NO KASARITAM ti dadduma maipapan kadagiti panggep ti Dios, pribado man wenno iti plataporma, masapul a ti salsalaysayem ket naipamaysa iti Sao ti Dios. Masansan a ramanen daytoy ti panangbasa kadagiti kasuratan iti Biblia, a rumbeng a nasayaat ti pannakaibasana.

Ti Maitutop a Panangipaganetget Ramanenna ti Rikna. Rumbeng nga ibasa ti kasuratan nga addaan rikna. Amirisem ti sumagmamano a pagarigan. No ibasam iti napigsa ti Salmo 37:11, agminar koma iti timekmo ti naragsak a panangsegga iti talna a naikari sadiay. No ibasam ti Apocalipsis 21:4 maipapan iti panagpatingga ti panagsagaba ken ipapatay, masapul nga ipasimudaag ti timekmo ti nabara a panangapresiar iti nakaskasdaaw a bang-ar a naipadto. Rumbeng a maibasa nga addaan naganat a tono ti Apocalipsis 18:2, 4, 5, a mangidagdagadag iti iruruar iti napnuan basol a “Babilonia a Dakkel.” Siempre, mayebkas koma ti rikna a naimpusuan ngem saan nga aglablabes. Ti maitutop a pannakayebkas ti emosion ket agpannuray iti teksto a mismo ken iti wagas a pannakausarna.

Ipaganetget Dagiti Umiso a Sasao. No dagiti komentom iti maysa a bersikulo ket naisentro iti maysa la a paset, itampokmo dayta a paset no ibasam ti teksto. Kas pagarigan, no ibasbasam ti Mateo 6:33, saan a “ti kinalintegna” wenno “amin dagitoy sabali pay a bambanag” ti kangrunaan nga igunamgunammo no panggepmo nga ilawlawag ti kaipapanan ti “sapulen nga umuna ti pagarian.”

No agpalawagka iti Gimong ti Serbisio, mabalin a panggepmo nga ibasa ti Mateo 28:19. Aniada a sasao ti masapul nga ipaganetgetmo? No kayatmo nga iparegta ti kinasaet iti panangirugi kadagiti panagadal iti Biblia, “mangaramidkayo iti ad-adalan” ti igunamgunammo. Iti sabali a bangir, no panggepmo a salaysayen ti maipapan iti responsabilidad dagiti Kristiano a mangiranud iti kinapudno a masarakan iti Biblia kadagiti tattao a taga sabali a pagilian wenno kayatmo a paregtaen dagiti dadduma nga agibumbunannag nga agserbi iti lugar a dakdakkel ti pakasapulan, “tattao iti amin a nasion” ti igunamgunammo.

Masansan a mausar ti maysa a teksto a kas sungbat iti maysa a saludsod wenno kas pangsuporta iti argumento a kontrobersial kadagiti dadduma. No agpapada ti pannakaipaganetget ti amin a kapanunotan a nayebkas iti dayta a teksto, mabalin a saan a makita dagiti agdengdengngeg no ania ti pakainaigan ti teksto iti punto. Mabalin a nabatad kenka ti punto ngem saan kadakuada.

Kas pagarigan, no ibasam ti Salmo 83:18 iti Biblia a naglaon iti nagan ti Dios, mabalin a saan a maawatan ti bumalay ti nakabatbatad a kinapudno nga adda personal a nagan ti Dios no ti laeng sasao a “ti Kangatuan” ti ipaganetgetmo. Masapul nga igunamgunammo ti nagan a “Jehova.” Ngem no dayta met la a teksto ti usarem a mangilawlawag iti kinasoberano ni Jehova, ti sasao a “ti Kangatuan” ti kangrunaan nga ipaganetgetmo. Kasta met, no usarem ti Santiago 2:24 a mangipakita a masapul a mapakuyogan ti pammati iti aramid, mabalin a saan a maala dagiti dadduma nga agdengdengngeg ti punto no “maideklara a nalinteg” ti nangnangruna nga ipaganetgetmo imbes a “kadagiti aramid.”

