Panagbangon Babaen Kadagiti Di Mauram iti Apuy a Materiales

“Dadduma agusardanto iti balitok wenno pirak wenno napateg a batbato iti panangibangon iti pundasion; dadduma agusardanto iti kayo wenno ruot wenno garami.”​—1 CORINTO 3:12, Today’s English Version.

1, 2. (a) Aniat’ ad-adda a nasaksakit ngem ti pannakakita iti pannakauram ti balay ti maysa agingga iti daga? (b) Ania dagiti umas-asping a pannakaupay ti no maminsan mapasaran dagiti ministro a Kristiano?

PUDNO a nakaay-ay-ay a buya no ti nagpintasan a balay ket mauram aginggana iti daga. Anian a nakalkaldaang pay no dakayo ti nangbangon iti dayta! Ti pannakakita iti amin a panawen ken panagreggetyo a maibus iti asuk ket pudno a nakasaksakit. Kaskasdi daytoy a sakit ket awan pannakaidiligna iti sakit a marikna dagiti Kristiano a nagannak a ti anakda a lalaki wenno babai ket panawanna ti kinapudno a maipaay kadagiti bambanag iti lubong. Awanen ti nasaksakit ngem ti pannakakita ti anak ti maysa nga umay iti kasta a naespirituan a pannakadadael.

² Ti panagrikrikna iti puspuso dagiti kakasta a nagannak ti mabalin a maiyasping iti pannakaupay a nalabit napadasanyon kas maysa a Kristiano a ministro. Nalabit nakairugikayo iti maysa a panagadal ti Biblia iti maysa a tao ket nangbusbos iti adu a bulan wenno uray pay tawtawen a mangtultulong kenkuana nga umay ti pannakaammo iti kinapudno. Nakitayo nga isut’ timmabtabuno payen kadagiti panaggigimong ken nangrugi payen a makiraman iti tay-ak ti ministerio. Ngem, apaman latta, ta isut’ kimmapsut iti naespirituan ket nagbalin nga inaktibo, nalabit nagsubli pay iti dati a dakes nga ar-aramidna. Anian a makaupay!

3. No naipasango kadagiti kakasta a kasasaad, ania a salsaludsod ti natural a tumaud, ken iti ania ti pagpannurayan dagiti sungbat?

³ Nakalkaldaang a kunaen, ta daytoy ti kanayon a mapaspasamak. Gapuna natural laeng a maisaludsod: Apay a mapaspasamak dayta? Adda aya maaramidantayo iti dayta? Nupay iti mismo a kasasaad ti puso ti tao ti maysa a makagapu, no maminsan ti sungbat kadagidiay a saludsod ti agpannuray iti sungbat iti sabali pay a saludsod: No mangisursurokayo kadagiti dadduma, agibangbangonkayo met laeng aya iti umiso a pundasion babaen kadagiti di mauram iti apuy a materiales? Ti pannakaawattayo a silalawag no ania ti kaipapanan daytoy ken no kasano ti panangaramid iti dayta isut’ tulbek iti panangtulong kadagidiay nasursuruantayon​—dagiti estudiantetayo iti Biblia ken dagiti annaktayo​—tapno makapagtakderda a sititibker iti kinapudno.

Asino ti Agibangbangon?

4. Idiay 1 Corinto 3:10, 11, iti aniat’ nangiyarigan ni Pablo kadagiti Kristiano a ministro, ken kasano?

⁴ Kas sungbat, agturongtayo idiay 1 Corinto kapitulo 3, nga inyarig ni Pablo ti Kristiano a ministro kas agibangbangon. Mabasatayo: “Kas iti di magatadan a kinamanangaasi ti Dios a naited kaniak, kas masirib nga agar-aramid iti balay inkabilko ti maysa a pundasion, ket sabali ti agbalay iti rabawna. Ngem kitaen ti tunggal maysa no kasano iti panagbalayna iti rabawna. Ta awan ti makabalin a mangikabil iti sabali a pundasion no di laeng ti naikabilen, nga isu ni Jesu-Kristo.”​—Bersikulo 10, 11.

5. (a) Sigun iti konteksto, ania a kita ti trabaho ti panangbangon ti salsalaysayen ni Pablo? (b) Iti ania a kaipapanan a ti Kristiano a ministro ‘agibangbangon ti tattao’?

⁵ Ania a kita ti panagbangon ti sarsaritaen ni Pablo? Kitaenyo ti konteksto: “Dakayo a tattao . . . dakayo ti balayen ti Dios.” “Dakayo ti templo ti Dios.” (1 Corinto 3:9, 16) Gapuna daytat’ makailadawan a panagbangon, a ramanenna dagiti “tattao.” Kayatna a sawen, ti Kristiano a ministro ti ‘agibangbangon kadagiti tattao’ iti kaipapananna a pagregreggetanna nga ibangon kadagiti tattao nga interesado ti Nakristianuan a personalidad, a pagbalinenna ida nga ad-adalan.​—Mateo 28:19, 20.

6, 7. (a) Makin-responsabilidad iti nakaisentruan dagiti sasao ni Pablo idiay 1 Corinto 3:9-15? (b) Nupay kasta, kasano a nairaman iti nagkadua a trabano ti panagbangon? (c) Ti kanayonan pay a panangusig kadagiti sasao ni Pablo ti tulongannatayo a makakita ti ania?

⁶ Isingasing kadi dayta a ti mannursuro a Kristiano ti addaan ti agsolsolo a responsabilidad no kasano iti irarang-ay ti estudiante? Nikaanoman. Umuna, datayo dagiti “katulongan ti Dios.” Nupay ti sasao ni Pablo idiay 1 Corinto 3:9-15 isensentrona iti responsabilidad iti daydiay agibangbangon, wenno mangisursuro, kinaagpaysona daytat’ trabaho a panagbangon ti dua a sadiay ti estudiante ket nairaman met. Mabalin nga iyarig dayta iti panangisagana iti maysa a soldado iti pannakigubat. Mabalin a dadduma ti mangsanay ken mangkabal kenkuana, ngem oras nga isun ti adda idiay pagbabakalan a ti soldado iti makidangadang, nga usarenna ti inna naadalen. Ti mismo a biagna ti agpannuray iti dayta! Umasping iti dayta, daydiay mangisursuro pagreggetanna ti panangibangon iti maysa a pudpudno a Kristiano, daydiay kabaelanna a maresistiran dagiti rigat ken pannulisog daytoy a sistema. Maigiddato iti dayta, nupay kasta, ti estudiante ti addaan ti responsabilidad; masapul nga iyaplikarna iti panagbiagna dagiti inna naadal.​—Mateo 7:24-27; Filipos 2:12, 13.

