No Kasano a Mayan-anay ti Bassit

MASAPUL ti naannad a panagplano tapno mayan-anay ti bassit a kuarta. Indagadag ni Jesus ti kinapateg daytoy idi insaludsodna: “Asino kadakayo a kayatna ti mangbangon iti torre ti saan nga agtugaw nga umuna ket pattapattaenna ti magastos, tapno kitaenna no adda umanay a pangleppasna iti dayta?” (Lucas 14:28, 29) Maibatay iti dayta a prinsipio, ‘mapattapattam ti magastosmo’ no ibadyetmo ti kuartam. Kasano? Padasem daytoy:

No naawatmon ti sueldom, ibadyetmo ti paggastuam ita wenno iti masanguanan. (Kitaem ti kahon iti panid 8.) No aramidem dayta, makitam ti pappapanan ti kuartam ken no mano ti magasgastom kadagiti saan a napateg. Iti kasta, makitam no ania ti rumbeng a kissayam.

Tapno masursurom ti agbadyet, padasem dagitoy a singasing.

Nainsiriban a Panaggatang

Idi naawanan ni Raúl iti trabaho, ni baketna a Bertha binaliwanna ti panaggatangna. Kunana: “Nagsapulak kadagiti pangdiskuento a kupon ken pakagatangan iti ‘buy 1, take 1.’” Dagitoy ti dadduma pay a mabalinmo nga aramiden:

● Planuem dagiti lutuem iti makalawas depende iti kalaka dagiti magatang.

● Gumatangka kadagiti ramen ken aglutoka imbes a gumatangka kadagiti nakasaganan a makan.

● Iyad-adum ti gumatang no kalaka wenno kaadu dagita.

● Gumatangka iti adu ngem saan met a sobra di la ket ta madadaelto laeng.

● Gumatangka kadagiti de-kalidad a segundamano a kawes.

● Mapanka kadagiti lugar a nalaklaka ti magatang, no la ket dika unay magastuan iti pagpletem.

● Dimo unay sansanen ti aggatang.a

Ilistam

“Nasken nga agbadyetkami,” kuna ni Fred, “isu nga ilislistak dagiti rumbeng a bayadanmi a dagus ken no mano pay ti masapulmi iti dayta a bulan.” Innayon ni baketna nga Adele: “No makitiendaak, ammok no mano laeng ti gastuek. No adda nasken a gatangek para kadagiti ubbing wenno iti balay, kitaek ti listaak sa panunotek, ‘Diak kabaelan, isu nga iyuraymi laengen agingga inton sumaganad a bulan.’ Talaga a makatulong ti panaglista!”

Panunotem Sakbay a Gatangem

Iyugalim nga isaludsod iti bagim: ‘Talaga kadi a kasapulak daytoy? Talaga kadi a perdin daytoy daan, wenno kayatko laeng ti maaddaan iti baro?’ No manmanom nga usaren ti maysa a banag, mabalin ngata nga agarkilaka laengen? No masansanto nga usarem, mabalin ngata a gumatangka laengen iti segundamano?

Nupay kasla babassit la a banag dagiti nadakamat ngem no aramidem amin, dakkel ti maitulongda kenka! Ti punto ket no iyugalim ti agekonomia kadagiti babassit a banag, makapagekonomiaka met kadagiti dadakkel a paggastosan.

Agbalinka a Manangipamuspusan

Tapno maksayan ti magastom kadagiti saan unay a napateg, agbalinka a manangipamuspusan. Kas pagarigan, kuna ni Adele: “Dua idi ti luganmi ngem inlakomi a dagus ti maysa ken agkakalugankamin no adda papananmi. Tapno makainutkami iti gasolina, papananmi amin a panggepmi a papanan iti maysa la a biahe agingga a mabalin. Inkeddengmi a dagiti laeng kasapulanmi ti gatangenmi.” Adtoy ti dadduma pay a pamay-an tapno agbalinka a manangipamuspusan:

● Agmulaka iti natnateng.

● Surotem dagiti instruksion iti manual dagiti ginatangmo nga alikamen tapno agpaut dagita.

● Agsukatka a dagus apaman a nakaawidkan tapno saan nga alisto a dumaan ti kawesmo.

Dimo Isinsina ti Bagim!

Adu kadagidiay naawanan iti trabaho ti nagbalin a naikay ken isinsinada ti bagbagida. Ngem saan a kasta ni Fred! Manangsaranay ken mannakipagrikna ti pamiliana agraman ti dadakkelen nga annakna. “Nasursuromi ti agririnnanud iti adu a banag isu nga ad-adda a simmingedkami iti maysa ken maysa,” kunana. “Nariknami amin a rumbeng nga agtitinnulongkami.”

Napabileg met ni Fred kadagiti kapammatianna a regular a makalangenna iti Kingdom Hall dagiti Saksi ni Jehova. Kunana: “Kanayon a maparegtaak tunggal makigimongak. Nakasaysayaat ken nakonsiderar ti amin. Gapu iti tulong ken panangliwliwada, naamirismi nga adda dagiti mangandingay kadakami.”—Juan 13:35.