Masarakan iti Roma 15:7-13 ti sabali pay a makatulong a pagarigan. Paset daytoy ti surat ni apostol Pablo iti kongregasion a buklen dagiti Gentil ken natural a Judio. Inlawlawag ditoy ti apostol a saan laeng a dagiti nakugit a Judio ti mabenepisiaran iti ministerio ni Kristo no di pay ket dagiti tattao iti nasnasion tapno “dagiti nasion maidaydayawda ti Dios gapu iti asina.” Kalpasanna, nagadaw ni Pablo iti uppat a kasuratan, nga inturongna ti atension iti dayta a gundaway nga agpaay kadagiti nasion. Kasano ti panangbasam kadagita a naadaw a teksto tapno maipaganetgetmo ti punto a pampanunoten ni Pablo? No markaam dagiti sasao nga igunamgunammo, mabalinmo nga itampok “dagiti nasion” iti bersikulo 9, “dakayo a nasnasion” iti bersikulo 10, “dakayo amin a nasion” ken “dagiti amin nga ili” iti bersikulo 11, ken “dagiti nasion” iti bersikulo 12. Padasem a basaen ti Roma 15:7-13 a buyogen ti kasta a panangipaganetget. No aramidem dayta, nalawlawag ken nalaklaka a matarusan ti intero nga argumento ni Pablo.

Dagiti Pamay-an ti Panangipaganetget. Mabalin nga ipaganetget iti nadumaduma a wagas dagiti mangiruar iti ideya a sasao a kayatmo a pagminaren. Dagiti pamay-an nga usarem ket mayataday koma iti kasuratan ken iti eksena ti palawagmo. Adda sumagmamano a maisingasing ditoy.

Panangigunamgunam babaen ti timek. Ramanen daytoy ti panagbaliwbaliw iti timek a mamagminar kadagiti mangiruar iti ideya a sasao tapno maiduma kadagiti sabali a paset ti sentensia. Mabalin a maipaganetget ti maysa a punto no baliwam ti kapigsa ti timek​—pigsaam wenno pakapsutem. Iti adu a lenguahe, ad-adda a maipaganetget ti punto no mabaliwan ti kangato ti timek. Ngem iti dadduma a lenguahe, mabalin a baliwanna a mamimpinsan ti kaipapananna. No maibambannayat dagiti kangrunaan a sasao, ad-adda ti pannakaigunamgunam dagita. Kadagiti lenguahe a dida palubosan ti panangigunamgunam babaen ti timek a kas pamay-an ti panangipaganetget kadagiti sasao, nasken nga usaren ti aniaman a kadawyan iti dayta a lenguahe tapno maibanag ti matarigagayan a resulta.

Panagsarimadeng. Mabalin nga aramiden daytoy sakbay wenno kalpasan ti panangbasa iti kangrunaan a paset ti kasuratan​—wenno agpada. Ti panagsarimadeng sakbay la unay nga ibasam ti kangrunaan a kapanunotan parnuayenna ti panagsegga; ti panagsarimadeng kalpasanna ipasagepsepna daydiay naigunamgunam. Nupay kasta, no adu unay ti panagsarimadeng, awan ti maitampok.

Panangulit. Maipaganetgetmo ti maysa a punto babaen ti panagsardengmo, sa ulitem nga ibasa ti sao wenno grupo ti sasao. Ti pamay-an a masansan a maus-usar isu ti aglaylayon a panangibasa iti teksto ket kalpasanna uliten ti kangrunaan a sasao.

Panagkompas. Masansan a ti panaggaraw ti bagi agraman ti ekspresion ti rupa nayonanna iti emosion ti maysa a sao wenno grupo ti sasao.

Tono ti timek. Iti dadduma a lenguahe, no dadduma maibasa dagiti sao iti tono a mangimpluensia iti kaipapananda ken mangilasin kadagita. Uray ditoy, masapul ti panagannad, nangnangruna no mausar a panglais.

No Sabali ti Mangibasa Kadagiti Teksto. No ti bumalay ti mangibasa iti kasuratan, mabalin a sabali a sasao wenno awan pay ketdi a pulos ti maigunamgunamna. Ania ngarud ti mabalin nga aramidem? Kaaduanna, nasaysayaat no pagminarem ti kaipapananna babaen ti panangyaplikarmo kadagiti teksto. Kalpasan a mailawlawagmo ti aplikasionna, mabalinmo a direkta nga ipamaysa ti atensionna kadagiti mangiruar iti ideya a sasao iti Biblia.

