Mabalinmo Kadi ti Umallatiw iti Macedonia?

ITI sangladan a siudad ti Troas iti Asia Menor, adda nasirmata ni apostol Pablo. Impakaasi kenkuana ti maysa a taga-Macedonia: “Umallatiwka iti Macedonia ket tulongannakami.” Apaman a nasirmata dayta ni Pablo, naawatanna agraman dagiti kakaduana nga ‘inayaban ida ti Dios tapno ideklarada ti naimbag a damag’ kadagiti taga-Macedonia. Ania ti resultana? Iti Filipos a kangrunaan a siudad ti Macedonia, nagbalin a manamati ni Lidia ken ti sangakabbalayanna. Kasta ti inaramid ti dadduma pay nga umili iti dayta a probinsia ti Roma.​—Ara. 16:9-15.

Kasta met laeng ti kinaregta dagiti Saksi ni Jehova ita. Iti bukodda a gastos, adu ti situtulok nga immakar kadagiti lugar nga agkasapulan iti ad-adu nga agibumbunannag iti Pagarian. Kas pagarigan, ti taga-Canada a ni Lisa kayatna nga ipangpangruna ti ministeriona isu nga immakar idiay Kenya. Uray da Trevor ken Emily a taga-Canada immakarda met idiay Malawi tapno mapalawada ti ministerioda. Da Paul ken Maggie a taga-Inglatera ginundawayanda ti panagretiroda tapno ad-adu pay ti maaramidanda a panagserbi ken Jehova isu nga immakarda iti Makindaya nga Africa. Addaanka kadi iti espiritu ti panagsakripisio? Mabalinmo kadi nga ikabilangan ti umakar? No wen, ania dagiti prinsipio ti Biblia ken praktikal a singasing a makatulong kenka?

Sukimatem ti Bagim

Ti maysa a masapul nga ikabilangam ket ti motibom. Kinuna ni Jesus a ti kadakkelan a bilin ket: “Ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” Agserbitayo koma iti sabali a pagilian gapu ta ay-ayatentayo ti Dios ken tarigagayantayo nga itungpal ti bilinna a mangaramid kadagiti adalan. Intuloy ni Jesus: “Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’” Maipakita ti panagayat iti pada a tao babaen ti naimpusuan a tarigagay a tumulong kadakuada. (Mat. 22:36-39; 28:19, 20) Saan a maysa a panagpasiar ti panagserbi iti sabali a pagilian no di ket agkalikagum dayta iti adu a trabaho ken panagsakripisio. Masapul nga ayat ti mangtignay kenka. Kastoy ti pananggupgop dagiti taga-Netherlands a da Remco ken Suzanne nga agserserbi itan idiay Namibia, “Ayat ti makagapu nga agserserbikami ditoy agingga ita.”

Kuna ni Willie, maysa a manangaywan iti sirkito idiay Namibia: “Dagiti nakapagtalinaed iti sabali a pagilian ket dagidiay saan a nangnamnama iti panangasikaso dagiti lumugar a kakabsat. Ti panggepda ket tapno tumulong kadagiti kakabsat iti trabaho a panangasaba.”

Kalpasan a masukimatmo dagiti motibom, isaludsodmo: ‘Ania dagiti kapadasak a mausarko iti panagserbik iti sabali a pagilian? Epektiboak kadi a ministro? Ania dagiti ammok a lenguahe? Sidadaanak kadi nga agsursuro iti baro a lenguahe?’ Pagsaritaanyo dayta a naimbag kas maysa a pamilia. Makiumanka kadagiti panglakayen iti kongregasionyo. Ken ikararagmo dayta ken Jehova. Ti kasta a napudno a panangsukimat iti bagim tulongannaka a mangkita no talaga nga addaanka iti abilidad ken determinasion nga agserbi iti sabali a pagilian.​—Kitaem ti kahon a “Tingitingem ti Bagim.”

