Imutektekanyo Dagiti Nakaskasdaaw nga Aramid ti Dios
1 Iti tallo a naisangsangayan nga aldaw, naguummongtayo iti “Dagiti Managtungpal iti Sao ti Dios” a Kombension Distrito. Imbaw-ingtayo pay laeng ti atensiontayo manipud kadagiti inaldaw a pakakumikomantayo iti biag, ket impamaysatayo dagiti nakaskasdaaw nga aramid ni Jehova. Kasanotayo a mabembenepisiaran kadagiti nasursurotayo?—Juan 13:17.
2 Dagiti Pamilia Agtulnogda iti Sao ti Dios: Ti simposium nga “Agtulnogkayo iti Sao ti Dios” tinulongannatayo a mangusig iti naespirituan a kasasaad ti pamiliatayo. Pagay-ayat dagiti ubbing ti agsursuro. Gapuna, naiparegta kadagiti nadiosan a nagannak a pagbalinenda ti sangapamiliaan a panagadal iti Biblia a pundasion ti panagibangon iti sangakabbalayan a natibker iti naespirituan. Adu nga ulo ti pamilia ti mangisalaysay kadagiti ubbingda iti baro a broshur a Mabalinmo ti Makigayyem iti Dios! Daytoy ti tumulong kadakuada a mangpatanor iti naragsak ken natalged a relasion ken Jehova. Dakayo a nagannak, isuroyo dagiti ubbingyo a mangikabilangan iti rikrikna ti Dios. Nabnabiag koma ti panangyebkasyo iti ayatyo kenkuana ken kadagiti aramidna. (Sal. 103:2) Agdadanggaykayo a mangipasdek ken mangragpat kadagiti naespirituan a kalat ket naan-anay a makibuligkayo iti panagserbi ken Jehova.
3 Ti Sao ti Dios Lawaganna ti Dalantayo: Anian a ragsaktayo a nangawat iti kompleto a New World Translation iti Tagalog ken nakangngeg nga iti mabiit maalanto metten dayta iti Cebuano ken Iloko! Naragsakantayo met a nakaawat iti baro a libro a Ti Padto ni Isaias—Lawag nga Agpaay iti Sangatauan I. Kasano kaadayon ti nabasayo iti daytoy umuna a tomo? Impadto ti libro ni Isaias ti pannakaukom dagiti nadangkes a nasion kasta met dagiti naraniag a bendision nga iburay ti Pagarian nga agpaay iti ili ti Dios. (Isa. 34:2; 35:10) Pabilgenna met ti pammati ken panagtalek ken ni Jehova ken iti wagas ti panangaramidna kadagiti bambanag.—Isa. 12:2-5.
4 No basaenyo ti Padto ni Isaias I, iti rugrugina pay laeng mapaliiwyo no kasano a tinaginayon ni Isaias ti kinatarnawna ken Jehova bayat a napalikmutan iti kinadakes. Idi maayaban tapno agbalin a mensahero ti Dios, kinuna ni Isaias: “Adtoyak! Ibaonnak.” (Isa. 6:8) No utobenyo ti kinatulokna, maparegtakayo a mangitultuloy a mangikasaba iti naimbag a damag, a makiraman a naan-anay iti ‘panagsaksi iti isuamin a nasnasion.’—Mat. 24:14.
5 Maitan-ok ti kinadayag ni Jehova no imutektekantayo dagiti aramidna. Gapuna, ipategyo ti pribilehio a kas managtungpal iti sao ti Dios!