti salmista a nagtalek iti Dios ken nangikanta: “Ni Jehova adda iti dasigko; saanakto nga agbuteng. Ania ti maaramidan kaniak ti naindagaan a tao?” (Sal. 118:6) Iti maudi a rabii ti panagbiagna ditoy daga, intugot ni Jesus ni Pedro ken ti dua pay nga apostol ket napanda iti minuyongan ti Getsemani. Saan a nagtalinaed a naridam ni Pedro ken ti dadduma pay nga apostol isu a nakaturogda. Riniing ida ni Jesus ket kinunana: “Lallaki, agtultuloykayo nga agbantay ken agkararag, tapno saankayo a dumteng iti pannakasulisog. Ti espiritu, siempre, sigagagar, ngem ti lasag nakapuy.” (Mar. 14:38) Ngem nakaturog manen ni Pedro ket timmulok idi agangay iti buteng ken pannakapilit.

13. Kasanotayo a masaranget ti panangpilit nga agaramid iti di umiso?

¹³ Adda pay napateg a maadaltayo iti napasamak kada Pilato ken Pedro: Tapno masarangettayo ti panangpilit, kasapulan ti umiso a pannakaammo, kinapakumbaba, kinaemma, panagayat ken Jehova a Dios, ken panagbuteng Kenkuana, saan nga iti tao. No naibangon ti pammatitayo iti umiso a pannakaammo, situtured ken sikokompiansa a maibagatayo ti patpatientayo iti sabsabali. Dayta ti tumulong kadatayo a mangsaranget iti panangpilit ti sabsabali ken mangparmek iti panagbuteng iti tao. Ditay met koma agtalek unay iti bagbagitayo. Imbes ketdi, sipapakumbaba a bigbigentayo a kasapulantayo ti pannakabalin ti Dios tapno masarangettayo ti panangpilit. Masapul nga ikararagtayo ti espiritu ni Jehova ken bay-antayo a ti ayattayo kenkuana ti mangtignay kadatayo a mangitandudo iti naganna ken kadagiti pagalagadanna. Kanayonanna, masapul a saganaantayo dagiti situasion a posible a pangpilitan ti sabsabali kadatayo. Kas pagarigan, makatulong ti panagkararag ken panagsagana tapno di tumulok dagiti annaktayo no piliten ida dagiti kapatadanda nga agaramid iti di umiso.​—2 Cor. 13:7.a

LIKLIKAN TI PALAB-OG A MANGIDAGEL​—NALABES A PANANGKONDENAR ITI BAGI

14. Maipapan kadagiti napalabas a basoltayo, ania ti kayat ti Diablo a panunotentayo?

¹⁴ No dadduma, ti palab-og ket maysa a nadagsen a kayo wenno bato a naibitin iti dalan a masansan a pagnaan ti animal. No madalapus ti animal ti naipakat a linas, agtupak ti kayo wenno bato ket maaddagan ti biktima. Ti nalabes a panangkondenar iti bagi ket mayarig iti kasta a nadagsen ken mangidagel nga awit. Mabalin a mariknatayo a ‘mailupitlupittayo iti napalalo’ no pampanunotentayo ti napalabas a basoltayo. (Basaen ti Salmo 38:3-5, 8.) Kayat ni Satanas a panunotentayo a dinatay mapakawan ti naasi a Dios a ni Jehova ken saantayo a maragpat dagiti kalikagumanna.

15, 16. Kasano a maliklikam ti palab-og a nalabes a panangkondenar iti bagi?

¹⁵ Kasanom a maliklikan ti palab-og a mangidagel? No nakaaramidka iti nadagsen a basol, agtignayka a dagus a mangpasubli iti relasionmo ken Jehova. Makisaritaka kadagiti panglakayen ket agpatulongka kadakuada. (Sant. 5:14-16) Aramidem ti amin a kabaelam a mangilinteg iti kamalim. (2 Cor. 7:11) Dika maupay no maipaayanka iti disiplina. Pammaneknek dayta nga ay-ayatennaka ni Jehova. (Heb. 12:6) Ikagumaam a saanen a maulit ti bambanag a nangituggod iti panagbasolmo. Kalpasan ti panagbabawi ken panagbalbaliwmo, agtalekka a dagiti basolmo ket kabaelan nga abbongan ti daton a subbot ni Jesu-Kristo.​—1 Juan 4:9, 14.