No Sadino ti Pagserbiam

Babaen ti sirmata, naawis ni Pablo nga agserbi idiay Macedonia. Saan nga agusar ita ni Jehova kadagiti milagro tapno iwanwannatayo. Ngem babaen iti daytoy a pagbasaan ken dadduma pay a publikasion, maammuan ti ili ti Dios ti adu a teritoria nga addaan iti dakkel a panagkasapulan. Gapuna, isuratmo dagita a lugar. No saanka pay a nakasagana nga agsursuro iti baro a lenguahe wenno saan a permanente ti panagnaedmo iti sabali a pagilian, ikabilangam ti agserbi iti lugar nga agus-usar iti lenguahe nga ammomon. Kalpasanna, ammuem dagiti bambanag a kas iti transportasion, seguridad, kasasaad ti panagbiag, klima, ken dagiti makalikaguman para iti visa. Makatulong ti pannakisarita kadagidiay nakapadasen nga immakar iti sabali a pagilian tapno agserbi. Ikararagmo met dayta. Laglagipem a ni Pablo ken dagiti kakaduana “pinaritan ida ti nasantuan nga espiritu a sawenda ti sao idiay distrito ti Asia.” Nupay pinadasda ti mapan idiay Bitinia, “saan a pinalubosan ida ti espiritu ni Jesus” a mangaramid iti dayta. Umasping iti dayta, nalabit a masapul a panunotem a naimbag no sadino ti talaga a pakausaram.​—Ara. 16:6-10.

Nalabit nga adda napanunotmo itan a pagserbian. No planom ti agserbi iti sabali a pagilian, agsuratka iti sanga nga opisina dagiti Saksi ni Jehova kadagiti pagilian a pampanunotem. Dakamatem dagiti pribilehio a tinagiragsakmo agraman dagiti espesipiko a saludsodmo, kas iti kasasaad ti panagbiag, pagyanan, pagpaagasan, ken panggedan. Kalpasanna, itedmo ti suratmo iti komite ti serbisio ti kongregasionyo. Iragpinda iti dayta ti rekomendasionda ken ipatulodda iti sanga nga opisina a dinakamatmo. Ti sungbatda ti tumulong kenka a mangikeddeng no sadino ti kasayaatan a pagserbiam.

Ni Willie, a nadakamat itay, kinunana: “No maipapan kadagidiay nakapagbayag, kaaduanna a binisitada nga umuna ti pagilian ken nagbirokda kadagiti lugar nga ammoda a naragsakdanto. Nabigbig ti maysa nga agassawa a marigatanda no agnaedda iti nasulinek a lugar. Gapuna, nagindegda iti bassit nga ili nga agkasapulan ngem matagiragsakda ti kasasaad ti panagbiag a kayatda.”

Panangsaranget Kadagiti Baro a Karit

Awan duadua a mangyeg iti sumagmamano a karit ti iyaakar iti lugar a saanmo pay a pulos a nagnaedan. “Nagrigat no sumken ti iliw,” kuna ni Lisa a nadakamat itay. Ania ti nakatulong kenkuana? Ti pannakisinningedna kadagiti baro a kakongregasionna. Inkagumaanna a kabesaduen ti naganda amin. Tapno maaramidna dayta, nasapa a sumangpet iti gimong ken agtalinaed kalpasanna tapno makasaritana dagiti kakabsat. Nakikadua kadakuada iti ministerio, inawisna ida iti pagtaenganna, ken nakigayyem kadakuada. Kinunana: “Diak pagbabawyan dagiti panagsakripisiok. Talaga a binendisionannak ni Jehova.”

Idi dadakkelen dagiti annakda, pinanawan da Paul ken Maggie ti balay a nagnaedanda iti 30 a tawen. Kuna ni Paul: “Nalaka met gayam nga idespatsar dagiti sanikua. Ti talaga a karit ket ti panangpanawmo iti pamiliam, a narigrigat ngem iti ninamnamami. Napalalo ti sangitmi idi addakami iti eroplano. Nalaka laeng ti maupay ngem nagtalekkami ken Jehova. Nakatulong ti pannakigayyemmi tapno makapagtultuloykami.”