NO ISURSUROTAYO dagiti sabali, saan nga umdas ti basta panangbasa kadagiti bersikulo iti Biblia. Insurat ni apostol Pablo iti kaduana a ni Timoteo: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.”​—2 Tim. 2:15.

Tapno maaramid daytoy, masapul a ti panangilawlawagtayo iti kasuratan ket maitunos iti isursuro ti Biblia. Masapul nga ikonsiderartayo ti konteksto, imbes nga agpilitayo laeng kadagiti sasao a magustuantayo ken inayon dagiti bukodtayo nga ideya. Babaen ken ni propeta Jeremias, pinakdaaran ni Jehova dagiti mammadto a nagkuna a nagtaud ken ni Jehova ti sasawenda idinto ta iti kinapudnona, “sirmata ti bukodda a puso” ti ibagbagada. (Jer. 23:16) Pinakdaaran ni apostol Pablo dagiti Kristiano maipapan iti pananglaok iti Sao ti Dios kadagiti natauan a pilosopia idi insuratna: “Nagpanawanmi ti mailimlimed a bambanag nga ibain, a saan a magmagna a sisisikap, wenno lalaokan ti sao ti Dios.” Kadagidi a tiempo, laokan dagiti nakusit a komersiante dagiti arakda tapno umadu ket dakdakkel ti makuartada. Saantay a lalaokan ti Sao ti Dios babaen ti panangigamportayo iti dayta kadagiti natauan a pilosopia. “Saantayo a managilako iti sao ti Dios a kas iti adu a tattao,” kuna ni Pablo, “no di ket gapu iti kinapasnek, wen, kas naibaon manipud iti Dios, iti imatang ti Dios, a maikuyog ken Kristo, agsasaotayo.”​—2 Cor. 2:17; 4:2.

No dadduma, mabalin a mangadawka iti kasuratan a mangitampok iti maysa a prinsipio. Naglaon ti Biblia kadagiti prinsipio a mangipaay iti nasimbeng a giya iti panangtaming iti nadumaduma a kasasaad. (2 Tim. 3:16, 17) Ngem siguraduem nga umiso ti panangyaplikarmo ken saanmo a ballikugen ti maysa a kasuratan, a pagparangem a ti ibagbagana ket daydiay kayatmo nga ibaga. (Sal. 91:11, 12; Mat. 4:5, 6) Masapul a maitunos iti panggep ni Jehova ti aplikasionna, mayataday iti intero a Sao ti Dios.

Ti ‘panangaramat a siuumiso iti sao ti kinapudno’ ramanenna met ti panangtarus iti kababagas ti ibagbaga ti Biblia. Saan a “pang-or” dayta a pangbutbuteng kadagiti sabali. Nagadaw iti Kasuratan dagidi narelihiosuan a mannursuro a nangbusor ken Jesu-Kristo, ngem liniwayanda dagiti napatpateg a banag​—kas iti kinahustisia ken asi ken kinamatalek​—nga iparebbeng ti Dios. (Mat. 22:23, 24; 23:23, 24) Idi insurona ti Sao ti Dios, inyanninaw ni Jesus ti personalidad ti Amana. Ti regta ni Jesus maipaay iti kinapudno ket napakuyogan iti nauneg a panagayatna kadagiti tattao a sinursuruanna. Ikagumaantay koma a suroten ti ulidanna.​—Mat. 11:28.

Kasanotay a masigurado nga umiso ti panangyaplikartayo iti maysa a kasuratan? Makatulong ti regular a panagbasa iti Biblia. Nasken met nga apresiarentayo ti “matalek ken masirib nga adipen,” a buklen dagiti napulotan iti espiritu a Kristiano nga us-usaren ni Jehova a mangipaay iti naespirituan a taraon iti sangakabbalayan ti pammati. (Mat. 24:45) Magunggonaantayo met iti instruksion nga ipapaay ti klase matalek ken masirib nga adipen babaen ti personal a panagadal agraman ti regular nga itatabuno ken pannakiraman kadagiti gimong.

