TUNGGAL lawas, adda urnos ti kaaduan a kongregasion dagiti Saksi ni Jehova para iti diskurso publiko maipapan iti Nainkasuratan a topiko. No maysaka a panglakayen wenno ministerial nga adipen, pampaneknekam met laeng kadi nga epektiboka a pumapalawag, maysa a mannursuro? No wen, nalabit maawiska a mangipaay iti palawag publiko. Pinullo a ribun a kakabsat a lallaki ti natulongan ti Teokratiko nga Eskuelaan ti Panagministro nga agbalin a kualipikado iti daytoy a pribilehio. No matudinganka a mangipaay iti palawag publiko, sadino ngay ti pangrugiam?

Adalem ti Balabala

Sakbay nga irugim ti agsukimat, basaem ti balabala ken mennamennaem dayta agingga a maalam ti kababagasna. Tandaanam ti tema, nga isu ti paulo ti diskurso. Ania ti kayatmo nga isuro kadagiti agdengngeg kenka? Ania ti panggepmo?

Kabesaduem dagiti kangrunaan a paulo. Anagem dagiti kangrunaan a punto. Kasano a nainaig ti tunggal punto iti tema? Iti baba ti tunggal kangrunaan a punto, nailista ti sumagmamano a segundario a punto. Dagiti punto a mangsuporta kadagiti segundario a punto ket nailista iti baba dagitoy. Usigem no kasano a ti tunggal benneg ti balabala palawaenna ti sinarunona, mangiturong iti sumaganad a benneg, ken tumulong a mangibanag iti panggep ti palawag. Apaman a maawatamon ti tema, ti panggep ti palawag, ken no kasano a dagiti kangrunaan a punto maibanagda dayta a panggep, no kasta nakasaganakan a mangbukel iti palawagmo.

Iti damo, mabalin a nalaklaka no ipapanmo a ti diskursom ket buklen ti uppat wenno lima nga ababbaba a palawag, a tunggal maysa addaan iti kangrunaan a punto. Saggaysaem nga isagana dagitoy.

Ti naipaay a balabala ket mausar iti panagsagana. Saan a nairanta dayta a kas nota nga isun ti ipalawagmo. Dayta ti pannaka-tulang ti palawag. Masapul a balkutam iti lasag, no iyar-arig, ikkam iti puso ken biagem.

Panangusar Kadagiti Kasuratan

Imbasar ni Jesu-Kristo ken dagiti adalanna ti pannursuroda kadagiti Kasuratan. (Luc. 4:16-21; 24:27; Ara. 17:2, 3) Mabalinmo met nga aramiden ti kasta. Rumbeng a dagiti Kasuratan ti pakaibatayan ti palawagmo. Imbes nga ilawlawag ken iyaplikarmo laeng dagiti sasao a nailanad iti balabala, tarusam no kasano a suportaran dagiti Kasuratan dagita a sasao, ket kalpasanna mangisuroka nga usarem dagiti Kasuratan.

Bayat nga isagsaganam ti palawagmo, usigem ti tunggal bersikulo a naisitar iti balabala. Imutektekam ti konteksto. Mabalin a mangted laeng dagiti dadduma a teksto iti makatulong nga impormasion. Saan a masapul a basaem wenno komentuam amin dagita inton agpalawagka. Piliem dagidiay maitutop unay kadagiti agdengdengngeg. No ipamaysam nga usaren dagiti teksto a naisitar iti nayimprenta a balabala, mabalin a saanen a kasapulan nga agusarka kadagiti kanayonan a Nainkasuratan a reperensia.

Agpannuray ti balligi ti palawagmo, saan nga iti kaadu ti teksto nga usarem, no di ket iti kalidad ti panangisurom. No mangiserrekka kadagiti teksto, ipakitam no apay nga inusarmo dagita. Iwayaam nga iyaplikar dagita. Kalpasan a mabasam ti maysa a teksto, bay-am a silulukat ti Bibliam bayat nga ilawlawagmo ti teksto. Mabalin a kasta met ti aramiden dagiti agdengdengngeg kenka. Kasano a matukaymo ti interes dagiti agdengdengngeg ken matulonganda a magunggonaan a naan-anay iti Sao ti Dios? (Neh. 8:8, 12) Maaramidmo dayta babaen ti panangilawlawag, panangiladawan, ken panangyaplikar.

