“Isuroyo Kadakuada a Tungpalenda ti Amin a Bambanag nga Imbilinko Kadakayo”
“Inkayo ngarud ket mangaramidkayo iti ad-adalan . . . , nga isuroyo kadakuada a tungpalenda ti amin a bambanag nga imbilinko kadakayo.”—MATEO 28:19, 20.
1. Ania ti nagpatangan ni adalan a Felipe ken ti Etiope?
NAGDALIASAT ti Etiope agturong idiay Jerusalem. Sadiay, nagdayaw iti Dios nga ay-ayatenna, ni Jehova. Nalawag nga impategna met ti naipaltiing a Sao ti Dios. Idi nakakaruahe nga agawid, basbasaenna ti maysa a kopia dagiti surat ni propeta Isaias idi nasabet ni Felipe, maysa nga adalan ni Kristo. Inyimtuod ni Felipe iti Etiope: “Ammom kadi nga agpayso no ania ti basbasaem?” Simmungbat ti lalaki: “Kasano koma a maawatak, malaksid no adda nangidalan kaniak?” Tinulongan ni Felipe daytoy napasnek nga estudiante ti Kasuratan tapno agbalin nga adalan ni Kristo.—Aramid 8:26-39.
2. (a) Iti ania a pamay-an a napno ti kaipapanan ti sungbat ti Etiope? (b) Ania a salsaludsod ti usigentayo mainaig iti bilin ni Jesus a mangaramid kadagiti adalan?
2 Makapainteres ti sungbat ti Etiope. Kinunana: ‘Kasano koma, malaksid no adda mangidalan kaniak?’ Wen, kasapulanna ti maysa a mangidalan, wenno mangisuro, kenkuana. Ipakita daytoy a komento ti kinapateg ti maysa nga espesipiko nga instruksion ni Jesus a nairaman iti bilinna a mangaramid kadagiti adalan. Ania nga instruksion? Tapno maammuantay ti sungbat, ituloytayo nga usigen ti sasao ni Jesus a masarakan iti Mateo kapitulo 28. Ti naglabas nga artikulo impamaysana kadagiti saludsod nga apay? ken sadino? Usigentayo ita ti dua pay a saludsod a nainaig iti bilin ni Kristo a mangaramid kadagiti adalan—ti ania? ken kaano?
“Isuroyo Kadakuada a Tungpalenda ti Amin a Bambanag”
3. (a) Kasano nga agbalin nga adalan ni Jesu-Kristo ti maysa a tao? (b) Ania ti ramanen ti panagaramid kadagiti adalan?
3 Ania ti nasken nga isurotayo tapno matulongantayo dagiti dadduma nga agbalin nga adalan ni Kristo? Imbilin ni Jesus kadagiti pasurotna: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) No kasta, masapul nga isurotayo dagiti bambanag nga imbilin ni Kristo.a Ngem ania ti tumulong iti maysa a nasursuruan kadagiti bilin ni Jesus tapno masigurado a saan laeng nga agbalin nga adalan no di ket agtalinaed nga adalan? Adda napateg a punto a linaon dagiti napili a naimbag a sasao ni Jesus. Imutektekanyo ta saanna laeng a kinuna: ‘Isuroyo kadakuada ti amin a bambanag nga imbilinko kadakayo.’ Imbes ketdi, kinunana: “Isuroyo kadakuada a tungpalenda ti amin a bambanag nga imbilinko kadakayo.” (Mateo 19:17) Ania ti ipasimudaag dayta?
4. (a) Ania ti kaipapanan ti panangtungpal iti bilin? (b) Iyilustrar no kasano a masursuruantayo ti maysa a mangtungpal kadagiti bilin ni Kristo.
