“Pumanawka iti Dagam ken kadagiti Kakabagiam”

“IDI Nobiembre 1981 ni Tony ken ni Margaret nga asawana, agraman dua nga annakda, agtawen ti 9 ken 11, immakarda manipud Inglatera a napanda idiay laud ti Irlandia. Apay? Tapno tumulong iti publiko a panangisursuro a trabaho dagiti Saksi ni Jehova. Sumagmamano a lawas kamaudiananna, naipasangoda kadagiti pakarigatan. Daytat’ nakaro unay a kalamiisna idi. Dagiti ninamnama a trabaho ti di nagballigi, gapuna rinugian ni Tony ti maysa a negosio a panagdaldalus kadagiti tsiminea. Gapu ta saan pay a nalaing iti dayta, isut’ nagawid a napunno ti nangisit nga asuk kalpasan ti agmalmalem a panagtrabahona. Anian a pannakadismayana idi nakitana a dagiti tubo ti danum kimter a timmangken amin, ket isut’ addaan laeng ti nagbassit a kaldero ti danum a pagbuggona! “Iti apagkanito nangrugiak a nagpampanunot no apay a pimmanawkami manipud pagtaenganmi ken kadagiti kakabagianmi,” inaminna.

Ti panangpanaw kadagiti pamilia ken gagayyem tapno agserbi iti Dios a naan-anay, ken makapagtultuloy agpapan pay kadagiti pakarigatan, ti agkasapulan pudpudno a pammati. Ti nangipakita ti kasta a pammati ngangngani 4,000 a tawen ti napalabasen ket isu ni patriarka nga Abraham. Kuna ni adalan nga Esteban maipapan kenkuana: “Ti Dios ti gloria nagparang ken amatayo nga Abraham idi adda idiay Mesopotamia, idi saan pay a nagnaed sadi Haran, ket kinuna [ti Dios] kenkuana, ‘Pumanawka iti dagam ken kadagiti kakabagiam ket umayka iti daga nga isurokto kenka.’”​—Aramid 7:2, 3.

Siempre, awan itatta ti addaan ti kasta nga espesipiko a bilin a manipud iti Dios a pumanaw manipud iti ili a nakaiyanakanda. Rinibo kadagiti Kristiano iti daytoy maika-20 a siglo, nupay kasta, ti nangiyurnos ti kabibiagda a mangaramid iti inaramid ni Abraham​—immakar kadagiti baro a disso tapno pagsaknapen ti intereses ti Dios. (Mateo 24:14; 28:19, 20; Roma 10:13-15) Nabigbigda a “ti talon isu ti lubong” ken adu a luglugar ti addaan dakkel a pagkasapulan iti ad-adu pay a tulong. (Mateo 13:38) Kas ken Isaias, simmungbatda a sipipigsa kadagiti sasao ni Jehova, “Asino ti ibaonkonto, ken asino ti mapan a gapu kadatayo?” Idi makitada ti pannakasapul, simmungbatda met, “Adtoyak! Ibaonnak.”​—Isaias 6:8.

Apay Ar-aramidenda Dayta?

Ania a kita dagiti tattao ti agar-aramid ti kasta? Saan a naggapu iti aniaman a partikular a grupo ti edad wenno nalikudan, wenno saanda met nga agkunkuna nga addaan kadagiti naisangsangayan nga abilidad. Tattaoda laeng nga, iti maysa, situtulokda a mangipasakop kadagiti personal a tartarigagayda ken nam-ayda a maipaay kadagiti intereses ti Pagarian ti Dios. Daytat’ kas ken Abraham idi pimmanaw manipud iti nakarangrang-ay ken nakanamnam-ay iti material a siudad ti Ur tapno agnaed kadagiti abong-abong iti ganggannaet a daga.​—Hebreo 11:8-10.

“Makitkitami a kanayon ti pannakasapul nga agaramid ti ad-adu nga ingganat’ mabalin iti serbisio ni Jehova,” kuna ti maysa a pagassawaan nga immakar a kadua dagiti dua a tin-edyer nga annakda a lallaki idi 1983. “Marikriknami kas ken apostol Pablo idi a kinunana, ‘Ti tiempo a natda bassiten’; gapuna naikeddengmi nga ‘umay ditoy Irlandia’ ket tumulong iti trabaho sadiay.” (1 Corinto 7:29; idiligyo iti Aramid 16:9.) Sigun iti maysa a nawaya a panangipatarus, ti kaiyulogan dagiti sasao ni apostol Pablo idiay 1 Corinto 7:29 ket: “Ti importante a banag a laglagipen a ta ti natda a tiempotayo ket nakaab-ababa unayen,” ken kasta met dagiti gundawaytayo a panagaramid ti trabaho ti Apo. (The Living Bible) Adu a matalek a Kristiano ti immak-akar sadinoman a pakasapulan kadakuada tapno alaen dagitoy a gundaway sakbay nga agpukawdan ken tapno mausarda a sisasayaat dagiti nasudi a panawen a natda.

