Sigaganetget a Mangiwaragawag iti Mensahe ti Pagarian
1 Ni Jehova isu ti Dios dagiti naimbag nga ar-aramid, ken naganetget a mangiringpas kadakuada. Aniaman a banag nga aramidenna isu ti pagimbagan dagidiay agserserbi kenkuana. Ni Jesus nangited ti nasayaat nga ulidan iti panangtulad ti ganetget ni Amana. Datayo kasapulantay met nga ipakita ti ganetget iti serbisiotayo ken ni Jehova a Dios no kayattayo a mabigbig kas maysa a nasion a “naganetget para kadagiti naimbag nga ar-aramid.”—Tito 2:14.
2 Dagiti naimbag nga ar-aramid dagiti Kristiano ket makagunggona kadagiti dadduma. Ti kasayaatan a banag a maaramidtayo para ti sabali a tao isu ti panangtulongtayo kenkuana a mangammo ken agserbi ken ni Jehova. (Juan 17:3) It-itedtayo dayta a tulong babaen ti naganetget a trabaho a panangasaba ti Pagarian ken panangaramid ti ad-adalan.
3 Ania ti ganetget? Ti ganetget isu ti kinaregta. Ti Nakristianuan a ganetget agtaud manipud ti natalged a tarigagay nga agaramid ti umiso ken naimbag. Ti Griego a sao para ti “ganetget” kaipapananna ti “agburek.” Kas ministros ti Dios, kasapulan nga ipakitatayo daytoy a kalidad kabayatan nga isaksaknaptayo ti damag ti Pagarian. Naganetgettayo kadi iti ministerio? Ar-aramidentayo kadi ti amin a kabaelantayo a mangtulong kadagiti dadduma a makaadal kadagiti pangpanggep ni Jehova?
IPAKITA TI GANETGET ITI PANANGITUKON ITI SUSKRIPSION
4 Iti bulan ti Oktubre, maaddaantayo manen ti pribilehio a mangitukon ti maysa a tawen a suskripsion para ti Agriingkayo! Ti Agriingkayo! paalibtakenna dagiti managbasana kadagiti napateg a paspasamak ditoy lubong. Dagiti makagutugot nga ilustrasionna a mangipakpakita kadagiti pagsidsiddaawan ti panamarsua pataudenda ti interes idiay baro a lubong ken paunegenda ti apresasiontayo para iti naayat a Namarsua.
PANANGARAMID TI PASETTAYO
5 Sakbay a maparegtatayo nga umiso dagiti nasingpet-panagpuspusona a tattao a mangbasa kadagiti magasintayo, kasapulan nga ammuentayo dagiti linaon ti tunggal maysa. Kasapulan nga ammotayo nga isinggalut daydiay Topiko a Pagsasaritaan iti isyu nga ituktukontayo. Ania dagiti espesipiko a punto idiay magasin a mabalintayo nga ibaga? No adalentayo a nalaing dagiti magasin ken apresiarentayo ida, makabalantayo a mangitukon kadakuada buyogen ti ganetget kadagiti tattao iti teritoriatayo.
6 Maysa pay, babaen ti panangawittayo kadagiti magasin kabayatan a makititienda, agbibiahe, agis-iskuela, addatayo idiay lugar ti pagtartrabahuantayo, wenno sadinoman a papanantayo, maaddaantayto kadagiti gundaway a mangasaba. Ti nasayaat-pannakapilina nga introduksion manipud Panakirinnason a libro a kadduana ti maysa a punto manipud maysa kadagiti artikulo ti mabalin a mangriing ti tarigagay ti maysa a tao a mangbasa kadagiti magasintayo.
7 No daydiay tao ket kayatna a basaen dagiti magasintayo, maipalawagtayo kenkuana ti andar ti trabahotayo ken no kasano a dagiti magasin ket maimalmaldit ti mamindua iti makabulan kas paset ti sangalubongan a trabaho ti panangisuro ti Biblia. Ti impormasion iti panid 4 ti Agriingkayo! ilawlawagna daytoy. Gapu ta dagiti linaon ti sumaganad nga isyu ket kanayon a maipakpakaammo, mabalintayo ti mangpataud kadagiti salsaludsod a maiyannatup wenno iturongtayo ti atensionna kadagiti sumaruno nga artikulo. Mabalin a mangpataud daytoy ti tarigagay daydiay tao ken manggutugot kenkuana nga agsuskribe kadagiti magasin.
8 Agsipud ta dagitoy panawentayo ket napeggad, ti mensahe nga awittayo ket naganat. Kasapulan a naganetgettayo a mangiwaragawag iti damag ti Pagarian, a patibkeren dagiti dadduma a mangammo iti Dios ken ti Saona. Babaen ti sigaganetget a panangiwaragawag iti daytoy makaited-biag a pannakaammo, ipakpakitatayo ti nadiosan a debosiontayo ken ayattayo ken ni Jehova. No ad-adu ti panawen nga itedtayo iti panangiwaragawagtayo iti damag ti Pagarian, narubrubrobto met ti ganetgettayo ken mapaneknekantayo a datayo a talaga ti maysa a nasion a naganetget kadagiti naimbag nga ar-aramid.