4 Ti panangtupal iti bilin kaipapananna ti “panangitunos iti tignay” iti maysa a bilin—ti panagtulnog, wenno panangannurot, iti dayta. Kasanotayo ngarud a matulongan ti maysa a mangtungpal kadagiti bambanag nga imbilin ni Kristo? Bueno, panunotenyo no kasano a ti maysa nga instruktor iti panagmaneho isurona dagiti estudiantena a mangtungpal kadagiti linteg ti trapiko. Mabalin nga isuro ti instruktor kadagiti estudiantena dagiti paglintegan iti lansangan bayat nga addada iti siled a pagadalan. Ngem tapno maisurona dagiti estudiantena no kasano ti agtulnog kadagiti paglintegan, masapul a tarabayenna dagiti estudiantena bayat nga aktual nga agmanehoda iti tengnga ti trapiko ken ikagumaanda nga ipakat ti naadalda. Umasping iti dayta, no iyadalantayo iti Biblia dagiti tattao, isurotayo kadakuada dagiti bilin ni Kristo. Nupay kasta, masapul nga iwanwantayo dagiti estudiante bayat nga ikagumaanda nga iyaplikar dagiti bilin ni Kristo iti inaldaw a panagbiagda ken iti ministerio. (Juan 14:15; 1 Juan 2:3) Gapuna, ti naan-anay a panangtungpal iti bilin ni Kristo a mangaramid kadagiti adalan kalikagumanna nga agbalintayo a mannursuro ken manangidalan. Iti kasta, matuladtayo ti ulidan ni Jesus ken ti mismo nga ulidan ni Jehova.—Salmo 48:14; Apocalipsis 7:17.
5. Apay a ti iyad-adalantayo iti Biblia mabalin nga agkitakit a mangtungpal iti bilin ni Kristo a mangaramid kadagiti adalan?
5 Ti panangisuro kadagiti sabsabali a pagtulnoganda dagiti bilin ni Jesus ramanenna ti panangtulong kadakuada nga agtulnog iti bilin a mangaramid kadagiti adalan. Mabalin a narigat dayta para kadagiti dadduma nga iyad-adalantayo iti Biblia. Uray no dati nga aktiboda iti nakaikamenganda a relihion ti Kakristianuan, saan nga insuro kadakuada dagiti lider ti relihionda a mapanda mangaramid kadagiti adalan. Prangka nga aminen ti dadduma a lider ti relihion a no maipapan iti panangisuro kadagiti arbanda nga agebanghelio, naan-anay a napaay dagiti relihion ti Kakristianuan. Iti komentona maipapan iti bilin ni Jesus a panangtulong iti amin a kita ti tattao tapno agbalinda nga adalan, kuna ti eskolar ti Biblia a ni John R. W. Stott: “Ti pannakapaaytayo a mangtungpal iti kababagas daytoy a bilin isu ti kangrunaan a pagkapuyan dagiti agkunkuna a Kristiano no iti tay-ak ti panagebanghelio ita.” Innayonna: “Saantay a personal nga idanon kadakuada ti mensahetayo. No dadduma, kaslatay kadagiti tattao a basta mangipukpukkaw no ania ti rumbeng nga aramiden dagiti malmalmes. Saantay a tumapog tapno alawen ida. Kaamaktay ngamin ti mabasa.”
6. (a) Iti panangtulong kadagiti iyad-adalantayo iti Biblia, kasanotay a matulad ti ulidan ni Felipe? (b) Kasanotay a maipakita ti pannakaseknantayo no ti iyad-adalantayo iti Biblia ket mangrugin a mangasaba?
6 No adda iyad-adalantayo iti Biblia a dati a naitimpuyog iti relihion a dagiti kamengna ket ‘maamak a mabasa,’ mabalin a maysa a karit kenkuana ti panangparmek iti butengna iti danum, no ar-arigen, ken mangtungpal iti bilin ni Kristo a mangaramid kadagiti adalan. Kasapulanna ti tulong. Gapuna, masapul nga anusantayo nga ipaay kenkuana ti kita ti panangisuro ken panangiwanwan a mangpauneg iti pannakaawatna ken mangguyugoy kenkuana nga agtignay, no kasano a ti Etiope ket nalawlawagan ken natignay nga agpabautisar gapu kadagiti pannursuro ni Felipe. (Juan 16:13; Aramid 8:35-38) Kanayonanna, ti tarigagaytayo a mangisuro kadagiti iyad-adalantayo iti Biblia a mangtungpal iti bilin a mangaramid kadagiti adalan tignayennatayo a sidadaan a mangisuro kadakuada no agdadamoda a mangikasaba iti Pagarian.—Eclesiastes 4:9, 10; Lucas 6:40.