⁷ Nupay kasta, ti kinapudno ti agtalinaed a daydiay mangisursuro ti addaan ti nadagsen a responsabilidad. Bayat nga us-usigentayo pay dagiti sasao ni Pablo, makitatayo ti pateg iti panangisuro iti Sao ti Dios a siepektibo tapno makaibangon kadagiti dadduma ti panangipateg a maipaay iti nailangitan nga Amatayo.

Panangisaad iti Umiso a Pundasion

8. Iti daytoy makailadawan a trabaho ti panagbangon, ania iti pundasion?

⁸ Sakbay a makaibangonkayo iti maysa a balay, masapul nga isaadyo pay nga umuna ti pundasion. Gapuna iti panangibangon iti panagaramid kadagiti ad-adalan, ania ti pundasion? Sumungbat ni Pablo: “Ta awan ti makabalin a mangikabil iti sabali a pundasion, no di laeng ti naikabilen, nga isu ni Jesu-Kristo.” (1 Corinto 3:11) Wen, ti umiso a pundasion nga isut’ pagbangonantayo isu ni Jesu-Kristo.​—Idiligyo iti Efeso 2:20-22 ken 1 Pedro 2:4-6.

9. (a) Iti panangisursuro kadagiti dadduma, aniat’ ramanenna iti panangisaad ken Kristo kas pundasion? (b) Apay nga importante para kadagiti estudiantetay iti Biblia a matarusan ti naan-anay a kinapudno maipapan ken Jesus?

⁹ Kasanotayo a maisaad ni Kristo kas pundasion no mangisursurotayo ti dadduma? Kas pangrugian, masapul isurotay ti kinapudno maipapan ken Jesus ken tulongantay ti dadduma nga ibangon ti panagbiagda nga aglawlaw iti dayta a kinapudno. Ramanen dayta ti panangtulongtay kadakuada a mamati ken Jesus kas Katulongantayo ken Daydiay a babaen kenkuana impaay ni Jehova ti subbot. (Mateo 20:28; 1 Juan 2:1, 2) Ngem saan laeng a dayta. Ni Jesu-Kristo ti nadutokan nga ulo ti kongregasion Kristiano. (Colosas 1:18) Isu met iti nainkalintegan nga Ari ti daga, ket iti dayta a kapasidad dandanin aramidenna “ti naan-anay a panangparmekna” inton Har-Magedon. (Apocalipsis 6:1, 2) Ngarud, nalawag, a ti panangisaad ken Kristo kas pundasion ramanenna ti panangisuro ti amin a kinapudno maipapan kenkuana, ti panangtulong iti dadduma a maawatan ti akem ni Jesus iti kaitungpalan ti panggep ti Dios. Apay a napateg unay daytoy? No dagiti estudiantetayo mamatida ken Jesus kas agturturayen nga Ari ti Dios, saandanto a nalaka a maupay kadagiti kasasaad ti lubong ken problema iti inaldaw a panagbiag.​—Isaias 28:16; 1 Pedro 2:6-8.

10. (a) Sigun iti Efeso 3:17-19, ania pay ti mairaman iti panangisaad ken Kristo kas pundasion? (b) Kasanotayo a palubosan a ni Kristo ‘agnaed iti puspusotayo’?

¹⁰ Nupay kasta, adu pay ti ramanen iti panangisaad ken Kristo kas pundasion. Masapul a maaddaantayo met ti isu met laeng a kalat kas ken apostol Pablo. Ti kararagna a maipaay kadagiti taga Efeso a ta “agnaed koma ni Kristo kadagiti puspusoyo gapu iti pammati nga addaan ayat; tapno agramutkayo ket maipasdekkayo iti pundasion, tapno mabaelanyo koma a maawatan agraman dagiti amin a sasanto no ania ti kaakaba ken kaatiddog ken ti kangato ken ti kauneg, ken maammuan ti ayat ni Kristo nga atiwenna ti amin a pannakaammo, tapno mapnokayo ti isuamin a pannakapunno iti Dios.” (Efeso 3:17-19) Kitaenyo ta ti “pannakairamut ken pannakaipasdek iti pundasion” ramanenna a ni Kristo ‘ti agnaed koma iti puspusotayo.’ Aniat’ kaipapanan daytoy? Bueno, ni Kristo ti ‘agnaed iti puspusotayo’ no bay-antayo a ti ulidan ken ti pannursurona ti mangapektar iti rikrikna ken tigtignaytayo.

11, 12. (a) Kasanotay a matulongan dagiti dadduma a ni Kristo ‘agnaed iti puspusoda’? (b) Mainayon pay iti panangadal maipapan ken Jesus, ania pay iti ramanenna?

¹¹ Kasanotay a matulongan dagidiay isursurotayo tapno ni Kristo ‘agnaed iti pusoda’? Ti panangiyallatiw ti pannakaammo ti nasken, ta kasapulan a “mabaelanda a maawatan koma” “ti kaakaba ken kaatiddog ken ti kangato ken kauneg” ti kinapudno ti Sao ti Dios, nangruna kas ti pannakainaig dayta iti biag ken sursuro ni Jesu-Kristo. Kayattayo a dagiti estudiantetayo magun-odanda “ti kapanunotan ni Kristo,” tapno maammuanda a naan-anay kas sibibiag, addaan riknana a persona. (1 Corinto 2:16) Daytoy iti mangsagid iti pusoda.

¹² Ngem kitaenyo ta kuna pay ni Pablo: “Ken maammuan [Griego, gnonaí, a maammuan “nangnangruna, babaen kapadasan”] ti ayat ni Kristo nga atiwenna ti amin a pannakaammo.” Mabalintay a maammuan ti “ayat” ni Kristo babaen ti panangadal no aniat’ ibagbaga ti Biblia kadatayo maipapan iti kurso ti panagbiagna ken ti pannakilangenlangenna iti sabsabali. Nupay kasta, babaen panangtuladtayo no ania a kita a persona ni Jesus isut’ pudno a pangapresiarantayo iti panagrikriknana. Iti daytoy a pamay-an, babaen kapadasan, mabalintay a maammuan “ti ayat ni Kristo nga atiwenna ti amin a pannakaammo.”

13, 14. (a) Kasanotay a matulongan dagiti estudiantetayo a tuladen dagiti kualidad ni Jesus? (b) Apay a ti panangpadpadas nga agbalin kas ken Jesus tulonganna dagiti estudiantetayo a mangpatanor iti nasayaat a pannakirelasion ken Jehova? (c) Mainayon pay iti umiso a pundasion, iti ania pay ti mabalintayo a pangtedan iti atension?

