Agimtuod Dagiti Agtutubo . . .

Apay nga Ipalubos ti Dios a Mapasamak ti Dakes a Bambanag?

TIN-EDYER pay laeng ni Lidija idi bimtak ti gubat iti nakaiyanakanna a lugar​—ti pagilian a dati a pagaammo kas Yugoslavia. “Binusbosko ti adu nga aldaw ken rabii iti nasipnget a pagyanan,” malagipna. “Masansan a masulisogak nga agtaray iti ruar, uray no kaipapanannat’ pannakatayko! Sakbay ti gubat, adda amin a masapsapulmo, ngem ita maragsakankan no sibibiagka.”

Inapektaran unay ti bannog ken rigat iti gubat ti espiritualidad ni Lidija idi agangay. Kunana: “Dikam makapangasaba wenno makagimong iti adu a lawas. Talaga nga impagarupko a baybay-annakam idin ni Jehova. Damagek no kua ti bagik, ‘Apay a dinatay tulongan ita?’”

Mapasamak dagiti gubat, krimen, kinaranggas, sakit, didigra, aksidente​—dagiti dakes a bambanag a kas kadagitoy uray kadagiti agtutubo. Ket no dumteng ti trahedia iti mismo a biagmo, natural laeng a maiyimtuodmo, ‘Apay nga ipalubos ti Dios a mapasamak dagitoy dakes a bambanag?’

Inimtuoden dagiti tattao ti Dios idi unana ti salsaludsod nga umasping iti dayta. Idi nakita ni mammadto a Habacuc, kas pagarigan, dagiti nakaap-aprang a kasasaad ti bambanag a rimsua iti ili ti Dios, inyunnoyna: “O Jehova, kasano ti kaunday ti panagasugko, ket dinakto ipangag? Agasugak kenka a maipapan iti ranggas, ket dika mangispal. Apay aya nga iparangmo kaniak ti kinadangkes, ken ipakitaannak iti kinasungit?” (Habacuc 1:2, 3) Mapaspasaran ti dadduma a Kristiano nga agtutubo ita dagiti umasping nga emosional a pakariribukan.

Usigem no aniat’ narikna ti maysa nga agtutubo a Kristiano kalpasan ti di napakpakadaan nga ipapatay ni tatangna. Kunana: “Kaslaak la bagtit a nagikkis iti tawa, a nagriawak ken Jehova a Dios . . . Isut’ pinabasolko iti amin a banag. Kasano a napasamak daytoy? Nagsingpet nga ama ni tatang ken nadungngo nga asawa, ket ita natay​—saan aya a maseknan ni Jehova?” Iti kasasaad a kas iti daytoy, normal laeng ti medio mariribukan, masair, wenno makapungtot pay ketdi. Laglagipem a naburiboran met uray ti matalek a mammadto a ni Habacuc iti pannakaipalubos ti kinadakes. Nupay kasta, no itultuloy ti maysa a tao a patanoren ti nasaem a rikrikna, adda peggad. Mabalin nga “agtanabutob a maikaniwas ken Jehova.”​—Proverbio 19:3.

Kasano ngarud a maliklikam ti agtanabutob ken maaddaan iti nasaem a rikrikna? Umuna, rumbeng a maawatam no pagtataudan ti kinadakes.

Saan nga Agtaud iti Dios ti Dakes a Bambanag

Pagminaren ti Biblia a pulos a di pinangggep ti Dios nga agsagabatayo iti kastoy a kasasaad. Inkabilna ti immuna a pagassawaan iti paraiso a pagtaengan nga awanan ut-ot ken panagsagaba. (Genesis 1:28) Ammom la ketdi no kasano a dimmakes ti kasasaad ti bambanag: Maysa a di makita nga espiritu a parsua, a napanaganan idi agangay kas Diablo ken Satanas, ti nangdurog kada Adan ken Eva a sumukir iti Dios. (Genesis, kapitulo 3; Apocalipsis 12:9) Babaen iti panangaramidna iti daytoy, kinondenar ni Adan amin a kaputotanna iti basol ken dagiti makadadael nga epektona.​—Roma 5:12.

