Usaren Dagiti Nagduduma a Broshur iti Ministerioyo
1 Interesado dagiti tattao ita iti nagduduma a tema. Bayat a makiramankayo iti tay-ak ti serbisio iti Hulio, mabalinyo ti mangitugot iti sumagmamano a nagduduma a broshur, nga usarenyo ti makaawis kadagiti tattao iti teritoria. Nalabit a kayatyo nga ipadas ti maysa kadagitoy a presentasion:
2 No itukonyo ti broshur a “Ti Gobierno a Mangiyegto iti Paraiso,” mabalinyo nga isaludsod:
◼ “Ania ti pagarupyo a kasasaad ti lubong no ti laeng Dios ti kakaisuna nga agturay? [Palubosan a sumungbat.] Dayta ti eksakto a dawdawatentayo no ikararagtayo ti Amami a kararag. [Luktan iti panid 3, ket basaen ti umuna a parapo, a nangadaw iti Mateo 6:10.] No kayatyo ti agbiag iti kasta a lubong, masapul a basaenyo daytoy a broshur.” Itukonyo nga ibati dayta.
3 Mabalinyo nga usaren ti “No Adda Matay nga Ay-ayatenyo” iti kastoy a wagas:
◼ “Ti pagarupyo dumtengto ngata ti tiempo nga awanton kadatayo ti agminatay iti ay-ayatenna. [Palubosan a sumungbat.] Liniwliwa daytoy a broshur dagiti minilion babaen iti kari ti Biblia a ti kasta a tiempo ket umayen. [Luktan iti panid 5, ket basaen ti maikalima a parapo, agraman ti 1 Corinto 15:21, 22. Kalpasanna iturong iti ilustrasion iti panid 30.] Naipakita ditoy ti rag-o a mapadasantayo a mangabrasa kadagiti pimmusay nga ingungotentayo inton panagungar. Ngem sadinonto ti pakaaramidan dayta? Ipakita kadakayo daytoy a broshur ti sungbat ti Biblia.” No awatenda ti broshur, mabalinyo nga inayon: “Kayatko ti agsubli ken lawlawagantayonto pay dayta a tema.”
4 Mabalin nga aramatenyo ti broshur nga “Adtoy! Pagbalinek Dagiti Isuamin a Bambanag a Baro,” nga usaren daytoy diretso nga iyaasideg a mangirugi iti panagadal ti Biblia:
◼ “Isalsaludsodko kadagiti kaarrubak no adda parikutda maipapan iti Biblia. Ilista daytoy a publikasion ti dadduma a napataud. [Luktan ti panid 30.] Tinukay daytoy maudi a saludsod ti interes dagiti adu: ‘Kasano ti panagsaganayo a maipaay iti agnanayon a biag idiay Paraiso?’” Pagsaritaan dagiti parapo 57-8 iti pinanid 29-30 sa basaen ti Apocalipsis 21:3, 4. Itukon ti broshur ken iyurnos ti panagsarungkar tapno lawlawagan dagiti dadduma a saludsod.
5 Nalabit a kayatyo nga ipadas daytoy simple a presentasion babaen ti broshur a “Ti Nasantuan a Nagan nga Agtalinaed iti Agnanayon”:
◼ “Maysa kadagiti umuna a banag a naadalko manipud Biblia isut’ nagan ti Dios. Ammoyo kadi no ania dayta? [Palubosan a sumungbat.] Adda ditoy Biblia iti Salmo 83:18. [Basaen.] Daytoy a broshur ipakitana no kasano a ti nagan ti Dios, a Jehova, ket agparang iti adu a nagduduma a pagsasao. [Ipakita ti kahon iti panid 8.] No kayatyo a maadal pay ti ad-adu maipapan ken Jehova ken dagiti panggepna, masapul a basaenyo daytoy a broshur.” Iyawat ti broshur iti bumalay.
6 Babaen kadagita a nagduduma a broshur nga usaren, sigurado a makabalantayo a “mangibaga ti naimbag a damag kadagiti naemma.”—Isa. 61:1.