Panagbalbaliw ti Oras a Makiddaw Kadagiti Payunir
1 Apresiarentayo amin ti kaadda dagiti naanep a regular ken auxiliary pioneer iti kongregasion. Uray iti teritoria a limitado ken masansan a matrabaho, nangipakita dagiti payunir iti nagsayaat nga ehemplo babaen ti naregta a serbisioda iti Pagarian. Pinaregtada amin nga agibumbunannag nga agtalinaed nga okupado iti panangbirok kadagidiay “siuumiso a maikari.”—Ara. 13:48.
2 Napaliiw ti Sosiedad dagiti dumegdegdeg a pakarigatan a pakaipaspasanguan dagiti payunir, nangnangruna iti panagbirok ti paset-tiempo a sekular a trabaho nga umdas a mangsustiner kadagiti personal a kasapulanda tapno makapagtalinaedda iti amin-tiempo a serbisio. Gapu iti agdama a kasasaad ti ekonomia iti adu a pagilian ad-adda a narigaten a makapagpayunir dagiti dadduma, nupay adda naimpusuan a tarigagayda nga agpayunir. Kadagiti kallabes a bulan, siaannad a nausig dagitoy ken ti dadduma pay a bambanag.
3 Gapu iti dayta, kinissayan ti Sosiedad ti oras a makiddaw kadagiti regular ken auxiliary pioneer. Mangrugi iti 1999, 70 nga oras ti makiddawen kadagiti regular pioneer iti binulan, wenno agdagup iti 840 nga oras iti makatawen. Makiddaw ti 50 nga oras kadagiti auxiliary pioneer iti binulan. Saan a nabaliwan ti oras a makiddaw kadagiti special pioneer ken misionero, yantangay adda probision ti Sosiedad kadakuada kadagiti kangrunaan a material a kasapulanda. Iti kasta, ad-adda a maipamaysada ti mangasaba ken mangyadal.
4 Manamnama a daytoy a panagbalbaliw ti makiddaw nga oras tulonganna ti ad-adu pay a payunir a mangpetpet iti daytoy nagpateg a pribilehio iti serbisio. Kasta met, daytoy koma ti mangilukat iti gundaway tapno ad-adu pay ti ag-regular ken ag-auxiliary pioneer nga agibumbunannag. Pudno a bendision daytoy kadagiti amin iti kongregasion!