Panangusar iti “Adtoy!” a Broshur iti Panagsarungkar
1 Ammo ni apostol Pablo ti pateg iti panangtaripato kadagidiay a nangipakita ti interes iti kinapudno. Iyarigna ida iti naganus a mula, a kasapulanda ti regular a panangsibug ken panangrukit. (1 Cor. 3:6-9) Kasta met ita, dagiti interesado a tattao ti agkasapulan iti natanang a taripato nga ipaaytayo no sarungkaran ida tapno rukiten ti espiritual a panagdakkelda.
2 Ti kada sarungkar nasayaat no marepaso iti apagbiit no ania ti napagsaritaan iti napalabas, a maiturong kadagiti puntos a paginteresan ti bumalay. Iraman ti bumalay iti diskusion ken usigen dagiti paginteresan ken kasapulanna.
3 No maaramid ti sarungkar, naipaima wenno saan ti “Adtoy!” a broshur, mabalin a kayatyo nga usaren daytoy sumaruno nga idudupag a pangirugi ti panagadal:
◼ “Adu dagiti tattao a nakasaomi ti nakasarak iti sungbat dagiti saludsodda iti Biblia babaen ti panangusar iti daytoy a broshur.” Kalpasan a maiturong kadagiti 12 a salsaludsod idiay panid 30 iti “Adtoy!” a broshur, mabalin a maisaludsod: “Ania a saludsod ti kayatyo a masungbatan?” Iturongyo idiay panid a sumungbat iti saludsod ken ipakita iti bumalay dagiti saludsod ti kada parapo. Wanasen dagiti sumagmamano a puntos ken maaramid ti depinido nga urnos iti panagsarungkar manen.
4 Mabalin a daytoy ti sabali nga idudupag:
◼ “Maragsakanak unay iti diskusiontayo idi napan a lawas. Adu a tattao ti masdaaw no apay nga agkarasarungkarkami iti pagtaenganda. Pagarupek a ti komento iti panid 26 iti daytoy a broshur ti makapainteres kadakayo. [Ipakita ti ilustrasion iti panagadal ti Biblia ken basaen iti paset ti parapo 51 ken 52.] Maibasar iti nabasatayo ditoy, ania ti makunayo a kasapulan tapno makastrektayo iti Paraiso?” Pasungbaten ken maiyurnos ti panagsarungkar tapno maituloy ti panagadal.
5 Ti panangsaruno iti napalabas a bisita idiay napaimaan ti “Adtoy!” a broshur, mabalinyo a kunaen:
◼ “Iti daydi naudi a bisitak, napagsaritaantayo iti kasasaad ti lubong nga agkasapulanen a mabaliwan. Agsiddaawkayo aya no apay a pinalubosan ti Dios iti kinadakes?” Pasungbaten sa maiturong iti panid 15, parapo 27-9, nga imutektekan dagiti saludsod ti panagadal. Basaen ken lawagan dagiti parapo.
6 Kadagidiay Naibatian iti Tract: No dadduma maysa a tract ti naibati iti umuna nga ipapan. No agsarungkarkayo, mabalinyo a lawlawagan ti maysa wenno dua a parapo manipud iti tract agraman dagiti naisitar a kasuratan. Kalpasanna maipakita no kasano a ti maysa a kasuratan idiay tract ket nailawlawag a detaliado idiay broshur nga “Adtoy!” No iparangarang daydiay tao ti interes, mabalinyo nga itukon iti broshur ken maiyurnos a maitultuloy ti diskusion iti sumaruno a sarungkar.
7 Bayat a matalek a taripatuen ti panagsibug kadagiti naganus a mula iti Kristiano a pammati a naipaaywan kadatayo, ti Dios isut’ mangpadakkel a maipaay iti dayaw ken dayagna.—1 Cor. 3:7.