Panangtulong Dagiti Payunir Kadagiti Sabsabali

¹ Kinuna ni Jesus: “Kinapudnona, dakkel ti anien, ngem bassit dagiti managobra. Gapuna ipakaasiyo iti Apo ti panagani a mangibaon kadagiti managobra iti panaganina.” Tangay bassit dagiti paraani idi umuna a siglo ken adu ti teritoria a saknapanda, mabalin koma nga imbaon ni Jesus ida a sinaggaysa tapno ad-adu ti mapakaammuanda iti naimbag a damag. Imbes ketdi, “imbaonna ida a sinagdudua.” (Luc. 10:1, 2) Apay a sinagdudua?

² Kabbaro dagidiay nga adalan ken awan pay kapadasanda. Babaen ti panagkakaduada nga agtrabaho makasursuroda iti maysa ken maysa ken makapagpipinnaregtada. Kas iti kinuna ni Solomon, “ti dua naim-imbagda ngem iti maysa.” (Ecl. 4:9, 10) Uray pay kalpasan a naiparukpok ti nasantuan nga espiritu idi Pentecostes 33 K.P., kinadua da Pablo, Bernabe, ken dadduma pay dagiti kapammatianda iti ministerio. (Ara. 15:35) Anian a pribilehio ti tinagiragsak dagiti dadduma tangay personal a sinanay ida ti kakasta a natalugadingan a lallaki!

³ Nagsayaat a Programa iti Panagsanay: Kas iti immuna a siglo a katupagna, ti moderno a kongregasion Kristiano ket maysa nga organisasion a mangaskasaba. Sansanayennatayo met. Kas indibidual, naimpusuan koma a tarigagayantay nga isango a sieepektibo ti naimbag a damag. Tapno ad-adda nga epektibo ti adu nga agibumbunannag, adda magun-odan a tulong.

⁴ Iti kalkalpas a Kingdom Ministry School, impakaammo ti Sosiedad ti maysa a programa a panangtulong dagiti payunir kadagiti sabsabali iti tay-ak ti ministerio. Kasapulan aya daytoy? Wen. Nasurok a maysa a milion nga agibumbunannag ti nabautisaran iti napalabas a tallo a tawen, ket adu kadagitoy ti masapul a masanay tapno ad-adda nga epektiboda a mangasaba. Siasino ti mangsanay kadakuada?

⁵ Makatulong dagiti amin-tiempo a payunir. Ipapaayan ida ti organisasion ni Jehova iti nawadwad a balakad ken panangsanay. Iti dua a lawas a Pioneer Service School, umawat dagiti payunir iti instruksion a mayataday kadagiti pakasapulanda. Magunggonaanda met iti pannakimitingda kadagiti manangaywan ti sirkito ken distrito, ken iti panangiwanwan dagiti panglakayen. Nupay saan nga amin a payunir ket aduan kapadasan a kas kada Pablo ken Bernabe, adu ti napapateg a nasursuroda, a pagragsakanda nga iburay.

⁶ Siasino Dagiti Magunggonaan? Dagiti laeng aya nabiit pay nga agibumbunannag wenno kababautisar ti mairaman iti daytoy a programa? Saan! Adda dagiti agtutubo ken natataengan a nakaammo iti kinapudno iti adun a tawen ngem apresiarenda ti tulong iti nagduduma a benneg ti ministerio. Nalaing dagiti dadduma nga agipaima iti literatura ngem marigatanda nga agsarungkar wenno mangirugi kadagiti panangyadal iti Biblia. Nalaka a makairugi iti panangyadal iti Biblia dagiti dadduma ngem mapaliiwda a saan a rumangrang-ay dagiti iyad-adalanda. Aniat’ manglaplapped iti irarang-ayda? Mabalin a makiddaw kadagiti aduan kapadasan a payunir a tumulongda kadagitoy a benneg. Adda dagiti payunir nga epektibo iti panangtukay iti interes, panangirugi kadagiti panangyadal iti Biblia, ken panangiturong kadagiti baro nga estudiante iti organisasion. Ti kapadasanda makatulong unay iti daytoy baro a programa.

⁷ Nupay tarigagayanyo a suportaran ti regular a taripnong ti kongregasion para iti panagserbi idiay tay-ak, marigatankayo kadi a mangaramid iti dayta gapu iti eskediulyo? Mabalin a makipagtrabaho kadakayo ti maysa a payunir kadagiti panawen a didakay makadua dagiti sabsabali nga agibumbunannag.

