Napadasam kadi ti naitublak idi ubingka? Baka nasugat ti imam wenno nagarumiadan ti tumengmo. Malagipmo kadi no kasano a pinakalmanaka ni nanangmo? Baka dinalusanna ti sugatmo sa inikkanna iti band-aid. Nagsangitka, ngem nabang-aranka idi inay-ayo ken inarakupnaka iti nairut. Kadagidi a tiempo, kanayon nga adda dagus mangliwliwa kenka.

Ngem bayat a dumakdakkeltayo, saanen a kasta kasimple ti biag. Kumarkaro dagiti problema ket kasla awanen ti makaited iti kasapulantayo a liwliwa. Makapaladingit ta no kadagiti problema dagiti adulto, saanen a basta band-aid ken arakup ti ina ti solusion. Panunotem dagitoy a pagarigan.

• Napadasam kadin ti na-stress gapu ta naikkatka iti trabaho? Kuna ni Julian a permi a naburiboran idi bigla a nasesante. Napanunotna, ‘Kasanok itan a masuportaran ti pamiliak? No mano a tawen a nagsaksakripisioak iti daytoy a kompania, sa ita, ibilangdakon nga awan serserbina?’

• Baka panagriknam, nagtupak ti langit kenka ta nagsinakayo iti asawam. Inyestoria ni Raquel: “Idi bigla a tinalawannak ni lakayko 18 a bulanen ti napalabas, nalapunosak iti liday. Kasla mapigpigis ti barukongko. Nasaktan la unay ti riknak ken naapektaran ti salun-atko. Madandanaganak idi.”

• Mabalin a nakaro ti sakitmo ket kasla awanen ti namnamam nga umimbag. Posible a nariknam ti kas iti insennaay ti patriarka a ni Job: “Saanko a kayaten ti agbiag! Awanen serserbi ti biagko.” (Job 7:16, Ti Baro a Naimbag a Damag Biblia) Siguro nariknam met ti narikna ni Luis, a nasuroken a 80 ti tawenna. Inaminna: “No dadduma, panagriknak ket iyur-urayko laengen ti ipapatayko.”

• Wenno posible a kasapulam ti liwliwa gapu iti ipapatay ti maysa nga ipatpategmo. “Natay ti barok idi naaksidente ti eroplano a naglugananna. Idi damo, kasla diak mamati,” inyestoria ni Robert. “Idi kuan, mariknakon ti sakit, ti sakit nga impada ti Biblia iti panangsalput ti atiddog a kampilan.”—Lucas 2:35.

Ngem naliwliwa da Robert, Luis, Raquel, ken Julian uray no nagrigat ti situasionda. Nabirokanda ti kasayaatan a paggapuan ti liwliwa—awan sabali no di ti Mannakabalin-amin a Dios. Kasano a mangmangted iti liwliwa ti Dios? Itedna met kadi kenka ti kasapulam a liwliwa?

Ni Jehovaa ket inladawan ni apostol Pablo kas ‘Dios ti amin a liwliwa, a mangliwliwa kadatayo iti amin a rigattayo.’ (2 Corinto 1:3, 4) Ipasigurado ngarud ti Biblia a kabaelan ti nailangitan nga Amatayo a tulongan ti amin ken maliwliwanatayo uray kasla bagyo ti trahedia a dumteng.

Siempre, masapul nga adda aramidentayo no kayattayo a liwliwaennatayo ti Dios. Kas pagarigan, kasanonatayo a matulongan ti doktor no ditayo met mapan kenkuana? Isu nga ibagbaga ti Biblia kadatayo: “Umadanikayo iti Dios, ket isu umadaninto kadakayo.”—Santiago 4:8.

Apay a masiguradotayo a kayat ti Dios ti umasideg kadatayo? Umuna, maulit-ulit nga imbagana a kayatnatayo a tulongan. (Kitaem ti kahon.) Maikadua, adda nabileg a testimonia dagiti agpaypayso a tattao a liniwliwa ti Dios iti panawentayo ken iti napalabas.

