Ania ti Naespirituan a Paraiso?

NI Gustavo ket dimmakkel iti maysa a bassit a siudad idiay Brazil.a Sipud kinaubingna, naisuro kenkuana a mapan idiay langit ti nasingpet a tao no matay. Awan ti ammona maipapan iti panggep ti Dios nga addanto tiempo a tagiragsaken ti matalek a sangatauan ti perpekto a biag iti paraiso a daga. (Apocalipsis 21:3, 4) Ken adda pay banag a dina ammo. Saanna a napanunot a mabalinna a tagiragsaken ti naespirituan a paraiso uray pay itan.

Nangngegyo kadin dayta a naespirituan a paraiso? Ammoyo kadi no ania dayta ken no ania ti kasapulan tapno agbalin a pasetna? Siasinoman nga agtarigagay iti pudno a ragsak masapul nga ammuenna ti maipapan iti dayta a paraiso.

Panangsapul iti Naespirituan a Paraiso

Nalabit saan a realistiko nga ibaga a ti maysa a tao mabalinna ti agbiag iti paraiso uray kadagitoy a tiempo. Saan la ketdi a paraiso daytoy a lubong. Adu unay dagiti tattao ita nga agpaspasar iti kasasaad nga inladawan ti nagkauna nga ari ti Israel: “Adtoy, dagiti lulua dagiti naparigat, ket isuda awananda iti mangliwliwa; ket iti biang dagiti mangparparigat kadakuada adda idi pannakabalin; ngem awan ti mangliwliwa kadakuada.” (Eclesiastes 4:1) Gapu iti rinuker a sistema ti politika, relihion, ken ekonomia, saan a mabilang ti kaadu dagiti agsagsagaba, ket dida manamnama ti bang-ar ken “mangliwliwa.” Adu ti marigatan a mangibaklay kadagiti babayadan, mangpadakkel kadagiti annak, ken mangaramid iti adu pay a bambanag tapno maisakad ti panagbiag. Agsapsapul la ketdi dagitoy iti mangliwliwa, maysa a mangpalag-an iti pakadagsenanda. Para kadakuada amin, adayo a mayarig iti paraiso ti biag.

Ngarud, sadino ti naespirituan a paraiso? Bueno, ti Ingles a sao para iti “paraiso” ket nainaig iti Griego, Persiano, ken Hebreo a sasao nga addaan amin iti anag a parke wenno minuyongan, maysa a lugar a natalna ken makapabang-ar. Inkari ti Biblia a ti daga agbalinto a literal a paraiso, kasla minuyongan a pagtaengan ti perpekto a natauan a rasa. (Salmo 37:10, 11) No sipapanunottayo iti daytoy, matarusantayo a ti naespirituan a paraiso ket maysa a makaay-ayo ken natalinaay a kasasaad tapno ti maysa a tao matagiragsakna ti natalna a relasion iti padana a tao ken iti Dios. Kas naammuan ni Gustavo, adda ti kasta a paraiso ita, ket umad-adu ti mangtagtagiragsak iti dayta.

Idi agtawen iti 12, desidido ni Gustavo nga agbalin a padi a Romano Katoliko. Inanamongan dagiti nagannak kenkuana, isu a nagadal iti maysa a relihioso a seminario. Nakipaset daytoy iti musika, drama, ken politika nga us-usaren ti simbaan a pangawis kadagiti agtutubo. Ammona a rebbengen ti padi ti agserbi kadagiti tattao ken saanna a mabalin ti mangasawa. Kaskasdi, agar-aramid iti imoralidad ti sumagmamano a padi ken seminarista nga am-ammo ni Gustavo. Saan a nagbayag, nangrugi ni Gustavo nga agbartek iti tengnga ti kasta a kasasaad. Nalawag, saanna pay a nasarakan ti naespirituan a paraiso.

Maysa nga aldaw, nabasa ni Gustavo ti maysa a naibatay-Biblia a tract a nangdakamat iti maysa a paraiso a daga. Daytoy ti nangtignay kenkuana nga agpanunot maipapan iti panggep ti biag. Kinunana: “Rinugiak a masansan a basaen ti Biblia, ngem saanko a naawatan dayta. Diak pay ketdi ammo nga adda nagan ti Dios.” Gapuna, pinanawanna ti seminario ket nagpayadal iti Biblia kadagiti Saksi ni Jehova. Kalpasanna, napartak ti panagrang-ayna ket di nagbayag indedikarna ti biagna iti Dios. Nangrugin a matarusan ni Gustavo ti naespirituan a paraiso.

