Ideklara ti Makapakintayeg a Mensahe ti Apocalipsis

¹ Nakatulong ti libro nga Apocalipsis kadatayo a nangawat iti makapakintayeg a mensahe a nairekord iti libro nga Apocalipsis. Tulongan met dagiti dadduma a mangipateg iti dayta a damag babaen ti panangaramat iti daytoy a libro iti ministerio bayat ti Marso. Masarakanyo a dagiti sumaruno a singasing ti makatulong kadakayo nga agsagana iti presentasionyo.

² Kalpasan ti maitutop a kablaaw, mabalinyo a kunaen daytoy:

◼ “Nangngegyo kadin dagidiay uppat a nakakabayo iti Apocalipsis? [Palubosan a sumungbat.] Ammoyo aya a dagitoy a simboliko a nakakabayo ket pasetda iti padto ti Biblia a mangipadles iti paspasamak ti tiempotayo? [Palubosan a sumungbat.] Interesadokayo kadi a mangawat iti daytoy a padto ken no ania ti kababagasna kadatayo?” No maipakita ti interes, mabalinyo nga itudo dagiti ilustrasion idiay kapitulo 16 ti Apocalipsis a libro ken ilawlawagyo dagiti dadduma a bersikulo iti natarnaw a tipo. Wenno makomentuanyo dagiti dadduma a benneg ti sirmata babaen ti panangusar iti tract a Daytoy Kadi a Lubong Makalasatto? Maitukon ti libro ken maiyurnos iti panagsubli tapno malawagan ti ad-adu pay maipapan iti sirmata ken ti kaipapananna.

³ Wenno nalabit a kayatyo nga ipadas ti iyaasideg a kas iti daytoy:

◼ “Nangngegyo kadin ti termino nga ‘Armagedon’? [Palubosan a sumungbat.] Adu ti mangipagarup a tukoyen daytoy iti nuklear a gubat ti baet dagiti pannakabalin iti lubong. Kinapudnona, ti Armagedon ket naiduma a banag. Maitunos iti Biblia, kaipapananna ti dakkel a panagbalbaliw, nga agresulta ditoy lubong iti agnanayon a talna.” Agpannuray iti sungbat ti tao, maitudo ti maysa a kasuratan a kas iti Apocalipsis 16:16 wenno Salmo 37:10, 11 sa maiturong iti kapitulo 39 ti Apocalipsis a libro. No maipakita ti interes, maitukon ti libro. No saan, mausig dagiti maitutop a puntos idiay tract a Daytoy Kadi a Lubong Makalasatto?

⁴ Mabalinyo a mapataud ti interes babaen ti panangusar iti daytoy a singasing:

◼ “Bayat daytoy a bulan, adu a tattao ti mangpanunot maipapan iti ipapatay ken panagungar ni Jesu-Kristo. Napanunotyo kadin no ania ti ar-aramidenna manipud panagungarna? Adu a paspasamak kadagitoy aldawtayo ti naisinggalut iti agdama a papel ni Jesus iti panggep ti Dios. Dadduma kadagitoy ti nailawlawag iti libro nga Apocalipsis. Kayatyo aya a maadal ti ad-adu pay maipapan iti panggep ti Dios a nangibaonan iti Anakna ditoy daga ken no ania ti kaipapananna kadakayo ken dagiti ay-ayatenyo?” Mabalinyo nga iyawis ti asikaso iti parapo 1 ken 2 iti kapitulo 41 ti Apocalipsis a libro wenno mailawlawag dagiti maitutop a puntos manipud agdinama a ruar dagiti Ti Pagwanawanan ken Agriingkayo! Wenno kayatyo nga usaren ti tract a Biag iti Maysa a Natalna a Baro a Lubong a pangpabara iti mainayon nga interes.

⁵ Siguruenyo nga awisen iti asinoman a mangipakita ti interes a tumabuno iti Memorial. Babaen ti bendision ni Jehova, mabalinanyo a tulongan iti asinoman a ‘dumngeg ti sasao daytoy a padto ken annuroten dagiti bambanag a naisurat kenkuana.’​—Apoc. 1:3.