Nalawag a saan a ti Dios ti nangyeg iti kinadakes iti sangatauan no di ket ti tao a mismo. (Deuteronomio 32:5; Eclesiastes 7:29) Kinapudnona, amin a dakes a bambanag a sagsagabaen ita ti tattao​—ti sakit, ipapatay, gubgubat, di kinahustisia​—ket bunga ti inggagara nga isusukir ni Adan. Kanayonanna, maipasidongtay amin iti awagan ti Biblia a “panawen ken di mapakpakadaan a pasamak.” (Eclesiastes 9:11, NW) Agpadpada a mapasaran ti nadangkes ken nalinteg dagiti kellaat nga aksidente ken trahedia.

Ti Panangipalubos ti Dios iti Kinadakes

Nupay makaliwliwa a maammuan a saan a ti Dios ti pagtataudan ti kinadakes, mabalin a pampanunotem pay laeng, ‘Apay a palpalubosanna nga agtultuloy ti kinadakes?’ Mainaig manen daytoy kadagiti isyu a napataud idiay Eden. Imbaga ti Dios ken ni Adan a no agsukir, matay. (Genesis 2:17) Ngem imbaga ti Diablo ken ni Eva a saan a matay no mangan iti naiparit a kayo! (Genesis 3:1-5) No kasta, ni Satanas inawaganna ti Dios nga ulbod. Kanayonanna, imparipirip ni Satanas nga ad-adda a magunggonaan ti tao no aramidenna dagiti bukodna a desision ket din kasapulan a ti Dios pay ti mangibaga iti aramidenna!

Saan a mabalin a baybay-an lattan ti Dios dagitoy a karit. Nakakitaka kadin iti kaklasem a nangkarit iti autoridad ti mannursuroyo? No baybay-an lattan ti mannursuro, mangruginto metten a tuladen ti dadduma pay nga estudiante. Iti umasping a pamay-an, nakirokiro ngata met ti uniberso no saan a direkta a sinango ni Jehova ti karit ni Satanas. Inaramid ni Jehova dayta babaen ti panangipalubosna a suroten ti tao ti wagas ni Satanas a mangaramid iti bambanag. Matagtagiragsak kadi ti tao ti kas-dios a kinawaywayas nga inkari ni Satanas? Saan. Nangyeg iti riribuk ken panagsagaba ti panagturay ni Satanas, a mangpaneknek nga isu ti nadamka a managulbod!

Agnanayonto kadi nga ipalubos ti Dios ti kinadakes? Saan. Tapno marisut dagiti isyu a pinataud ni Satanas, pagpatinggaenton ti Dios amin a kinadakes. (Salmo 37:10) Ngem kabayatanna, kasanotay a makadaer?

Isyu a Pakairamanam

Amirisem, umuna iti amin, a nairamanka iti daytoy nga isyu iti nagbaetan ti Dios ken ni Satanas! Kasano a kasta? Usigem ti libro ti Biblia a naipanagan iti nalinteg a tao a ni Job. Idi tinukoy ti Dios ni Job kas pagwadan a matalek a managdaydayaw, insungbat ni Satanas: “Dayawennaka ngata ni Job no awan magunggonana iti dayta?” (Job 1:9, Today’s English Version) Kinapudnona, inkalintegan ni Satanas a no mapalubosan la koma a mangparigat, mapatallikudna ti asinoman iti panagserbina iti Dios!​—Job 2:4, 5.

Pinardaya ngarud ni Satanas amin a managbuteng-Dios a tattao. Pinardayanaka. Nupay kasta, kuna ti Proverbio 27:11: “Anakko, agsiribka, ket paragsakem toy pusok, tapno masungbatak ti mangumsi kaniak.” Wen, no agserserbika iti Dios agpapan pay kadagiti nasaem a pakarigatan, aktual a makatulongka a mangpaneknek nga ulbod ni Satanas!

Bigbigentayo a no napasanguantayo iti dakes a bambanag, saan a nalaka a panunoten dagiti nairaman nga isyu. Kuna ni Diane, nga agtawen laeng iti sangapulo idi natay ni nanangna: “Maamakak idi di la ket ta bumato wenno maaddaanak iti nasaem a rikrikna maigapu kadagiti suot iti biagko.” Nupay kasta, ti pannakaammo no apay a pinalubosan ti Dios ti kinadakes ti nakatulong kenkuana a makagun-od iti umiso a panirigan kadagiti parikutna. Kunana itan: “Nupay adda dagiti banag a narigat a tamingen iti biagko, kanayon a tultulongannak ni Jehova.”

