Ti Pagdalus ti Carpenter Ant iti Antenana

Para iti maysa nga insekto, napateg ti kinadalus tapno makatayab, makakalay-at, ken maammuanna ti mapaspasamak iti aglawlawna. Kas pagarigan, no narugit ti rungo wenno antena ti kuton, kumapuy ti abilidadna nga agsawar, makikomunikar, ken agangot. Gapu iti dayta, “awan a pulos ti makitam a dugyot nga insekto,” kuna ti zoologist a ni Alexander Hackmann. “Ammoda ti aramidenda no marugitan ti bagida.”

Panunotem: Inadal ni Hackmann ken dagiti katrabahuanna ti pamay-an ti maysa a kita ti kuton a maawagan iti carpenter ant (Camponotus rufifemur) a mangdalus iti antenana. Naammuanda nga ikkaten ti kuton dagiti nagduduma ti kadakkelna a rugit a dimket iti antenana babaen ti panangpilkona iti gurongna tapno agbalin a kasla ipit sana guyoden ti tunggal antena nga inipitna iti pinilkona a gurongna. Dagiti nakersang a pannakangipen ti arig sagaysay a gurongna ti mangikkat iti kadakkelan a rugit. Dagiti babbabassit a rugit ket maikkat babaen ti pino a ngipen ti arig sagaysay a gurongna, a ti nagbabaetan dagita a ngipen ket kas iti kapino dagiti muldot iti antena ti kuton. Kalpasanna, dagiti kabassitan a rugit​—a kas iti kabassit ti 1/80 ti diametro ti buok ti tao—​ket ikkaten dagiti kasla sugod ti kapinona a paset ti arig sagaysay a gurongna.

Buyaem ti panangdalus ti carpenter ant iti antenana

Patien ni Hackmann ken dagiti katrabahuanna a ti pamay-an dagiti kuton tapno agtalinaed a nadalus ti antenada ket mabalin a mausar iti industria. Kas pagarigan, dagiti umasping a pamay-an ket makatulong iti panangmantener iti kinadalus bayat ti panagaramid kadagiti delikado a nagbabassit nga elektroniko nga alikamen ken semiconductor, nga agbalin a depektibo no makaptan iti uray bassit laeng a rugit.