Maysa nga Ili Maipaay iti Nagan ti Dios

Naadal ni Gustavo a ti nagan ti Dios a Jehova ket saan a basta napateg nga impormasion para iti maysa nga agad-adal iti Biblia. (Exodo 6:3) Nakapatpateg dayta a paset ti pudno a panagdayaw. Insuro ni Jesus dagiti pasurotna nga agkararag iti kastoy: “Amami nga adda iti langlangit, masantipikar koma ti naganmo.” (Mateo 6:9) No maipapan kadagiti Gentil a nagbalin a Kristiano, kinuna ni adalan a Santiago: “Ti Dios . . . inturongna ti asikasona kadagiti nasion tapno mangala manipud kadakuada ti maysa nga ili a maipaay iti naganna.” (Aramid 15:14) Idi umuna a siglo, ti kongregasion Kristiano ti “ili a maipaay iti naganna.” Adda kadi ili ita a maipaay iti nagan ti Dios? Adda, ket naamiris ni Gustavo a dayta nga ili ket dagiti Saksi ni Jehova.

Aktibo dagiti Saksi ni Jehova iti agarup 235 a daga ken teritoria. Agdagup dagitoy iti nasurok nga innem a milion a ministro, ken tumabtabuno iti gimongda ti sabali pay a walo a milion nga interesado a tattao. Nalatak dagitoy kas manangaskasaba iti publiko, a tungtungpalenda ti sasao ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion.” (Mateo 24:14) Nupay kasta, apay a narikna ni Gustavo a nasarakanna ti naespirituan a paraiso iti pannakilangenna kadagiti Saksi ni Jehova? Kunana: “No ibatayko iti nakitak, ti ayat nga adda kadagiti Saksi ni Jehova ti dakkel a nakaidumaanda iti lubong, nangruna iti seminario.”

Kasta met laeng ti komento dagiti dadduma maipapan kadagiti Saksi ni Jehova. Kinuna ni Miriam, maysa nga agtutubo a babai a taga Brazil: “Saanko idi nga ammo no kasano ti agbalin a naragsak, uray iti pamiliak. Kadagiti Saksi ni Jehova ti umuna a gundaway a nakitak ti ayat nga adda aramidna.” Kinuna ti maysa a lalaki nga agnagan Christian: “Sagpaminsan a makiramramanak iti espiritismo, ngem saan a napateg ti relihion kaniak. Napatpateg kaniak ti takderko iti kagimongan ken ti trabahok kas maysa nga inheniero. Kaskasdi, idi rinugian ni baketko ti makipagadal iti Biblia kadagiti Saksi ni Jehova, adda nakitak a nagbaliwanna. Naay-ayoak met gapu iti rag-o ken kinaregta dagiti Kristiano a babbai a bumisbisita kenkuana.” Apay a kasta ti komento dagiti tattao maipapan kadagiti Saksi ni Jehova?

Ania ti Naespirituan a Paraiso?

Ti maysa pay a nakaidumaan dagiti Saksi ni Jehova isu ti panangipategda iti pannakaammo iti Biblia. Mamatida a pudno ti Biblia ken Sao ti Dios dayta. Gapuna, saanda a mapnek a basta ammuen dagiti pamunganayan a sursuro ti relihionda. Regular ti personal a panagadal ken panagbasada iti Biblia. Bayat a ti maysa a tao bumaybayag ti pannakilangenna kadagiti Saksi ni Jehova, umun-uneg met ti pannakaammona maipapan iti Dios ken iti pagayatanna kas naipalgak iti Biblia.

Ti kasta a pannakaammo wayawayaanna dagiti Saksi ni Jehova kadagiti bambanag a manglaplapped kadagiti tattao nga agragsak, kas iti an-anito ken makadangran a kapanunotan. Kadagiti Saksi ni Jehova, pudno ti kinuna ni Jesus: “Ti kinapudno wayawayaannakayto.” (Juan 8:32) Kinuna ni Fernando, maysa idi a mangan-annurot iti espiritismo: “Dakkel a bang-ar ti panagadal maipapan iti biag nga agnanayon. Maamakak amangan no matay dagiti dadakkelko wenno siak a mismo.” Ti kinapudno winayawayaanna ni Fernando iti panagbuteng iti lubong dagiti espiritu ken iti makunkuna a biag kalpasan ti ipapatay.

Iti Biblia, ti pannakaammo iti Dios ket nainaig unay iti paraiso. Kinuna ni propeta Isaias: “Saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.”​—Isaias 11:9, NW.

