Mapagballigianyo Dagitoy a Tubeng!

TI MAYSA a dakkel nga eroplano mabalinna a laonen ti ginasut a pasahero ken tinonelada a karga. Kasano a makatayab ti kastat’ kadagsenna nga eroplano? Babaen laeng iti lift.

No napartak ti panagtaray ti eroplano iti runway, maipugso ti angin iti ngatuen ken babaen dagiti nagbakkug a payak. Daytoy ti mangpataud iti agpangato a puersa a maawagan iti lift. No napatauden ti umdas a lift, malabanannan ti grabidad ti daga ket makapagtayaben. Siempre, ti adu unay ti kargana nga eroplano saan a makapataud iti umdas a lift tapno makapagtayab.

Mabalin met a maaddaantayo iti adu unay a karga. Sinigsiglo iti napalabasen, kinuna ni Ari David a dagiti ‘kinakillona ket kas iti awit a nadagsen unay kenkuana.’ (Salmo 38:4) Kasta met, namakdaar ni Jesu-Kristo maibusor iti pannakapadagsen kadagiti pakaringgoran iti biag. (Lucas 21:34) Dagiti negatibo a pampanunot ken rikrikna padagsenandatay agingga a kasla narigaten ti “makapagtayab.” Napadagsenankay kadi iti kasta a pamay-an? Wenno napasaranyo kadin ti sumagmamano a tubeng iti nalawlawa a naespirituan nga irarang-ayyo? No kasta, aniat’ makatulong?

Masikorankay Kadi?

Ti pannakasikor​—maysa a gagangay a reklamo itatta​—nalabit agbalin a tubeng iti isip, uray pay iti sumagmamano a tattao ni Jehova. Nangnangruna nga addaan dagiti agtutubo iti pagannayasan a di mangikankano kadagiti dadduma nga aktibidad nga ibilangda a makapasikor. Kasta kadit’ panagriknayo no dadduma kadagiti Nakristianuan a gimong? No kasta, aniat’ maaramidanyo a mamagbalin iti itatabunoyo iti gimong a makagutugot?

Ti pannakiramanyo [kadagiti gimong] isut’ tulbek. Nagsurat ni Pablo ken ni agtutubo a lalaki a Timoteo: “Sanayem ti bagim buyogen ti nadiosan a debosion kas kalatmo. Ta ti panagsanay iti bagi bassit ti maigunggonana; ngem ti nadiosan a debosion makagunggona iti isuamin a bambanag, ta addaan kari a biag ita ken daydiay umayto.” (1 Timoteo 4:7, 8) Ti maysa a libro iti physical fitness mabalin a makapasikor ken limitado ti pategna no saantay a sinurot dagiti naisingasing a panagwatwat. Nadisenio dagiti Nakristianuan a gimong a mangwatwat kadagiti panunottayo ket maaramidanna dayta no agsagana ken makiramantayo. Daytoy a pannakiraman pagbalinenna dagiti panaggigimong nga ad-adda a makagunggona ken makapainteres.

Maipapan itoy, kinuna ti maysa a Kristiano nga agtutubo a babai nga agnagan Mara: “No saanak nga agsagana maipaay kadagiti gimong, saanko a matagiragsak dagitoy. Nupay kasta, no nakasaganaak a nasaksakbay, nalaklaka nga umawat [iti impormasion] ti panunot ken pusok. Agbalin nga ad-adda a nabagas dagiti gimong, ket magagaranak nga agkomento.”

Makatulong met ti panagsursuro nga agimdeng. Ti panagimdeng iti nasayaat a musika ket nalaka ken dagus a mangparagsak. Ngem saan nga amin a pannakapnek ket giddato [a magun-odan]. Magun-odtay laeng ti pannakapnek manipud iti programa ti gimong no sipapasnek nga agimdengtayo iti maibaga. Kinuna ti maysa a Kristiano nga agnagan Rachel: “No saan a naganaygay ti agpalawag, kasapulan nga ad-adda nga ipamaysak ti agimdeng. Ti pagalagadan para kaniak ket, ‘No saan unay a makapainteres ti palawag, ad-adda a kasapulan nga ipamaysak ti agimdeng.’ . . . Imutektekak dagiti kasuratan, nga ikagumaak ti magunggonaan a naimbag manipud kadagitoy.” Kas ken Rachel, kasapulan a disiplinaentay ti bagbagitayo tapno makapagimdeng. Kuna ti libro ti Proverbio: “Anakko, imatangam ti kinasiribko. Iyallingagmo ta lapayagmo iti pannakaawatko.”​—Proverbio 5:1.