Ipalagip ni Diane kadatayo ti nakapatpateg a banag: Saan a namnamaen ni Jehova a daerantayo dagitoy a pakarigatan a datdatayo. Ipasigurado kadatayo ti Salmo 55:22: “Iyallatiwmo ta awitmo ken Jehova, ket saranayennakanto. Dinanto ipalubos a magaraw ti nalinteg.” Napaneknekan ni agtutubo a Kotoyo a pudno daytoy. Napasaranna ti trahedia idi natay dagiti nagannak kenkuana iti ginggined idi 1995 a nangapektar idiay Kobe, Japan. Iti panangilawlawagna iti kasasaadna ken dagiti addina, kunana: “Agsipud ta sinuruannakam ni nanang nga agpannuray ken ni Jehova, makapagibturkami.”

Ni ngay Lidija, ti agtutubo a babai a nadakamat iti pangrugian? Idi agangay, naamirisna a saan a pulos a binaybay-an ni Jehova. Kunana itan: “Kanayon nga adda kadakami ni Jehova. Inturong ken inwanwanna dagiti addangmi.”

Ni Jehova​—Dios a Naayat ken Maseknan

Masagrapmo met ti tulong ti Dios no mapasamak dagiti dakes a banag kenka. Apay? Agsipud ta maseknan ni Jehova kenka! Ket nupay palpalubosanna a mapasamak ti dakes a bambanag kadagiti naimbag a tattao, mangipapaay met iti naayat a liwliwa. (2 Corinto 1:3, 4) Maysa a pamay-an nga ar-aramidenna dayta ket babaen ti kongregasion Kristiano. Sadiay a makasarakka ‘iti gagayyem a nadekdekket ngem kabsat,’ a mangpabileg kenka no dumteng ti krisis. (Proverbio 18:24) Malagip ni Kotoyo: “Manipud iti umuna nga aldaw kalpasan ti ginggined, napankam iti lugar a nagtataripnongan dagiti kakabsat, ket nakaawatkami iti pammaregta ken bambanag a kasapulan. Daytat’ nangpatalged iti riknak. No la ket ta adda ni Jehova ken dagiti kakabsat, patiek a maanduranmi ti aniaman.”

Agsipud ta am-ammonaka ni Jehova kas maysa nga indibidual, maipaayna met dagiti kasapulam no mapasamak ti dakes a bambanag. Malagip ni Daniel no kasano a dinaeranna ti pannakapukaw ni amana babaen ti panagkunana: “Agbalin ni Jehova nga ama kenka, ket mangipaay ti organisasionna kadagiti naespirituan a lallaki kas pagwadan. Kanayon a mangipaay ni Jehova iti sungbat kadagiti saludsodko a kadawyan a pagsaritaanmi koma ken ni tatangko.” Napadasan met ni Diane ti naayat a pannakaseknan ni Jehova manipud natay ni nanangna. Kunana: “Babaen kadagiti tattao a natataengan, nataengan iti naespirituan a nakaipaay iti pammaregta, panangiwanwan, ken balakad, imbagnos ken tinulongannak a mangdaer iti aniaman a pannakaupay.”

Siempre, di pulos makaay-ayo ti agsagaba iti dakes a bambanag. Ngem maliwliwaka koma a mangammo no apay nga ipalpalubos ti Dios ti kakasta a bambanag. Kanayon a palagipam ti bagim a nakaas-asidegen a risuten ti Dios ti parikut. Anian, mapunaston amin nga ared-ed ti dakes a bambanag a napasarantayo! (Isaias 65:17; 1 Juan 3:8) Babaen ti pananggundawaymo iti amin a probision nga ar-aramiden ti Dios a tumulong kenka a mangdaer, maaramidmo ti pasetmo a mangpaneknek nga ulbod ni Satanas. Inton agangay, ‘ti Dios punasennanto ti amin a lua kadagiti matam.’​—Apocalipsis 21:3, 4.

[Dagiti ladawan iti panid 19]

Asidegen a pagpatinggaen ni Jehova amin a dakes a bambanag