Baro a Programa iti Asamblea Sirkito
1 Impakpakauna ti Apotayo a dagiti adalanna makapasarda iti rigat. (Mat. 24:9) Kasano ti rumbeng a panangmatmattayo kadagiti pakasuotan? Ania ti makatulong kadatayo a mangibtur iti rigat? Masungbatan dagitoy a saludsod iti programa ti asamblea sirkito iti 2004. Natemaan daytoy iti “Agrag-okayo iti Namnama. Agibturkayo iti Sidong ti Rigat.”—Roma 12:12.
2 Ti Dua a Simposium: Ti umuna a simposium a napauluan iti “Mangpataud iti Bunga Buyogen ti Panagibtur,” ibinsabinsana dagiti pamay-an tapno makapataudtayo iti bunga. Mainterbiu ti sumagmamano nga agibumbunannag no kasanoda a nangasaba ken nangisuro buyogen ti kinaganat. Nangnangruna nga imutektekan dagiti nagannak ti paset a “No Disiplinaennatayo ni Jehova,” a mangilawlawag no kasano a makirinnason dagiti nagannak kadagiti annakda. Ti maudi nga ispiker iti simposium itampokna no ania ti nasken nga aramidentayo tapno saannatayo a maimpluensiaan ti lubong a mamagbalin kadatayo a di nabunga.—Mar. 4:19.
3 Natemaan ti maikadua a simposium iti, “Tarayentayo ti Lumba Buyogen ti Panagibtur.” Ibatad daytoy kadatayo no kasano a mayasping ti biagtayo iti lumba. Apay a nasken a tumaraytayo sigun kadagiti pagannurotan? Kasano a sibaballigi a maikkattayo ti tunggal dadagsen ket ditay mabannog iti lumba ti biag? Ti maipaay a naintiempuan a Nainkasuratan a balakad tulongannatayo nga agtultuloy a tumaray buyogen ti panagibtur.
4 Ti Panagibtur Mangyeg iti Anamong ti Dios: Maysa kadagiti palawag ti manangaywan iti distrito ket napauluan iti “Ti Panagibtur Mangiturong iti Naanamongan a Kasasaad.” Ti palawag publiko sungbatanna daytoy a saludsod: Makinnagan ti rumbeng a pangnamnamaan dagiti nasion, ken ania ti nairaman iti dayta? Ti maudi a palawag a napauluan iti, “Babaen ti Panagibtur Magun-odanyonto Dagiti Kararuayo,” ilawlawagna no kasano a naibturan ni Jesus ti kinaawan hustisia a di man la naupay.
5 Laglagipenyo nga itugot ti libro nga Eskuelaan ti Panagministro ken Ti Pagwanawanan a maadal iti dayta a lawas. Aginotarkayo tapno maipamaysayo ti agimdeng ken tapno adda reperensiayo iti masanguanan. Addanto repaso iti kongregasion maipapan iti programa.