Mabalin a kasla maulit-ulit ti sumagmamano nga impormasion a maidatag kadagiti gimong. Napateg daytoy! Amin nga ad-adipen ti Dios kasapulanda dagiti pammalagip. Ti imperpekto a lasag, buyogen dagiti nasukir a pagannayasan ken agkamali a memoriana, kasapulanna amin ti tulong a magun-odan. ‘Nasindadaan [ni apostol Pedro] a nangipalagip kadagiti padana a manamati ti sumagmamano a bambanag, nupay ammodan ida ken sititibker a naipasdekda iti kinapudno.’ (2 Pedro 1:12) Inlawlawag met ni Jesus a “tunggal manangisuro iti publiko . . . umasping iti maysa a tao, maysa a bumalay, a mangiruar kadagiti bambanag a baro ken daan manipud iti pagipempenan iti gamengna.” (Mateo 13:52) Gapuna, bayat a dagiti gimongtayo mangiruarda kadagiti pamiliar a Nainkasuratan kapanunotan, wenno ‘daan a gamgameng,’ kanayon nga adda sumagmamano a ‘baro a gamgameng’ a mangparagsak kadatayo.

Ti panagbalin a determinado a mangaprobetsar a naan-anay kadagiti gimong agbanag iti pudpudno a pannakaparegta iti naespirituan. “Naragsak dagidiay sipapanunot iti naespirituan a kasapulanda [dagidiay agpalpalama maipaay iti espiritu],” kinuna ni Jesus. (Mateo 5:3, footnote) Ti kasta a kababalin iti makapasalun-at a naespirituan a taraon a maipapaay kadagiti gimong pukawennanto ti pannakasikor.​—Mateo 24:45-47.

Naupay Gapu iti di Nasayaat nga Ulidan?

Nasairkay kadin gapu iti kababalin ti maysa iti kongregasionyo? Nalabit a nasdaawkayo, ‘Kasano a makapagtignay a kasta ti maysa a kabsat ken kaskasdi nga addaan iti nasayaat reputasion?’ Dagiti kasta a kapanunotan mabalin nga agserbi kas maysa a tubeng iti isip, a kullaapannatayo iti kinapateg ti makaay-ayo a panagkakadua a magun-odtayo kadagiti tattao ti Dios.​—Salmo 133:1.

Nalabit a naaddaan dagiti sumagmamano a kameng ti kongregasion idiay Colosas iti umasping a parikut. Inggunamgunam ni Pablo kadakuada: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pangidarumanna iti sabali.” (Colosas 3:13) Nabigbig ni Pablo a mabalin a saan nga umiso ti panagtignay dagiti dadduma a Kristiano a taga-Colosas ket gapuna mabalin a nangipaay daytoy kadagiti sabsabali iti pudpudno a makagapu iti panagreklamo. Isu a saan a rumbeng a maklaattay unay no ti maysa kadagiti kakabsattayo a lallaki wenno babbai ket pasaray agkurang iti sumagmamano a Nakristianuan a kualidad. Nangipaay ni Jesus iti nasayaat a balakad iti panangrisut kadagiti nakaro a pakarigatan. (Mateo 5:23, 24; 18:15-17) Ngem kaaduanna, mabalin a pagpasensiaantay laengen dagiti pagkurkurangan dagiti pada a manamati ken pakawanen ida. (1 Pedro 4:8) Kinapudnona, ti kasta a kababalin agpaay iti bukodtayo a pagimbagan ken iti sabsabali. Apay a kasta?

“Ti kinamanagpanunot ti tao pagbalinenna a nabannayat nga agpungtot, ket ti dayawna ti panangpalabesna iti kaniwas,” kuna ti Proverbio 19:11. Anian a nasaysayaat nga amang ti mangpakawan ngem ti mangipalubos a kumaro ti pungtot ken sakit ti nakem! Kinuna ni Salvador, maysa a panglakayen a pagaammo gapu iti kinamanagayatna: “No saan a nasayaat ti panangtrato kaniak ti maysa a kabsat wenno makaisao iti nagubsang, saludsodek iti bagik: ‘Kasanok ngata a matulongan ti kabsatko? Kasano ngata a maliklikak ti pannakapukaw ti napateg a pannakirelasionko kenkuana?’ Kanayon a silalagipak no kasanot’ kalaka ti mangibaga iti dakes a banag. No ti maysa agsao a sidadarasudos, ti naan-anay a solusion isu komat’ panangibabawina iti naibagana ket mangrugi manen. Ngem imposible dayta, isu nga aramidek ti sumaganad a kasayaatan nga addang ket diak ikaskaso ti naibaga. Ibilangko laengen dayta a bunga ti kinaimperpekto imbes a mangyanninaw iti pudpudno a personalidad ni kabsatko.”