No adda iti lenguahem ti libro a Panakirinnason Manipud Kadagiti Kasuratan ket masursurom nga usaren a naimbag, adda ti sidadaan a mangiwanwan kenka tapno siuumiso a mayaplikarmo dagiti ginasut a kasuratan a masansan a mausar iti ministeriotayo. No panggepmo ti agusar iti kasuratan a saanmo a kabesado, ti kinaemma tignayennaka nga agsukimat tapno inton agpalawagka, maaramatmo a siuumiso ti sao ti kinapudno.​—Prov. 11:2.

Pagbalinem a Nalawag ti Aplikasionna. No isursurom dagiti sabali, siguraduem a makitada a silalawag no kasano a nainaig dagiti kasuratan nga us-usarem iti topiko a salsalaysayem. No iruanganmo ti kasuratan babaen ti maysa a saludsod, maawatan koma dagiti agim-imdeng kenka no kasano a sungbatan ti kasuratan dayta a saludsod. No usarem ti kasuratan a pangsuporta iti imbagam, siguraduem a matarusan a naimbag ti iyad-adalam no kasano a paneknekan ti teksto dayta a punto.

Masansan a saan nga umdas ti panangbasa laeng iti kasuratan, uray pay no maipaganetget. Laglagipem, ti ordinario a tao saanna a kabesado ti Biblia ken nalabit dina maawatan ti puntom babaen ti maminsan laeng a panagbasa. Iturongmo ti atension iti paset ti teksto a direkta nga agaplikar iti salsalaysayem.

Masansan a kalikaguman daytoy ti panangilasinmo kadagiti kangrunaan a sasao, dagidiay adda direkta a pakainaiganna iti punto a maisalsalaysay. Ti kasimplean a pamay-an ket babaen ti panangulitmo kadagiti mangiruar iti ideya a sasao. No maymaysa a tao ti kasarsaritam, mabalinmo ti mangibangon kadagiti saludsod a tumulong kenkuana a mangilasin iti kangrunaan a sasao. No grupo ti palawaganda, kaykayat dagiti dadduma a pumapalawag ti agusar iti umarngi a sasao wenno ulitenda nga ibaga ti ideya tapno maibanag ti panggepda. Ngem no kastoy ti piliem nga aramiden, annadam di la ket ta di makita dagiti agdengdengngeg no kasano a nainaig ti pannakaisao ti kasuratan iti punto a maisalsalaysay.

No nailasinmon ti kangrunaan a sasao, nakaipasdekkan iti nasayaat a pundasion. Surnadamon dayta. Iti panangiruanganmo iti kasuratan, sibabatad kadi nga impasimudaagmo no apay nga inusarmo dayta a teksto? No kasta, pagminarem no kasano a ti sasao nga intampokmo ket nainaig iti daydiay banag nga imbagam a namnamaen dagiti agdengdengngeg. Ibatadmo no ania ti pakainaigan ti teksto iti punto a dakdakamatem. Uray pay no saanmo nga inusar ti kasta a nabatad nga introduksion iti teksto, masapul a surnadam dayta.

Inyimtuod dagiti Fariseo ken Jesus ti impagarupda a narikut a saludsod, nga isu daytoy: “Nainkalintegan aya a ti maysa a lalaki idiborsiona ti asawana iti tunggal kita ti pangibatayan?” Imbasar ni Jesus ti sungbatna iti Genesis 2:24. Paliiwem ta impamaysana ti atension iti maysa la a paset ti nadakamat a teksto, ket kalpasanna, inlawlawagna no ania ti kaipapanan dayta. Idi napagminarnan a ti lalaki ken babai ket agbalinda a ‘maymaysa a lasag,’ kinuna ni Jesus: “Gapuna, ti pinagsinnangol ti Dios saan koma a pagsinaen ti tao.”​—Mat. 19:3-6.

Kasano kabayag ti panangilawlawagmo tapno nabatad ti aplikasion ti kasuratan? Agpannuray dayta iti no siasino dagiti agdengdengngeg ken iti kinapateg ti punto a maisalsalaysay. Simple ken di agpalpalikaw koma ti panangilawlawagmo.

