Dagiti “Sagut a Tattao” Sigagagar nga Ipastoranda ti Arban ti Dios
1 Anian a nakaay-ayat a probision ti impakita ni Jehova babaen ti Anakna iti panangipaay kadagiti “sagut a tattao”! (Efe. 4:8, 11, 12) Adu ti annongenda, agraman ti aktibo ken sigagagar a panangipastor iti arban ti Dios. (1 Ped. 5:2, 3) Magunggonaantayo amin iti daytoy kasapulan unay a probision. Maseknan unay dagitoy a lallaki iti naespirituan a pagimbagan ti amin, dagiti marigrigatan man, kabbaro a naitimpuyog iti kongregasion, addaan iti pagkapuyan, wenno naiwawa.—Fil. 2:4; 1 Tes. 5:12-14.
2 No adda panagdanag gapu iti nariribuk a paspasamak iti lubong, dagitoy a katulongan a papastor ket pudno a “kas paglemmengan a lugar manipud iti angin ken lugar a pakaitalimengan manipud iti natutudo a bagyo.” Pabilgendatayo no nabannogan wenno madagdagsenan ken agkasapulantayo iti liwliwa, a kasda la “barbaresbes ti danum iti awanan danum a pagilian” wenno “kas salinong ti maysa a nadagsen a napasdok a bato iti napaksuyan a daga.”—Isa. 32:2.
3 Panangparegta Kadagiti Di Aktibo: Mangaramid dagiti panglakayen iti naisangsangayan a panangikagumaan a mangparegta kadagidiay nagbalin nga iregular wenno di aktibo, a tulonganda ida a regular manen a makipaset kadagiti amin nga aktibidad ti kongregasion. Dagiti naayat a panagsarungkar tapno mangipastor ket nakatulong iti adu a tumabuno a regular kadagiti gimong ti kongregasion ken rumang-ay iti naespirituan agingga a nakiramanda manen iti tay-ak ti ministerio. Amin dagita a panagregget dagiti panglakayen iyanninawda ti naayat a panangaywan ni Jehova ken ti aktibo a panangidaulo ni Jesu-Kristo. Impasdekna ti pagtuladan iti panangipakita iti kasta a pannakaseknan iti asinoman iti arbanna a mabalin a naiwawa wenno napukaw.—Mat. 18:12-14; Juan 10:16, 27-29.
4 Dagiti katulongan a papastor siputanda dagiti pagilasinan a mangipasimudaag no adda dagiti kumapkapuy iti naespirituan. Mabalin nga agkasapulan iti naespirituan a tulong ti asinoman a mangipasimudaag iti pannakaupay, agbalin nga iregular iti itatabuno kadagiti gimong, wenno kumapuy ti serbisioda iti tay-ak. Magagaran dagiti panglakayen a tumulong iti asinoman a mangipakita iti pagannayasan a tumulad iti nailubongan a panagkawkawes ken panaglanglanga wenno agbalin a manangbabalaw iti kongregasion. Buyogen ti napudno a pannakaseknan ken kinadungngo, situtulok dagiti maseknan a manangaywan a ‘mangiburay iti bukodda a kararua’ iti panangikagumaanda a tumulong kadagitoy a mangisubli iti panagayatda ken Jehova.—1 Tes. 2:8.
5 Iti naglabas, dadduma a dedikado a Kristiano ti nagsardeng a nakitimpuyog iti kongregasion, a nagbalinda a di aktibo iti naespirituan agsipud ta nalapunosda kadagiti parikut iti salun-at, rigat ti biag, wenno pakaringgoran ti pamilia. Imbes a mangbabalaw, siaasi a mangipaay dagiti panglakayen iti pammatalged nga ay-aywanan ni Jehova dagiti amin a karnerona ken saranayenna ida iti tiempo ti pakarigatan. (Sal. 55:22; 1 Ped. 5:7) Dagiti alerto a papastor ti arban matulonganda dagitoy a mangamiris a no ‘umadanida iti Dios, isu umadaninto kadakuada,’ nga ipaayanna ida iti liwliwa ken bang-ar.—Sant. 4:8; Sal. 23:3, 4.
6 Panangipateg Kadagiti Addaan iti An-annayen: Dagiti naayat a katulongan a papastor pakaseknanda met dagidiay mabalin a mabaybay-an. Iti tunggal kongregasion, adda dagiti naitimpuyog nga addaan iti an-annayen, naidalit kadagiti balay a pagtaraknan, wenno nabaldado. Gapu iti kasasaadda, di pakasdaawan a limitado ti maaramidanda iti panangiwaragawag iti mensahe ti Pagarian. Mabalin a ti makasabaanda laeng ket dagidiay bumisita kadakuada, padada a pasiente, wenno dagiti mangay-aywan kadakuada. Ngem aniaman ti kabaelanda nga aramiden, mamatmatan dayta kas napateg a suporta iti sangalubongan a trabaho a panangasaba. (Mat. 25:15) Uray no mangasabada iti 15 minuto laeng, maireport koma dayta, ket maibilangda latta kas regular nga agibumbunannag ti Pagarian.
7 Dagiti “sagut a tattao” ket nangnangruna a sipapanunot kadagiti naespirituan a kasapulan dagiti kakabsatda iti daytoy a paset ti tawen—ti tiempo ti Memorial. Anian a naintiempuan a mangaramid dagiti panglakayen iti naisangsangayan a panangikagumaan a tumulong kadagiti amin a naiwawa tapno maaddaanda manen iti rag-o ken talna ti panunot nga iyeg ti aktibo a pannakitimpuyog iti kongregasion! Agrag-otayo no makitatayo a makigimong ken mangasaba dagitoy a “nainaig kadatayo iti pammati,” a mangpatalged iti pammatida iti subbot a daton.—Gal. 6:10; Luc. 15:4-7; Juan 10:11, 14.