¹³ Gapuna iti panangisaad iti pundasion, iyawistayo kadagiti atensionda dagiti kualidad ni Jesus​—ti ayatna (Juan 15:13, 14), ti kinabara ken panagrikriknana (Mateo 11:28-30), ti kinapakumbabana (Juan 13:1-15) ken ti panangngaasina (Marcos 6:30-34), kas pananginagan laeng ti sumagmamano. Paregtaenyo ti estudianteyo a mangtulad kadagiti kualidad iti panagbiagna. Daytoy ti mangipaay ti nagsayaat a pundasion a pakaibangonanna ti dadduma pay nga importante a kualidad. No maminsan, no salsalaysayenyo dagiti salaysay ti Biblia maipapan ken Jesus, mabalin nga agsardengkayo ket isaludsodyo: ‘Ania a kualidad ti makitkitayo nga iparparangarang ni Jesus? Kasanoyo pay nga ipakita nga ad-adda daytoy a kualidad iti panagbiagyo?’ Ilawlawagyo a ti panangtulad iti personalidad ni Jesus ti mangtulong iti estudiante ti Biblia a mangparang-ay iti maysa a napigsa, nasinged a pannakirelasion ken Jehova. Kasano a kasta? Ngamin ta apagpag-isu ti panangisarming ni Jesus iti personalidad ni Amana a no padpadasentayo a tuladen ni Jesus aktualmente a tultuladentay ni Jehova!​—Juan 14:9.

¹⁴ Ti pannakaadda ti umiso a pundasion iti nasken, ngem umdas kadi daytan? Sumungbat ni Pablo: “Ngem kitaen ti tunggal maysa no kasano ti panagbalayna iti rabawna.” Wen, ngem ania met ngay ti maipapan kadagiti materiales nga usarentayo iti panangibangon ti pasdek nga agsaad iti rabaw iti pundasion?

Dagiti Di Mauram iti Apuy a Materiales

15, 16. (a) Idiay 1 Corinto 3:12, ania a panamaggidiat iti nalawag a pangiturturongan ni Pablo? (b) Iti panangyaplikar iti ilustrasion ni Pablo, ania a saludsod iti maiyimtuod?

¹⁵ Daytoy iyegnatayo iti bersikulo 12 iti 1 Corinto kapitulo 3, a sadiay ilawlawag ni Pablo ti nadumaduma a materiales iti panagbangon: “No adda agbalay iti rabaw daytoy a pundasion, ti balitok, pirak, batbato a napateg, kayo, ruot, garami.” Daytat’ nawadwad a panagduduma dagiti materiales! Isingsingasing kadi ni Pablo nga agbangontayo iti bassit iti tunggal maysa kadagitoy kadagiti estudiantetayo? Nalawag a saan. Kitaenyo no kasano ti panangipaulog dadduma a patarus: “Dadduma ti agusar iti balitok wenno pirak wenno napateg a batbato iti panangibangonda iti pundasion; dadduma agusarda iti kayo wenno ruot wenno garami.” (TEV) “Iti daytoy a pundasion mabalinyo ti agbangon iti balitok, pirak ken batbato, wenno iti kayo, ruot ken garami.” (The Jerusalem Bible) Gapuna nalawag a pagsupsupadien ni Pablo ti dua a kita ti patpatakder. Iti maysa, kayariganna, maysa a napintas a palasio a naadornoan iti balitok, pirak ken napateg a batbato. Maisupadi ti dayta adda met iti maysa a kalapaw a naatepan iti ruruot nga addaan ti kayo a tabtabla wenno postena a mangsupsuportar kadagiti didingna a naaramid manipud namagaan a ruruot a nalaokan iti pitak.

¹⁶ Iti panangiyaplikar iti ilustrasion ni Pablo, ngarud, daytoy ti saludsod: Iti panangisursuro ti dadduma, agibangbangonkayo aya kadagiti “palasio” wenno “kalapaw”? Ti rason no apay dadduma nga agtutubo ken kabbaro matnagda ket nalabit a saan amin naibangonda kadagiti isu met laeng a materiales. Aniat’ naggidiatanna? Ti situasion iti kongregasion idiay Corinto idi ugma ti iyilustrarna ti naggidiatan iti panagbangon babaen kadagiti di mauram iti apuy a materiales ken dagiti nalaka a mauram.

17, 18. (a) Ania a serioso a problema ti adda idi iti kongregasion idiay kadaanan a Corinto, ket kasano a pinalinteg ni Pablo dagiti bambanag? (b) Gapuna ania ti tulbek iti panangdeterminar no agibangbangontayo babaen iti “balitok” wenno “garami”?

¹⁷ Inaramid ni Pablo ti pasetna iti panangibangon iti umiso a pundasion, ngem dadduma idiay Corinto ti agibangbangohda iti dayta babaen iti ‘kayo, garami ken ruruot’​—ti narasi a materiales a mangirepresentar kadagiti kualidad a di naandor. (1 Corinto 3:12) Gapuna, masapul nga agsurat ni Pablo kadagiti kakabsat sadiay: “Adda sussusik kadakayo. Kayatko a sawen daytoy, a tunggal maysa kadakayo kunana: ‘Siak kaduanak ni Pablo,’ ‘Ket siak kaduanak ni Apollos,’ ‘Ket siak kaduanak ni Cefas,’ ‘Ket siak kaduanak ni Kristo.’ Adda a nasinasina ni Kristo.” (1 Corinto 1:11-13) No kasta dagiti kamkameng ti kongregasion ti nabingaybingayda. Apay? Agsipud ta dakkel la unay iti panangipategda kadagiti dadduma a tattao. Pinalinteg ida ni Pablo, inlawlawagna: “Asino ngarud ni Apollos? Wen, ket asino ni Pablo? Ministrosda a naaramat tapno namatikayo . . . Nagmulaak, ni Apollos nagsibug, ngem inted ti Dios ti idadakkel.”​—1 Corinto 3:5-7.

¹⁸ Ti ababa, ti problema isu daytoy: Agsipud ta dakkel nga importansia iti inkabilda iti panangsurot iti tattao, dadduma kadagiti kameng ti kongregasion idiay Corinto saan a napigsa ti nasinged a pannakirelasionda ken Jehova. Daytoy ti kangrunaan a panangdeterminar no, kas kaiyariganna, agibangbangontayo babaen iti “balitok” wenno “garami,” ti panangibangon kadagiti “palasio” wenno “kalapaw.”

19. (a) Kasano a daydiay maysa a mangisursuro mabalin a dina igaggagara a dakkel unay nga atension iti pangiturturonganna iti bagina wenno iti sabali a tao? (b) No kayattayo iti agbangon babaen iti ‘balitok, pirak ken napateg a batbato, aniat’ masapul a pagreggetantayo nga aramiden?

