Matulongandakayo a Mangasaba
IDI imbaga ni Jesus kadagiti adalanna a mapanda mangasaba, nalabit awan kapanunotanda maipapan iti naan-anay a kaipapanan ti ibilbilinna nga aramidenda. (Mateo 10:7) Situtulnog, sinurotda ti ulidanna ket napanda kadagiti “amin a siudad ken purpurok, a mangaskasaba ken ipakaammoda ti naimbag a damag ti pagarian ti Dios.” (Lucas 8:1) Daytat’ bassit a nangrugian ti panagregget a mangasaba a dimmakkel agingga a naiyeg ti naimbag a damag ti Pagarian iti atension dagiti tattao iti intero a daga.
Kadagiti immuna nga al-aldaw ti kongregasion Kristiano, ti panangaskasaba ket kangrunaanna babaen iti ngiwat. Nakisasao dagiti adalan ni Kristo iti asinoman nga umimdeng. “Ket inaldaw-aldaw iti templo ken kadagiti balbalay dida namingga a mannursuro ken mangikaskasaba a ni Jesus, isu ti Kristo.”—Aramid 5:42.
Kaawatan nga adda nadiosan a tulong gapu ta nakapagaramidda kadagiti pagilasinan. (Aramid 14:3) Adu a tattao ti napaimbag a pisikal ken kalpasanna nagtalinaedda a nagimdeng iti sasao iti naespirituan a pannakaagasda. Kas resultana, “dagidi mammati iti Apo umaduda la nga umadu.”—Aramid 5:14-16.
Ti Panagsaknap ti Naimbag a Damag Itatta
Iti ipapatay dagiti apostol, nagpukawen ti sagsagut ti panangagas ken pagsasao. Ngem adda aya aniaman a nangbaliwan daytoy iti bilin nga inted ni Jesus kadagiti adalanna? Awan! Imbagana kadakuada a “pagbalinenyo nga ad-adalan dagiti tattao iti amin a nasion,” ket bayat nga ar-aramidenda dayta, isunto ti adda kadakuada “iti amin nga aldaw agingga iti panungpalan ti sistema dagiti bambanag.” (Mateo 28:19, 20) Itatta, nalawag dagiti Nainkasuratan nga ebidensia nga agbibiagtayon iti panungpalan ti sistema dagiti bambanag. Tinungpal aya ni Jesus ti karina nga isut’ addanto a kadua dagiti adalanna iti trabaho a panagaramid-adalan? Ti ebidensia kunana wen!
Ti panangdanon iti binilbilion nga agtataeng iti daga babaen iti ngiwat ket imposible a maaramidan ti tao. Gapuna, naipaay ti tulong iti langa dagiti literatura ti Biblia a mabasa dagiti tattao kadagiti pagtaenganda. Kas pangarigan, idi 1879 idi tinarigagayan ti bunggoy dagiti napasnek nga estudiante ti Biblia a maipan ti mensahe ti Pagarian ti Dios kadagiti dadduma, rinugianda ti nagaramid kadagiti literatura, kas iti magasin ti Biblia a pagaammo itan kas Ti Pagwanawanan, agraman kadagiti polieto a mangilawlawag kadagiti tema ti Biblia. Idi damo nagusarda kadagiti komersial a managimaldit nga agaramid kadagiti literatura. Idi 1920 naaddaandan ti bukodda a pagimalditan iti naabangan a pasdek, ket idi 1927 nangibangondan ti kabukbukodanda a paktoria nga agimprenta kadagiti Biblia, libro, bokleta, magasin, ken polieto nga usaren ti asinoman a mayat a tumulong a mangitungpal iti bilin nga inted ni Jesus kadagiti adalanna.
Awan butengna kadagiti bumusbusor a nagkuna a daytoy a panagimprenta ket mapaayto, ti Watch Tower Society addaanen kadagiti planta a pagimprentaan kadagiti dagdaga iti intero a globo. Iti laeng napan a tawen, nakapataudda iti nasurok a 63,000,000 a Biblia, libro, ken bokleta ken nasurok a 582,000,000 a magasin iti nasurok a 200 a pagsasao.