Panangilawlawag. No agsagsaganaka a mangilawlawag iti maysa a napateg a teksto, isaludsodmo iti bagim: ‘Ania ti kayatna a sawen? Apay nga usarek daytoy iti palawagko? Ania ngata a saludsod maipapan iti daytoy a bersikulo ti sumiplot iti panunot dagiti agdengdengngeg?’ Mabalin a nasken nga adalem ti kontekstona, ti pakaipuonanna, ti eksena, ti puersa dagiti sasao, ti panggep ti napaltiingan a mannurat. Kalikaguman daytoy ti panagsukimat. Adu a napateg nga impormasion ti masarakam kadagiti publikasion nga ipapaay ti “matalek ken masirib nga adipen.” (Mat. 24:45-47) Dimo padasen nga ilawlawag ti amin nga adda iti bersikulo, ngem ilawlawagmo no apay nga impabasam dayta kadagiti agdengdengngeg a mainaig iti punto nga ipalpalawagmo.

Panangiladawan. Ti panggep dagiti ilustrasion ket tapno maiturongmo dagiti agdengdengngeg iti naun-uneg a pannakaawat wenno tapno matulonganda a mangtandaan iti punto wenno prinsipio nga inlawlawagmo. Dagiti ilustrasion tulonganna dagiti tattao tapno matarusanda ti imbagam kadakuada ken mainaigda dayta iti datin nga ammoda. Kasta ti inaramid ni Jesus idi intedna ti nalatak a Sermonna iti Bantay. “Dagiti tumatayab iti langit,” ‘dagiti lirio iti talon,’ ‘akikid a ruangan,’ ‘balay iti rabaw ti dakkel a bato,’ ken adu a kakasta a sasao ti namagbalin a napuersa, nalawag, ken di malipatan ti pannursurona.​—Mat., kap. 5–7.

Panangyaplikar. Ti panangilawlawag ken panangiladawan iti kasuratan ket mangted iti pannakaammo, ngem ti panangyaplikar iti dayta a pannakaammo ti mangyeg iti resulta. Pudno, responsabilidad dagiti agdengdengngeg ti agtignay a mayannurot iti mensahe ti Biblia, ngem matulonganda a mangilasin no ania ti masapul nga aramidenda. Apaman a masiertom a maawatan dagiti agdengdengngeg ti bersikulo a maus-usig ken makitada no kasano a mainaig dayta iti punto a masalsalaysay, mangusarka iti umdas a tiempo a mangipakita kadakuada no ania ti epekto dayta iti pammati ken kondukta. Itampokmo dagiti pagimbagan ti panangiwaksi kadagiti di umiso nga ideya wenno kondukta a di maitunos iti kinapudno a maipalpalawag.

Bayat nga ut-utobem no kasano a mayaplikar dagiti kasuratan, laglagipem a nagduduma ti nalikudan ken kasasaad dagiti agdengdengngeg kenka. Mabalin nga adda dagiti kabbaro nga interesado, agtutubo, natataengan, ken dagidiay mangsarsaranget iti nadumaduma a personal a problema. Pagbalinem a praktikal ken realistiko ti palawagmo. Liklikam ti mangbalakad a kas man la adda pampanunotem a sumagmamano laeng nga indibidual.