“Amin a Bambanag”
7. Aniada a bilin ti nairaman iti panangisuro kadagiti dadduma a “tungpalenda ti amin a bambanag”?
7 Saantay laeng nga isuro kadagiti kabbaro nga adalan a mangaramidda kadagiti adalan. Imbilin ni Jesus nga isurotayo kadagiti dadduma a “tungpalenda ti amin a bambanag” nga imbilinna. Awan duadua a karaman iti dayta ti dua a kadakkelan a bilin—ti panagayat iti Dios ken panagayat iti kaarruba. (Mateo 22:37-39) Kasano a ti kabbaro nga adalan masursuruan a mangtungpal kadagita a bilin?
8. Ilawlawagyo no kasano a ti maysa a kabbaro nga adalan masursurona a tungpalen ti bilin a mangipakita iti ayat.
8 Sublianantayo ti ilustrasion maipapan iti agsursuro nga agmaneho. Bayat ti panagmanehona iti tengnga ti trapiko ken adda iti abayna ti instruktorna, saan laeng a makasursuro ti estudiante babaen ti panagimdengna iti instruktorna no di ket babaen ti panangpaliiwna pay kadagiti dadduma a drayber. Kas pagarigan, mabalin nga itudo ti instruktorna ti maysa a drayber a siaasi a mangted iti waya iti sabali a lugan; wenno iti nakonsiderar a drayber a mangibaba iti silawna tapno saan a masisirap dagiti masabatda a lugan; wenno iti drayber a sidadaan a mangitukon iti tulongna iti maysa a nadadaelan iti lugan. Dagiti kasta a pagarigan ket mangipaay kadagiti napateg a leksion a mabalin nga iyaplikar ti estudiante no agmanmaneho. Umasping iti dayta, ti maysa a kabbaro nga adalan a mangrugi a magna iti dalan ti biag ket saan laeng a makaadal manipud iti mannursurona no di ket uray kadagiti nasayaat nga ulidan a makitana iti kongregasion.—Mateo 7:13, 14.
9. Kasano a masursuro ti maysa a kabbaro nga adalan no ania ti kaipapanan ti panangtungpal iti bilin nga ipakita ti ayat?
9 Kas pagarigan, mabalin a ti maysa nga estudiante ti Biblia mapaliiwna ti maysa nga agsolsolo a nagannak a mangikagkagumaan a tumabuno iti Kingdom Hall a kaduana dagiti babassit pay nga annakna. Mabalin a makitana a regular a makigimong ti maysa a kabsat uray agsagsagaba iti panagleddaang, ti maysa a balo a baket a mangimaneho kadagiti dadduma a nataenganen iti tunggal gimong ti kongregasion, wenno ti maysa a tin-edyer a makitinnulong iti panagdalus iti Kingdom Hall. Mabalin met a mapaliiw ti estudiante ti Biblia ti maysa a panglakayen ti kongregasion a simamatalek a mangidadaulo iti panangasaba iti laksid ti adu nga annongenna iti kongregasion. Mabalin a maam-ammona ti maysa a Saksi a baldado ken saan a makaruar iti pagtaengan ngem gubuayan ti naespirituan a pammaregta kadagiti amin a bumisita kenkuana. Mabalin a mapaliiw ti estudiante ti maysa nga agassawa a mangar-aramid kadagiti dadakkel a panagbalbaliw iti biagda tapno maaywananda dagiti lakay ken baketen a nagannakda. Babaen ti panangpaliiwna kadagiti naasi, nalaing a tumulong, ken mapagpannurayan a Kristiano, maadal ti kabbaro nga adalan babaen kadagiti ulidan no ania ti kaipapanan ti panagtulnog iti bilin ni Kristo nga ayaten ti Dios ken kaarruba, nangnangruna dagiti kapammatian. (Proverbio 24:32; Juan 13:35; Galacia 6:10; 1 Timoteo 5:4, 8; 1 Pedro 5:2, 3) Gapuna, tunggal kameng ti kongregasion Kristiano ket mabalin—ken nasken—nga agbalin a mannursuro ken manangidalan.—Mateo 5:16.