Kas iti adu nga agpatpatulong iti Dios ita, naipasango met ni Ari David kadagiti agsusukot a trahedia. Naminsan, impakaasina ken Jehova: “Denggem ti timek dagiti panagpakaasik inton agpatulongak kenka.” Dimngeg kadi ti Dios? Wen. Innayon ni David: “Natulonganak, iti kasta agrag-o ti pusok.”—Salmo 28:2, 7.

TI AKEM NI JESUS A MANGLIWLIWA

Pinanggep ti Dios a maaddaan ni Jesus iti napateg nga akem iti panangipaay iti liwliwa. Isu a karaman kadagiti trabaho nga intalek ti Dios ken ni Jesus ket “mangpatapat iti nasnaayan ti pusona” ken “mangliwliwa kadagidiay amin nga agledleddaang.” (Isaias 61:1, 2) Kas naipakpakauna, nagpaiduma idi ti impakitana nga interes kadagidiay ‘nabambannogan ken nadagdagsenan.’—Mateo 11:28-30.

Liniwliwa ni Jesus dagiti tattao babaen iti nagsasayaat a balakadna, naimbag a panangtratona kadakuada, ken no dadduma, panangagasna kadagiti sakitda. Naminsan, nagpakaasi ken Jesus ti maysa a lalaki nga adda leprosy-na: “No kayatmo laeng koma, kabaelannak a dalusan.” Gapu iti asi, insungbat ni Jesus: “Kayatko. Madalusanka koma.” (Marcos 1:40, 41) Ket immimbag ti lalaki.

Awanen ita ditoy daga ti Anak ti Dios tapno liwliwaennatayo a mismo. Ngem ni Jehova nga Amana, a “Dios ti amin a liwliwa,” ket agtultuloy a tumultulong kadagiti agkasapulan iti liwliwa. (2 Corinto 1:3) Kitaem ti uppat a kangrunaan nga us-usaren ti Dios a mangliwliwa kadagiti tattao.

• Ti Biblia. “Amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.”—Roma 15:4.

• Ti Nasantuan nga Espiritu ti Dios. Di nagbayag kalpasan a natay ni Jesus, narikna ti intero a kongregasion Kristiano ti talna. Ngamin, “magmagna dayta iti panagbuteng ken Jehova ken iti panangliwliwa ti nasantuan nga espiritu.” (Aramid 9:31) Ti nasantuan nga espiritu, ti puersa nga us-usaren ti Dios, ket nakapigpigsa. Mabalin nga usarenna dayta a mangliwliwa iti aniaman a situasion.

• Kararag. Imbalakad ti Biblia: ‘Dikay maringgoran iti aniaman. Maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo.’—Filipos 4:6, 7.

• Dagiti Pada a Kristiano. Pudpudnoda a gagayyem a mapangnamnamaan a makaited iti liwliwa kadagiti narigat a situasion. Inladawan ni apostol Pablo dagiti kakaduana kas paggapuan ti “makapabileg a tulong” iti panawen ti ‘panagkasapulan ken rigat.’—Colosas 4:11; 1 Tesalonica 3:7.

Ngem baka pampanunotem no kasano kaagpayso dagita. Ammuentayo ti ad-adu pay maipapan iti kapadasan dagiti tattao a naipasango kadagiti problema a naibaga iti rugi daytoy nga artikulo. Kas kadakuada, makitamto a tungtungpalen latta ti Dios daytoy a makapabang-ar a kari: “Kas iti tao nga agtultuloy a liwliwaen ti bukodna nga ina, kasta ti agtultuloy a panangliwliwak a mismo kadakayo.”—Isaias 66:13.

NO NAAWANANKA ITI TRABAHO

“Naggiddankami ken baketko a naawanan iti trabaho,” malagip ni Seth.a “Dua a tawen a nagdepende ti pamiliami iti tulong ti gobierno ken masapul nga agtrabahokami iti nadagsen. Na-depress ni Priscilla a baketko, ken panagriknak, awanen serserbik.