¹⁶ Adda dagiti indibidual a mangkonkondenar pay laeng iti bagida uray no napakawanen ti basolda. No kasta ti marikriknam, laglagipem a pinakawan ni Jehova ni Pedro ken ti dadduma pay nga apostol uray no binaybay-anda ti dungdungnguenna nga Anak a ni Jesus idi kasapulanna unay ida. Pinakawan ni Jehova ti lalaki a nailaksid iti kongregasion ti Corinto gapu iti nakaro nga imoralidad ngem nagbabawi met laeng idi agangay. (1 Cor. 5:1-5; 2 Cor. 2:6-8) Dakamaten ti Sao ti Dios ti sumagmamano a nakaaramid iti nakaro a basol ngem nagbabawida ken pinakawan ida ti Dios.​—2 Cron. 33:2, 10-13; 1 Cor. 6:9-11.

17. Ania ti maaramidan kadatayo ti subbot?

¹⁷ Pakawanen ken lipaten ni Jehova ti napalabas a basolmo no pudpudno nga agbabawika ken awatem ti kaasina. Dimo koma panunoten a dagiti basolmo ket saan a kabaelan nga abbongan ti daton a subbot ni Jesus. No kasta ti pampanunotem, biktimanaka ti maysa kadagiti palab-og ni Satanas. Laglagipem a kabaelan ti subbot nga abbongan dagiti basol dagidiay agbabbabawi nga indibidual. (Prov. 24:16) Ti panamati iti subbot maikkatna ti nadagsen nga awit a nalabes a panangkondenar iti bagi. Maikkannaka met iti pigsa nga agserbi iti Dios buyogen ti isuamin a puso, panunot, ken kararuam.​—Mat. 22:37.

SAANTAYO NGA IGNORANTE KADAGITI GAKAT NI SATANAS

18. Kasanotayo a maliklikan dagiti silo ti Diablo?

¹⁸ Awan bibiang ni Satanas no ania a palab-og ti pakasiluantayo. Ti napateg kenkuana ket matiliwnatayo. Gapu ta saantay nga ignorante kadagiti gakat ni Satanas, mabalintayo a liklikan ti pananggundawayna. (2 Cor. 2:10, 11) Saannatayto a matiliw kadagiti silo wenno palab-ogna no ikararagtayo a maaddaantayo iti sirib a mangsango kadagiti pannubok. “No ti asinoman kadakayo agkurang iti sirib,” kuna ni Santiago, “agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi; ket maitedto dayta kenkuana.” (Sant. 1:5) Masapul nga agtignaytayo maitunos iti karkararagtayo babaen ti regular a panagadal ken panangyaplikar iti Sao ti Dios. Dagiti naibatay-Biblia a publikasion nga ipapaay ti klase matalek ken masirib nga adipen ti tumulong kadatayo a mangilasin ken mangliklik kadagiti palab-og ti Diablo.

19, 20. Apay a masapul a guraentayo ti dakes?

¹⁹ Matignaytayo nga agaramid iti naimbag no agkararagtayo ken adalentayo ti Biblia. Ngem nasken met a sursuruentayo a guraen ti dakes. (Sal. 97:10) Maliklikantayo ti managimbubukodan a tarigagay no utobentayo dagiti dakes a pagbanagan dayta. (Sant. 1:14, 15) No guraentayo ti dakes ken pudpudno nga ay-ayatentayo ti naimbag, agbalin a makarimon kadatayo ti appan nga ikabkabil ni Satanas kadagiti palab-ogna, ket saantayto a magargari kadagita.