Makirinnason Manipud iti Kasuratan. Maipapan iti ministerio ni apostol Pablo idiay Tesalonica, ibaga kadatayo ti Aramid 17:2, 3 nga isu ket ‘nakirinnason manipud iti Kasuratan.’ Daytoy ket abilidad a rebbeng a patanoren dagiti amin nga adipen ni Jehova. Kas pagarigan, dinakamat ni Pablo dagiti bambanag maipapan iti biag ken ministerio ni Jesus, nga impakitana a naipadto dagitoy iti Hebreo a Kasuratan, ket kalpasanna, nangted iti nabileg a konklusion babaen ti panagkunana: “Isu daytoy ti Kristo, daytoy Jesus nga ibumbunannagko kadakayo.”

Iti suratna kadagiti Hebreo, maulit-ulit a nagadaw ni Pablo iti Hebreo a Kasuratan. Tapno maipaganetget wenno mailawlawag ti maysa a punto, masansan nga ilasinna ti maysa a sao wenno grupo ti sasao, sana ipakita ti kaipapananna. (Heb. 12:26, 27) Iti salaysay a masarakan iti Hebreo kapitulo 3, nagadaw ni Pablo iti Salmo 95:7-11. Imutektekam ta pinalawana ti tallo a paset dayta a teksto: (1) ti pannakatukoy ti puso (Heb. 3:8-12), (2) ti kinapateg ti sasao nga “Ita nga aldaw” (Heb. 3:7, 13-15; 4:6-11), ken (3) ti kaipapanan ti sasao a: “Saanda a sumrek iti panaginanak” (Heb. 3:11, 18, 19; 4:1-11). Ikagumaam a tuladen dayta nga ulidan bayat nga iyaplikarmo ti tunggal kasuratan.

Paliiwem ti kinaepektibo ti pannakirinnason ni Jesus manipud iti Kasuratan kas naisalaysay iti Lucas 10:25-37. Insaludsod ti maysa a lalaki a nalaing iti Linteg: “Mannursuro, babaen ti panangaramidko iti ania a matawidko ti agnanayon a biag?” Kas sungbat, dinamag ni Jesus nga umuna no ania ti kapanunotan ti lalaki maipapan iti dayta, ket kalpasanna, impaganetget ni Jesus ti kinapateg ti panangaramid iti ibagbaga ti Sao ti Dios. Idi agparang a di maala ti lalaki ti punto, naan-anay nga inlawlawag ni Jesus ti maysa laeng a sao manipud iti kasuratan​—“kaarruba.” Imbes nga itedna laeng ti kayulogan dayta a sao, nagusar iti pangngarig tapno matulonganna ti lalaki a makagteng iti umiso a konklusion.

Nabatad nga iti panangsungbatna kadagiti saludsod, saan a basta nagadaw ni Jesus kadagiti teksto a mangted iti direkta ken nalawag a sungbat. Inusigna ti ibagbaga dagitoy, sana inyaplikar dagita iti saludsod a naidatag kenkuana.

Idi sinupiat dagiti Saduceo ti maipapan iti namnama a panagungar, impamaysa ni Jesus ti atensionda iti maysa nga espesipiko a paset ti Exodo 3:6. Ngem saan a nagsardeng kalpasan nga inadawna ti kasuratan. Nakirinnason iti dayta tapno silalawag a maipakitana a ti panagungar ket paset ti panggep ti Dios.​—Mar. 12:24-27.

Ti panagsursuro nga agrason a siuumiso ken epektibo manipud iti Kasuratan ket napateg iti panagbalinmo a nalaing a mannursuro.

SAAN a nainsiriban ti panangipapan a dagiti umim-imdeng kenka, indibidual man wenno maysa a grupo, ket interesado iti topikom gapu la ta interesadoka iti dayta. Napateg ti mensahem, ngem no saanmo a maibatad ti praktikal a pategna, mabalin a saanmo a matengngel ti interes dagiti agdengdengngeg.

Pudno daytoy uray kadagiti tumabuno iti Kingdom Hall. Mabalin nga umimdengda no agusarka iti ilustrasion wenno kapadasan a dida pay nangnangngeg. Ngem saanda nga umimdeng no datin nga ammoda ti ibagbagam, aglalo no saanmo a mailawlawag a nalaing. Masapul a tulongam ida a mangamiris no apay ken kasano a talaga a makagunggona kadakuada ti ibagbagam.