Makatulong ti Kaadda ti Pammatim

Nasakit ti nakem ti minilion a naawanan iti trabaho gapu ta panagriknada ket sinaur ida dagiti amoda. Ni Raúl a nadakamaten ket naupay iti di ninamnama a pannakasesantena iti namindua—idiay Peru a naggappuanna ken idiay New York a napananna. Kalpasan ti maikadua a pannakasesantena, kinuna ni Raúl, “Talaga nga awan ti permanente iti daytoy a lubong.” Adu a bulan a nagbirok iti trabaho ngem awan latta. Ania ti nakatulong kenkuana nga aganus? Kinuna ni Raúl, “Ti kinasingedko iti Dios ken ti pannakaamirisko a masapul nga agtalekak kenkuana tapno mariknak ti pudpudno a kinatalged.”

Maysa ni Raúl kadagiti Saksi ni Jehova, ket ti panagadalna iti Biblia ti nakatulong kenkuana tapno tumibker ti pammatina iti nadungngo a nailangitan nga Ama a nangikari: “Saankanto a pulos panawan ket saankanto a pulos baybay-an.” (Hebreo 13:5) Narigat dagiti kasasaad ngem kinuna ni Raúl: “Kanayon nga inkararagmi dagiti kangrunaan a kasapulanmi, ken nasursuromi ti agbalin a kontento kadagiti ipapaay ti Dios.” Innayon ni Bertha nga asawana: “Madanaganak unay no dadduma ta pampanunotek no makastrekto pay ngata ni Raúl iti trabaho. Ngem nakitami a sinungbatan ni Jehova dagiti kararagmi babaen iti panangipaayna kadagiti inaldaw a kasapulanmi. Nupay saanen a kas iti kaadu idi ti ik-ikutanmi, amang a nasimsimple metten ti biagmi.”

Gapu ta maysa ni Fred kadagiti Saksi ni Jehova, dakkel ti naitulong ti panagadalna iti Biblia tapno matamingna ti kasasaadna. “No dadduma, ipagaruptayo a natalgedtayo no addaantayo iti permanente a trabaho, nangato a saad, wenno kuarta iti bangko,” kinunana. “Ngem nasursurok a natalged laeng ti biagtayo no agtalektayo ken Jehova a Dios, ket ti pannakigayyem kenkuana ti kakaisuna a mangyeg iti pudno a kinatalged.”b

[Footnotes]

[Blurb iti panid 9]

“Kanayon nga inkararagmi dagiti kangrunaan a kasapulanmi, ken nasursuromi ti agbalin a kontento kadagiti ipapaay ti Dios”

[Kahon/Tsart iti panid 8]

No Kasano ti Agbadyet

(1) Isuratmo dagiti napateg a paggastuam kada bulan. Ilistam ti amin a gastuem iti makabulan para iti taraon, balay (abang wenno pagtinnag), lugan, ken babayadam iti danum, koriente, telepono, ken dadduma pay. Kadagiti tinawen a babayadam, bingayem dagitoy iti 12 a bulan.

(2) Ikategoriam dagiti paggastuam. Karaman kadagitoy ti taraon, balay, lugan, plete, ken dadduma pay.

(3) Ammuem no mano ti binulan nga ilatangmo iti tunggal kategoria. Para iti tinawen a babayadam, kuentaem no mano ti nasken nga urnongem iti kada bulan.

(4) Isuratmo ti dagup ti neto a mateggedanyo a sangapamiliaan. Ikissaymo dagiti babayadan kas iti buis. Idiligmo daytoy kadagiti paggastuan.

(5) Binulan a mangilatangka para iti tunggal kategoria. Ti simple a pamay-an ket agusarka kadagiti namarkaan a sobre para iti tunggal kategoria. Ikabilmo ti kuarta iti maitutop a sobre a pagbayadmo iti nairanta a paggastuam.

Pakdaar: No addaanka iti credit card, agannadka iti panangusarmo iti dayta! Adu ti saan a makasurot iti badyetda gapu ta masulisogda nga umutang.

[Tsart]

(Para iti aktual a pannakaurnosna, kitaem ti publikasion)

Neto ti Binulan a Mateggedan

NETO TI BINULAN A SUELDO ₱․․․․․ DADDUMA PAY ₱․․․․․

₱․․․․․

₱․․․․․ Abang wenno Pagtinnag ₱․․․․․

₱․․․․․ Insurance/Buis ₱․․․․․

₱․․․․․ Bayad ti Koriente, Danum, Kdpy ₱․․․․․

₱․․․․․ Lugan ₱․․․․․

₱․․․․․ Panaglinglingay/Panagpasiar ₱․․․․․

₱․․․․․ Telepono/Selpon ₱․․․․․

₱․․․․․ Taraon ₱․․․․․

₱․․․․․ Dadduma pay ₱․․․․․

₱

₱

DAGUP DAGUP

₱․․․․․ ₱․․․․․

Pagdiligem ti Mateggedam ken Paggastuam

NETO TI BINULAN A MATEGGEDAN ₱․․․․․

IKISSAY TI− NATDA

BINULAN A PAGGASTUAN ₱․․․․․ ₱․․․․․