“Ania ti nakatulong? Kanayon a panunoten ni Priscilla ti sasao ni Jesus iti Mateo 6:34 a ditay koma pakadanagan ti sumaruno nga aldaw, ta kada aldaw, adda bukodna a pakadanagan. Nakatulong pay ken baketko ti naimpusuan a panagkarkararag tapno saan a sumuko. Naliwliwaak met iti kuna ti Salmo 55:22. Kas iti nangisurat iti dayta, impalladawko ken Apo Jehova dagiti dadagsenko, ket nakitak a talaga a tinulongannak. Adda trabahok itan, ngem pagtaltalinaedenmi a simple ti biagmi kas iti imbalakad ni Jesus iti Mateo 6:20-22. Kangrunaan iti amin, naas-asidegkamin iti Dios ken nadekdekketkamin kas agassawa.”

“Idi nabangkrap ti bassit a negosio ti pamiliami, nagdanagak no kasanonto ngatan ti biagmi,” kuna ni Jonathan. “Gapu iti krisis, napukaw a kasla asuk ti nagbambannoganmi iti 20 a tawen. Pagap-apaanmin ken baket ti maipapan iti kuarta. Dimi payen maitured nga usaren ti credit card-mi no aggatangkami ta baka dida awaten.

“Ngem iti tulong ti Biblia ken nasantuan nga espiritu ti Dios, nakaaramidkami kadagiti nasayaat a desision. Nasursurok nga awaten ti aniaman a trabaho, ken kinissayanmi ti amin a saan nga importante a paggastuanmi. Tinulongandakami pay dagiti padami a Saksi ni Jehova. Pinatibkerda ti pakinakemmi ken intedda ti kasapulanmi idi marigrigatankami.”

NO NAGSINAKAYO ITI ASAWAM

“Idi bigla a pinanawannak ni lakayko, nasaktanak ken nakapungtotak,” kuna ni Raquel. “Kaslaak la malmes iti nakaro a liday. Ngem immasidegak iti Dios ket liniwliwanak. Kimmalma ti riknak gapu iti inaldaw a panagkararagko iti Dios. Pinaimbagna ti nasugatan a pusok.

“Ken gapu iti tulong ti Biblia a Saona, nalabanak ti pungtot ken sakit ti nakemko. Impapusok ti imbaga ni apostol Pablo iti Roma 12:21: ‘Dika ipalubos a parmekennaka ti dakes, no di ket itultuloymo a parmeken ti dakes babaen ti naimbag.’

“Iti tulong ti maysa a nasayaat a gayyem, nakitak a kasapulan a lipatekon ti napasamak. Impabasana ti Eclesiastes 3:6 ken siaayat nga imbagana nga adda dagiti tiempo a masapul a ‘baybay-antayo’ lattan ti napasamak. Kasla tungpa dayta a balakad ngem dayta idi ti kasapulak. Adda itan baro a planok iti biag.”

“Kasapulam ti tulong no nagsinakayo iti asawam,” kuna ni Elizabeth. “Adda nadungngo a gayyemko nga inaldaw a timmultulong kaniak. Nakipagsangit kaniak, liniwliwanak, ken impariknana nga adda mangipatpateg kaniak. Siguradoak nga isu ti inusar ni Apo Jehova a mangagas kadagiti sugat ti pusok.”

NO AGSAKIT, LUMAKAY WENNO BUMAKETKAN

Ni Luis, a naibaga iti umuna nga artikulo, ket addaan iti nakaro a sakit ti puso, ken namindua a dandanin natay. Kasapulan a naka-oxygen iti 16 nga oras iti kada aldaw. “Kanayon nga agkarkararagak ken Apo Jehova,” kunana. “Ket kalpasan nga agkararagak iti Dios, mariknak a papigsaennak ti espirituna. Pimmigsa ti pakinakemko a di sumuko ta mamatiak a tulongannak ti Dios, ken ammok nga ay-ayatennak.”

