Itedtayo ti Kasayaatan ken ni Jehova
1 Impaannurot ti Linteg ni Jehova iti Israel a masapul a “nasalun-at” dagiti animal a maidaton kenkuana. Di maawat ti animal nga adda depektona. (Lev. 22:18-20; Mal. 1:6-9) Maysa pay, no maidaton ti maysa nga animal, amin a taba—nga isu ti kasayaatan a paset—ket agpaay ken ni Jehova. (Lev. 3:14-16) Kas Ama ken Naindaklan nga Apo ti Israel, maikari ni Jehova iti kasayaatan.
2 Kas idi un-unana, maseknan unay ita ti Dios iti kalidad dagiti datontayo. Ti panagserbitayo rumbeng nga iyanninawna ti umiso a panagraem ken ni Jehova. Siempre, nagduduma ti kasasaadtayo. Nupay kasta, adda naimbag a rason a sukimatentayo ti bagitayo tapno masigurado nga ipapaaytayo kenkuana ti kasayaatan.—Efe. 5:10.
3 Naimpusuan a Panagserbi: Tapno maidaydayaw ni Jehova ken matukay ti puso dagiti makasaritatayo, saan a mabalin a bareng-bareng ti ministeriotayo. Rumbeng nga agubbog iti puso a napno iti panagyaman dagiti balikastayo maipapan iti Dios ken kadagiti naindaklan a panggepna. (Sal. 145:7) Ipaganetget daytoy ti kinapateg ti panangtaginayon iti nasayaat nga urnos iti personal a panagbasa iti Biblia ken panagadal.—Prov. 15:28.
4 Ti panangted iti kasayaatan ken ni Jehova ramanenna met ti panangtulad iti ayatna kadagiti tattao. (Efe. 5:1, 2) Gapu ta ay-ayatentayo dagiti sabsabali, ikagumaantayo nga iranud ti makaispal-biag a mensahe ti kinapudno iti amin a tao aginggat’ mabalin. (Mar. 6:34) Ipakitatayo ti personal nga interes kadagidiay makasaritatayo. Pampanunotentayo ida kalpasan ti damo nga isasarungkar ken subliantayo ida. Aramidentayo ti amin a kabaelantayo a tumulong kadakuada a rumang-ay iti naespirituan.—Ara. 20:24; 26:28, 29.
5 “Sakripisio ti Panagdaydayaw”: Maitedtayo met ti kasayaatan ken ni Jehova babaen ti kinaaneptayo iti ministerio. Adu ti magapuanantayo no nasayaat ti panangyurnostayo kadagiti bambanag ken igaedtayo ti agtrabaho. (1 Tim. 4:10) Nalawag ken makakombinsir ti panagsaotayo no nakasaganatayo a naimbag, iti kasta ad-adda nga ipangagdatayo. (Prov. 16:21) Bayat nga iranranudtayo ti naimbag a damag kadagiti sabsabali, maitutop a maawagan iti “sakripisio ti panagdaydayaw” dagiti naimpusuan a balikastayo.—Heb. 13:15.