Dagiti Ikeddeng ti Agpalawag

Dagiti dadduma a pangngeddeng maipapan iti diskursom ket nalpasen a naaramid. Nailanad a sibabatad dagiti kangrunaan a punto, ken nalawag a naipakita no kasano kapaut ti panangsalaysaymo iti kada kangrunaan a paulo. Adda dagiti banag a sika ti makaammo a mangikeddeng. Mabalinmo nga iyad-adu ti panawen a busbosem kadagiti dadduma a segundario a punto ket ab-ababa kadagiti dadduma. Dimo ipapan a masapul nga agpapareho ti kapaut ti panangilawlawagmo iti kada segundario a punto. Ta no kasta, mabalin a paspasamto a saklawen ti intero a material ket matikaw dagiti agdengdengngeg kenka. Kasanom a maikeddeng no ania a punto ti palawaem ken no ania ti dakamatem laeng iti apagbiit, wenno dukitem la bassit? Isaludsodmo iti bagim: ‘Aniada a punto ti tumulong kaniak a mangyallatiw iti kangrunaan nga ideya ti palawag? Aniada ti kangrunaan a pagimbagan dagiti agdengngeg? Kumapuy kadi ti panagsasagadsad ti maidatag nga ebidensia no ikkatek ti maysa a naisitar a teksto ken ti mainaig a punto?’

Dika mangiserrek kadagiti pattapatta wenno personal nga opinion. Uray ni Jesu-Kristo nga Anak ti Dios liniklikanna ti agsao ‘iti bukodna a parnuay.’ (Juan 14:10) Tandaanam a ti makagapu a tumabuno dagiti tattao kadagiti gimong dagiti Saksi ni Jehova ket tapno dumngegda iti pannakailawlawag ti Biblia. No ibilangdaka a nalaing a pumapalawag, dayta ket nalabit gapu ta inyugalim nga iturong ti atensionda, saan nga iti bagim, no di ket iti Sao ti Dios. Maigapu itoy, apresiarenda dagiti palawagmo.​—Fil. 1:10, 11.

Ita ta ti simple a balabala ket pinagbalinmon a nabagas a panangilawlawag iti Kasuratan, masapul nga ensayuemon ti palawagmo. Nasayaat no pigsaam nga ensayuen dayta. Ti nasken, siguraduem a sipapanunotka a nalaing kadagiti amin a punto. Masapul a naimpusuan ti panagpalawagmo, nabiag ti panangidatagmo iti material, ken entusiastiko ti panangisaom iti kinapudno. Sakbay nga agpalawagka, isaludsodmo iti bagim: ‘Ania ti namnamaek a magapuanan? Maitampok met la kadi dagiti kangrunaan a punto? Talaga kadi a pinagbalinko dagiti Kasuratan a nakaibatayan ti palawagko? Naannayas kadi ti pannakayallatiw ti tunggal kangrunaan a punto iti daydiay sumaruno? Pabilgen met la kadi ti palawagko ti apresasion ken ni Jehova ken kadagiti probisionna? Direktamente kadi a nainaig ti konklusion iti tema, nga ipakitana kadagiti agdengngeg no ania ti aramidenda, ken magutugotda a mangaramid iti dayta?’ No masungbatam iti wen dagitoy a saludsod, ngarud ‘nasayaat ti maaramidmo a buyogen ti pannakaammo,’ a maipaay a pagimbagan ti kongregasion ken pakaidayawan ni Jehova!​—Prov. 15:2.

ANIA ti kalatmo kas mannursuro? No kabbaroka nga agibumbunannag iti Pagarian, di pagduaduaan a tarigagayam a sursuruen no kasano ti mangyadal iti Biblia, tangay binilin ni Jesus dagiti pasurotna a mangaramid kadagiti adalan. (Mat. 28:19, 20) No addaankan iti kapadasan iti daytoy a trabaho, nalabit a ti kalatmo isu ti mas epektibo a panangdanon iti puso dagidiay kayatmo a tulongan. No maysaka nga ama wenno ina, sigurado a kayatmo ti agbalin a mannursuro a makabael a manggutugot kadagiti annakna a mangidedikar iti biagda iti Dios. (3 Juan 4) No maysaka a panglakayen wenno agngayngayangay nga agbalin a kasta, nalabit kayatmo ti agbalin a pumapalawag iti publiko a makabael a mangpatanor kadagiti agdengdengngeg iti naun-uneg a panangapresiar ken ni Jehova ken iti daldalanna. Kasano a maragpatmo dagita a kalat?