²⁰ Anian a yamantayo ta tultulongannatayo ti Dios tapno dinatay a magundawayan ni Satanas! Ispalennatayo ni Jehova iti “daydiay nadangkes” babaen ti espirituna, ti Saona, ken ti organisasionna. (Mat. 6:13) Iti sumaruno nga artikulo, maammuantayo no kasano a liklikan ti dua pay a palab-og nga epektibo nga ar-aramaten ti Diablo tapno matiliwna a sibibiag dagiti adipen ti Dios.

Agtakder a Sititibker ken Liklikan Dagiti Palab-og ni Satanas!

“Agtakder a sititibker maibusor kadagiti pangallilaw a pamuspusan ti Diablo.”​—EFE. 6:11.

ANIA TI SUNGBATMO?

Kasano a maliklikan ti maysa nga adipen ni Jehova ti pannakatnag iti silo ti materialismo?

Ania ti makatulong iti naasawaan a Kristiano tapno saan a matnag iti palab-og ti pannakikamalala?

Apay a kombinsidoka a pagimbagam no liklikam ti silo ti materialismo ken seksual nga imoralidad?

1, 2. (a) Apay nga awan asi ni Satanas kadagiti napulotan ken “sabsabali a karnero”? (b) Ania dagiti palab-og ni Satanas a mailawlawag iti daytoy nga artikulo?

AWAN asi ti Diablo kadagiti tattao, nangruna kadagidiay agserserbi ken Jehova. Kinapudnona, gubgubaten ni Satanas dagiti napulotan a natda. (Apoc. 12:17) Dagita a nasungdo a Kristiano ti mangidadaulo iti pannakaikasaba ti Pagarian iti kaaldawantayo ken mangibutbutaktak a ni Satanas ti agturay daytoy a lubong. Awan met ayat ti Diablo iti “sabsabali a karnero,” a mangsupsuporta kadagiti napulotan ken mangnamnama nga agbiag nga agnanayon​—ti namnama nga awanen ken Satanas. (Juan 10:16) Di ngarud pakasdaawan nga isu ket agpupungtot! Nailangitan man wenno naindagaan ti namnamatayo, saan a maseknan ni Satanas iti pagimbagantayo. Kayatnatay a biktimaen.​—1 Ped. 5:8.

² Tapno mabiktimanatayo ni Satanas, nangaramid iti nadumaduma a palab-og, wenno silo. Yantangay “binulsekna ti pampanunot” dagiti di manamati, saanda nga awaten ti naimbag a damag ken dida makita dagitoy a palab-og. Ngem kabaelan met ti Diablo a siluan ti dadduma a nangawat iti mensahe ti Pagarian. (2 Cor. 4:3, 4) Impakita ti napalabas nga artikulo no kasanotay a liklikan ti tallo a palab-og ni Satanas: (1) di mamedmedan a panagsao, (2) buteng ken panangpilit ti sabsabali, ken (3) nalabes a panangkondenar iti bagi. Usigentay ita no kasano a makapagtakdertayo a sititibker maibusor iti dua a sabali pay a palab-og wenno silo ni Satanas​—ti materialismo ken sulisog a makikamalala.

MATERIALISMO​—SILO A MANGBEKKEL

3, 4. Kasano a dagiti pakaringgoran iti daytoy a sistema ti bambanag ket mangituggod iti materialismo?

³ Iti maysa kadagiti ilustrasion ni Jesus, dinakamatna dagiti bin-i a naimula iti kasiitan. Imbagana a mabalin nga ipangag ti maysa a tao ti sao, “ngem ti pakaringgoran daytoy a sistema ti bambanag ken ti makaallilaw a pannakabalin ti kinabaknang leppesenda ti sao, ket isu agbalin a di nabunga.” (Mat. 13:22) Wen, maysa ti materialismo kadagiti silo nga ar-aramaten ti kabusortayo a ni Satanas.