“Agingga iti Panungpalan ti Sistema ti Bambanag”
10. (a) Agingga kaano a mangaramidtayo kadagiti adalan? (b) Ania ti inyulidan ni Jesus no maipapan iti panangitungpal kadagiti annongen?
10 Agingga kaano nga itultuloytayo ti mangaramid iti adalan? Agingga iti panungpalan ti sistema dagiti bambanag. (Mateo 28:20) Matungpaltayo kadi daytoy a paset ti bilin ni Jesus? Kas maysa a sangalubongan a kongregasion, determinadotayo a mangaramid iti kasta. Kadagiti naglabas a tawtawen, siraragsak a binusbostayo ti tiempo, pigsa, ken ik-ikutantayo a mangbirok kadagidiay “siuumiso nga agannayas iti agnanayon a biag.” (Aramid 13:48) Iti agdama, busbusbosen dagiti Saksi ni Jehova ti promedio a nasurok a tallo a milion nga oras kada aldaw iti makatawen tapno ikasabada ti Pagarian ken mangaramid kadagiti adalan iti sangalubongan. Ar-aramidentayo dayta gapu ta sursurotentayo ti ulidan ni Jesus. Kinunana: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Dayta met ti naimpusuan a tarigagaytayo. (Juan 20:21) Saantay laeng a kayat a rugian ti trabaho a naitalek kadatayo; kayattay a turposen dayta.—Mateo 24:13; Juan 17:4.
11. Ania ti napasamak iti dadduma a kakabsattayo a Kristiano, ket ania ti nasken nga imtuodentayo iti bagitayo?
11 Ngem makapaladingit a makita ti dadduma a kapammatiantayo a kimmapuyda iti naespirituan ket, kas resultana, gimminad wenno nagsardengda a mangitungpal iti bilin ni Kristo a mangaramid kadagiti adalan. Adda kadi maaramidantayo tapno mapabara manen ti pannakitimpuyogda iti kongregasion ken makiramanda manen iti panagaramid kadagiti adalan? (Roma 15:1; Hebreo 12:12) Mabalin nga adda maaramidantayo no kitaentayo ti pamay-an ti panangtulong ni Jesus kadagiti apostolna idi temporario a kimmapuyda.
Mangipakita iti Pannakaseknan
12. (a) Sakbay unay a natay ni Jesus, ania ti inaramid dagiti apostol? (b) Ania ti inaramid ni Jesus kadagiti apostolna iti laksid ti impakitada a nakaro a panagkapuy?
12 Iti ngudo ti ministerio ni Jesus ditoy daga, idi dandanin matay, ‘isu binaybay-an dagiti apostol ket tinalawanda.’ Kas impakpakauna ni Jesus, ‘nawarawarada tunggal maysa iti bukodna a balay.’ (Marcos 14:50; Juan 16:32) Ania ti inaramid ni Jesus kadagiti kakaduana a kimmapuy iti naespirituan? Di nagbayag kalpasan ti panagungarna, kinuna ni Jesus kadagiti dadduma a pasurotna: “Dikay agbuteng! Inkayo, ipadamagyo iti kakabsatko, tapno mapanda idiay Galilea; ket sadiay makitadakto.” (Mateo 28:10) Nupay nangipakita dagiti apostol iti nakaro a panagkapuy, kaskasdi nga inawagan ida ni Jesus iti “kakabsatko.” (Mateo 12:49) Saan a naikkat ti talekna kadakuada. Iti kasta, impakita ni Jesus nga isu ket naasi ken manangpakawan, no kasano a kasta met ni Jehova. (2 Ar-ari 13:23) Kasanotay a matulad ni Jesus?