Paregtaennatayo ti Biblia nga agpanunot iti praktikal a pamay-an. (Prov. 3:21) Inusar ni Jehova ni Juan a Mammautisar a mangiturong kadagiti tattao “iti praktikal a kinasirib dagiti nalinteg.” (Luc. 1:17) Kinasirib daytoy a nairamut iti umno a panagbuteng ken Jehova. (Sal. 111:10) Dagidiay mangipateg iti daytoy a sirib ket matulongan a mangsango a sibaballigi iti biag ita ken mangragpat iti pudpudno a biag, biag nga agnanayon iti masanguanan.​—1 Tim. 4:8; 6:19.

Aramidem a Praktikal ti Palawagmo. Tapno agbalin a praktikal ti palawagmo, saan laeng a ti material ti panunotem a naimbag no di pay ket dagiti agdengngeg. Saanmo nga ibilang ida a kas maysa laeng a grupo. Dayta a grupo ket buklen dagiti indibidual ken pampamilia. Mabalin nga adda dita dagiti ubbing, agtutubo, nataengan, ken lallakay wenno babbaket. Mabalin nga adda dagiti kabbaro nga interesado agraman dagidiay agserserbin ken Jehova sakbay pay a nayanakka. Nataengan iti naespirituan dagiti dadduma; adda met dagidiay napalalo a maim-impluensiaan pay laeng kadagiti kababalin ken aramid ti lubong. Isaludsodmo iti bagim: ‘Kasano a makagunggona kadagiti agdengdengngeg ti material nga ipalawagko? Kasano a matulongak ida a mangtarus iti punto?’ Mabalin a kayatmo nga ipangpangruna nga ipaayan iti atension ti maysa wenno dua kadagiti grupo a nadakamat ditoy. Nupay kasta, dimo lipaten a mamimpinsan dagiti dadduma.

No ngay natudinganka a mangilawlawag iti pagdamdamuan a sursuro ti Biblia? Kasanom nga ipalawag tapno makagunggona kadagiti agdengdengngeg a datin a mamati iti dayta a sursuro? Ikagumaam a pabilgen ti pammatida iti dayta. Kasano? Babaen ti panangilawlawagmo kadagiti Nainkasuratan a pammaneknek a mangsuportar iti dayta. Mabalinmo met a paunegen ti apresasionda iti dayta a sursuro ti Biblia. Maaramidmo daytoy babaen ti panangipakitam no kasano a maitunos dayta a sursuro iti dadduma pay nga isursuro ti Biblia ken iti mismo a personalidad ni Jehova. Agusarka kadagiti ehemplo​—dagiti pudno a pasamak iti biag no mabalbalin​—a mangipakita no kasano a daytoy a sursuro ket nakatulong kadagiti tattao ken no ania ti epektona iti panangmatmatda maipapan iti masanguanan.

Saan laeng nga iti sumagmamano nga ababa a komento iti konklusion ti palawagmo nga ipakitam ti praktikal nga aplikasion ti material. Manipud iti rugi, maikuna koma ti tunggal agdengdengngeg nga “agaplikar kaniak daytoy.” No naisaadmon dayta a pundasion, itultuloymo ti mangaramid iti praktikal nga aplikasion bayat nga isalsalaysaymo ti tunggal maysa kadagiti kangrunaan a punto ti palawagmo agingga iti konklusion.

No iyaplikarmo ti maysa a punto, siguraduem nga aramiden dayta iti pamay-an a maitunos kadagiti prinsipio ti Biblia. Ania ti kayat a sawen dayta? Kayatna a sawen nga aramidem dayta iti naayat a pamay-an ken buyogen ti empatia. (1 Ped. 3:8; 1 Juan 4:8) Uray idi inasikasona dagiti narikut a problema idiay Tesalonica, impangruna ni apostol Pablo nga inturong ti atension kadagiti positibo nga aspeto ti naespirituan nga irarang-ay dagiti Kristiano a kakabsatna sadiay. Inyebkasna met ti panagtalekna a no maipapan kadagiti banag nga insalaysayna, sigurado a kayatda nga aramiden ti umiso. (1 Tes. 4:1-12) Anian a nagsayaat a pagwadan a tuladen!

