Dagiti Natataengan Mangasabada nga Awan Sardayna
1 Bayat a lumakay ken bumaket dagiti tattao, adu kadakuada ti magagaran nga agretiro iti regular a sekular a trabahoda ken tagiragsakenda ti nanam-ay a biag kadagiti nabatbati a tawenda. Nalabit mariknada nga umdasen ti panagbannogda ket mayanatup laeng nga aginanadan. Wenno nalabit kayatda laeng a tagiragsaken ti nabatbati a tawtawen ti panagbiagda.—Luc. 12:19.
2 Kas dedikado nga ad-adipen ni Jehova, naiduma ti panangmatmattayo iti biag. Ammotayo nga awan panagretiro iti panagserbi iti Dios. Positibo ti panangmatmattayo gapu ta sipapanunottayo iti “agnanayon a biag.” (Jud. 21) Ti pannakaammo ken kapadasan a nagun-od iti adu a tawen maparang-ayna ti pannakaawat ti maysa a tao. Daytoy ti tumulong iti maysa a tao tapno ad-adda nga agbalin a nasirib ken natimbeng ken tapno maiparangarangna ti naun-uneg a panangapresiar iti biag. Amin dagitoy a galad dakkel ti maitulongna iti ministro ti naimbag a damag.
3 Ti panaglakay ket saan a basta pisikal a panagmataengan; ramanenna met ti panagpampanunot ti maysa a tao. No kayatyo ti agbiag a napaut ken ikagumaanyo a taginayonen ti panagpampanunotyo, nalabit agpadpada a maaramidyo dagita. Dagiti nataengan maparayrayda ti biagda babaen ti panangparang-ayda iti naespirituan a pannakaammoda ken panangiburayda iti dayta kadagiti sabsabali.—1 Cor. 9:23.
4 Dagiti Aktual nga Ulidan: Iti edad a 86, kinuna ti maysa a kabsat a babai: “No pampanunotek ti 60 a tawen a naglabas sipud idi naammuak ti kinapudno, agburburayok iti pusok ti makaliwliwa a kari ti Dios. Wen, ni Jehova nga agtignay a sisusungdo kadagiti nasungdo ipalubosna nga agapittayo iti aglaplapusanan a rag-o.” (Sal. 18:25) Malaglagip ti maysa a nataengan a kabsat no kasano a naldaangan unay idi natay ni baketna, sa kalpasanna dimmakes ti salun-atna. Kinunana: “Ngem, babaen ti di kaikarian a kinamanangngaasi ni Jehova, nakaungarak a naan-anay ken nakapagpayunirak kalpasan ti dua a tawen. Anian a yamanko ken Jehova ta simmayaat ti salun-atko ken rimmang-ayak iti trabaho a panangasaba!”
5 Anian a nagsayaat ta nakaad-adu dagiti nataengan a determinado nga agtultuloy a mangasaba agingga iti ipalubos ti salun-at ken pigsada—a dida agsarday! Addaanda iti naimbag a rason a mangikuna: “O Dios, sika insuronak nanipud kinaagtutubok; ket agpapan ita impalpalawagko dagiti nakaskasdaaw nga ar-aramidmo.”—Sal. 71:17.