Tulonganyo Ida nga Agtignay iti Mensahe

¹ Ti trabahotayo a panangasaba mangted kadagiti tattao iti oportunidad a ‘dumngeg ti sasao iti padto ti Apocalipsis.’ (Apoc. 1:3) Ngem tapno makalasatda “iti dakkel a rigat,” masapul nga agtignayda a maitunos kadakuada. (Apoc. 7:14) Nasaklaw dagiti biag! Siguruenyo ti sumarungkar kadagidiay a nangipakita ti interes.

² No nakaibatikayo iti “Apocalipsis” a libro, mabalinyo a kunaen:

◼ “Nagsayaat a makitakayo manen. Iti daydi naudi a nagsaotayo, napagsaritaantayo maipapan dagiti padto ti Apocalipsis, ket nakaibatiak iti publikasion a mangilawlawag iti dayta. Nalabit a nadlawyo a nupay ti libro nga Apocalipsis ket nauneg, maawatan dayta babaen iti lawag dagiti agdama a paspasamak. Alaek ti sumagmamano a minutos a mangilawlawag no ania ti makuna ti Biblia maipapan iti tiempotayo.” Kalpasanna maiturong iti publikasion a pangirugianyo iti panagadal ti Biblia.

³ No nakaibatikayo iti tract a “Daytoy Kadi a Lubong Makalasatto?” iti umuna a sarungkar, mabalinyo a kunaen daytoy:

◼ “Maragsakanak a nakadanon kadakayo ita nga aldaw. Idi bimmisitaak kadakayo iti nabiit, napagsaritaantayo maipapan ti pagilasinan a dumteng sakbay iti panungpalan ti lubong. [Repasuen dagiti maitutop a benneg ti pagilasinan iti Mateo 24:3-14.] Nadlawyo kadi ti aniaman a pasamak iti kallabes ditoy lubong a kaitungpalan ti paset dayta a pagilasinan?” Babaen ti panangusar kadagiti ilustrasion idiay kapitulo 16 iti Apocalipsis a libro, komentuan ti kaitungpalan dagiti dadduma a padto ti Biblia.

⁴ No awisenyo ti bumalay iti Memorial, kunaenyo:

◼ “Idi kallabes a bisitak, nagsaritaantayo maipapan no kasano ti kapateg iti ipapatay ni Jesus a maipaay ti sangatauan. Inawiskayo met a tumabuno iti Memorial ti ipapatayna, a daytoy ti rambakan dagiti Kristiano iti intero a lubong inton Marso 26. Immayak ita nga aldaw tapno ipalagipko kadakayo a maawiskayo iti daytoy a napateg a pasamak. [Ibaga ti oras ken lugar ti rambak.] Mabalin a tumulong daytoy kadakayo a mangipateg iti kaipapanan ti okasion no repasuentayo dagiti dadduma a bendision a sagsagrapentayo itan kas resulta ti inaramid ni Jesus a maipaay iti sangatauan, agraman dagiti bendision a mapasungad pay.” Kalpasanna malawagan dagiti puntos manipud kapitulo 14 ti libro nga Apocalipsis. Mailawlawag met dagiti ilustrasion idiay pinanid 294, 299, ken 308. No mabalin, maiyurnos ti panangtulong iti interesado a tumabuno ti Memorial.

⁵ No ti tao ket basta kayatna latta ti dumngeg, mabalin a daytoy ti epektibo:

◼ “Maragsakanak unay iti daydi kallabes a panagsaritatayo maipapan ti Biblia. Nagsubliak gapu ta kayatko a magun-odmo no ania ti naikari iti Dios kadagidiay agmayat a mangadal ti ad-adu pay maipapan kenkuana.” Basaen ti Juan 17:3, sa maiturong iti tract a Biag iti Natalna a Baro a Lubong.

⁶ Sapay koma ta ti panangipategyo iti subbot ti mangtignay kadakayo nga agsarungkar iti interesado a tattao. Tulonganyo ida nga agtignay a maitunos iti makapakintayeg a mensahe ti Apocalipsis. Laglagipenyo, “ti naituding a tiempo asidegen.”​—Apoc. 1:3.