Kompleto Kadi ti Teokratiko a Librariayo?
1 Manipud idi 1944, imparegta ti Sosiedad kadagiti kongregasion a mangipasdekda iti libraria ti Teokratiko nga Eskuelaan ti Panagministro iti Kingdom Hall. Kunaen ti libro a Ti Ministeriotayo iti panid 74 a daytoy a libraria “mabalin a manglaon kadagiti adda a publikasion ti Sosiedad, nalabit ti sumagmamano a bilang dagiti patpatarus ti Biblia, maysa a konkordansia ken dadduma pay a makatulong a reperensia.” Ti manangaywan iti eskuelaan ti makinrebbeng iti libraria.
2 Kasano kakompleto ti libraria iti Kingdom Hall-yo? Napateg nga adda koma iti librariayo dagiti Watch Tower Publications Index tapno makapagsukimat dagiti kakabsat. Tapno makagunggona daytoy, kasapulan met nga addaankayo kadagiti tomo ti Watchtower a nadakamat kadagiti Index. Ragsakenmi nga ibaga nga addaantayon iti limitado nga stock ditoy sanga ti Pilipinas ti amin a tomo ti Watchtower iti Ingles manipud 1950 aginggat’ 1995. Dagiti kongregasion wenno indibidual nga agkasapulan a mangkompleto iti bukodda a libraria mabalinda ti agpedido kadagitoy iti Sosiedad.
3 Nupay kasta, laglagipenyo nga “Special-Request Items” dagitoy a tomo, kayatna a sawen, mabayadanda a dagus apaman a maawat ken saanda a maipempen a paggastosan ti Sosiedad. Kayat a sawen daytoy a kasapulan a maipatulod ti kontribusion a ₱120.00 iti kada tomo a mapedido. Nalabit a kayat dagiti kakabsat ti agkontribusion tapno makompleto ti libraria ti Kingdom Hall kadagitoy a tomo. Maysa daytoy a bendision iti intero a kongregasion. Uray no saanyo a maala amin dagiti tomo a mamimpinsan, mabalin nga agpedido ti kongregasion iti maysa wenno dua ita sa mangalanto iti ad-adu pay bayat a di pay naibus ti abastomi.
4 Paregtaenmi dagiti indibidual a makapagpedido a maaddaan iti bukodda a kompleto a libraria. Ngem kadagidiay saan a makapagpedido, makagunggona ti libraria ti Teokratiko nga Eskuelaan ti Panagministro. Bayat nga usarentay daytoy iti panagsukimat, masarakantayo dagiti ‘naitalimeng a gameng’ ti Sao ti Dios.—Prov. 2:4-6.