Siempre, saan nga umdas ti pannakaammo laeng tapno magun-odan ti talna nga impadto ni Isaias. Ti maysa a tao masapul nga iyaplikarna dagiti naadalna. Kastoy ti inkomento ni Fernando: “No ti maysa a tao sukayenna ti bungbunga ti espiritu, isut’ tumultulong iti naespirituan a paraiso.” Tuktukoyen ni Fernando dagiti sasao ni apostol Pablo, a nangawag kadagiti nasayaat a galad a rumbeng a patanoren dagiti Kristiano kas “ti bunga ti espiritu.” Inlistana dagitoy kas ti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.”​—Galacia 5:22, 23.

Maawatanyo kadi no apay a kasla addakayo iti paraiso no makitimpuyogkayo iti grupo dagiti tattao a mangikagkagumaan a mangsukay kadagita a galad? Dagita a tattao ti mangtagiragsak iti naespirituan a paraiso nga impadto ni propeta Sofonias. Kinunana: “Saandanto nga agaramid iti kinakillo, wenno uray agsao iti kinaulbod, saanto met a masarakan kadagiti ngiwatda ti dila a manangallilaw; ta isuda agtaraondanto ket pudno nga agiddada a nakaunnat, ket awanto ti asinoman a mamagpigerger kadakuada.”​—Sofonias 3:13, NW.

Ti Napateg a Paset ti Ayat

Nalabit nadlawyo a ti ayat ti umuna kadagiti bunga ti espiritu a dinakamat ni Pablo. Adu ti maibaga ti Biblia no maipapan iti dayta a galad. Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Pudno, saan a perpekto dagiti Saksi ni Jehova. Kas kadagiti apostol ni Jesus, adda tiempo a dida agkikinnaawatan. Ngem pudno nga agiinnayatda, ken ikararagda ti tulong ti nasantuan nga espiritu bayat a suksukayenda daytoy a galad.

Kas resultana, naisangsangayan ti timpuyogda. Awan kadakuada ti tribalismo wenno mamagsisina a nasionalismo. Kinapudnona, adu a Saksi ti nagsisinnalaknib uray dayta ti namagpeggad iti biagda iti tengnga ti panagiinnibus ti puli idi arinunos ti maika-20 a siglo. Nupay naggapuda “manipud kadagiti isuamin a nasion ken kadagiti tribo ken kadagiti il-ili ken kadagiti pagsasao,” tagtagiragsakenda ti panagkaykaysa a narigat a matarusan malaksid no mapadasanyo.​—Apocalipsis 7:9.

Paraiso Kadagiti Mangar-aramid iti Pagayatan ti Dios

Iti naespirituan a paraiso, awan lugarna ti kinaagum, imoralidad, ken panagimbubukodan. Nabalakadan dagiti Kristiano: “Sumardengkayo a maisuksukog maitunos iti daytoy a sistema ti bambanag, no di ket mapagbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken perpekto a pagayatan ti Dios.” (Roma 12:2) No nadalus iti moral ti biagtayo ken aramidentayo ti pagayatan ti Dios, tumultulongtayo a mangbangon iti naespirituan a paraiso ket dayta ti ad-adda a mangparagsak kadatayo. Napaneknekan dayta ni Carla, a nagkuna: “Insuro ni tatangko nga igaedko ti mangged tapno masuportarak ti bagik. Ngem nupay naaddaanak iti kinatalged gapu iti kursok iti unibersidad, kailiwko ti panagkaykaysa ti pamilia ken kinatalged a ti laeng pannakaammo iti Sao ti Dios ti makaipaay.”

Siempre, uray tagtagiragsakentayo ti naespirituan a paraiso, adda latta dagiti parikuttayo iti biag. Agsakit latta dagiti Kristiano. Mabalin a nariribuk ti pagilian a pagnanaedanda. Adu ti napanglaw. Kaskasdi, mabalintayo ti agpatulong ken Jehova a Dios no addaantayo iti nasinged a relasion kenkuana, ti nakapatpateg a paset ti naespirituan a paraiso. Gapuna, awisennatayo nga ‘ipalladaw ti dadagsentayo kenkuana,’ ket adu dagiti makapaneknek iti naisangsangayan a pamay-an ti panangtulongna kadakuada bayat ti karigatan a kasasaad. (Salmo 55:22, NW; 86:16, 17) Inkari ti Dios a tarabayenna dagiti managdaydayawna uray iti “ginget ti sipnget ni patay.” (Salmo 23:4) No agtalektayo a nakasagana ti Dios a bumadang kadatayo, dayta ti tumulong a mangtaginayon iti ‘talnatayo iti Dios a mangringbaw iti amin a panunot,’ nga isu ti tulbek iti naespirituan a paraiso.​—Filipos 4:7.

