“Alagadenyo ti Kinaanus”
1 Bayat a makitkitatayo nga umas-asideg unayen ti panungpalan ti daan a sistema ni Satanas, nasken nga ‘alagadentayo ti kinaanus’ bayat nga ur-urayentayo ti aldaw a panangisalakan ni Jehova. Nangnangruna iti daytoy a tiempo, determinado ti buyot dagiti nadangkes a kabusor a mangisiasi iti atensiontayo iti kapatgan nga isyu maipapan iti kinasoberano ni Jehova ket sulisogendatayo tapno masimbaludtayo kadagiti naruay a personal a paginteresan. Iti kastoy a wagas, allilawennatayo ni Satanas a sumuko wenno bumannayat iti trabaho a panangikasaba iti Pagarian. (Sant. 5:7, 8; Mat. 24:13, 14) Kadagiti ania a pamay-an a maiparangarangtay ti kasta a nagpateg a kinaanus?
2 Babaen ti Panagibtur: No saan nga interesado dagiti tattao wenno busorenda ti ministeriotayo, ti panagibtur tulongannatayo nga agtultuloy a mangasaba. Saantayo a nalaka a mapabutngan wenno masair no nasabrak wenno nauyong dagiti tattao a makasabaantayo. (1 Ped. 2:23) No kastoy ti kapigsa ti pakinakemtayo, saantay nga agsao iti negatibo maipapan kadagiti tattao iti teritoriatayo a mangipakita iti kinaawan interes wenno bumusor iti trabahotayo, tangay pampanunotentayo a ti kasta a sasao isu ti mangupay kadatayo ken kadagidiay kaduatayo iti ministerio.
3 Babaen ti Kinapinget: Mapukaw ti anustayo no kalpasan ti nasayaat a pannakisaritatayo iti tay-ak ti serbisio ket ditay manen madanon ti interesado a tao iti pagtaenganna. Pudno met dayta no nabannayat ti irarang-ay dagidiay iyad-adalantayo wenno dida maitakderan ti kinapudno. Nupay kasta, masansan a nasayaat ti ibunga ti kinapinget. (Gal. 6:9) Adda maysa a sister a namin-adu a simmarungkar iti agkabannuag a babai sakbay nga aktual a nairugi ti panagadal iti Biblia. Kadagiti damo a naminlima nga isasarungkar, adu ti sabali a pakakumikoman ti babai. Iti maikanem, naslep ti sister gapu iti napigsa a tudo, ngem awan nadanonna iti pagtaengan. Nupay kasta, gapu ta inkeddengna nga ikkanna ti babai iti maysa pay a gundaway, nagsubli manen ti sister ket nakasaganan a makipagadal ti babai. Kalpasanna, nagtultuloyen ti irarang-ay ti estudiante ket di nagbayag indedikarnan ti biagna ken Jehova.
4 Ammotayo a dinto maladaw ti aldaw ni Jehova. Gapuna, urayentayo ti panangitungpalna kadagiti bambanag, tangay ammotayo a nasayaatto ti ibunga ti kinaanus ti Dios. (Hab. 2:3; 2 Ped. 3:9-15) Masapul nga aganustayo a kas ken Jehova ket ditay sumuko iti ministerio. “Babaen ti pammati ken kinaanus,” inanamaenyo a supapakan ni Jehova ti kinapingetyo.—Heb. 6:10-12.