“Nakitami daytoy a nagsayaat a gundaway nga ‘aduankayo laeng iti aramid ti Apo.’” (1 Corinto 15:58) “Kayatmi ti agserbi ken Jehova sadinoman a pakaaramidanmi ti kadakkelan a kinaimbag.” “Patienmi nga addakami iti pinansial a kasasaad a mabalinmi ti umakar ket no mabalinmi a mapunnuan ti maysa a pagkasapulan iti sabali a lugar, maysa a biddut para kadakami no dikam aramiden dayta.” Dagita a panangiyebkas iladawanna ti rikna dagiti adu a pinilida ti agserbi idiay dakdakkel ti pakasapulan kadakuada. Dagitoy a Kristiano impapusoda ti pammagbaga a masarakan idiay Proverbio 3:9, 27: “Pagdayawmo ti kukuam ken Jehova ken dagiti umuna a bungbunga ti amin a maapitmo. . . Dika medmedan ti imbag kadagiti karbenganna, no adda ita imam iti pannakabalin a mangaramid.” Babaen ti naannad a panangsukimat iti kasasaadda, naikeddengda nga ‘adda iti imada ti pannakabalin a mangaramid’ ti napaut a kinaimbag kadagiti padada a tao iti dadduma a paset ti lubong.​—Kitaenyo met ti Roma 1:14, 15; Lucas 10:27-37.

Mabalin nga addakayo iti kasasaad a mangaramid ti kasta nga iyaakar. No kasta, mabalin nga interesadokayo iti pamay-an a panangsungbat dagiti dadduma nga immakaren kadagiti sumaganad a salsaludsod.

Ania dagiti Masapul nga Usigen Sakbay ti Iyaakar?

Sakbay nga umakar, umuman kadagiti panglakayen iti mismo a kongregasionyo. Kitaenyo no aniat’ makunada maipapan iti planoyo. (Proverbio 24:6) Mabalin nga addada rason no apay ti kasta nga iyaakar ket saan a mairekomendar iti kasoyo, ket tulongandakayo a mangtingiting a naimbag ti kasasaadyo. Kas pangarigan, ti maysa a tao nga umakar kasapulan a napigsa iti naespirituan no kayatna ti agbalin a katulongan imbes a padagsen idiay baro nga akaranna.

Makipagtrabaho iti sanga nga opisina dagiti Saksi ni Jehova iti pagilian a namnamaenyo nga akaran​—wenno babaen iti lokal a sanga nga opisinayo no namnamaenyo ti umakar iti uneg ti mismo a pagilianyo. No posible, bumisitakayo iti naiproponer a disso tapno maammuanyo ti daga ken dagiti tattao sakbay a mangaramidkayo ti pinal a desisionyo.

Analisarenyo dagiti motiboyo sakbay nga umakarkayo. Immakar ni Abraham agsipud ta isut’ addaan napasnek a tarigagay a mangtungpal iti pagayatan ti Dios, saan a gapu iti espiritu ti panagadbentura wenno personal a kapritso wenno panaggusto. Timbangenyo a naimbag amin dagiti ramanenna a bambanag. Addanto aya problema ti pagsasao? Mabalinanyo kadi ti agbalbaliw a maitunos iti naigiddiat a kultura ken klima? Addaankay aya ti naisangsangayan a pakasapulan iti salun-at? Dagiti kadi amin a miembro ti pamilia naimpusuanda iti iyaakar? Naiyorganisaryo kadin dagiti pinansial a kasasaadyo tapno mabalinanyo nga aramiden ti kasta nga iyaakar a sibaballigi? (Idiligyo iti Lucas 14:28.) Dagitoy ken adu pay a sabsabali a bambanag sapulenda ti naannad ken buyogen panagkararag a panangusig.​—Efeso 6:18.

Ania a Pakarigatan ti Mabalin a Sanguen?