Dagiti literatura nga ipabpablaakda ket nakapatpateg unay iti panangipaay kadagiti naespirituan a kasapulan dagiti tattao. Maimalmaldit dagiti libro a nairanta a pangdanon kadagiti tattao nga addan kadagiti partikular a panangmatmat ken pampammati. Minilmilion nga agtutubo ti nangapresiar iti Ti Librok dagiti Estoria ti Biblia ken Ti Kinaagtutuboyo—Pananggun-od ti Kasayaatan iti Dayta. Ti Panangparagsak ti Biag ti Pamiliayo ket nagdakkel pategna iti panangpapigsa ti singgalut ti pamilia ken panangisuro kadagiti assawa a lallaki ken babbai a mangipakita ti dakdakkel nga ayat iti maysa ken maysa. Maysa a tulong kadagiti kabbaro a kayatda a pagbalinen ti kinapudno a kabukbukodanda isu ti Panagkaykaysa iti Panagdayaw iti Maymaysa a Pudno a Dios. Dagiti tattao a mangbasbasa iti daytoy a libro ket natakuatanda nga isudat’ matignay nga agpanunot ken agrason a naun-uneg maipapan iti pannakirelasionda iti Dios.
Ti libro a masansan maaw-awagan kas ti “asul a bomba,” Ti Kinapudno a Mangiturong iti Biag nga Awan Inggana, ti naaddaan naisangsangayan nga epekto iti biag dagiti minilmilion a tattao. No kasano kaadu pay ti matignay nga agserbi iti Dios kas resulta dagiti kinapudno ti Biblia a maadalda manipud itoy a libro ti makitanto pay.
Iti agdama, dagidiay agtartrabaho a mangikaskasaba ti naimbag a damag iti panangiwanwan ni Jesus ti matultulongan babaen iti libro a Mabalinyo ti Agbiag na Agnanayon iti Paraiso a Daga. Maikonkondukta ti panagadal ti Biblia kadagiti minilmilion, nga adu kadakuadan ti mangituntunos ti panagbiagda kadagiti pagannurotan ti Biblia.
Kas pangarigan, maysa a 68-años a lakay idiay Estado ti Nueva York ti binisita ti kabsatna a lalaki idiay Colorado, a nagipatpatulod kadagiti pagbasaan ti Watch Tower tapno basaenna. Dagus a binasa ti lakay amin a libro a naipatulod ket maragsakan a mangirugi ti panagadal iti libro nga Agbiag nga Agnanayon idi simmarungkar ti maysa a Saksi iti pagtaenganna. Iti intero a panagbiagna, daytoy a tao ti nakakolekta kadagiti nangingina a historikal a palpaltog, ngem idi mabasana a dagidiay agserserbi ken Jehova ket didanto adalenen ti pannakigubat uray kaano, dagus nga inlakona dagiti paltogna uray dakkel ti nakalugianna. (Isaias 2:4) Mainayon pay, kalpasan ti nakaro a panagsigsigariliona iti 53 años, insardengna daytan apaman a nabasana a daytoy ti di makaay-ayo ken Jehova. (2 Corinto 7:1) Idi naammuanna babaen iti panagad-adalna a rebbeng nga iranudna ti naimbag a damag kadagiti sabsabali, agnernerbios a nagsagana a mangsarungkar iti anakna a lalaki ken manugangna tapno makisarita kadakuada ken kadagiti appokona. Apaman a nakastrek idiay siled para kadagiti sangailida, isut’ naragsakan a makakita ti libro nga Agbiag nga Agnanayon iti rabaw ti lamisaanda. Ti manugangna ti mangad-adal iti dayta ket saanna a masiguro no kasanot’ panangipakaammona iti dayta a tema iti katuganganna. Agpadpada a nakaaramiddan ti ekselente a naespirituan nga irarang-ay.
