Panangiparang ti Naimbag a Damag—Panangiparang ti Naimbag a Damag—Kadagiti Nangina nga Aldaw
1 Nupay adu kadagiti selebrasion ti Christmas ken Baro a Tawen ket namunganayda iti pagano, nasurok a maysa a bilion kadagiti agkunkuna a Kristiano ti mangrambak kadagitoy iti tinawen. Kasano a madanon iti puspuso dagitoy babaen ti naimbag a damag kabayatan dagiti nangina nga aldaw?
2 Naparbeng ken Managraemkayo: Aramiden dagiti panglakayen ti espesial nga urnos nga agpaay iti nangina nga aldaw a panangasaba, nangruna iti Disiembre 25 ken Enero 1. Bayat nga ibaklay iti ministeriotayo, nalabit a maranaantayo dagiti adu a tattao a kupado kadagiti bisita ken ti panagsaganada iti taraon. Kas naparbeng, maaramidtayo nga ababa ken napunto dagiti komentotayo. Manglukat daytoy iti dalan a maipaay ti mainayon a pammaneknek iti masakbayan.
3 Saantayo a makiraman kadagiti nailubongan a relihioso a rambak, ken ditay met usaren dagiti kablaaw iti nangina nga aldaw. Ngarud, kasapulan ti taktika no kasanotayo nga agtignay kadagita a kablaawda. Saantayo a pagbalinen nga isyu daytoy, ngem iti adu a kaso mabalintayo ti agyaman iti bumalay ti naimbag a tarigagayna. No agsaludsod dagiti tattao maipapan ti pammatitayo, ipasigurado kadakuada a raementayo ni Kristo Jesus, agsipud kasapulan dayta kadagidiay agraem iti Dios. (Juan 5:23) No kalikaguman ti maysa a tao nga ammuen iti ad-adu pay nga impormasion bayat dayta a tiempo wenno ti masakbayan, mabalintayo nga iranud kadakuada dagiti material idiay Panakirinnason a libro iti pinanid 242-244 ken 246.
4 Dagiti Introduksion: Nalabit a masarakan dagiti tattao a mas naamoda a makisao kadatayo maipapan iti Dios bayat daytoy a tiempo ti tawen. Mabalintayo a gundawayan daytoy iti introduksiontayo. Kas ehemplo, mabalintayo a kunaen: “Iti daytoy tiempo ti Christmas, masansan a mangngegan dagiti tattao nga iyebkasda iti namnama nga addanto talna ditoy daga ken naimbag a nakem kadagiti tattao. Patienyo kadi nga iyeg ti Dios iti talna ditoy daga iti daytoy tiempotayo?” Kalpasanna maitultuloy a maipakita a ni Jesu-Kristo isu daydiay naipadto a “Prinsipe ti Kappia.” (Isa. 9:6, 7) Kas nadutokan nga Agturay iti gobierno ti Dios, agtignayton ni Kristo a mangyeg iti talna ditoy daga.—Dan. 2:44; Apoc. 21:3-5.
5 Nupay kaaduan a tattao ket naaleng-alengda maipapan iti mensahe ti Pagarian ken pagragsakanda dagiti palso a relihioso a nangina nga aldaw, sigurado a bendisionan ni Jehova iti reggettayo a mangsarak kadagiti agsapsapul ti kinapudno ket iturongna ida iti organisasionna.—Juan 4:23, 24.