⁸ Nasken ti Nasayaat a Kooperasion: Mamindua iti makatawen, iyurnos dagiti panglakayen ti pannakiraman dagiti agibumbunannag nga agtarigagay iti personal a tulong iti programa a Panangtulong Dagiti Payunir Kadagiti Sabsabali. No kayatyo ti matulongan, makikaduakayo iti payunir nga agibumbunannag a natudingan a tumulong kadakayo, mangaramidkayo iti praktikal nga eskediul iti panagserbi, ken surotenyo dayta. Tungpalenyo amin a tulagan. Bayat ti panagkaduayo, paliiwenyo dagiti epektibo a wagas a panangisango iti naimbag a damag. Usigenyo no apay nga epektibo dagiti maaramat a metodo. Imutektekanyo dagiti isingasing ti payunir nga agibumbunannag iti pannakaparang-ay ti presentasionyo. Bayat nga iyaplikaryo dagiti maadalyo, makitayonto ken makitanto dagiti sabsabali ti irarang-ayyo iti ministerio. (Kitaenyo ti 1 Timoteo 4:15.) Sansanenyo ti agkadua nga agtrabaho, a makiramankayo iti amin a benneg ti ministerio, a pakairamanan ti di pormal a panangasaba ngem ipamaysayo iti aniaman a partikular a benneg a pakasapulanyo iti personal a tulong.

⁹ Interesado ti manangaywan iti serbisio iti pagdur-asan dayta. Sagpaminsan, ammuenna iti konduktor ti Panagadal iti Libro ti Kongregasion no aniat’ naitulongna kadakayo dayta a programa. Tulongannakay met ti manangaywan ti sirkito no bumisita iti kongregasion.

¹⁰ Kayat ni Jehova a masanay ti ilina ken ‘makabalan maipaay iti tunggal naimbag nga aramid.’ (2 Tim. 3:17) Matmatanyo ti urnos a Panangtulong Dagiti Payunir Kadagiti Sabsabali kas nagsayaat a probision a pangtulong kadagidiay agtarigagay a mangparang-ay iti kabaelanda a mangikasaba iti sao. No pribilehioyo ti makiraman iti dayta, aramidenyo a buyogen ti panagyaman, kinapakumbaba, ken rag-o.

Dagiti Manangaywan a Mangidadaulo—Ti Manangaywan iti Serbisio

¹ Interesado unay ti manangaywan iti serbisio iti isuamin a banag a mainaig iti pagdurdur-asan ti trabaho a panagebanghelio iti naituding a teritoria ti kongregasion. Gapuna, makatulong unay kadatayo a mangitungpal iti rebbengentayo a mangikasaba iti naimbag a damag. Kas naregta nga ebanghelisador, idauluanna ti pannakaorganisar amin a banag a mainaig iti serbisio. Kas nalaing a mannursuro, tulonganna dagiti indibidual nga agibumbunannag a mangparang-ay iti kinaepektiboda iti ministerio.—Efe. 4:11, 12.

² Direkta nga imatonan daytoy a panglakayen ti trabaho dagiti ministerial nga adipen a nadutokan a mangasikaso iti literatura, magasin, ken teritoria. Rebbengenna a siguraduen nga adda nawadwad a literatura, magasin, ken pormas iti serbisio nga usarentayo iti binulan.

³ Imatonan ti manangaywan iti serbisio ti nadumaduma a benneg ti panangasaba, a pakairamanan ti panangasaba iti lugar ti negosio, lansangan, ken babaen iti telepono. Alerto a mangorganisar kadagiti praktikal nga urnos ti panagtataripnong para iti serbisio iti intero a makalawas, agraman kadagiti piesta opisial. Ipakitana ti napaypayso nga interes iti trabaho a panangyadal iti Biblia. Ipamuspusanna ti mangipaay iti naespirituan a tulong kadagidiay saan a regular wenno di aktibo iti ministerio. Maseknan unay iti trabaho dagiti payunir, ket imatonanna ti programa a Panangtulong Dagiti Payunir Kadagiti Sabsabali.

⁴ Kas kameng ti Congregation Service Committee, mangisingasing ti manangaywan iti serbisio kadagiti nasken a panagbalbaliw kadagiti grupo ti Panagadal iti Libro ti Kongregasion. No bisitaenna ti grupoyo, siguraduenyo ti tumabuno ken makikadua kenkuana iti tay-ak ti serbisio.

⁵ Situtulok koma dagiti amin iti kongregasion a makikooperar iti panangiturong ti manangaywan iti serbisio. Daytoy ti tumulong kadatayo a mangparang-ay iti kinaepektibotayo iti trabaho a panagaramid iti adalan ket ad-adda a pagrag-oantay ti ministeriotayo.