Panangitalek iti Sao ti Dios
1 Adu ita ti mangmatmat iti Biblia a kas nagpaso ken saan a napudno. Nupay kasta, ti Sao iti Dios ket addaan ti puersa a mangbaliw iti kabibiag. (Heb. 4:12) Naiparangarang daytoy iti panunot ken kababalin dagiti nagduduma a tattao. (Efe. 4:24) Ti panangalagad iti pammagbaga ti Biblia isut’ mangted ragsak iti aglawlaw ti pamilia. Patanorenna iti nakaarubaan a relasion, nga uray ania ti rasa, kolor, wenno sosial a takder.—Luc. 10:29-37.
2 Ti personal a kapadasan iti Sao ti Dios isut’ mangtignay kadatayo a mangparegta iti dadduma nga usigenda a mismo ti pudno a pateg iti Biblia. Ti ekselente a tumulong a mangaramid iti daytoy isu daytoy Topiko a Pagsasaritaan, “Apay a Basaen ti Biblia?” Kasano a mausar daytoy a topiko a maisinggalut iti New World Translation ken Sao ti Dios a libro bayat iti Nobiembre?
3 Panangusar iti Topiko a Pagsasaritaan: Kalpasan ti ababa nga introduksion, mabalintayo a kunaen: “Iti kaadu dagiti problema a naipasango kadagiti pamilia ita, simmarungkarkami tapno iturongmi ti asikaso iti kakaisuna a gubbuayan ti praktikal a tulong. Iti napalabas, dagiti tattao ti masansan a kumita iti Biblia a kas giya, ngem nagbalbaliwen ti tiempo, saan kadi? Makunayo kadi a ti Biblia ket makatulong a mangsolbar kadagiti problema kadagitoy nga aldaw, kas iti di umiso a panagusar ti druga, delinkuensia, ken pagtaengan a nasinasina? [Palubosan a sumungbat.] Timudenyo no ania iti kunaen ti Biblia iti 2 Timoteo 3:16. [Basaen.] Makunayo aya a ti Biblia ket makaited iti pagimbagan nga impluensia? [Palubosan a sumungbat.] Kaaduan dagiti tattao ti agkasapulan ken agtarigagay iti pannakaiwanwan no mapasanguanda ti problema wenno banag a desisionan iti biag, saan aya? Usigenyo no sadino ti pangiturongan iti Sao ti Dios kadatayo no alagadentayo. [Basaen ti Juan 17:3.] Ited ti Biblia iti nabatad a direksion a mangsolbar kadagiti personal a pakarigatan ken ibalabalana iti sigurado a namnama iti masakbayan.” Kalpasanna mabalintayo nga idemostra iti pateg ti New World Translation wenno iti Sao ti Dios a libro.
4 No itukonyo ti New World Translation, mabalinyo nga iyawis ti asikaso kadagiti benneg, agraman iti usar ti moderno a pagsasao ken pannakaisubli iti nasantuan a nagan. Masarakanyo met a makatulong ti panangaramat iti maysa wenno dua a puntos manipud pinanid 255-259 ti Panakirinnason a libro. Itukon ti personal a panagadal iti Biblia kadagidiay a mangipakita ti interes.
5 No iturongyo ti interes iti Sao ti Dios a libro, mabalin a kayatyo nga iyawis ti asikasoda idiay Kapitulo 13 iti “Ti Sao ti Dios Nabiag,” a mangipakita no kasano a dagiti kabibiag ket nabaliwanda babaen iti panangsurot kadagiti prinsipio ti Biblia. Nalabit a kayatyo a basaen iti paset ti parapo 1 iti dayta a kapitulo a pangallukoy ti interesda iti dayta.
6 Bayat ti Nobiembre, naridamkayo koma kadagiti gundaway a mangparegta kadagiti tattao nga agbasa ti Biblia. Alistokayo koma a mangsaruno babaen ti panagsarungkar kadagidiay a nangiyebkas iti interesda. Tulonganyo ida a mangkultibar iti napudno a panangipateg ti pannakabalin iti Sao ti Dios. Babaen ti panangannurot kadagiti prinsipiona iti bibiagda, magun-odda ti agnanayon a gunggona nga agpadpada itan ken iti biag a mapasungad.—1 Tim. 4:8.