Upayennakay Kadi Dagiti Maipawil?
DAGITI maipawil! Awan ti pudno a mangayat kadakuada; ngem masapul a tumuloktay kadakuada iti dadduma a kasasaad. Nupay kasta, maup-upaykay aya no dadduma gapu ta ti biagyo ket kasla malaplapdan unay? Nalabit nasaysayaat ti riknayo no baliwanyo ti panangmatmatyo. Imbes a pakadukotanyo dagiti diyo maaramid, apay a dikay gundawayan ti aniaman a wayawaya a tagtagiragsakenyo?
Kas pagarigan, adu kadagiti nakurapay ti mangar-arapaap a nabaknangda koma. Nupay kasta, bayat a limitaran ti kinapanglaw ti mabalintayo nga aramiden iti daytoy a sistema ti bambanag, mabalin a gun-oden ti amin dagiti napateg a bambanag iti biag. Agpada dagiti tattao a napanglaw ken nabaknang nga agayat, agasawa, agpataud iti annak, mangtagiragsak kadagiti naimbag a pannakigayyem, ken dadduma pay. Kangrunaanna, agpada nga ammo dagiti tattao a napanglaw ken nabaknang ni Jehova ket ur-urayenda ti naikari a baro a lubong. Agpada a rumang-ay dagiti tattao a napanglaw ken nabaknang iti Nakristianuan a kinasirib ken pannakaammo, a nasaysayaat ngem ti kinabaknang. (Proverbio 2:1-9; Eclesiastes 7:12) Isuamin—nabaknang ken napanglaw—mabalinda ti mangaramid iti naimbag a nagan ken Jehova. (Eclesiastes 7:1) Idi kaaldawan ni Pablo ti kongregasion Kristiano ket buklen ti ad-adu a nakurapay ti biagna—dadduma kadakuada ti tagabo—a nainsiriban a nangusar ti aniaman a wayawaya nga ipalubos ti kasasaadda.—1 Corinto 1:26-29.
Nainkasuratan a Kinaulo
Iti Nakristianuan a panagasawa, ti asawa a babai agpasakop ken lakayna—urnos a nadisenio a pakagunggonaan ti intero a pamilia. (Efeso 5:22-24) Rumbeng kadi a riknaen ti asawa a babai nga isut’ naipababa gapu iti daytoy? Saan. Agbinnulig ti asawa a lalaki ken ti asawa a babai. No ipakat ti lalaki ti kinaulona a kas ken Kristo, bassit laeng ti maipawil nga aramidenna ken ni baketna ket ad-adu ti gundawayna a mangusar kadagiti abilidad ken paglainganna. (Efeso 5:25, 31) Ti “natalunggadingan nga asawa” idiay Proverbio kapitulo 31 ket napnuan iti adu a makapainteres ken makakarit a trabaho nga agkasapulan iti laing ken determinasion. Nalawag a ti panagpasakop ken ni lakayna ket saan a makaupay kenkuana.—Proverbio 31:10-29.
Kasta met, di maipalubos iti babai a mangidaulo iti kualipikado a lallaki iti kongregasion Kristiano. (1 Corinto 14:34; 1 Timoteo 2:11, 12) Rumbeng kadi nga agpasugnod dagiti Kristiano a babbai iti sidong dayta a panangipawil? Saan. Kaaduanna agyamanda a makakita a maay-aywanan dagiti paset ti Nakristianuan a serbisio iti nateokratikuan a pamay-an. Maragsakanda ta magunggonaanda iti panangipastor ken panangisuro dagiti nadutokan a panglakayen ken maseknanda iti napateg a trabaho a panangasaba ken panagaramid iti ad-adalan. (Mateo 24:14; 28:19, 20) Adut’ maar-aramidan dagiti Kristiano a babbai iti daytoy a benneg, ket mangyeg daytoy iti dayaw iti imatang ni Jehova a Dios.—Salmo 68:11; Proverbio 3:35.
