Panagsarungkar nga Addaan Panggep
1 No agsarungkarkayo, ikagumaanyo ti mangusar iti maysa a teksto a mangnayon iti pannakaammo ti tao iti tema ti Biblia a napagsaritaanyo idi napalabas.
2 No naipaimayo ti artikulo a “Maysa a Lubong nga Awan ti Gubat—Kaano?” (Ti Pagwanawanan, Oktubre 1), mabalinyo a kunaen:
◼ “Ania ngata ti kasasaad ti biag ditoy daga inton awanen ti gubgubat? [Palubosan a sumungbat.] Palubosandak a mangipakita kadakayo no ania ti inkari ti Dios nga aramiden.” Basaen ti Salmo 37:10, 11. Ipalagip iti tao ti insuro ni Jesus kadagiti adalanna a kararagen kas nairekord iti Mateo 6:9, 10. Tulongan a mangtarus iti kaipapanan dagiti sasao ni Jesus. Itukon ti suskripsion iti Pagwanawanan wenno Agriingkayo! sa iyurnos ti panagsubli a maipaay iti kanayonan panagsarita.
3 No nagsublikayo tapno ituloyyo a pagsaritaan ti artikulo nga “Apay a Nakaab-ababa ti Biag?” (Agriingkayo!, Oktubre 22), mabalinyo a rugian a kastoy:
◼ “Idi naudi nga immayak, nagsaritaantayo maipapan iti kaatiddog ti biag ti tao. Awan duadua a nadlawyo kadagiti artikulo ti Agriingkayo!, bassit ti maipanamnama dagiti sientista a tumulong kadatayo tapno agbiagtay iti nasurok a 70 wenno 80 a tawen. Ngem ania ti makunayo maipapan iti ikarkari ti Biblia? [Palubosan a sumungbat.] Ipakita ti Biblia nga adda banag a nasaysayaat a pampanunoten ti Dios a maipaay iti tao.” Sa basaen ken ilawlawag ti Juan 17:3. Iti daytoy a punto mabalinyo nga itukon ti panagadal iti Biblia iti pagtaengan wenno iyurnos ti sabali pay a panagsarita maipapan iti Biblia.
4 Maysa kadagiti kalat ti panangsarungkar kadagiti naipaimaan iti magasin isut’ panangipasdek iti ruta ti magasin. Ti simple a presentasion a kas iti daytoy ket mabalin nga epektibo:
◼ “Namnamaek a tinagiragsakyo daydiay artikulo ti Pagwanawanan a naibatik kadakayo a mangilawlawag no apay a masapul nga agbutengtayo iti Dios. Ita nangitugotak iti maysa nga artikulo ti Agriingkayo! nga agsalsaludsod, ‘Apay a Nakaab-ababa ti Biag?’ Nasayaat a saludsod dayta, saan kadi?” Mabalinyo nga ituloy babaen ti panagkuna: “Dagiti nalatak a sasao ni Jesus iti Juan 3:16 ket ikarina ti biag nga agnanayon.” Sa ilawlawag nga agsublikayto tapno iyeg dagiti sumaganad a ruar ken nalabit a nayonanyonto pay a pagsaritaan ti inkari ti Dios iti natulnog a sangatauan. Laglagipenyo a tunggal itulodyo dagiti magasin, mabalinyo nga ireport a panagsarungkar.
5 Ti panangirugi ti panagadal iti Biblia ket maysa a napateg a kalat iti ministeriotayo. Nalabit a namin-adun a sinarungkaranyo ti maysa a tao a nangala kadagiti magasin. Apay a dikay padasen daytoy nga iyaasideg iti sumaruno nga isasarungkaryo?:
◼ “Adu dagiti agsusupadi a pammati no apay a pinalubosan ti Dios ti kinadakes wenno no apay a lumakay ken mataytayo.” Luktan ti maysa kadagiti pangyadal iti Biblia a publikasiontayo iti tema a mariknayo a paginteresan ti bumalay, nga idemostra iti ababa no kasano a maikondukta ti panagadal.
6 Ni Jehova ket maysa a Dios ti panggep. Tuladentayo bayat ti Oktubre babaen iti panagsarungkar nga addaan panggep.