‘Ikasabatayo ti Sao’
1 Kas kuna ti Biblia maipapan “kadagiti maudi nga al-aldaw,” kaaduan a tattao ita ti addaan laeng “iti langa ti nadiosan a debosion.” (2 Tim. 3:1, 5) Maigapu daytoy iti saan a panangitandudo dagiti relihioso a papangulo iti Biblia. Kaykayatda ti agadaw iti sursuro dagiti pilosopo ken teologo wenno pagsasaritaan dagiti sosial ken politikal nga isyu imbes nga ikasabada ti Sao ti Dios. Adu dagiti relihioso a papangulo nga agkuna a daanen ti Biblia, isut’ gapuna a kaykayatda nga itandudo ti teoria ti ebolusion imbes a ti sursuro ti Biblia maipapan iti Namarsua. Saan nga ar-aramaten ti kaaduan kadagiti klero ti personal a nagan ti Dios, ket saanda a pagkedkedan ti pannakaikkatna kadagiti kaaduan a moderno a patarus ti Biblia.
2 Kas kadagiti relihioso a papangulo idi kaaldawan ni Jesus, barengbareng ti panangaskasaba dagiti klero ita. (Mat. 15:8, 9) Kas impadto ni mammadto nga Amos, adda ‘bisin, saan a bisin iti tinapay, wenno waw iti danum, no di ket panagdengngeg kadagiti sao ni Jehova.’ (Amos 8:11) Nangnangruna ngem iti aniaman a banag, kasapulan dagiti tattao ti naespirituan a taraon iti Sao ti Dios.
3 No Kasano a Penneken ti Naespirituan a Kasapulan Dagiti Tattao: Binalakadan ni Pablo ni Timoteo nga agtalinaed kadagiti “nasantuan a sursurat, a makabael a mamagsirib [iti maysa a tao] maipaay ti pannakaisalakan,” ken imbilinna nga “ikasaba[na] ti sao” kadagiti dadduma. (2 Tim. 3:14, 15; 4:2) Kas Saksi ni Jehova, nasken nga agtalinaedtayo iti isursuro ti Biblia no mangasabatayo, iti kasta tultuladentayo ni Jesus, a nagkuna: “Ti isursurok ket saanko a kukua, no di ket kukua daydiay nangibaon kaniak.” (Juan 7:16) Kayattayo a maammuan dagiti tattao a ti Sao ti Dios ti gubuayan ti pannakaammo nga iranranudtayo kadakuada.—1 Cor. 2:4-7.
4 Masapul a mangngeg nga umuna dagiti tattao ti kinapudno manipud iti Biblia tapno mamatida ken Jehova. Lohikal nga insurat ni Pablo: “Kasano a maaddaandanto iti pammati iti daydiay dida nangngeg? Kalpasanna, kasano a mangngegdanto no awan ti mangasaba?” (Roma 10:14) No ikasabatayo ti Sao ti Dios, matulongantayo dagiti sabsabali a maaddaan iti pammati babaen ti umiso a pannakaammo. Ti kasta a pannakaammo pasayaatenna ti biagda. Maipapan iti Biblia, insurat ti Ingles nga autor a ni Charles Dickens: “Isu dayta ti kasayaatan a libro iti lubong iti amin a panawen, agsipud ta isurona kadakayo dagiti kasayaatan a leksion a mabalin a pagpaidalanan ti asinoman a tao a mangikagkagumaan nga agbalin a napudno ken matalek.”
5 Nalaka la a mabigbig dagidiay mabisin iti naespirituan a kinapudno a supsuportaran dayta ti autoridad ti Sao ti Dios. Idi 1913, ni Frederick W. Franz, kas agtutubo nga estudiante iti kolehio, ket naikkan iti bokleta a napauluan Where Are the Dead? Idi nabasana ti sungbat ti Biblia, kinunana: “Isu daytoy ti kinapudno.” Itultuloytayo nga ikasaba ti Sao a sireregta ket iti kasta makipagrag-otayo a dumngeg kadagiti dadduma nga agkuna: “Isu daytoy ti kinapudno.”