¹⁹ Adda iti nagpateg a leksion a maadal iti dayta. .Mabalin a kunaen ti dadduma, ‘Ngem diak met isursuro kadagiti dadduma a surotenda ti asinoman a tao.’ Nupay kasta, naglaka a mapasamak daytoy uray no saantayo nga inranta a kasta. Kas pangarigan, no, mangpataud dagiti estudiante ti salsaludsod, maulit-ulit a kunkunatayo, ‘Ni Brother (wenno Sister) Kastoy-ken-kastoy kunana, . . ,’ di kadi mabalin a ditay igaggagara nga iturturong iti dakkel nga atension iti maysa nga imperpekto a lalaki wenno babai? Wenno no, mapataud ti salsaludsod, maikunatayo, ‘Bueno, saanak a sigurado, ngem kastoy ti mabalinko a maikuna,’ di kadi mabalin a dikay igaggagara nga at-atrakaren iti dakkel nga atension iti bagitayo? Laglagipenyo, naglaka para iti maysa nga estudiante a mangpataud iti maysa a naitan-ok nga opinion iti mannursurona. (Idiligyo iti Aramid 10:25, 26 ken Apocalipsis 19:10.) No kayattayo ti agbangon kadagiti “palasio,” kasapulan ti panagaluadtayo a maibusor iti panagbangon iti paspasurot dagiti tattao. Imbes ketdi, tulongantayo dagiti estudiantetayo a mangpatanor iti nasinged a pannakirelasion ken Jehova. Gapu ti dayta masapul nga agibangontayo babaen kadagiti ‘balitok, pirak ken kadagiti napateg a batbato.’ Ania ti irepresentarna dagitoy?

20. Ania ti ireprepresentar ti ‘balitok, pirak ken napateg a batbato’? (Proverbio 3:13-15)

²⁰ Iti panamagdilig kadagiti kasuratan kas ti Salmo 19:7-11, Proverbio 2:1-6 ken 1 Pedro 1:6, 7 ipakitada a ti balitok, pirak ken napateg a batbato maus-usarda a mangiladawan kadagiti kualidad, kas napigsa a pammati, nadiosan a sirib, naespirituan a pannakaawat, kinasungdo, panangipateg ken Jehova ken ti linlintegna. Dagita a kualidad nasken ti pannakaadda iti maysa ti napigsa a nasinged a pannakirelasion ken Jehova a Dios. Dagitoy a kualidad ti mangbukel iti patakder iti personalidad a masapul a pagreggetantayo nga ibangon kadagidiay a sursuruantayo. Agibangbangonkayo aya iti kastoy a pamay-an?

Maibturandanto Aya ti “Apuy”?

21. (a) Apay a napateg unay ti intay panangibangon kadagiti naandor a kualidad kadagiti sursuruantayo? (b) Ania ti ireprepresentar ti “apuy”?

²¹ Apay a napateg a tumulongtayo nga agibangon ti kakasta a naandor a kualidad kadagidiay sursuruantayo? Intuloy nga ilawlawag ni apostol Pablo: “Ti aramid ti tunggal maysa maiparangarangto, ta ti aldaw ipakitananto, a maipalgakto gapu iti apuy; ket ti met laeng apuy padasennanto ti aramid ti tunggal maysa, no ania a kita.” (1 Corinto 3:13) No kasta ti “apuy” ket “padasennanto” no ania a kita iti panagbangontayo. Ania ditoy ti “apuy”? Ti kadi narungsot a pisikal a pannakaidadanes? Nalawag a saan. Ta kitaenyo a ti “aramid ti tunggal maysa” maipalasatto iti “apuy.” Saan amin a Kristiano ket umawat ti naranggas a pannakaidadanes. Gapuna irepresentar ti “apuy” ti aniaman kadagiti rigrigat wenno pannakasulisog a mabalin mangdadael iti espiritualidad ti maysa.

22. Aniada ti sumagmamano kadagiti naapuy a susuot a mabalin a paglasatan ti dadduma?

²² Kadagiti dadduma mabalin a ti “apuy” umay iti langa ti neutraliad. Kas pangarigan, dadduma mapilitda a makiraman kadagiti napolitikaan nga ar-aramid wenno maipasangoda iti pannakaibalud. (Juan 15:19) No maminsan ti “apuy” mabalin a nasiksikap pay ngem iti dayta. Nalabit isu ti pannulisog nga agbuya ti pelikula wenno programa ti TV a mangitamtampok iti sekso ken kinaranggas. Para kadagiti agtutubo a Kristiano mabalin a ti “apuy” umay iti langa ti pannakaisarang iti seksual a pannakagargari, iti pannakaallukoyda nga agusar iti droga wenno iti pannakapilitda a makiraman iti nakaap-aprang a paglinglingayan iti lubong. Ti nakaisigudan a tarigagay nga akseptaren dagiti dadduma ti mabalin mangipaay ti napalalo a pannakaparigat dagiti Kristiano nga agtutubo a makikomporme.​—1 Juan 2:16.

23. (a) Maipapan iti panangsango kadagiti kakasta a suot, ania a saludsod ti tumaud, ket iti ania ti pagpannurayan dagiti sungbat? (b) Anianto iti masalaysay iti sumaganad nga artikulo?

²³ Kaaduan kadagiti pudno a Kristiano ti sibaballigi a naibturanda dagiti kakasta a naapuy a susuot. Ngem nakalkaldaang a kunaen, a dadduma saanda a naballigi. Gapuna, kasapulan a saludsodantay dagiti bagbagitayo: No dagidiay sinursuruantayo ket maipasangoda iti “apuy,” kasano iti nagbanaganda? Maiyarigdanto aya kas iti napintas a palasio a naarkosan kadagiti di mauram iti apuy a balitok, pirak ken napateg a batbato, ket makapagtakderda a sititibker? Wenno kaiyariganda kas ti kalapaw a naaramid iti kayo, garami ken ruruot, ket napuoranda? Siempre, ti kadakkelanna agpannuray iti estudiante a mismo. Maigiddato iti dayta, ti kadakkelanna agpannuray met kadatayo a kas mannursuro​—no kasanotay a mismo a nangibangon. Gapuna daytoy a saludsod ti agtalinaed: Kasano ti panagibangbangonyo kadagiti kakasta a naandor a kualidad kadagiti isursuroyo? Daytoy iti masalaysayto iti sumaganad nga artikulo.

Mailawlawagyo aya:

◻ No kasano a ti agkadua a trabaho ti panagbangon ti nairaman iti panangisuro kadagiti dadduma?

◻ No kasano ti panangisaadyo ken Kristo kas maysa a “pundasion”?

◻ No ania iti maadaltayo manipud iti napasamak iti kongregasion idiay kadaanan a Corinto?

◻ No ania ti “apuy ken no kasano a daytoy ipaganetgetna ti kinapateg iti panangbangon kadagiti naandor a kualidad kadagiti dadduma?