⁴ Adda dua a nagtipon a banag a mabalin a mangleppes iti sao. Ti maysa isu ti “pakaringgoran daytoy a sistema ti bambanag.” Kadagitoy “napeggad a tiempo a narigat a pakilangenan,” adu ti mabalin a pakaringgorantayo. (2 Tim. 3:1) Gapu iti nangina a gagatangen ken kaawan ti trabaho, mabalin a marigatanka nga agbirok iti pagbiagmo. Mabalin met a maringgoranka iti masanguanan ket maisaludsodmo, ‘Addanto ngata umdas a pagbiagko inton agretiroak?’ Gapu iti kasta a pakaringgoran, naituggod ti dadduma nga agsapul iti kinabaknang, a pampanunotenda a kuarta ti makaipaay iti natalged a masakbayan.

5. Kasano a makaallilaw ti “pannakabalin ti kinabaknang”?

⁵ Dinakamat ni Jesus ti sabali pay a makagapu​—“ti makaallilaw a pannakabalin ti kinabaknang.” Dayta agraman dagiti pakaringgoran mabalin a leppesenda ti sao. Bigbigen ti Biblia a “ti kuarta agpaay a salaknib.” (Ecl. 7:12) Ngem di nainsiriban ti panagsapul iti kinabaknang. Napaneknekan ti adu a bayat nga agregreggetda a bumaknang, ad-adda met a masiluanda iti materialismo. Adda pay ketdi dagiti nagbalin nga ad-adipen ti kinabaknang.​—Mat. 6:24.

6, 7. (a) Kasano nga agbalin a silo ti materialismo iti pagtrabahuan? (b) Ania koma ti masapul nga ikabilangan ti maysa a Kristiano no makiddaw nga ag-overtime?

⁶ Mabalin a di mapupuotan a tumanor ti tarigagay a bumaknang. Kas pagarigan, mabalin nga asitgannaka ti boss-mo ket kunaenna: “Adda nasayaat nga ibagak kenka! Nangabak ti kompaniatayo iti dakkel a kontrata. Masapul nga ag-overtime-ka iti sumagmamano a bulan. Ngem dika agdanag ta dakdakkel met ti sueldom.” Ania ti aramidem no kasta ti maibaga kenka? Siempre, pagrebbengam nga ipaay ti material a kasapulan ti pamiliam, ngem saan la a dayta ti responsabilidadmo. (1 Tim. 5:8) Adda pay dadduma a banag a rumbeng nga ikabilangam. Mano nga oras ti busbosem nga ag-overtime? Saanto ngata nga agawen ti sekular a trabahom ti tiempom para kadagiti naespirituan nga aktibidad, kas iti pannakigimong ken iti Panagdaydayaw ti Pamilia?

⁷ Ania ti napatpateg kenka, ti ad-adu a masapulam iti panag-overtime wenno ti espiritualidadmo? Ti kadi gagarmo nga agbirok iti ad-adu a kuarta ti makagapu a saanmo a mayun-una dagiti interes ti Pagarian? Makitam kadi ti epekto ti materialismo no baybay-am ti espiritualidadmo ken ti pamiliam? No kasta ti mapaspasamak kenka, kasano a makapagtakderka a sititibker tapno saannaka a leppesen wenno bekkelen ti materialismo?​—Basaen ti 1 Timoteo 6:9, 10.

8. Aniada a Nainkasuratan a pagarigan ti makatulong tapno mausigtayo ti panagbiagtayo?

⁸ Tapno saannaka a bekkelen ti materialismo, nasayaat no pasaray usigem ti panagbiagmo. Dimo koma tultuladen ni Esau a nangumsi iti naespirituan a bambanag! (Gen. 25:34; Heb. 12:16) Ken sigurado a dimo met kayat a tuladen ti nabaknang a lalaki a nangibagaan ni Jesus nga ilakona dagiti sanikuana, itedna dagita kadagiti napanglaw, sa sumurot ken Jesus. Imbes a nangipangag, “pimmanaw a sileleddaang, ta agik-ikut idi iti adu a sanikua.” (Mat. 19:21, 22) Nasiluan iti kinabaknang ket sinayangna ti dakkel a pribilehio​—ti panagbalin a pasurot ti katan-okan pay laeng a tao a nagbiag! Agannadka amangan no saysayangem ti pribilehiom kas adalan ni Jesu-Kristo.