Dagiti Maipawil Kadagiti Agtutubo
No dadduma ireklamo dagiti agtutubo nga adut’ dida maaramid iti biagda, gapu ta kaaduanna addada iti sidong ti autoridad dagiti nagannakda. Kaskasdi a Nainkasuratan met daytoy. (Efeso 6:1) Imbes a marurodda gapu iti panangpawil dagiti nagannak kadakuada, ipamaysa dagiti masirib a Kristiano nga agtutubo ti panangtagiragsakda iti adda a wayawayada—masansan a pakairamanan ti wayawaya manipud kadagiti nadagsen a pagrebbengan. No kasta mausarda ti pigsa ti kinaagtutubo ken kasasaadda a mangisagana iti bagbagida maipaay iti biag ti nataengan.
Malagip ti dati a manangaywan ti sirkito idiay Brazil ti 12-tawenna a barito iti maysa a bassit a naiputputong a grupo a nakedngan ti mabalinna nga aramiden a naimbag iti kasasaadna. Naigalut iti sekular a panggedan ti mangay-aywan iti rekord ket bassit ti tiempona a mangasikaso iti grupo, ngem inyurnosna a tulongan daytoy a barito. Naammuanna no sadinot’ nakaikabilan dagiti amin a porma ken kanayon nga adda tapno tumulong. Makaparegta ti interesna, ken matalek a kadua iti tay-ak ti serbisio. Maysa itan a nadutokan a panglakayen dayta a baro.
Adu dagiti kasasaad a mabalin a manglimitar iti wayawaya ti maysa a tao. Ti sakit ti manglapped kadagiti dadduma. Dadduma agtataengda kadagiti nabingaybingay a sangakabbalayan ket matakuatanda a malapdan ti wayawayada babaen ti pagayatan ti di manamati nga asawa. Nupay tarigagayan dagidiay addaan lapped a saan koma a kasta, makapagbiagda pay laeng nga addaan pannakapnek. Naglaon daytoy a magasin kadagiti adu a pakasaritaan ti kakasta a tattao a makapabileg unay iti sabsabali agsipud ta agtalekda ken Jehova ken usarenda a naimbag dagiti kasasaadda.
Maipapan iti gagangay a kasasaad idi kaaldawanna, kinuna ni apostol Pablo: “Naayabanka aya idi maysaka nga adipen? Dinaka koma pagdanagen dayta; ngem no mabalinmo met ti agwayawaya, gammatam ketdi ti gundaway.” (1 Corinto 7:21) Nagtimbengen a panangmatmat! Agbaliwbaliw ti dadduma a kasasaad. Agmataengan dagiti agtutubo. No maminsan awaten dagiti bumusbusor nga assawa ti kinapudno. Naammuan a mabalin a sumayaat ti kasasaad ti ekonomia. Mabalin nga umimbag dagiti tattao a masakit. Iti dadduma a kasasaad, nalabit a di agbalbaliw dagiti bambanag agingga a dumteng ti baro a lubong ni Jehova. Nupay kasta, aniat’ magunggona iti panagdukot gapu ta di maipalubos nga aramiden ti maysa ti maipalubos iti sabali?
Nakabuyakayo kadin kadagiti billit nga agtaytayab iti tangatang ket dinayawyo ti pintas ken wayawaya iti panagtignayda? Nalabit tinarigagayanyo a makatayabkay met koma. Bueno, saan a mabalin ken pulos a diyonto mabaelan ti tumayab a kas kadagiti billit! Ngem nalabit a dikay agreklamo. Imbes ketdi, pagragsakanyo dagiti inted-Dios nga abilidadyo. Kabaelanyo ti agbiag a sibaballigi bayat nga aggargarawkayo iti rabaw ti daga. Kasta met, aniaman ti kasasaadtay iti biag, no ipamaysatay iti mabalintay nga aramiden imbes a pagdukotan ti ditay mabalin nga aramiden, agbalin a makapnek ti biag, ket masarakantayto ti rag-o iti panagserbi ken Jehova.—Salmo 126:5, 6.
[Ladawan iti panid 28]
Mariknayo kadi a kasla al-aladandakayo dagiti dadakkelyo?