No Mangisurokayo, Danonenyo ti Puso

1, 2. (a) Ania dagiti kasapulan tapno makaibangon kadagiti dadduma iti nauneg a panangapresiar ken Jehova ken kadagiti pagalagadanna? (b) Apay nga ad-adda pay ti kasapulan ngem basta pannakaammo iti ulo?

NUMAN pay mabalinyo ti agibangon a sidadaras iti maysa a kalapaw, sigurado a saankay a makaipatakder iti maysa a palasio iti agpatnag laeng. Pudno met daytoy iti panagaramid kadagiti adalan. Saan a bassit a trabaho iti panangibangon kadagiti dadduma iti nauneg a panangipateg ken Jehova ken kadagiti pagalagadanna. Alaenna iti nawadwad a panawen ken kinasigo tapno makapataud kadagiti kakasta a “palasio.”

² Tapno maaramidan daytoy, ad-adu pay iti ramanenna ngem basta panangyallatiw ti pannakaammo. Kas kunaen ti Proverbio 3:1: “Anakko, dika lipaten ti lintegko, ket salimetmetam koma dita pusom dagiti bilbilinko.” Dagiti estudiantetayo ti masapul a masursuruan no ania ti kuna ti Biblia. Ngem nangnangruna pay iti dayta, masapul a dagiti kinapudno ti Biblia iti maipasagepsep iti puspusoda. Wen, masapul a danonentay no kayattayo ti makaibangon kadagiti di mauram iti apuy a kualidad kadagidiay sursuruantayo, a tulongan ida a mangpataud iti maysa a napigsa a pannakirelasion ken ni Jehova a Dios.

3. (a) Apay a ti “arte ti panangisuro” dakkel iti maaramidanna no magtengantayo met laeng iti puso? (b) Bayat ti panangusyusigtayo kaaagiti sumagmamano a praktikal a suhestion, asino koma iti adda iti panunottayo?

³ Nalawag, daytoy ti nalaka a sawen ngem aramiden. Tapno madanon dagiti puspuso masapul a saantay laeng a maaddaan kadagiti umiso a materiales ti panagbangon no di ket usarentay met ti “arte ti panangisuro.” (2 Timoteo 4:2) Saan nga umdas iti basta panangibaga ti kinapudno kadagiti estudiantetayo. Imbes ketdi, ti “arte ti panangisuro” ramanenna ti panangtulong kadakuada nga agpanunot ken agrason kadagiti maad-adalda. Saan a gapu kadagiti kinasigutayo wenno metodotayo ti makapataud iti naespirituan a panagdakkel; ti pammendision ti Dios isut’ nasken. (1 Corinto 3:5, 6) Nupay kasta, addada sumagmamano a singasing a makatulong kadatayo a mangdanon ti puspuso dagiti dadduma. Bayat nga us-usigentayo dagitoy a punto, laglagipenyo koma dagidiay nga isursuroyo​—dagiti estudianteyo ti Biblia ken dagiti annakyo.

Mangipakita ti Umiso nga Ulidan

4. (a) Aniat’ maysa a banag nga inaramid a siepektibo ni Jesus iti panangdanon kadagiti dadduma? (b) Apay nga importante ti panangipakita ti umiso nga ulidan no mangisursuro kadagiti dadduma?

⁴ Ania kadi pay ti nasaysayaat nga ulidan a maadda kadatayo no kasanot’ panangdanon ti puspuso dagiti dadduma ngem ni Jesu-Kristo mismo? Apay nga isut’ epektibo iti panangdanon kadagiti tattao? Umuna, inaramid ni Jesus ti banag nga inkaskasabana, nangted iti nakaskasdaaw a pagulidanan a maipaay kadagiti paspasurotna a tuladenda. (Juan 13:15; 1 Pedro 2:21) Ngarud, daytoy, ti umuna a singasing: mangipakita iti umiso nga ulidan. Saan kadi a lohikal a rebbeng a maaddaantayo met iti kasta met laeng a naandor a Nakristianuan a kualidad a kayattayo met nga ibangon kadagiti dadduma? Kas panagkuna ni Jesus: “Tunggal nasayaat ti pannakasanayna nga estudiante agbalinto kas ti mannursurona.”​—Lucas 6:40, The New Berkeley Version.

5. Kasano ti panangipakita ti Kasuratan ti koneksion ti panangipakita ti umiso nga ulidan ken ti panangdanon ti puspuso dagiti dadduma?

⁵ Maulit-ulit ti panangipakpakita ti Biblia ti koneksion ti panangipakita ti umiso nga ulidan ken panangdanon ti puspuso dagiti dadduma. Kas pangarigan, ipamatmat ti Deuteronomio 6:4-6 a ti panagayat ken Jehova masapul “agyandanto ita pusom [puso ti nagannak]” sakbay a maipasagepsepyo met dayta iti puspuso dagiti annakyo. (Proverbio 20:7) Maisupadi iti dayta, tinubngar ni Jesus dagiti managinsisingpet a Pariseo idi kaaldawanna agsipud ta ‘agsaoda ket dida agaramid.’ Pagsidsiddaawantay ngarud aya a ti puso dagiti tattao ti “nabibinegda”?​—Mateo 23:3; 13:13-15.

6. Apay nga importante ti panagbiagyo a maitunos iti isursuroyo? (Roma 2:21-23)

⁶ Gapuna masapul nga adda ti panagtunos iti inkay isursuro ken iti ar-aramidenyo. Kas pangarigan, no tarigagayanyo ti panangibangon kadagiti estudianteyo wenno annakyo iti panagayat ken Jehova ken ti tarigagay a mangay-ayo kenkuana, di aya rebbeng a makitada met koma kadakayo babaen iti karkararagyo, sasao ken tigtignayyo iti ebidensia iti kasta nga ayat ken tarigagay kadakayo? No kayatyo a maiyukuok iti napigsa a debosion kadagiti prinsipio ti Biblia, di aya rebbeng nga umuna a makitada kadakayo, babaen kadagiti sasao ken ar-aramidyo, ket dikay lislisian dagidiay a prinsipio? Dagidiay isursurotayo, nangnangruna kadagiti annaktayo, masansan a ti atensionda adda kadagiti ar-aramidentayo a nangnangruna ngem iti ibagbagatayo. No makita dagiti dadduma nga agbibiagtayo a maitunos kadagiti intay isursuro, nasaysayaatto ti posisiontayo a mangdanon kadagiti puspusoda.

Agsaludsod

7, 8. (a) Iti ania iti pagpannurayan iti kaaduan iti panagballigitayo a panangdanon kadagiti dadduma? (b) Apay a dagiti salsaludsod makatulong iti panangdanon ti puso?