9, 10. Sigun iti Kasuratan, ania koma ti panangmatmatmo iti material a bambanag?

⁹ Tapno saanka unay a madanagan iti material a bambanag, ipangagmo ti balakad ni Jesus: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo.”​—Mat. 6:31, 32; Luc. 21:34, 35.

¹⁰ Imbes nga agpabiktima iti makaallilaw a pannakabalin ti kinabaknang, ikagumaam ketdi a tuladen ti panangmatmat ti mannurat ti Biblia a ni Agur, a nagkuna: “Dimo ipalubos nga [agbalinak] a napanglaw wenno baknang. Ti laeng umanay a taraonko ti itedmo.” (Prov. 30:8, Ti Baro a Naimbag a Damag Biblia) Nalawag a naawatan ni Agur a makaipaay ti kuarta iti proteksion ken mabalin a mangallilaw ti kinabaknang. Bigbigem koma a mabalin a madadael ti espiritualidadmo gapu kadagiti pakaringgoran daytoy a sistema ti bambanag ken iti makaallilaw a pannakabalin ti kinabaknang. Ti nalabes a panagdanag iti material a bambanag mabalin nga ibusenna ti tiempo ken pigsam, ken pukawenna ti gagarmo a mangyun-una kadagiti interes ti Pagarian. Gapuna, determinadoka koma a mangliklik iti materialismo a silo ni Satanas!​—Basaen ti Hebreo 13:5.

PANNAKIKAMALALA ​—NAILEMMENG NGA ABUT

11, 12. Kasano a mabalin a makaaramid iti pannakikamalala ti maysa a Kristiano iti lugar ti pagtrabahuan?

¹¹ Dagiti mangnganup nga agtiliw iti napigsa nga animal mabalin nga agkalida iti abut iti masansan a pagnaan ti animal. Masansan a naparabawan dayta iti babassit a kayo ken daga. Umasping iti dayta ti maysa kadagiti kaballigian a pannulisog ni Satanas​—ti imoralidad. (Prov. 22:14; 23:27) Adun a Kristiano ti natnag iti dayta nga abut gapu ta tinagtagilag-anda dagiti situasion a mangituggod iti dayta. Dadduma a naasawaan a Kristiano ti nakaaramid iti imoralidad ta naaddaanda iti di umiso a romantiko a relasion iti saanda nga asawa.

¹² Mabalin a mangrugi iti pagtrabahuan ti kasta a romantiko a relasion. Kinapudnona, ipakita ti maysa a panagadal a nasurok a kagudua kadagiti nakikamalala a babbai ken gistay 75% kadagiti nakikamalala a lallaki ti nakirelasion iti katrabahuanda. Iti pagtrabahuam, talaga kadi a saanmo a maliklikan ti makilangen kadagiti dimo kasekso? No kasta, kasano ti pannakilangenmo kadakuada? Adda kadi inkeddengmo a limitasion tapno maliklikam ti romantiko a pannakirelasion iti katrabahuam? Kas pagarigan, kalpasan ti masansan a pannakitungtong ti maysa a Kristiano a babai iti maysa a lalaki a katrabahona, mabalin a suminged kenkuana agingga a mayebkasna payen ti problemada ken lakayna. Iti met sabali a situasion, gapu ta nasayaat ti ipakpakita ti maysa a katrabaho a babai, mabalin nga irason ti maysa a Kristiano a lalaki: “Magustuanna dagiti opinionko ken talaga a dumngeg no agsasaoak, ken ap-apresiarenna ti magapgapuanak. Kasta koma met ni baketko!” Makitayo kadi no kasano a mabalin nga agturong dagita a situasion iti pannakikamalala?

