Kasano a Maawisko a Dumngeg ti Bumalay?
1 Idiay siudad ti Filipos, “maysa a babai a managan Lidia, a managlako iti purpura, . . . agim-imdeng idi, ket ni Jehova linuktanna a naimbag ti pusona tapno ipangagna dagiti bambanag a sasawen ni Pablo.” (Ara. 16:14) Ania ti isuro daytoy a salaysay kadatayo? Iturong ti panagimdeng ti maysa a tao a mangadal iti kinapudno. Ti balligi ti panangiranudtayo iti mensahe ti Pagarian agpannuray unay iti sitatallugod a panagdengngeg ti bumalay. Apaman a maawistayo a dumngeg, saan a narigat nga idatag ti mensahetayo. Ngem nalabit maysa a karit ti panangallukoy iti asinoman a dumngeg. Aniat’ mabalintay nga aramiden?
2 Sakbay nga intay mangasaba, masapul a kitaentayo a nalaing ti langa ken kagawaan nga usarentayo. Apay? Ad-adda a dumngeg dagiti tattao iti tao a natakneng ti takderna. Makaay-ayo aya ngem natakneng ti panagkawkawestayo? Nupay uso iti lubong ti nalalawa a kawes, liklikantayo ti kasta a di nadalimanek a langa agsipud ta ministrotayo a mangibagbagi iti Pagarian ti Dios. Ti nadalus ken nadalimanek a langatayo nayonanna ti makaay-ayo a pammaneknek iti mensahe ti Pagarian nga ikaskasabatayo.
3 Mannakigayyem ken Managraemkayo Koma: Iti sidong ti panagbaliwbaliw ti kababalin kadagitoy nga aldaw, adu pay laeng ti tattao a mangipateg iti Biblia ken mayat nga umawat iti naraem ken nainggayyeman a panagpapatang maipapan iti linaon ti Biblia. Ti nabara, napudno nga isem pagkalmaenna ti bumalay ken manglukat iti makaay-ayo a panagsasarita. Mairimat met koma ti kinapasnek ken naimbag a kababalin iti panagsao ken konduktatayo, a pakairamanan ti panagimdengtayo a sidadayaw kadagiti kapaliiwan ti bumalay.
4 Panggeptayo nga iranud ti namnama ti Biblia iti sabsabali. No adda daytoy iti panunottayo, masigurado a makaallukoy ti pannakisaotayo, saan a makapagura wenno makakarit. Saan a masapul a busbosen ti tiempo a maki-argumento iti maysa a tao a nabatad a bumusbusor. (2 Tim. 2:23-25) Makapilitayo manipud nagduduma a makaparegta ken naintiempuan a parang nga impaay kadatayo Ti Ministeriotayo iti Pagarian ken ti libro a Panakirinnason. Siempre, masapul nga isaganatayo dagitoy a naimbag tapno makapagsaotayo iti nabara ken makaawis a wagas.—1 Ped. 3:15.
5 Kalpasan ti ibibisitatayo, sumagmamano laeng a bumalay ti makalagip iti eksakto nga insaotayo. Nupay kasta, gagangay a malagipda ti wagas a panangisaotayo iti dayta. Ditay koma tagibassiten ti bileg ti kinaimbag ken kinaasi. Sigurado nga adu a marakarnero a tattao iti teritoriatayo ti situtulok a dumngeg iti kinapudno a kas ti inaramid ni Lidia idi umuna a siglo. Ti siaannad a panangpampanunot iti langa ken wagas ti panagsaotayo mabalinna a paregtaen dagiti napasnek a tattao a dumngeg iti Sao ti Dios ken siraragsak nga umawat iti dayta.—Mar. 4:20.