Makaserbikayo Kadi nga Auxiliary Payunir iti Marso ken Abril?
1 Inrubuat ni Jesus iti panangasaba a trabaho iti kasta a kapategna a ti masanguanan iti amin a sangatauan ket agpannurayda iti pagbanaganna. (Mat. 4:17) Magtengan daytoy a trabaho ti ngudona sakbay unay “iti panungpalan,” inton ti mensahe ti Pagarian ket “maikasaba iti amin a mapagnaedan a daga a kas pammaneknek iti amin a nasion.”—Mat. 24:14.
2 Mas apurado itan daytoy a trabaho ngem iti napalabas. Ti auxiliary payunir nga urnos isut’ namaregta iti adu a mas aktibo a mangiringpas iti trabaho. Mabalinyo kadi ti agserbi nga auxiliary payunir iti Marso ken Abril?
NAIMBAG NGA OPORTUNIDAD ITI MARSO KEN ABRIL
3 Idinto ta ti Marso ket addaan lima a Sabado ken ti Abril addaan iti lima a Domingo, dagitoy dagiti ekselente a bulbulan a maipaay iti auxiliary payunir a trabaho. Uray pay dagiti dadduma nga addaan iti amin a tiempo a panggedan mabalinda nga aramiden daytoy. Dadduma kadagiti nagpayunir idi napan a tawen iti nabendisionan iti nawadwad ket kayatda manen ti agserbi iti daytoy a tawen. Apay a dikay makisao maipapan iti daytoy kadagidiay nadutokanen ket dumawatkayo iti singasingda? Kasta met a mabalinyo ti tumabuno iti miting inton Pebrero 18 nga agpaay kadagiti manamnama nga auxiliary payunir ket makagun-odkayo iti kanayonan a pammaregta sadiay.
4 Agpapan pay ti panangpalawa iti serbisiotayo ket ramanenna ti panangisakripisio iti bukodtayo nga interes, babaen ti panagmulatayo iti nawadwad, umanitayo met iti nawadwad a naespirituan a bendision. (2 Cor. 9:6) Dagidiay agtrabaho iti amin a kararua a maipaay ken Jehova isudat’ “mapnuan iti rag-o” iti nawadwad a maani a baro a disipulo.—Ara. 13:48, 52.
MAYSA A TEOKRATIKO A BATO A TUKAD
5 Adu dagiti nakapadas nga immuna iti auxiliary payunir nga aramid ti nagbalin a regular payunir. Gapuna a ti auxiliary payunir a trabaho isut’ maysa a bato a tukad nga agturong iti dakdakkel a ragsak. No makapagserbikayo nga auxiliary payunir iti Marso ken Abril, mabalin a makapatanorkayo iti sasarungkaran ken panagadal ti Biblia a tumulong kadakayo iti naannayas nga iyaallatiw iti regular payunir a serbisio inton Setiembre wenno sakbay pay daytoy.
6 Apay nga umadu dagiti mangpalawa ti ministerioda iti daytoy a tiempo imbes a sapulenda dagiti material a pagimbagan daytoy a sistema? Agsipud ta ammoda a “ti lubong ket aglabas agraman iti tarigagayna, ngem daydiay mangaramid iti pagayatan ti Dios ket agtalinaed iti agnanayon.” (1 Juan 2:17) Agtignayda a maitunos iti kararagda a ti Apo iti paganian ket “mangibaon iti trabahador idiay paganian.”—Mat. 9:37, 38.
7 Ti panangaramid iti amin a kabaelan iti serbisio ni Jehova isut’ pakakomendarantayo a kas kadagidiay ‘agtrabaho a sipipinget ken ikagkagumaanda a tulongan dagiti amin a kita dagiti tattao tapno maisalakanda.’—1 Tim. 4:10.