Amangan no mariknayo a daytoy ket nalaklaka a sawen ngem ti aramiden. Ngem kaaduanna nga agpannuray iti pamay-an a panangiturongtay iti panunottayo. “Aniaman dagiti bambanag a maay-ayat, . . . itultuloyyo nga imutektekan dagitoy a bambanag,” imbalakad ni Pablo. (Filipos 4:8) Ti “maay-ayat” literal a kaipapanannat’ “makagutugot iti ayat.” Kayat ni Jehova nga usigentayo ti nasayaat kadagiti tattao, nga ipamaysa iti banag a manggutugot iti panagayat imbes a pannakarurod. Ipaayna a mismo kadatayo ti katan-okan nga ulidan iti daytoy a banag. Pinalagipannatay ti salmista iti daytoy, a kunkunana: “No sika O Jehova, mingmingam koma dagiti kinadangkes, O Apo, siasino koma ti makapagtakder?”​—Salmo 103:12; 130:3.

Pudno, no dadduma mabalin a makapaupay ti kababalin ti maysa a kabsat, ngem kaaduan kadagiti padatay a managdaydayaw ket nasasayaat a pagulidanan iti Nakristianuan a panagbiag. No laglagipentay daytoy, kas ken David maragsakantayo ‘a mangitan-ok unay ken Jehova, ken mangidayaw kenkuana iti tengnga ti dakkel a gimong.’​—Salmo 109:30.

Kasla Narigat Kadi Unay ti Panagbalin a Saksi?

Nakalkaldaang, gapu iti sabali pay a tubeng iti isip, dadduma saanda pay a rinugian ti agdayaw ken Jehova. Adu a lallaki a saan a Saksi ni Jehova responsable nga ipaayda dagiti kasapulan ti pamiliada ken suportaranda pay dagiti assawada iti Nakristianuan a ministerio. Mannakigayyem ken mabalin a mangipakpakitada iti interes iti kongregasion, ngem liklikanda ti agbalin a dedikado nga adipen ti Dios. Aniat’ manglaplapped kadakuada?

Mabalin a ti maysa a parikut ket makita dagitoy nga assawa a lallaki ti okupado a nateokratikuan nga aktibidad dagiti assawada ken mariknada nga adu unay ti makalikaguman iti panagbalin a Saksi. Wenno mabalin a maamakda a saanda a pulos a kabaelan ti makiraman iti panangasaba a trabaho iti binalaybalay. Iti panangmatmatda, dagiti responsabilidad kasla rimbawanna dagiti gunggona. Apay nga adda kasta a tubeng iti isip? Kaaduan nga estudiante ti Biblia ket in-inut a makasursuro ken mangyaplikar iti kinapudno. Ngem masansan a sipapanunot unay dagiti di manamati nga assawa a lallaki kadagiti amin a Nakristianuan a responsabilidad sakbay a matignayda a mangawat kadakuada.

Ni Manuel, a kastoy idi ti kasasaadna, ilawlawagna: “Iti agarup sangapulo a tawen, kinuykuyogko ni baketko kadagiti asamblea ken kadagiti gimong. Kinapudnona, kaykayatko ti timpuyog dagiti Saksi ngem kadagiti tattao iti lubong, ket maragsakanak a tumulong kadakuada no kabaelak. Naguyugoyak iti ayat nga adda kadakuada. Ngem dakkel a tubeng kaniak ti kapanunotan a mapan agbalaybalay, ket maamakak di la ket ta umsiendak dagiti katrabahuak.

“Nakaan-anus kaniak ni baketko ket dinak pulos pinadas a piliten nga agadal iti Biblia. Isu ken dagiti ubbing agpapadada a ‘nangasaba’ kangrunaanna babaen ti nasayaat a kababalinda. Ni José, maysa a panglakayen iti kongregasion, nangipaay iti naisangsangayan nga interes kaniak. Panagkunak, ti pammaregtana isut’ nangtignay kaniak kamaudiananna tapno agadalak a sipapasnek. Kalpasan ti pannakabautisar, nautobko nga adda la gayam dagiti tubeng iti panunotko. Idi inkeddengkon ti agserbi ken Jehova, napasarak ti tulongna iti panangparmek kadagiti pagbutbutngak.”