Agsursuroka iti Kalaingan a Mannursuro, ni Jesu-Kristo. (Luc. 6:40) Agpalpalawag man ni Jesus iti maysa a bunggoy iti darisdis ti bantay wenno iti sumagmamano la a tattao bayat a magmagnada iti dalan, napaut ti epekto ti insaona ken ti wagas a panangisaona. Tinukay ni Jesus ti panunot ken puso dagiti agdengdengngeg kenkuana, ken impakitana iti wagas a maawatanda no kasanoda a mayaplikar ti maad-adalda iti praktikal a pamay-an. Maaramidmo met kadi dagita?

Agpannurayka ken Jehova

Nalaing a mangisuro ni Jesus gapu iti nasinged a relasionna iti nailangitan nga Amana ken gapu iti pamendision ti espiritu ti Dios. Sipapasnek kadi nga ikarkararagmo ken Jehova nga epektibo koma ti panangyadalmo iti Biblia? No maysaka nga ama wenno ina, kanayon kadi nga idawdawatmo iti Dios nga iwanwannaka a mangisuro kadagiti annakmo? Naimpusuan kadi nga agkararagka no agsagsaganaka nga agpalawag wenno mangikondukta kadagiti gimong? Ti kasta a nabuyogan iti kararag a panagpannuray ken Jehova tulongannaka nga agbalin nga ad-adda nga epektibo a mannursuro.

Ti panagsadag ken Jehova ket maiparangarang met babaen ti panagpannuray iti Saona, ti Biblia. Idi nagkararag iti daydi maudi a rabii ti biagna kas perpekto a tao, kinuna ni Jesus ken Amana: “Intedko kadakuada ti saom.” (Juan 17:14) Nupay adu ti kapadasan ni Jesus, saan a nagsao iti kabukbukodanna a parnuay. Ti laeng insuro kenkuana ni Amana ti sinaona, iti kasta, nangibati iti pagwadan a tuladentayo. (Juan 12:49, 50) Ti sao ti Dios, a naitalimeng iti Biblia, adda bilegna a mangimpluensia iti tattao​—ti tigtignay, kaunggan a pampanunot, ken rikriknada. (Heb. 4:12) Bayat a rumangrang-ay ti pannakaammom iti Sao ti Dios ken masursurom nga usaren a siuumiso iti ministeriom, mapatanormo met ti wagas ti panangisuro a mangyadani kadagiti tattao iti Dios.​—2 Tim. 3:16, 17.

Idayawmo ni Jehova

Ti panagbalin a mannursuro kas panangtulad ken Kristo dina kaipapanan ti basta panangipaay iti makapainteres a diskurso. Pudno, nagsiddaawan ti tattao ti “makaay-ayo a sasao” ni Jesus. (Luc. 4:22) Ngem ania ti panggep ni Jesus iti nagsayaat a panagpalpalawagna? Tapno maidaydayaw ni Jehova, saan a tapno maiturong kenkuana ti atension. (Juan 7:16-18) Indagadagna kadagiti pasurotna: “Agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.” (Mat. 5:16) Apektaran koma dayta a balakad ti wagas ti panangisurotayo. Ikagumaantay a liklikan ti aniaman a mangisiasi iti dayta a panggep. Isu a no iplanotayo ti sawentayo wenno no kasano nga isaotay dayta, nasayaat no isaludsodtayo iti bagitayo, ‘Paunegen ngata dayta ti panangapresiarda ken Jehova, wenno iturongna ti atension kaniak?’