Idiay España, ti pagtataripnongan dagiti Saksi ni Jehova ket nabangon a dumna iti simbaan a Katoliko. Makaunget ti padi. Kunana a no ammona la koma a dagiti Saksi ti mangibangon ti pagtataripnonganda sadiay, ginatangna koma ti daga tapno lapdan ida a mangusar iti dayta. Daytoy a Kingdom Hall ti addaan tawa a nakaidispleyan ti libro nga Agbiag nga Agnanayon. Kada maysa nga aldaw maysa a kameng ti kongregasion ti mangiyukrad ti maysa a panid. Dagiti umili agsardengda ket basaenda ti baro a panid. Kas resultana, adu a tattao ti nangipakita ti interes, ket narugian dagiti panagadal ti Biblia. Wen, napaneknekan a ti libro ket maysa a naulimek ngem epektibo a saksi wenno mammaneknek.
Ti Paset dagiti Magasin iti Panangisaknap ti Naimbag a Damag
Idi ti umuna a bilang Ti Pagwanawanan naipablaak idi Hulio 1879, 6,000 laeng a kopia ti naiyimprenta. Kaskasdi, ti bassit a bunggoy a nakabasa kadagita ti sigagagar a nangibaga kadagiti sabsabali ti linaonda. Itatta, nasurok a 3,500,000 kadagiti Saksi ni Jehova ti mangus-usaren kadagiti 13,000,000 a kopia a maiyim-imprenta kada bilang a mangiwarwaragawag ti Pagarian ti Dios kas ti kakaisuna a namnama ti sangatauan.
Ti magasin ket dakkel a tulong iti panangilawlawag kadagiti nagduduma a Nainkasuratan a tema. Ti agdama a serie iti Ti Pagwanawanan itamtampokna ti biag ken ministerio ni Jesus. Daytoy ti nakatulong ti minilmilion a mangiladawan iti is-isipda ken mangtarus a nasaysayaat kadagiti nasken a salaysay kadagiti Ebanghelio.
Dagiti naisangsangayan a serie agpadpada iti Ti Pagwanawanan ken Agriingkayo! ket nadisenioda a mangdanon ti puspuso dagiti agtutubo. Dagiti serie a “Ti Sao ti Dios Nabiag” ti nangisuro ti adu a prinsipio ken nangilawlawag kadagiti adu nga isyu iti is-isip dagiti tattao. Dagiti serie nga “Agimtuod dagiti Agtutubo . . . ” ti nangtaming kadagiti pudno iti biag a salsaludsod, sa mangted kadagiti praktikal a sungbat a supsuportaran dagiti kasuratan a mangigiya ti panagpampanunot ken panagtigtignay dagiti agtutubo kadagitoy nariribuk nga al-aldaw. No itamtampok dagiti Saksi ni Jehova dagitoy nga artikulo no ituktukonda dagiti magasin, ti panangawatda ket nagsayaat unay.
Ngem mainayon pay kadagiti artikulo kadagiti espesial a tema, ti talaga a karne Ti Pagwanawanan isuda dagiti kangrunaan nga artikulo, nga isudat’ mangpappapigsa ti pammati ken kumbiksion dagiti amin a pudno a Kristiano. Dagitoy artikulo a naibatay iti Kasuratan mangipapaayda kadagiti makakumbinsir a pammaneknek iti kinaasidegen ti panungpalan daytoy a sistema dagiti bambanag, a mangisalsalaysay iti kaitungpalan dagiti padto ti Biblia, ken mangipapaayda kadagiti makasukisok-puso a balakad no kasanot’ rebbeng a panagbiag dagiti Kristiano gapu kadagiti panawen. Napunno iti daytoy a pannakaammo, determinado dagiti Kristiano a mangusar kadagiti bambanag a naad-adalda iti trabahoda a panangasaba.
No kasano kabayag pay ti panagtultuloy daytoy trabaho a panangasaba sakbay nga umay ti panungpalan daytoy a sistema dagiti bambanag, ditay ammo. Kaskasdi, makasiguradotayo a dagiti publikasion a maimalmaldit ken iwarwaras dagiti Saksi ni Jehova ti agtultuloyto a dakkel a tulong kadagiti Kristiano bayat a sursurotenda ti bilin ti Panguloda, a ni Jesus.