13. Ania koma ti panangmatmattay kadagidiay kimmapuy iti naespirituan?
13 Masapul a nasged ti pannakaseknantayo kadagidiay gimminad wenno nagsardeng a makiraman iti ministerio. Malagiptayo pay dagiti ebkas ti ayat nga impakita dagita a kapammatiantayo kadagiti naglabas—nalabit dekada pay kadagiti dadduma. (Hebreo 6:10) Talaga a kailiwtayo ti makikadua kadakuada. (Lucas 15:4-7; 1 Tesalonica 2:17) Ngem kasanotay a maipakita ti pannakaseknantayo kadakuada?
14. Kas panangtulad ken ni Jesus, kasanotayo a matulongan ti maysa a kimmapuy iti naespirituan?
14 Kinuna ni Jesus kadagiti naupay nga apostol a masapul a mapanda idiay Galilea ket makitada sadiay. No ar-arigen, aw-awisen ida ni Jesus a tumabuno iti maysa nga espesial a taripnong. (Mateo 28:10) Kasta met ita, paregtaentayo dagiti nakapuy iti naespirituan a tumabunoda kadagiti gimong ti kongregasion Kristiano, ket nalabit nga agkalikagum dayta iti masansan a pammaregta. Iti kaso dagiti apostol, adda nagbanagan ti awis kadakuada, ta “dagiti sangapulo ket maysa nga adalan napanda idiay Galilea iti bantay a sadiay ti inyurnos kadakuada ni Jesus.” (Mateo 28:16) Anian a rag-otayo no awaten met dagiti nakapuy ti nabara nga awistayo ket tumabunoda manen kadagiti Nakristianuan a gimong!—Lucas 15:6.
15. Kasanotay a matulad ti ulidan ni Jesus no iti panangabrasa kadagidiay nakapuy iti naespirituan nga umay makigimong?
15 Ania ti aramidentayo no tumabuno iti Kingdom Hall ti maysa a kimmapuy a Kristiano? Bueno, ania ti inaramid ni Jesus idi nakitana a dagiti apostolna, a temporario a kimmapuy ti pammatida, ket dimtengda iti nayurnos a pagkikitaanda? “Immasideg ni Jesus ket nagsao kadakuada.” (Mateo 28:18) Saanna laeng a basta minulenglengan ida no di ket inasitganna ida. Mailadawanyo ti pannakabang-ar dagiti apostol idi sidadaan nga inaramid dayta ni Jesus! Sapay koma ta sidadaan ken sibabara met nga abrasaentayo dagiti nakapuy iti naespirituan a mangikagkagumaan nga agsubli iti kongregasion Kristiano.
16. (a) Ania ti maadaltayo iti pamay-an ti pannakilangen ni Jesus kadagiti pasurotna? (b) Kasanotay a maiparangarang ti panangmatmat ni Jesus kadagidi nakapuy? (Kitaenyo ti footnote.)
16 Ania pay ti inaramid ni Jesus? Umuna, adda impakaammona: “Isuamin nga autoridad naiteden kaniak.” Maikadua, nangted iti annongen: “Inkayo ngarud ket mangaramidkayo iti ad-adalan.” Maikatlo, inkarina: “Addaak kadakayo iti amin nga al-aldaw.” Ngem nadlawyo kadi ti saan nga inaramid ni Jesus? Saanna a tinubngar dagiti adalan gapu kadagiti pagkurangan ken panagduaduada. (Mateo 28:17) Epektibo kadi ti pamay-anna? Wen. Di nagbayag, ‘insuro ken indeklara manen dagiti apostol ti naimbag a damag.’ (Aramid 5:42) Babaen ti panangtulad iti ulidan ni Jesus no kasano ti panangmatmat ken panangtrato kadagiti nakapuy, mabalin a mapasaran met ti kongregasiontayo ti kasta a makaparagsak a resulta.b—Aramid 20:35.
“Addaak Kadakayo iti Amin nga Al-aldaw”
17, 18. Aniada a makapabileg a kapanunotan ti linaon ti sasao ni Jesus nga, “addaak kadakayo iti amin nga al-aldaw”?