Uray pay sakbay ti iyaalisyo, mabalin a maipasangokayon kadagiti pakarigatan. Saan a tunggal maysa makitada dagiti bambanag kas iti panagkitayo. Mabalin a makangngegkayo kadagiti di naannad wenno negatibo a komento. Ngem, laglagipenyo, uray met ni apostol Pedro negatibo ti riknana idi nangngegna no aniat’ mapasamak ken Jesus. Imbes a paregtaenna ni Jesus nga agbalin a natibker iti panagaramid ti pagayatan ni Jehova, kuna ni Pedro: “Apo, kaasiam ta bagim; uray kaanoman saan koma a maaramid kenka daytoy.” Kas ken Jesus, agbalinkayo koma a natibker a mangparmek iti aniaman a negatibo a sasao.​—Mateo 16:22, 23.

Kalpasan a nakapirmikayon iti baro a lugaryo, mabalin a ti panagil-iliw ti dakkel a problema. Ti ayat ken Jehova ken kadagiti tattao a masapul a mangngeganda ti naimbag a damag ti Pagarianna ti makatulong kadakayo a mangparmek itoy. Adu a parikut ti mapabassit no pudno a pagbalinenyo ti baro a lugaryo a pagtaenganyon. Liklikanyo ti panagar-aramid kadagiti negatibo a panangiyasping iti napalabas a pagtaenganyo, ta ti panangaramid ti kasta mangpataud ti di pannakapnek ken sakit ti nakem. No maipasango kadagiti rigat, laglagipenyo ti awis ni Jehova idiay Malakias 3:10: “Padasendak ita iti daytoy,. . . no siak diakto luktan kadakayo dagiti tawtawa ti langit ket ibuyatkonto kadakayo ti bendision nga awanto ti lugar a makalaon.”

Anianto a Bembendision ti Tagiragsaken?

Bayat a rumangrang-ay ti pannakairamanyo iti trabaho a panangiwaragawag ti naimbag a damag, kastanto met a rumang-ay ti kualidad ti ministerioyo. Daytoy ti mangparang-ay pay ti laingyo kas mannursuro ti Sao ti Dios. Daytoy ti mangyeg gunggona saan laeng a kadakayo no di ket kasta met kadagiti isuamin a dumngeg kadakayo. (1 Timoteo 4:15, 16) Anian a pribilehio ti panangidadaulo ti panagadal ti Biblia kadagiti pagtaengan ken panangtulong a mawayawayaan dagiti nasingpet-panagpuspusona a tattao manipud kadagiti Binababilonia nga ulbod a sursuro! Maaddaankayonto ti ragsak a dineskribir ni apostol Pablo idi a nagsurat kadagiti dadduma a natultulonganna a nagbalin a Kristiano: “Ta ania ti inanamami wenno rag-o wenno balangat a pakaidayawanmi​—saan aya a dakayo met laeng?” (1 Tesalonica 2:19) Wen, maysa a rag-o ken bendision iti pannakairaman a mangtulong kadagiti indibidual ken kongregasion a rumang-ay iti naespirituan.

Ni Abraham ti naawagan “gayyem ni Jehova” agsipud ta sisasagana a nagtulnog iti panangiwanwan ni Jehova. (Santiago 2:21-23; Isaias 41:8) Uray dakayo met mabalinyo a patibkeren ti personal a pannakirelasionyo iti Dios. Bayat ti panagreggetyo iti serbisioyo, mapasaranyonto ti kinamanagayat ken panangsuportarna. Matarusanyonto a naan-anay no aniat’ kayat a sawen ti salmista idi a kinunana: “O nanamenyo ket kitaenyo ta ni Jehova naimbag.”​—Salmo 34:8.

Ni Tony, ni Margaret, ken dagiti annakda ti naipasango kadagiti problema idi immakarda tapno makapagserbida a naan-anay ken Jehova. Ngem babaen iti tulong ni Jehova, natamingda a sibaballigi dagitoy. “Dikam pinalubosan dagiti rigat nga isut’ mangikkat iti daytoy a rag-o kadakami,” kunada. “Kadagiti situasion kas kadagidiay naipasango kadakami, naadalmi ti agpannuray nga ad-adda pay ken ni Jehova, ket nakitami ti imana iti isuamin bayat a saggaysa a nagpukaw dagiti parparikut.” Rinibo kadagiti moderno-aldaw nga ad-adipen ni Jehova ti nangipakpakita ti umas-asping a pammati babaen iti iyaakar kadagiti dakdakkel ti panagkasapulanna. Maaramidanyo met aya dayta?

[Ladawan iti panid 23]

Ti diskusion ti pamilia ad-adda a pagbalinenna a naballigi ti iyaakar