Ti Panagsarungkar Mangiturong iti Panangyadal iti Biblia
1. Apay a nagpateg ti panagsarungkar?
1 Binilin ni Jesus dagiti pasurotna a saanda laeng a mangasaba no di pay ket ‘mangaramid kadagiti adalan . . . , nga isuroda ida.’ (Mat. 28:19, 20) Ti manangaskasaba ket mangiwaragawag, ngem saan la a dayta ti aramiden ti mannursuro. Mangisuro, mangilawlawag, ken mangidatag kadagiti pammaneknek. Ti maysa a pamay-an tapno maisurotayo dagiti sabali ket babaen ti panagsarungkar kadagiti interesado nga addaan panggep nga iyadalan ida iti Biblia.
2. Siasino dagiti rumbeng a sarungkarantayo?
2 Siasino dagiti rumbeng a sarungkaranyo? Siguraduenyo a sublianan dagiti amin a nangala iti literatura wenno nangipakita iti uray bassit laeng nga interes iti naimbag a damag. No makasarakkayo iti interesado bayat ti panangasabayo iti publiko, ikagumaanyo nga alaen ti address wenno numero ti teleponona tapno masukay ti interesna. Positibokayo koma a mangirugi iti panangyadal iti Biblia. Itultuloyyo a biroken dagidiay agtarigagay a payadalan iti Biblia, ket mabalin a masarakanyo ida.—Mat. 10:11.
3, 4. Ania ti ramanen ti epektibo a panagsarungkar?
3 Ipakita ti Personal nga Interes: Ti panagsagana para iti epektibo a panagsarungkar ket mangrugi iti damo a pannakisarita. Dagiti naballigi nga ebanghelisador inotarda ti paginteresan ti bumalay, ket usarenda dayta a pagibatayan iti sumaruno a pannakisaritada. Natakuatan dagiti dadduma a makatulong ti panangibangon iti saludsod iti ngudo ti panagsarita tapno matukay ti interes ti bumalay iti sumaruno a panagsarungkar. No sipapasnek a maseknantayo kadagiti tattao, pampanunotentay ida uray no nakapanawtayon, ken matignaytayo a sumarungkar manen iti kabiitan a panawen. No mabalin, agsublikayo bayat a di pay bimmaaw ti interesda—nalabit uray kalpasan ti maysa wenno dua nga aldaw.
4 No sumarungkarkayo, ituloyyo a pagsaritaan daydi naudi a nagsaritaanyo. Ikagumaanyo ti mangiranud iti uray maysa wenno ad-adu pay a Nainkasuratan a punto kada sumarungkarkayo, ken umimdengkayo a naimbag. Am-ammuenyo a nalaing ti bumalay. Ket kadagiti sumaruno a panagsarungkaryo, iranudyo dagiti kinapudno nga adda iti Sao ti Dios a direkta a mainaig kadagiti pakaseknanna.
5. Ania a simple a pamay-an ti mabalin nga usaren iti panangirugi iti panangyadal iti Biblia?
5 Gundawayanyo ti Mangirugi iti Panangyadal iti Biblia: No sumarungkarkayo, ikagumaanyo ti mangirugi iti panangyadal iti Biblia. Kasano a maaramid daytoy? Dakamatenyo a kayatyo nga iranud ti maysa a makapainteres a punto, sa ukradenyo ti libro a Pannakaammo wenno ti broshur a Kalikaguman iti parapo nga iti panagkunayo ket magustuan ti bumalay. Basaenyo ti parapo, usigenyo ti saludsod, sa pagsaritaanyo ti maysa wenno dua a naisitar a teksto. Mabalin nga aramiden daytoy iti mismo a ruangan iti las-ud ti lima agingga iti sangapulo a minuto. Ingudoyo babaen ti panangyimtuod iti sumaganad a saludsod, sa ibagayo nga ituloyyonto a pagsaritaan dayta iti sabali a gundaway.
6. Kasanotay a maipakita a maawatantayo ti kinapateg ti panagsarungkar?
6 Napateg a paset ti ministeriotayo ti panagsarungkar kadagiti amin a nangipakita iti interes. Gapuna, iti linawas nga eskediulyo, mangilasinkayo iti panawen para iti panagsarungkar. Ti panangaramid iti dayta ad-adda a pagbalinenna nga epektibo ti ministerioyo ken mangyeg iti napaypayso a rag-o.