“Adu ti kayatko nga aramiden, ngem diakon kabaelan,” imbaga ni Petra, a nasuroken a 80 ti tawenna. “Nagrigat nga awaten nga agrakrakayan ti salun-atko. Nakakapkapsutakon, ken nakadependeak laengen iti agas. Kanayon a mapampanunotko ti panangipakaasi ni Jesus iti Amana a no mabalin, ilisina iti maysa a pakarigatan. Ngem isu ket pinapigsa ni Jehova, ken pappapigsaennak met. Ti panagkararag ti inaldaw a mangag-agas kaniak. Lumag-an ti riknak no makasaritak ti Dios.”—Mateo 26:39.

Kasta met ti marikrikna ni Julian, a dandani 30 a tawenen a makilablaban iti sakitna a multiple sclerosis. “Dati, nakatugawak iti opisina kas boss, ngem ita, iti laengen wheelchair,” kunana. “Ngem adda latta serbi ti biagko, ta nakapokusak a tumultulong iti dadduma. No mangmangtedak, mapalag-ananak iti panagrigrigatko. Ken talaga a tungtungpalen ni Apo Jehova ti karina a papigsaennatayo no kumapsuttayo. Kas ken apostol Pablo, maibagak met: ‘Ta iti amin a bambanag addaanak iti bileg gapu iti daydiay mangmangted kaniak iti pannakabalin.’”—Filipos 4:13.

NO NATAYANKA

“Idi natay ni Papa iti maysa nga aksidente, nagrigatko a patien idi damo,” malagip ni Antonio. “Apay a kasdiay ti napasamak? Magmagna laeng met idi. Ngem awanen ti maaramidak. Lima nga aldaw a comatose sa natay. No adda ni Mama, tepteppelak ti agsangit, ngem no agmaymaysaakon, diakon makontrol. ‘Apay? Apay?’ sangkasaludsodko.

“Kadagidiay a nakalidliday nga aldaw iti biagko, kanayon nga agpatpatulongak ken Apo Jehova tapno makontrolko ti emosionko ken agbalin a natalna ti panunotko. Ket in-inut no kua nga agkalma ti riknak. Nalagipko ti imbaga ti Biblia a mabalin a maipasangotayo amin iti ‘di mapakpakadaan a pasamak.’ Kombinsidoak a makitakto manen ni Papa inton panagungar ta saan nga agulbod ti Dios.”—Eclesiastes 9:11; Juan 11:25; Tito 1:2.

Kasta met laeng ti kapanunotan ni Robert, a naibaga iti umuna nga artikulo. Kunana: “Iti tulong dagiti kararagmi ken Ama Jehova, naaddaankami ken baketko iti talna ti panunot a nadakamat iti Filipos 4:6, 7. Gapu iti dayta, naibagami pay kadagiti reporter ti maipapan iti namnamatayo a panagungar. Uray natay ti anakmi idi nag-crash ti eroplano a naglugananna, adu latta dagiti malaglagipmi a nararagsak a panagkakaduami. Ikarkarigatanmi ti agpokus kadagita.

“Imbaga dagiti padami a Saksi a nabuyadakami iti TV a kalmado a nangilawlawag iti pammatitayo. Kinunami met nga awan duadua a gapu dayta iti nagadu a karkararagda para kadakami. Kombinsidoak a tultulongannakami ni Jehova babaen iti di mabilang a makaliwliwa a mensaheda.”

Kas ipakita dagita a kapadasan, kabaelan ti Dios a liwliwaen dagiti tattao uray agduduma ti sangsanguenda a problema ken pakarigatan. Sika ngay? Aniaman ti problemam, sigurado nga adda mabirokam a liwliwa.b Isu nga apay a dimo padasen ti agpatulong ken Jehova? Isu ti “Dios ti amin a liwliwa.”—2 Corinto 1:3.