17 Ti maudi a sasao iti bilin ni Jesus nga “addaak kadakayo iti amin nga al-aldaw,” ket naglaon iti makapabileg a kapanunotan agpaay iti isuamin a mangikagkagumaan a mangtungpal iti bilin ni Kristo a mangaramid kadagiti adalan. Ditay rumbeng nga agbuteng, kasanoman ti panangbusor dagiti tattao iti trabahotayo a panangikasaba iti Pagarian ken aniaman a kita a pammardaya ti aramidenda kadatayo. Apay a ditay agbuteng? Gapu ta supsuportarannatayo ni Jesus, ti Lidertayo, nga addaan ‘iti amin nga autoridad idiay langit ken ditoy daga.’
18 Gubuayan met ti dakkel a liwliwa ti kari ni Jesus nga, “addaak kadakayo iti amin nga al-aldaw.” Bayat nga ikagkagumaantayo a tungpalen ti bilin ni Jesus a mangaramid kadagiti adalan, saantay laeng a makapasar kadagiti naragsak nga al-aldaw no di ket uray kadagiti naladingit nga al-aldaw. (2 Cronicas 6:29) Dadduma kadatayo ti maladingitan gapu iti ipupusay ti maysa nga ingungoten. (Genesis 23:2; Juan 11:33-36) Lakay wenno baketen ti dadduma, ket kumapkapuy ti salun-at ken bilegda. (Eclesiastes 12:1-6) Adda met dagidiay idasay ni liday. (1 Tesalonica 5:14) Umad-adu pay kadatayo ti makidangdangadang iti rigat ti biag. Nupay kasta, iti laksid dagita a pakarigatan, naballigi ti ministeriotayo gapu ta adda kadatayo ni Jesus iti “amin nga al-aldaw,” agraman kadagiti karirigatan a tiempo ti biagtayo.—Mateo 11:28-30.
19. (a) Ti bilin ni Jesus a mangaramid kadagiti adalan ket naglaon kadagiti ania nga instruksion? (b) Ania ti tumulong kadatayo a mangitungpal iti bilin ni Kristo?
19 Kas nakitatayo iti daytoy nga artikulo ken iti naglabas nga artikulo, nalawa ti saklawen ti bilin ni Jesus a mangaramid kadagiti adalan. Imbaga kadatayo ni Jesus no sadino ken apay a tungpalentayo ti bilinna. Imbagana met kadatayo no ania ti nasken nga isurotayo ken agingga kaano nga aramidentayo dayta. Pudno, maysa a karit ti panangitungpal iti daytoy a bilin. Ngem iti tulong ti autoridad ni Jesus ken ti kaaddana, kabaelantayo nga iringpas dayta! Umanamongkay met laeng?
[Footnotes]
a Impatuldo ti maysa a reperensia a ti imbaga ni Jesus ket, “bautisaranyo ida . . . nga isuroyo kadakuada,” saan a ‘bautisaranyo ida ken isuroyo kadakuada.’ Gapuna, ti bilin a mangbautisar ken mangisuro ket “saan la a basta . . . dua nga agsaruno a tignay.” Imbes ketdi, “ti panangisuro ket maysa nga agtultuloy a proseso, a nangrugi sakbay ken aglayon kalpasan ti bautismo.”
b Dagiti kanayonan nga impormasion no kasano a matmatan ken tulongan dagiti nakapuy ket masarakan iti Ti Pagwanawanan a Pebrero 1, 2003, panid 15-18.
Ania ti Sungbatyo?
• Kasano a maisurotayo ti dadduma a tungpalenda ti bilin ni Jesus?
• Aniada a leksion ti mabalin a masursuro ti maysa a kabbaro nga adalan kadagiti kameng ti kongregasion?
• Kasanotay a matulongan dagiti kimmapuy iti naespirituan?
• Ania a bileg ken liwliwa ti magun-odtayo manipud iti kari ni Jesus nga “addaak kadakayo iti isuamin nga al-aldaw”?
[Dagiti Ladawan iti panid 15]
Nasken nga agbalintayo a mannursuro ken manangidalan
[Dagiti Ladawan iti panid 17]
Ti maysa a kabbaro nga adalan ket makasursuro kadagiti napateg a leksion babaen ti ulidan dagiti dadduma