Kasano a makatulong dagiti assawa a babbai ken Nakristianuan a panglakayen kadagiti assawa a lallaki a kas ken Manuel a mangparmek iti pakatubenganda iti isip? Ti panagadal iti Biblia mabalin a pabilgenna ti panangapresiar ken tarigagay a mangaramid iti pagayatan ti Dios. Kinapudnona, ti nalawa a pannakaammo iti Kasuratan isut’ pakaibatayan ti pammati ken panagtalek iti namnama iti masanguanan.​—Roma 15:13.

Aniat’ mangparegta kadagiti kasta nga assawa a lallaki a mangawat iti panagadal iti Biblia? Masansan a ti pannakigayyem iti maysa a mannakaawat a kabsat a lalaki iti kongregasion isut’ makatulong iti asawa a lalaki a mangngeddeng. Nalabit a maysa a panglakayen wenno sabali pay nga addaan kapadasan a kabsat a lalaki ti mabalin a makiam-ammo iti asawa a lalaki. No naipasdeken ti nasayaat a pannakirelasion, ti laengen mabalin a kasapulanna isut’ panangawis kenkuana a makipagadal. (1 Corinto 9:19-23) Kabayatanna, mabalin nga iburay ti maysa a masirib a Kristiano nga asawa a babai dagiti babassit a naespirituan a banag iti di manamati nga asawana, a pampanunotenna nga isut’ mabalin a saan nga agtignay iti panangpilit.​—Proverbio 19:14.

Kas ti nasursuro ni Manuel babaen iti kapadasan, iti kanito a makagun-od ti maysa a tao iti naespirituan a bileg, dagiti dadakkel a lapped agbalindanto a kasla babassit a bunton. Papigsaen ni Jehova dagidiay agtarigagay nga agserbi kenkuana. (Isaias 40:29-31) Iti bileg ti Dios ken buyogen ti pannaranay dagiti nataengan a Saksi, maikkat dagiti tubeng. Iti kasta, ti trabaho a panagbalaybalay agbalinto a saan unayen a makapaupay ken dagiti katrabahuan ket saan unayen a pagbutngan, bayat a ti amin-kararua a panagserbi agbalin nga ad-adda a makaay-ayo.​—Isaias 51:12; Roma 10:10.

Panagtalinaed a Naregta

Posible a mapagballigian dagiti tubeng kas kadagiti tallo a nasalaysaytayon. No tumayaben ti maysa nga eroplano, gagangay a makalikaguman ti isuamin a puersa ti makina kasta met ti di mabingay nga atension ti tripulante. Iti rugi ti panagtayab, nabatad nga ad-adu a gasolina ti magastar ngem kabayatan ti panagtayab. Umasping iti dayta, tapno maidian dagiti negatibo a kapanunotan ken rikrikna, kasapulan ti dakkel a panagregget ken panangipamaysa. Ti panangirusat mabalin nga isut’ karirigatan a paset, idinto ta naparpartak ti irarang-ay no nagun-odanen ti regta.​—Idiligyo ti 2 Pedro 1:10.

Mapagtalinaed ti irarang-ay babaen ti dagus a panangipangag iti Nainkasuratan a pammaregta. (Salmo 119:60) Masiguradotayo a ti kongregasion kayatna ti tumulong. (Galacia 6:2) Nupay kasta, ti kapatgan iti isuamin isut’ suporta ni Jehova a Dios. Kas kinuna ni David, “bendito ni Jehova, nga inaldaw-aldaw a mangawit iti awittayo.” (Salmo 68:19) No iyebkastay dagiti pakadagsenantayo babaen ti kararag, lumag-an ti awittayo.

No dadduma, pumanaw ti eroplano iti panawen a matutudo ken nakuyemyem, a lumabas iti maysa a napuskol nga ulep, ket agtayab iti nawada a tangatang. Mabalintay met nga idian dagiti negatibo a pampanunot. Iti tulong ti Dios, masalputtay ti napuskol nga ulep, no ar-arigen, ket makapagrag-o iti naraniag, naragsak a kasasaad iti sangalubongan a pamilia dagiti managdaydayaw ken Jehova.

[Dagiti Ladawan iti panid 23]

Iti tulong ni Jehova, mapagballigiantay dagiti tubeng iti isip