Kas pagarigan, dagiti ilustrasion ken ehemplo a naadaw kadagiti pudno a pasamak iti biag ket mabalin a mausar a sieepektibo iti panangisuro. Ngem, no atiddog unay ti ilustrasion a maisalaysay wenno detalyado unay ti mayestoria a kapadasan, mabalin a mapukaw ti punto ti instruksion. Kasta met, ti panagestoria a mangpakatawa laeng iyaw-awanna ti panggep ti ministeriotayo. Iti kasta, ti mannursuro iturturongna ti atension iti bagina imbes nga ibanagna ti pudno a panggep ti teokratiko nga edukasion.

‘Pagdumaem’

Tapno ti maysa ket pudno nga agbalin nga adalan, masapul a nalawag a matarusanna no ania ti maisursuro. Masapul a mangngegna ti kinapudno ken makitana ti nakaidumaan dayta kadagiti sabali a sursuro. Tapno maibanag daytoy, makatulong ti panamagdilig.

Maulit-ulit nga indagadag ni Jehova iti ilina a ‘pagdumaenda’ ti nadalus ken ti narugit. (Lev. 10:9-11) Kinunana a dagidiay agserbi iti naindaklan a naespirituan a templona isuroda kadagiti tattao “ti nagdumaan ti nasantuan a banag ken ti di nasantuan a banag.” (Ezeq. 44:23) Iti libro dagiti Proverbio, namin-adu a napagdilig ti kinalinteg ken kinakillo, ti sirib ken kinamaag. Mabalin met a pagdumaen uray dagiti banag a di agsupadi. Pinagdilig ni apostol Pablo ti nalinteg a tao ken ti naimbag a tao, kas nailanad iti Roma 5:7. Iti libro a Hebreo, impakitana a natantan-ok ti saad ni Kristo a kas nangato a padi ngem ti kinapadi ni Aaron. Wen, kas insurat ni John Amos Comenius, maysa nga edukador idi maika-17 a siglo: “Ti panangisuro kaipapananna laeng ti panangipakita iti naggigidiatan ti bambanag sigun iti nagduduma a panggep, porma, ken punganayda. . . . No kasta, nalaing a mangisuro ti tao a nalaing a mamaggidiat iti bambanag.”

Kas pagarigan, mabalin nga isursurom iti maysa a tao ti maipapan iti Pagarian ti Dios. No dina matarusan no ania ti Pagarian, mabalinmo nga ipakita no kasano a ti kuna ti Biblia ket naiduma iti ideya a ti Pagarian ket maysa laeng a kasasaad iti puso ti maysa a tao. Wenno mabalinmo nga ipakita no kasano a naigiddiat ti Pagarian kadagiti natauan a gobierno. Ngem kadagiti tattao a makaammon kadagitoy a pamunganayan a kinapudno, mabalinmo ti mangidatag iti ad-adu pay a detalye. Mabalinmo nga ipakita kadakuada no kasano a naiduma ti Mesianiko a Pagarian iti mismo a sapasap a kinaari ni Jehova, a nadeskribir iti Salmo 103:19, wenno “iti pagarian ti Anak ti ayatna,” a nadakamat iti Colosas 1:13, wenno iti “panangaywan,” a nadakamat iti Efeso 1:10. Makatulong ti panamaggidiat tapno nalawag a matarusan dagiti agdengdengngeg dayta a napateg a sursuro ti Biblia.

Maulit-ulit idi nga impakat ni Jesus dayta a wagas ti panangisuro. Pinagdiligna ti nalatak a pannakaawat iti Linteg Mosaiko ken ti pudno a panggep ti Linteg. (Mat. 5:21-48) Pinaggidiatna ti pudno a nadiosan a debosion ken dagiti aramid dagiti managinsisingpet a Fariseo. (Mat. 6:1-18) Pinagdiligna ti kababalin dagidiay ‘mangituray’ kadagiti sabsabali ken ti managsakripisio nga espiritu a rumbeng nga ipakita dagiti pasurotna. (Mat. 20:25-28) Iti sabali a gundaway, kas nailanad iti Mateo 21:28-32, ginutugot ni Jesus dagiti agdengdengngeg kenkuana a pagdiligenda a mismo ti panaginlilinteg ken ti pudno a panagbabawi. Iturongnatay dayta iti sabali pay a napateg a benneg ti nasayaat a panangisuro.