⁷ Ti maikadua a suhestion, maysa pay a banag a namagbalin ken Jesus kas epektibo a mannursuro, isu ti panagusar kadagiti salsaludsod. Ni Jesus ket isu ti maysa a naglaing a mamagpanunot ken mamagrason kadagiti tattao. (Mateo 17:24-27) Ti kaaduan iti panagballigiyo a mangdanon kadagiti puspuso dagiti sursuruanyo ti agpannuray iti inkay met panagusar kadagiti salsaludsod. Apay?

⁸ Umuna, babaen iti panagsaludsod mabalinyo a madeterminar no ti estudianteyo ket pudno met laeng a matartarusanna ti maad-adalna. Total, no saanna met laeng matartarusan ken akseptaren ti impormasion, kasano a dayta ti agramutto idiay pusona? (Lucas 8:15) Maikadua, tapno madanon ti pusona makatulong a maammuan no ania ti adda idiay pusona. Nalabit a dagiti naimula a kapanunotan ken dagiti palso a narelihiusuan a sursuro ti napigsan pannakairamutna. Yantangay ditay mabasa ti puso, kasapulan ti panagsaludsodtayo iti nangnangruna a pangyebkasan iti estudiante iti bukodna a sasao no aniat’ marikriknana iti pusona. Usigenyo ti sumagmamano a pangarigan.

9, 10. lyilustrar ti kinaepektibo ti panagusar iti salsaludsod a punto de vista.

⁹ Ikabiltayon a pagsarsaritaanyo ti kapitulo 10, “Napipigsa Dagiti Dakes nga Espiritu,” iti libro a Mabalinyo ti Agbiag nga Agnanayon iti Paraiso a Daga. Nakagtengkayo iti parapo 18, iti panid 97, a sadiay ti naiyimprenta a saludsod kunana, “Ania nga ulidan dagiti immuna a Kristiano idiay Efeso ti nasayaat a suroten no kayat ti tao ti lumapsut manipud espiritismo?” Mabalin a ti estudianteyo umiso ti isusungbatna manipud parapo, ngem kasano a talaga ti riknana? Nalabit agan-annurot iti espiritismo iti adun a tawtawen ket napigsa a manamati iti dayta. No kasta, kumbinsido met laeng aya itan nga isut’ rebbeng a lumapsut iti dayta? Mabalinyo saludsoden: ‘Kasano iti panagriknayo ita maipapan iti daytoy? Kasanoyo a maiyaplikar daytoy nga impormasion iti panagbiagyo?’ Iti panangsungbatna maiparangarang no kasano ti kaunegen iti panangsagid daytoy nga impormasion iti pusona.

¹⁰ Kas maysa pay a pangarigan, mabalin nga us-usigenyo a kadua ti anakyo ti kapitulo 26, “Ti Pannakidangadang nga Agaramid ti Umiso,” iti isu met laeng a libro. Idiay panid 220, ti saludsod “b” iti parapo 8 kastoy ti saludsodna, “Ania a panangmatmat, kas inyebkas ti maysa nga agtutubo, ti nainsiriban nga adda kadatayo?” Mabalin a ti anakyo ti umuna a sumungbat manipud parapo, ngem saanna a pudpudno nga ebkas no kasano ti panagrikriknana. Nalabit kasapulan iti natanang a panangsukimatyo a naun-uneg pay bassit: ‘Ngem kasano iti panagrikriknam iti daytoy? Rasonable met laeng aya daytoy a panangmatmat kenka?’ Wenno mabalinyo ti mangiparang iti maysa a situasion: ‘Kas pangarigan dadduma kadagiti agtutubo idiay eskuelaan ti agsigsigarilioda ket opresirandaka ti maysa a sigarilio? Ania ngata no sumagmamano kadakuada ti agbuybuya ket ang-angawendaka agsipud ta saanmo nga inakseptar? Ania ngay ita ti aramidem?’ No usaren a nainsiriban, dagita a saludsod makatulong kadakayo a mangdeterminar no aniat’ adda iti puso iti anakyo.

11. (a) Apay a kasapulan ti panagannad no agus-usar kadagiti salsaludsod? (b) Apay a kasapulan ti panagannad nangnangruna dagiti nagannak no di umiso ti iyebkas dagiti annakda a panangmatmat? (Colosas 3:21)

¹¹ Nupay kasta, kasapulan panagannad. No maminsan dagita a saludsod mabalin a makaiyeg sungbat a mangkellaat wenno mangpaay kadakayo. Ania ngarud itan? No daytat’ maysa a delikado a tema, nasaysayaat a saan pay laeng nga ipapilit ti isyu no di ket kunaen: ‘Isardengtay pay laeng ita. Pagsaritaantanto manen dayta inton maminsan.’ (Juan 16:12) Nangnangruna kasapulan ti panagannad iti biang ti nagannak. No dagiti di umiso a panangmatmat ti maiyebkas, medmedanyo ti rikriknayo. Dikayo kayat a dadaelen iti linea ti komunikasion. No ti anakyo ket mabutengen a mangiyebkas no kasano ti panagriknana, kasanoyonto ngarud a maammuan no ania ti adda iti pusona tapno makatulongkayo kenkuana?

Itampok ti Kinasirib iti Panagtulnog iti Linlinteg ti Dios

12, 13. (a) Apay a ti pannakakita ti kinasirib iti panagtulnog kadagiti linlinteg ti Dios matignayna ti puso ti estudianteyo? (b) Aniat’ ramanen iti panangtulong iti estudiante a makakita a ti panagtulnog ken Jehova isut’ kurso ti kinasirib?

¹² Ti maikatlo a suhestion isut’ panangtulong iti estudianteyo a makakita ti kinasirib iti panagtulnog iti linlinteg ti Dios. (Deuteronomio 4:5, 6; 10:12, 13) Daytoy ti mabalin a mangtignay iti pusona. Kasano a kasta? No isut’ kumbinsidon a ti panangsalimetmet iti linlinteg ni Jehova agpaay iti kasayaatan a paginteresanna, daytoy ti mangtignay kenkuana nga agayat iti Dios ken mangtarigagay a mangay-ayo kenkuana.​—Salmo 112:1.

¹³ Kasanoyo a matulongan dagidiay sursuruanyo a makita ti kinasirib iti panagtulnog iti linlinteg iti Dios? Maiyilustrartay daytoy babaen iti panangidilig iti linlinteg ni Jehova iti karatula a “No Trespassing.” Nupay ti kasta a karatula ket maysa a pakdaar, dikay aya umanamong a no ti karatula naglaon kadagiti rason maipaay iti pakdaar nalaklaka nga umay iti panagtulnog? Kas pangarigan, no ti karatula kunana “No Trespassing​—High Voltage,” daydiay koma sumrek nga awan iti palubos, mabigbigna ti posibilidad iti personal a peggad, ket ad-adda ti panangipangagna ti pakdaar.

