Agbutengkayo ken Jehova iti Agmalmalem
1 “Ti panagbuteng ken Jehova isu ti punganay ti sirib.” (Sal. 111:10, NW) Dayta ti manggutugot kadatayo nga agaramid iti naimbag ken tumulong kadatayo a mangiwaksi iti dakes. (Prov. 16:6) Daytoy a panagbuteng ket nauneg a panagraem iti Namarsua kadatayo, a mangtignay kadatayo a di mangpagura wenno sumukir kenkuana. Masapul a patanoren ken iparangarangtayo dayta iti agmalmalem.—Prov. 8:13.
2 Inaldaw a nakaro ti panangsuot kadatayo ti espiritu ti lubong ni Satanas tapno kumanunongtayo kadagiti dakes a dalanna. (Efe. 6:11, 12) Managbasol ti imperpekto a lasagtayo ken nakayanakan a pagannayasanna ti agaramid iti dakes. (Gal. 5:17) Gapuna, masapul nga agbutengtayo ken Jehova iti agmalmalem tapno matungpaltayo dagiti bilinna, naragsak, ken agbiagtayo.—Deut. 10:12, 13.
3 Iti Hebreo 10:24, 25, nabagbagaantayo nga agtataripnong tapno makapagpipinnaregtatayo a “nangnangruna” kadagitoy tiempo a pagbibiagantayo. Nasken ti regular a pannakigimong tapno malasatantay dagitoy maudi nga al-aldaw. Matignaytayo a makigimong ken mangipateg unay kadagitoy gapu ta mabutengtayo a mangpagura iti Dios. Dagidiay agbuteng iti Dios ibilangda a sagrado a pribilehio ti pannakiraman iti Nakristianuan a gimgimong.
4 Ti panagtulnog iti bilin nga ikasaba ti naimbag a damag ti Pagarian ket sabali pay a pamay-an a maiparangarangtayo ti panagbuteng iti Dios. (Mat. 28:19, 20; Ara. 10:42) Maysa a kangrunaan a kalattayo iti panangasaba ket ti itutulong kadagiti dadduma nga agbuteng ken ni Jehova ken agpasakup iti pagayatanna. Maaramidantay dayta babaen ti panagsarungkar, panangirugi kadagiti panagadal iti Biblia iti pagtaengan, ken panangisuro kadagiti sabsabali ti amin a bilbilin ti Dios. Iti kasta maiparangarangtayo ti panagbuteng ken Jehova ken ti ayat iti padatayo a tao.—Mat. 22:37-39.
5 Dagidiay di agbuteng iti Dios awan panangipategda iti naespirituan a bambanag, ken tumulokda iti makapapatay nga angin, wenno panagpampanunot, ti lubong. (Efe. 2:2) Sapay koma ta agbalin a natibker a determinasiontayo ti ‘mangipaay iti sagrado a panagserbi iti Dios buyogen ti nadiosan a buteng ken panagamak.’ (Heb. 12:28) Iti kasta masagraptayo dagiti bendision nga agpaay kadagidiay agbuteng ken Jehova iti agmalmalem.