Pannakitinnulong iti Naespirituan a Paraiso

Kaay-ayo ti kaaduan a tattao ti agpasiar iti parke wenno minuyongan. Pagaayatda ti agpagnapagna iti kasta a lugar wenno mabalin nga agtugawda iti bangko ket tagiragsakenda ti aglawlaw. Iti umar-arngi a wagas, magustuan ti adu a tattao ti makitimpuyog kadagiti Saksi ni Jehova. Makapabang-ar, natalna, ken makapabileg dayta a timpuyog para kadakuada. Nupay kasta, masapul a maaywanan ti napintas a minuyongan tapno agtalinaed dayta a paraiso. Kasta met, napaadda ti naespirituan a paraiso iti daytoy dakes a lubong gapu iti panangkultibar dagiti Saksi ni Jehova, ket bembendisionan ti Dios ti panagreggetda. Kasano ngarud a pudpudno a makatulong ti maysa a tao iti dayta a paraiso?

Umuna, masapul a makitimpuyogkayo iti maysa a kongregasion dagiti Saksi ni Jehova, makipagadalkayo iti Biblia kadakuada, ken gun-odenyo ti pannakaammo iti Biblia nga isu ti nakaibatayan ti naespirituan a paraiso. Kinuna ni Carla: “Awan ti naespirituan a paraiso no awan ti naespirituan a taraon.” Ramanenna daytoy ti regular a panangbasa iti Sao ti Dios ken panangutob iti nabasayo. Ti pannakaammo a magun-odanyo ad-adda a pasingedennakayo ken Jehova, ket masursuroyo nga ayaten ti Dios. Masursuroyo met ti makisarita kenkuana babaen ti kararag ken agkiddaw iti panangiwanwan ken espirituna a tumulong kadakayo bayat nga ar-aramidenyo ti pagayatanna. Imbilin ni Jesus nga agkararagtayo a sipipinget. (Lucas 11:9-13) Kinuna ni apostol Pablo: “Agkararagkayo a di agressat.” (1 Tesalonica 5:17) Ti pribilehio a makisarita iti Dios babaen ti kararag buyogen ti naan-anay a panagtalek a denggennakayo ket napateg dayta a paset ti naespirituan a paraiso.

Bayat ti panaglabas ti tiempo, makitayo a sumayaat ti katataoyo gapu iti naadalyo, ket tarigagayanyonto a saritaen ti maipapan iti dayta kadagiti dadduma. Iti kasta, mabalinanyo ti agtulnog iti bilin ni Jesus: “Agsilnag koma ti silawyo iti sanguanan dagiti tattao, tapno makitada dagiti nasayaat nga aramidyo ket mangipaayda ti dayag iti Amayo nga adda iti langlangit.” (Mateo 5:16) Dakkel a ragsak ti itden ti panangiranud iti pannakaammo ken Jehova a Dios ken Jesu-Kristo kadagiti dadduma ken ti panangipateg iti naindaklan nga ayat nga impakitada iti sangatauan.

Asidegen ti tiempo inton ti intero a daga agbalin a literal a paraiso​—maysa nga arig minuyongan nga awanan iti polusion, ken maitutop a pagtaengan ti matalek a sangatauan. Ti kaadda ti naespirituan a paraiso kadagitoy “napeggad a tiempo a narigat a pakilangenan” ket pammaneknek iti pannakabalin ti Dios ken pakpakauna ti kabaelanna ken sigurado nga iringpasna iti masanguanan.​—2 Timoteo 3: 1.

Uray itan, dagidiay mangtagtagiragsak iti naespirituan a paraiso mapaspasaranda ti naespirituan a kaitungpalan ti Isaias 49:10 (NW): “Saandanto nga agbisin, saandanto met a mawaw, saanto met a kabilen ida ti mangparkag a pudot wenno init. Ta iturongto ida Daydiay maas-asian kadakuada, ket idalannanto ida iti igid dagiti ubbog ti danum.” Paneknekan ni José a pudno dayta. Arapaapna idi ti agbalin a nalatak a musikero, ngem ad-adda a nariknana ti pannakapnek iti panagserbi iti Dios kadua ti kongregasion Kristiano. Kinunana: “Tagtagiragsakek ita ti biag nga adda panggepna. Natalged ti panagriknak iti tengnga ti Nakristianuan a panagkakabsat, ken ammok a ni Jehova ti naayat nga Ama a mabalintayo a pagtalkan.” Gapuna, kastoy ti panangiladawan ti Salmo 64:10 maipapan iti ragsak ni Jose ken ti minilion pay a kas kenkuana: “Dagiti nalinteg maay-ayatandanto ken Jehova, ket agkamangdanto kenkuana.” Anian a nagsayaat a panangiladawan iti naespirituan a paraiso!

[Footnote]

[Ladawan iti panid 10]

Bayat a tagtagiragsakenyo ti naespirituan a paraiso, tumulongkayo a mangpalawa iti dayta!