14. (a) Iti ania a pamay-an a mabalinyo ti makirinnason iti estudianteyo tapno matulongan a makakita no apay a ti maysa a partikular a kurso ti nainsiriban wenno minamaag? (b) Ania dagiti kasuratan ti mangiyilustrar ti kinapateg ti panangted ti rason no apay a ti maysa a kurso ket naimbag wenno dakes?

¹⁴ Daytat’ umas-asping met kadagiti linlinteg ti Dios. Saanyo laeng nga ibagbaga iti estudianteyo no ania ti kuna ti Biblia nga umiso ken di umiso; tulonganyo a makakita no apay a ti partikular a kurso ket nainsiriban wenno minamaag. Makirinnason kenkuana no kasano a ti panagtulnog iti linlinteg iti Dios makagunggona kenkuana. Isut’ tulonganyo a makakita kadagiti pagbanagan iti di panangikankano kadagidiay a pagalagadan. No maminsan aramiden ti Biblia daytoy. Basaenyo nga agpaay met laeng kadakayo, pangngaasiyo, ti Proverbio 22:24, 25; 23:4, 5; 24:15, 16, 19, 20. Kitaenyo nga iti tunggal kaso it-ited ti Biblia ti rason no apay ti maysa a kurso ket naimbag wenno dakes.

15. Usarenyo dagiti naipaay a salsaludsod ken kasuratan a panangsalaysay ti kinasirib iti panagtulnog iti kuna ti Dios maipapan iti di panagsuitik ken pannakiabig.

¹⁵ Kas pangiyilustrar, usigenyo no kasano a dagiti sumaganad a salsaludsod ken kasuratan ipagpaganetgetda ti kinasirib iti panagtulnog kadagiti linlinteg iti Dios.

Panagulbod, panagtakaw: Apay a ti kinasuitik ket dakes? (Proverbio 15:27; 20:10; Apocalipsis 21:8) Apay a makagunggona kenka ti panagbalin a nasingpet iti pannakilangen kadagiti dadduma? (Proverbio 3:3, 4; 12:19; Hebreo 13:18)

Pannakiabig: Kasano a ti imoralidad ti makadangran kadatayo? (Proverbio 5:9; 7:21-23; 1 Corinto 6:18) Kasano a daytat’ addaan makadangran nga epekto kadagiti dadduma? (1 Tesalonica 4:6; 1 Corinto 5:6; Hebreo 12:15, 16) Kasano a magunggonaankayo no ipangagyo dagiti moral a pagalagadan ti Biblia? (Proverbio 5:18, 19; Hebreo 13:4)

Kalpasan ti pannakirinnasonyo iti daytoy a pamay-an iti maysa a linteg ti Biblia, mabalin a maisaludsodyo: ‘Patiem aya a ti adda iti puso ni Jehova ket isu dagiti agpaay iti kasayaatan a paginteresantayo? Umanamongka aya a dagiti linlintegna ket saanda nga ilibak kadatayo ti aniaman a naimbag?’

16. Ti panagrason iti kastoy a pamay-an ti addaan ania nga epekto iti estudianteyo?

¹⁶ Bayat iti panagad-adalyo, makirinnason met laeng kadakuada iti linteg iti Dios maipapan iti panagbartek, iti panagbayad kadagiti buis, iti panagsigarilio, iti isyu maipapan iti dara, ken dadduma pay. Iti daytoy a pamay-an ti estudianteyo wenno ti anakyo ket matulongan a makakita amin a linlinteg iti Dios ket agpaay a pagimbagantayo. Ti estudianteyo saan met a ti rebbeng a kanayon a kasapulanna ti rason tapno agtulnog iti Dios. Ngem ti sumagmamano a pangarigan ti mabalin a makatulong tapno madanonyo ti pusona, matignayyo a tarigagayanna a paragsaken iti Dios. Iti kasta, inton umay ti “apuy,” wenno suot, isunto ti sisasaganan nga agtulnog iti sao ti Dios.​—1 Corinto 3:13.

Tulonganyo Ida a Mangammo iti Dios

17. Ania a kanayonan a suhestion ti makatulong pay kadakayo a mangdanon ti puso ti estudianteyo?

¹⁷ Ti maikapat a suhestion isu daytoy: tulonganyo ti estudianteyo a mangammo iti Dios. (Juan 17:3) Malaksid laeng iti panangtulongyo kenkuana a mangammo nga adda ni Jehova ken addaan iti nagan, tulonganyo a makaammo kenkuana a sisisinged. Daytoy iti mangtignay ti pusona agsipud ta ti panangammo ken Jehova isu ti panagayat kenkuana.

18. Bayat iti panagadal, kasanoyo a maiturong ti atensionda kadagiti kualidad ni Jehova?

¹⁸ Kasanoyo a matulongan iti estudianteyo a makaammo a sisisinged ken Jehova? Umuna, saanyo mabalin nga ayaten iti asinoman malaksid no ammoyo dagiti kualidadna, ti aw-awidna. Gapuna bayat iti panagadal, silalagipkay koma a kanayon iti panangiyeg iti atensionna kadagiti di maartapan a kualidad ni Jehova. Daytoy ti masansan a maaramidan agpapan pay ania a tema ti pagsasaritaanyo. Kas pangarigan, no pagsasaritaanyo ti subbot, mabalinyo ti agsardeng iti maysa a maiyanatup a punto ket isaludsodyo: ‘Kasano a ti subbot itan-okna ti kinauneg ti ayat ni Jehova kadatayo?’ Wenno no us-usigenyo iti panangipalubos ti Dios iti kinadakes, mabalinyo a maisaludsod: ‘Kasano nga impakita ni Jehova ti naindaklan a panagituredna iti kinadakes ti tao?’ wenno, ‘Kasano nga impamatmat ni Jehova ti di maartapan a kinasiribna iti inna panangtaming iti iyaalsa idiay Eden?’ Ti kastoy a panagrason makatulong a mangibangon iti estudianteyo iti napigsa a panagrikna iti debosion ken Jehova. Matmatannanto ni Jehova a kas maysa a Persona a dagiti kualidadna makitananto a makaayat, makaawis.

19, 20. (a) Ania pay ti kasapulan tapno maam-ammo a sisisinged ni Jehova? (b) Kasano a ti kapadasan nga adda iti parapo iyilustrarna ti kinapateg ti panangipakita ti umiso nga ulidan no maipapan iti panagkararag?