13. Kasano a mabalin a tumanor iti uneg ti kongregasion ti di umiso a romantiko a relasion?

¹³ Mabalin met a tumaud ti di umiso a romantiko a relasion iti uneg ti kongregasion. Usigem daytoy a pudno a pasamak. Ni Daniel ken ni baketna a Saraha ket regular pioneer. Maysa ni Daniel a panglakayen, a sigun kenkuana, di agkedked iti aniaman a pribilehio iti kongregasion. Adda lima a babbaro nga iyad-adalanna iti Biblia, ket tallo kadagita ti nabautisaranen. Agkasapulan iti tulong dagitoy a kabbaro a nabautisaran. No okupado ni Daniel kadagiti nateokratikuan nga annongenna, ni Sarah ti tumulong kadakuada. Idi agangay, kasapulan dagitoy a babbaro ti emosional a suporta ket ni Sarah ti kanayon a mangandingay kadakuada. Agkasapulan met ni Sarah iti atension, ket dagiti sigud nga iyad-adalan ni Daniel ti nangipaay iti dayta. Nagbalin daytoy kas napeggad a palab-og. “Kalpasan ti sumagmamano a bulan nga itutulong ni baketko, isuna metten ti agkasapulan iti naespirituan ken emosional a saranay,” kuna ni Daniel. “Daytoy agraman ti diak pannakaas-asikaso ken baketko ti nangituggod iti pannakikamalalana iti maysa kadagiti sigud nga iyad-adalak. Diak napupuotan a nakapuy gayamen ti espiritualidadna gapu ta okupadoak unay iti amin a pribilehiok.” Kasanom a maliklikan ti kasta a nasaem a kapadasan?

14, 15. Ania dagiti makatulong iti assawa a Kristiano tapno saanda a matnag iti palab-og ti pannakikamalala?

¹⁴ Tapno maliklikam ti pannakikamalala, laglagipem ti kaipapanan ti tulagan ti panagasawa. Kinuna ni Jesus: “Ti pinagsinnangol ti Dios saan koma a pagsinaen ti tao.” (Mat. 19:6) Saanmo koma a panunoten a napatpateg dagiti nateokratikuan a pribilehiom ngem iti asawam. Silalagipka met koma a no masansan a panawam ti asawam para iti di unay napateg nga aktibidad, mabalin a kumapuy ti relasionyo ket mangituggod dayta iti sulisog a makikamalala.

¹⁵ Ngem no maysaka a panglakayen, kasanom a maipaay ti kasapulan ti arban? Insurat ni apostol Pedro: “Ipastoranyo ti arban ti Dios nga adda iti aywanyo, saan a mapilpilit, no di ket situtulok; saan met nga iti panagayat iti nakusit a gunggona, no di ket sigagagar.” (1 Ped. 5:2) Siempre saanmo koma a baybay-an dagiti miembro ti kongregasion nga adda iti aywanmo. Ngem, saanmo koma nga ipalubos a maliwayam ti responsabilidadmo kas asawa gapu iti annongem kas pastor. Awan serserbina ken napeggad pay ketdi no usarem ti amin a panawenmo iti panangtaraon iti kongregasion ngem mabaybay-am met nga “agbisin” ni baketmo. Kinuna ni Daniel, “Saan a nasayaat nga okupadoka unay kadagiti pribilehiom iti kongregasion no mabaybay-am met ti pamiliam.”

16, 17. (a) Ania ti nasayaat nga aramiden ti assawa a Kristiano tapno maipakitada a dida kayat ti maaddaan iti romantiko a relasion iti asinoman a katrabahuanda? (b) Mangted iti pagarigan iti naipablaaken a material a makatulong kadagiti Kristiano a mangliklik iti pannakikamalala.