Gutugotem nga Agpanunot Dagiti Agdengdengngeg

Iti Mateo 21:28, mabasatayo nga inruangan ni Jesus ti panamagdiligna babaen ti panangisaludsodna iti kastoy: “Ania ti pagarupyo?” Ti nalaing a mannursuro ket saan laeng a basta mangyallatiw iti impormasion wenno mangted kadagiti sungbat. Imbes ketdi, gutugotenna nga agpanunot dagiti agdengdengngeg kenkuana. (Prov. 3:21; Roma 12:1) Ti maysa a pamay-an tapno maaramid daytoy ket babaen ti panagsaludsod. Kas masarakan iti Mateo 17:25, insaludsod ni Jesus: “Ania ti pagarupmo, Simon? Manipud kadagiti siasino a ti ar-ari ditoy daga umawatda kadagiti impuesto wenno panguluen a buis? Manipud iti annakda wenno manipud kadagiti ganggannaet?” Dagiti mamagpanunot a saludsod ni Jesus ti nakatulong ken Pedro a mangbukel iti umiso a konklusion maipapan iti panagbayad iti buis nga agpaay iti templo. Umasping iti dayta, idi sinungbatanna ti tao a nagsaludsod iti, “Asino a pudpudno ti padak a tao?” Indilig ni Jesus ti inaramid ti maysa a padi ken ti maysa a Levita iti inaramid ti maysa a Samaritano. Kalpasanna, insaludsodna daytoy: “Asino kadagitoy a tallo ti pagarupem a namagbalin iti bagina a pada a tao daydiay natnag kadagiti mannanakaw?” (Luc. 10:29-36) Ditoy manen, imbes nga impanunotanna ti kasasaona, binay-an ni Jesus a sungbatan dayta a tao ti bukodna a saludsod.​—Luc. 7:41-43.

Danonem ti Puso

Dagiti mannursuro a makatarus iti kababagas ti Sao ti Dios mabigbigda a ti pudno a panagdayaw ket saan a basta panangikabesa kadagiti impormasion ken panangannurot kadagiti paglintegan. Naibatay dayta iti nasayaat a relasion ken ni Jehova ken panangipateg kadagiti dalanna. Ti kasta a panagdayaw ramanenna ti puso. (Deut. 10:12, 13; Luc. 10:25-27) Iti Kasuratan, ti sao a “puso” masansan a tuktukoyenna ti intero a makin-uneg a kinatao, a pakairamanan ti tartarigagay, emosion, rikrikna, ken motibo.

Ammo ni Jesus a nupay makinruar a langa ti kitaen ti tao, puso ti kitaen ti Dios. (1 Sam. 16:7) Panagayat iti Dios ti manggutugot koma kadatayo nga agserbi kenkuana, saan ket a tapno dayawendatay dagiti padatayo a tattao. (Mat. 6:5-8) Iti sabali a bangir, adu ti inaramid dagiti Fariseo a pammarang laeng. Napalalo ti panangipaannurotda kadagiti detalye ti Linteg ken panangipatungpalda kadagiti paglintegan nga inaramidda a mismo. Ngem dida imparangarang iti biagda dagiti galad ti Dios a kunkunada a daydayawenda. (Mat. 9:13; Luc. 11:42) Insuro ni Jesus a nupay nasken ti panagtulnog kadagiti bilin ti Dios, ti pateg ti kasta a panagtulnog ket ikeddeng ti linaon ti puso. (Mat. 15:7-9; Mar. 7:20-23; Juan 3:36) Makagunggona unay ti panangisurotayo no tuladentayo ti ulidan ni Jesus. Nasken a tulongantayo dagiti tao a mangammo no ania ti kalikaguman ti Dios kadakuada. Ngem nasken met nga ammuen ken ayatenda ni Jehova a kas maysa a persona tapno ti kababalinda iyanninawna ti panangipategda iti naanamongan a relasion iti pudno a Dios.