¹⁹ Mainayon pay, talaga a dikayo mabalin a maam-ammo a naimbag iti maysa malaksid no adda iti maysa a kita iti pannakikomunikar. Kasta met, ti estudianteyo dinanto mabalin a tagiragsaken iti maysa a nasinged a pannakirelasion ken Jehova no saan a makisasao kenkuana. Iti panangapresiar iti daytoy, suruanyo ngarud ti estudianteyo no kasanot’ agkararag. Isu ti tulonganyo a makakita ti nadumaduma a bambanag a mabalin siuumiso a maikararag. (1 Juan 5:14) Pabilgenyo kenkuana iti panangapresiar ken Jehova kas Daydiay agpadpada a makangngeg ken sumungbat kadagiti karkararag. (Salmo 65:2) Isut’ paregtaenyo a mangiyebkas kadagiti nauneg a rikriknana, ‘ibukbokna ti pusona’ ken Jehova.​—Salmo 62:8.

²⁰ Ditoy manen, ti mismo nga ulidanyo ti nasken. Dagiti kadi karkararagyo isarsarmingda iti kinauneg iti debosionyo iti Dios? Daytoy ti maaddaan iti nagsayaat nga epekto kadagidiay isursuroyo, agraman dagiti annakyo. Usigenyo ti sumaganad a kapadasan.

Sumagmamano a tawen iti napalabasen, maysa a pagassaawaan a Kristiano ti mangisursuro iti tallot’-tawenna nga anakda a lalaki no kasano ti agkararag. Maysa a rabii, kalpasan ti panagkararagna a bendisionan koma ni Jehova da Mommy ken Daddy, inkalikagum ti ubing ken Jehova a bendisionanna koma ni “Wally.” Asino ni “Wally”? Saan nga ammo dagiti nagannakna, ket iti ubing masansan nga agkarkararag a maipaay ken ni “Wally”! Kamaudiananna, kalpasan ti adu a panagsidsiddaaw, naawatanda no ania iti napasamak. Ti ubing ti agkarkararag a maipaay kadagiti kakabsat idiay Malawi (a kadagidi a panawen ket maidaddadanesda), ngem di umiso ti panangibalikasna iti dayta kas “Wally.” Daytoy a punto ket, nangngeg ti bassit nga ubing manipud kadagiti nagannak kenkuana a mangikarkararag iti daytoy a pamay-an, ket tinuladna ti nasayaat nga ulidanda. Panunotenyo laengen no kasano ti panagrikna dagidiay a nagannak!

Saan kadi nga iyilustrar daytoy iti kinapateg iti panangipakita ti umiso nga ulidan no maipapan iti panangisursuro kadagiti dadduma no kasano iti panagkararag?

Ti Gunggona

21. (a) Sigun iti 1 Corinto 3:14, 15, ania ti mabalinyo a panginanamaan kas maysa a Kristiano a managbangon? (b) Ti kadi “gunggona” isu iti biag nga agnanayon idiay Baro nga Urnos ti Dios? Ilawlawagyo.

²¹ Gapuna, no mangibangontayo iti dadduma kadagiti kualidad a di mauram iti apuy, tulonganyo ida a mangpatanor iti maysa a nasayaat a pannakirelasion ken Jehova, masapul a danonentayo ti puspusoda. Mabalin a saan a nalaka nga aramiden dayta, ngem daytat’ makagunggona. Impamatmat daytoy ni Pablo idi a kinunana: “No ti aramid a binalay ti siasinoman a tao iti rabawna mataginayonto, awatennanto ti gunggona; no ti aramid ti siasinoman a tao mapuoranto [agsipud ta nakapuy ti panagbangonna, saan nga agusar kadagiti materiales a di mauram], isu mapukawanto [kayatna a sawen, ti imbangonna ket mapukawto iti “apuy”], ngem isu met laeng maisalakanto; ngem kasla limmasat iti apuy.” Ania ti “gunggona”? Nalawag a ni Pablo pampanunotenna ti dadduma pay ngem iti gunggona iti biag nga agnanayon idiay Baro nga Urnos ti Dios, ta kitaentayo a daydiay nakapuy ti panagbangonna mapukawna ti “gunggona,” nupay isu met laeng maispalnanto iti bagina iti “apuy.”​—1 Corinto 3:14, 15.

22, 23. (a) Ania a gunggona ti inawat ni apostol Pablo maipapan kadagiti Kristiano a kakabsatna idiay Tesalonica? (b) Ania a “gunggona” ti tarigagay ti pusoyo, ket kasanoyo koma a magun-odan dayta?

²² Ania, ngarud, dagitoy a “gunggona”? Ti nasao ni Pablo kadagiti taga Tesalonica, nangted lawag iti daytoy. Kadagiti naidaddadanes a Kristiano sadiay, nagsurat ni Pablo: “Ta ania ti inanamami wenno rag-o wenno balangat a pakaidayawanmi​—saan aya a dakayo met laeng?​—iti sanguanan iti kaadda ni Apotayo a Jesus? Kinapudnona dakayo ti dayaw ken ragsakmi [“ti pagpannakkel ken ti rag-omi!” Today’s English Version].” (1 Tesalonica 2:19, 20) Tinulongan ni Pablo dagidiay a taga Tesalonica iti dalan ti kinapudno. Ket nupay manipud iti pangrugian nagsagabada ti pannakaidadanes, isudat’ nagtakder a sititibker. Ti gunggona ni Pablo isu iti rag-o ti pannakakita kadakuada a nakapagtalinaed nupay adda ti kasta nga ibubusor. Daytoy ti mangpaneknek a nasayaat iti panagbangon ni Pablo.

²³ Daytat’ umas-asping met laeng kadatayo. Saan aya a tarigagay iti pusoyo a tulongan dagidiay a sursuruanyo a makapatanor kadagiti naandor a Nakristianuan a kualidad tapno makapagtakderdanto met a sititibker no dumteng dagiti pannakasulisog ken rigrigat kadakuada? Wen, anian a makagunggona ti pannakakita kadagiti estudianteyo iti Biblia ken kadagiti annakyo a maibturanda dagiti kasta a naapuy a susuot! Daytoy ti mangpaneknek a nasayaat met ti panangbangonyo. Sapay koma ta isu daytanto met iti gunggonayo bayat iti panagbangbangonyo iti umiso a pundasion babaen kadagiti di mauram iti apuy nga materiales ken bayat a kumitkitakayo ken Jehova a mangbendision kadagiti panagreggetyo.

Malagipyo aya?

Tapno madanon iti puso​—

◻ Apay a nasken iti panangipakita ti umiso nga ulidan?

◻ Ania a kita a salsaludsod dagiti makatulong, ken apay?

◻ Apay a kasapulan a makita ti estudianteyo ti kinasirib ti panagtulnog kadagiti linlinteg iti Dios?

◻ Apay a masapul a maadal ti estudianteyo no kasano ti panagkararag?