Ti taga-Canada a da Greg ken Crystal inkeddengda ti umakar idiay Namibia gapu ta Ingles ti lenguaheda, ti opisial a lenguahe dayta a pagilian. Ngem idi agangay, nakitada a makagunggona no sursuruenda ti pagsasao dagiti lumugar. “No dadduma, maupaykami. Idi laeng nasursuromi ti lokal a pagsasao a naawatanmi ti kulturada. Ti kanayon a pannakikaduami kadagiti kakabsat ti timmulong kadakami a makibagay iti baro a pagnaedanmi.”

Nasayaat met ti epektona kadagiti lumugar a kakabsat ti kasta a kinapakumbaba ken kinatulok. Maragsakan ni Jenny a manglagip kadagiti pamilia nga immakar idiay Ireland a dimmakkelanna. “Isuda pay ketdi ti managpadagus,” kinunana. “Immayda tapno agserbi, saan a tapno pagserbian. Nakaregregta ken nakaragragsakda isu a tinuladko met ida.” Agserserbi itan ni Jenny ken ti lakayna kas misionero idiay Gambia.

“Mangpabaknang” ti Bendision ni Jehova

Anian a makapabileg ti kapadasan ni Pablo idiay Macedonia! Agarup sangapulo a tawen kalpasanna, insuratna kadagiti kakabsat idiay Filipos: “Agyamanak a kankanayon iti Diosko iti tunggal pannakalagipko kadakayo.”​—Fil. 1:3.

Kasta met laeng ti narikna da Trevor ken Emily a nagserbi idiay Malawi sakbay a nageskuelada iti Watchtower Bible School of Gilead. “No dadduma, pampanunotenmi no umiso met laeng ti inaramidmi a desision, ngem naragsakkami. Nasingsingedkami iti tunggal maysa ken nariknami ti pamendision ni Jehova.” Kinuna da Greg ken Crystal, a nadakamat itay, “Para kadakami, awanen ti nasaysayaat pay nga aramidenmi ngem iti daytoy.”

Pudno, saan a tunggal maysa ket adda iti kasasaad nga agserbi iti sabali a pagilian. Dadduma ti posible nga umakar iti sabali a lugar iti pagilianda nga addaan iti dakdakkel a panagkasapulan. Adda met dagidiay mabalin nga agserbi kadagiti kongregasion nga asideg iti lugarda. Ti napateg ket aramidem ti amin a kabaelam nga agserbi ken Jehova. (Col. 3:23) Iti kasta, mapadasam ti kaitungpalan ti naipaltiing a sasao: “Ti bendision ni Jehova​—isu dayta ti mangpabaknang, ket awan rigat nga inayonna iti dayta.”​—Prov. 10:22.

[Kahon/Ladawan iti panid 5]

Tingitingem ti Bagim

Tapno matingitingmo no kabaelam ti agserbi iti sabali a pagilian, usigem dagiti sumaganad a saludsod. Kalpasanna, sipupudno a sukimatem buyogen ti kararag no kabaelam ti umakar. Makatulong kenka dagiti impormasion kadagiti naglabas a ruar Ti Pagwanawanan.

• Naespirituan kadi ti panagpampanunotko?​—“Dagiti Addang a Mangiturong iti Kinaragsak” (Oktubre 15, 1997, panid 6)

• Epektiboak kadi a ministro?​—“No Kasano ti Agballigi iti Kinapayunir” (Mayo 15, 1989, panid 21)

• Kabaelak kadi ti mayadayo iti pamilia ken gagayyemko?​—“Panangparmek iti Iliw iti Panagserbi iti Dios” (Mayo 15, 1994, panid 28)

• Kabaelak kadi ti agsursuro iti baro a lenguahe?​—“Panagserbi iti Kongregasion nga Agus-usar iti Ganggannaet a Lenguahe” (Marso 15, 2006, panid 17)

• Kabaelak kadi nga ibaklay ti pinansial a kalikaguman ti iyaakarko?​—“Makapagserbikayo Kadi iti Ganggannaet a Tay-ak?” (Oktubre 15, 1999, panid 23)

[Ladawan iti panid 6]

Adda nasayaat nga epektona kadagiti lumugar a kakabsat ti kinapakumbaba ken kinatulok

[Ladawan iti panid 7]

Dagiti nagballigi ket dagidiay napan tapno agserbi