Siempre, tapno magunggonaan dagiti tattao iti kasta a pannursuro, masapul nga ammuenda ti linaon ti pusoda. Ginutugot ni Jesus dagiti tattao nga usigenda dagiti motiboda ken sukimatenda ti rikriknada. No ilintegna ti di umiso a panangmatmat, damagenna kadagiti agdengdengngeg no apay a napanunot, sinao, wenno inaramidda ti kastoy ken kasdiay. Ngem saan nga agingga la dita, no di ket pinakuyogan ni Jesus ti saludsodna iti panangilawlawag, pangngarig, wenno tignay a mangparegta kadakuada a mangmatmat a siuumiso kadagiti bambanag. (Mar. 2:8; 4:40; 8:17; Luc. 6:41, 46) Matulongantay met dagiti agdengdengngeg kadatayo babaen ti panangisingasing nga iyimtuodda iti bagida dagiti saludsod a kas iti: ‘Apay a magustuak ti kastoy a wagas? Apay a kastoy ti reaksionko iti daytoy a situasion?’ Kalpasanna, gutugoten ida a mangmatmat kadagiti bambanag sigun iti panangmatmat ni Jehova.

Ipakitam ti Aplikasionna

Ammo ti nalaing a mannursuro a “ti sirib isu ti kangrunaan a banag.” (Prov. 4:7) Ti sirib isu ti abilidad a mangipakat a sibaballigi iti pannakaammo tapno marisut dagiti problema, maliklikan dagiti peggad, maragpat dagiti kalat, matulongan dagiti sabali. Ti mannursuro pagrebbenganna a tulongan dagiti iyad-adalanna a mangyaplikar iti maad-adalda, ngem saanna nga idesisionan ida. No pagsaritaanyo dagiti nadumaduma a prinsipio ti Biblia, tulongam ti iyad-adalam nga agrason. Mabalinmo ti mangdakamat iti kasasaad a mapaspasamak iti inaldaw ken damagem iti iyad-adalam no kasano a ti kaad-adalyo a prinsipio ti Biblia ket makatulong kenkuana no maipasango iti kasta a situasion.​—Heb. 5:14.

Iti diskursona idi Pentecostes 33 K.P., nangipaay ni apostol Pedro iti ehemplo ti praktikal a panangyaplikar a nangapektar iti biag dagiti tattao. (Ara. 2:14-36) Kalpasan a dinakamatna ti tallo a teksto ti Kasuratan nga ammona a patpatien ti bunggoy a kasasaona, inlawlawag ni Pedro no kasano a natungpal dagitoy sigun kadagiti pasamak a naimatanganda amin. Kas resultana, naamiris ti bunggoy a masapul nga agtignayda a maitunos iti nangngegda. Kasta met kadi ti epekto ti panangisurom kadagiti tattao? Saan laeng kadi a basta mangidatag iti impormasion ti ar-aramidem no di ket tultulongam ida a mangtarus kadagiti bambanag? Parparegtaem kadi ida a mangamiris no kasano a dagiti maad-adalda apektaranna ti biagda? Mabalin a saanda nga ibaga, “Ania ti aramidenmi?” a kas insaludsod dagiti tattao idi Pentecostes, ngem no nasayaat ti panangyaplikarmo iti kasuratan, magutugotda a mangaramid iti umiso.​—Ara. 2:37.