¹⁶ Adu a nagsasayaat a balakad ti nagparangen kadagiti ruar ti Pagwanawanan ken Agriingkayo! a makatulong iti assawa a Kristiano tapno saanda a matnag iti palab-og ti pannakikamalala. Kas pagarigan, kastoy ti ibalakad ti Pagwanawanan a Setiembre 15, 2006: “Iti pagtrabahuan ken iti sadinoman, agannadka kadagiti situasion a mabalin a mamagsinged kenka iti saanmo nga asawa. Kas pagarigan, irubrubom ti bagim iti sulisog no mangbusboska iti kanayonan nga oras nga agtrabaho a kaduam ti kasungani a sekso. Kas maysa a naasawaan, nasken a nalawag nga ibagam ken ipakitam babaen ti tigtignaymo nga awan ti panggepmo a makirelasion iti saanmo nga asawa. Kas maysa a mangsalsalimetmet iti nadiosan a debosion, sigurado a dimo kayat ti mangala iti atension babaen ti panagalembong wenno babaen ti saan a naemma a panagkawkawes ken panaglanglanga. . . . No adda nakadispley a ladawan ti asawam ken dagiti annakmo iti lugar a pagtartrabahuam, agserbi dayta a pammalagip kenka ken kadagiti dadduma nga addan obligasionmo. Determinadoka koma a di pulos mangiparegta​—wenno uray mangpanuynoy man laeng​—iti romantiko a pananggargari ti sabali.”

¹⁷ Ti artikulo iti Agriingkayo! nga Abril 2009 a napauluan iti “Kinamatalek iti Asawa​—Ania a Talaga ti Kaipapananna?” ket namakdaar iti peggad ti seksual a panagpantasia iti saanmo nga asawa. Kinuna pay dayta nga artikulo a dakdakkel ti posibilidad a makikamalala ti maysa nga agar-arapaap a makidenna. (Sant. 1:14, 15) No addaankan iti asawa, nainsiriban no pasaray usigenyo a dua ti kasta nga impormasion. Ni Jehova a mismo ti nangyurnos iti panagasawa, isu a sagrado a banag dayta. No iwayaanyo ti agtungtong nga agassawa, ipakpakitayo a raraemenyo ti sagrado a bambanag.​—Gen. 2:21-24.

18, 19. (a) Ania dagiti epekto ti pannakikamalala? (b) Ania ti nasayaat nga ibunga ti kinamatalek iti asawa?

¹⁸ No masulisogka a makirelasion iti saanmo nga asawa, utobem ti makadadael a pagbanagan ti pannakiabig ken pannakikamalala. (Prov. 7:22, 23; Gal. 6:7) Dagidiay makikamalala wenno makiabig pagladladingitenda ni Jehova ken saksaktanda ti asawada ken ti bagbagida. (Basaen ti Malakias 2:13, 14.) Iti sabali a bangir, mennamennaem dagiti nasayaat nga ibunga ti panagtalinaed a nadalus iti moral. Saanmo laeng a segseggaan ti agbiag nga agnanayon no di ket addaanka met iti kasayaatan a biag ita, agraman ti nadalus a konsiensia.​—Basaen ti Proverbio 3:1, 2.

¹⁹ Inkanta ti salmista: “Ti naruay a talna kukua dagidiay mangay-ayat iti linteg [ti Dios], ket awan ti pakaitibkolanda.” (Sal. 119:165) Ayatem ngarud ti kinapudno, ken ‘itultuloymo ti agaluad a siiinget a ti pannagnam saan a kas kadagiti nakuneng no di ket kas kadagiti masirib a tattao’ kadagitoy a napeggad a tiempo. (Efe. 5:15, 16) Dagiti desdes a pagpagnaantayo ket minurumoran ni Satanas iti palab-og a mangsilo kadagiti pudno nga agdaydayaw iti Dios. Ngem addaantayo iti kompleto a kabal a mangsalaknib kadatayo. Impaay ni Jehova dagiti kasapulantayo tapno ‘makapagtakdertayo a sititibker’ ken ‘madepdeptayo ti amin a sumsumged a gayang daydiay nadangkes’!​—Efe. 6:11, 16.