Nairanta aya ti palawagmo a mangtignay kadagiti kakabsat a makiraman a mangikasaba ken mangisuro iti naimbag a damag kadagiti sabsabali? Parayrayem ti gagar ken panangipategda iti dayta a pribilehio. Ngem bayat nga aramidem ti kasta, laglagipem a nagduduma ti kabaelan ti tunggal maysa a makiraman iti dayta a pribilehio, ket dinakamat daytoy ti Biblia. (Mat. 13:23) Saanmo a konsiensiaen dagiti kakabsatmo. Idagadag ti Hebreo 10:24 a “mangparegta[tayo] iti ayat ken nasayaat nga ar-aramid.” No mangparegtatayo iti ayat, aramidenda dagiti banag a naibatay iti nasayaat a motibo. Imbes nga idiktartayo ti itutunosda, bigbigentayo a ti kayat ni Jehova isu ti panangiparegtatayo iti “kinatulnog babaen ti pammati.” (Roma 16:26) No silalagiptayo iti daytoy, ikagumaantay a pabilgen ti pammati​—ti bukodtayo a pammati ken ti pammati dagiti kakabsattayo.

Panangtulong Kadagiti Dadduma a Mangtarus iti Punto. Bayat a kaskasabaam dagiti dadduma, dimo liwayan nga itampok ti praktikal a kinapateg ti naimbag a damag. Masapul nga amirisem no ania ti pakaseknan dagiti tattao iti teritoriayo. Kasanom a maammuan? Agdengngegka iti damdamag iti radio wenno telebision. Basaem ti umuna a panid ti diario. Kasta met, makitungtongka kadagiti tattao, ken umimdengka no agsaoda. Mabalin a matakuatam a sarsarangtenda dagiti makaburibor a problema​—pannakapukaw ti panggedan, panagbayad iti abang, panagsakit, ipapatay ti kameng ti pamilia, panagpeggad iti krimen, kinaawan hustisia iti ima ti tao nga addaan autoridad, panagsina ti agassawa, panangkontrol kadagiti ubbing, ken dadduma pay. Matulongan aya ida ti Biblia? Wen.

No mangirugika iti tungtongan, nalabit adda topiko a pampanunotem. Ngem no ipasimudaag ti katungtongmo nga adda sabali a banag a paginteresanna unay, dika bumdeng a makisarita maipapan iti dayta no la ket ta kabaelam, wenno ibagam kenkuana a mangitugotka iti makatulong nga impormasion inton agsublika. Siempre, liklikantayo ti ‘makibiang iti saantay a pakaseknan,’ ngem maragsakantayo a mangiranud kadagiti dadduma iti praktikal a balakad nga ipaay ti Biblia. (2 Tes. 3:11) Nabatad a ti kangrunaan a manggutugot kadagiti tattao isu ti balakad ti Biblia a mangapektar iti mismo a biagda.

No di mabigbig dagiti tattao no kasano a personal nga apektaran ida ti mensahetayo, mabalin nga isardengda a dagus ti makitungtong. Uray no palubosandatayo nga agsao, no ditay maipabigbig kadakuada ti praktikal a pateg ti topiko, mabalin a bassit unay ti epekto ti mensahetayo iti biagda. Iti sabali a bangir, no ibatadtayo ti praktikal a pateg ti mensahe, ti pannakisaritatayo mabalin a dakkel ti epektona iti biag dagiti tattao.

No mangyad-adalka iti Biblia, itultuloymo nga itampok ti praktikal nga aplikasion. (Prov. 4:7) Tulongam dagiti iyad-adalam a mangtarus kadagiti Nainkasuratan a balakad, prinsipio, ken ulidan a mangipakita kadakuada no kasano ti magna kadagiti dalan ni Jehova. Igunamgunammo dagiti pagimbagan ti panangaramid iti kasta. (Isa. 48:17, 18) Daytoy ti manggutugot kadagiti iyad-adalam a mangaramid kadagiti kasapulan a panagbalbaliw iti biagda. Patanorem ti panagayatda ken ni Jehova ken ti panagtarigagayda a mangay-ayo kenkuana, ken bay-am nga aggubuay iti pusoda ti pannakagutugotda a mangyaplikar iti balakad ti Sao ti Dios.