Dakayo a nagannak, no basaenyo ti Biblia a kaduayo dagiti annakyo, nasayaat a gundawayyo dayta a mangsanay kadakuada nga agpanunot no kasano nga iyaplikar dagiti prinsipio ti Biblia iti praktikal a pamay-an. (Efe. 6:4) Mabalinyo, kas pagarigan, ti pumili iti sumagmamano a bersikulo ti Biblia a nayeskediul a mabasa iti lawas, a pagsasaritaanyo ti kaipapananda, ket iyimtuod dagiti kastoy a saludsod: ‘Kasano nga iwanwannatay daytoy? Kasanotay a mausar dagitoy a bersikulo iti ministerio? Ania ti ipalgakda maipapan ken ni Jehova ken ti wagas a panangtamingna kadagiti bambanag, ken kasano a pabilgen dayta ti panangapresiartayo kenkuana?’ Paregtaenyo ti pamiliayo nga agkomento kadagitoy a punto inton masalaysay dagiti tampok iti panagbasa iti Biblia iti Teokratiko nga Eskuelaan ti Panagministro. Ad-addanto a matandaananda dagiti bersikulo a kinomentuanda.

Mangipakitaka iti Nasayaat nga Ulidan

Mangisuroka saan laeng a babaen ti sao no di pay ket babaen ti aramid. Agserbi dagiti tignaymo a praktikal nga ulidan no kasano nga ipakat dagiti banag nga ibagbagam. Kastoy ti wagas a panagsursuro dagiti ubbing. No tuladenda dagiti dadakkelda, ipakpakitada a kayatda ti agbalin a kas kadagiti dadakkelda. Kayatda a maammuan no ania ti riknana ti panangaramid iti ar-aramiden dagiti dadakkelda. Kasta met, no dagidiay isursurom ket ‘tuladendaka a kas panangtuladmo ken Kristo,’ mapasaranda dagiti bendision nga iyeg ti pannagna iti daldalan ni Jehova. (1 Cor. 11:1) Agbalin a paset ti bukodda a kapadasan ti pannakilangen ti Dios kadakuada.

Serioso a pammalagip daytoy maipapan iti kinapateg ti panangipakita iti umiso nga ulidan. Ti “kita ti tattao [a] rebbeng koma a pagbalinan[tayo] kadagiti nasantuan a panagbibiag ken ar-aramid ti nadiosan a debosion” ket makatulong unay a mangted iti sibibiag a pagtuladan dagidiay isursurotayo no kasanoda nga iyaplikar dagiti prinsipio ti Biblia. (2 Ped. 3:11) No paregtaem ti iyad-adalam iti Biblia a mangbasa a regular iti Sao ti Dios, naanepka met koma a mismo a mangbasa iti dayta. No kayatmo a masursuro dagiti annakmo a tungpalen dagiti prinsipio ti Biblia, siguraduem a makitada a dagiti tigtignaymo ket maitunosda iti pagayatan ti Dios. No ibagam iti kongregasion nga agregtada iti ministerio, siguraduem a makiramramanka a naan-anay iti dayta a trabaho. No tungpalem ti isursurom, ad-adda a magutugotmo dagiti dadduma.​—Roma 2:21-23.

Tapno maparang-aymo ti panangisurom, isaludsodmo iti bagim: ‘No mangisuroak, ar-aramidek aya dayta iti wagas a balbaliwanna ti kababalin, panagsasao, wenno tigtignay dagidiay agdengdengngeg? Tapno agbatad dagiti bambanag, igidgidiatko met laeng aya ti maysa nga ideya wenno aramid iti daydiay sabali? Ania ti ar-aramidek tapno matulongak dagiti iyad-adalak, dagiti annakko, wenno dagiti agdengdengngeg iti gimong tapno matandaananda ti ibagbagak? Silalawag aya nga ipakpakitak kadagiti agdengdengngeg no kasanoda a mayaplikar ti maad-adalda? Makitada aya a tungtungpalek ti isursurok kadakuada? Matarusanda aya no kasano a ti reaksionda iti banag a maad-adalda maapektaranna ti relasionda ken Jehova?’ (Prov. 9:10) Laglagipem a kanayon dagitoy bayat a patpatanorem ti abilidadmo kas mannursuro. “Itultuloymo nga asikasuen ti bagim ken ti isursurom. Agtalinaedka kadagitoy a banag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.”​—1 Tim. 4:16.