No Kasano nga Usaren Dagiti Pagtuladan a Presentasion

1. Ania ti rumbeng a panangmatmattayo kadagiti naipaay a pagtuladan a presentasion?

¹ Iti Ti Ministeriotayo iti Pagarian, kanayon nga adda dagiti pagtuladan a presentasion iti panangitukon kadagiti magasin ken dadduma pay a publikasiontayo. No makiramantayo iti ministerio, saan a kasapulan a sao por sao a sawentayo dagita a naisingasing a presentasion. Naipaay dagita tapno adda pamalatpatantayo no ania ti mabalin a sawentayo. Ad-adda nga epektibo no usarentayo dagita a presentasion iti bukodtayo a sasao. Natalged ti rikna ti bumalay a makisarita kadatayo no ti panagsaotayo ket natural, napasnek, ken kombinsidotayo iti ibagbagatayo.—2 Cor. 2:17; 1 Tes. 1:5.

2. Apay a nasken nga ikonsiderartayo dagiti lokal a kostumbre no agisaganatayo kadagiti presentasiontayo?

² Ibagaymo ti Presentasionmo: Dakkel ti epekto dagiti lokal a kostumbre iti panangidatagtayo iti naimbag a damag. Mabalin kadi nga agkinnablaawkayo pay iti bumalay sa idatagmo ti presentasionmo, wenno namnamaen dagiti tattao iti teritoriayo nga ibagamon a dagus ti kayatmo nga ibaga? Agdepende dayta iti tunggal lugar ken no dadduma uray iti tunggal tao. Nasken met a naannad ti panagusartayo kadagiti saludsod. Dagiti saludsod a maitutop iti dadduma a lugar ket mabalin a mangpaalusiis kadagiti tattao iti sabali a lugar. Gapuna, nasken a tingitingentayo a naimbag ti kasasaad ken ibagaytayo dagiti presentasiontayo sigun iti mayanatup iti lugartayo.

3. Apay nga ikabilangantayo ti nalikudan ken kapanunotan dagiti makasaritatayo?

³ Maysa pay, nasken nga ikabilangantayo ti nalikudan ken kapanunotan dagiti tattao iti teritoriatayo no agsaganatayo a mapan mangasaba. Kas pagarigan, mabalin nga agduma ti panangilawlawagmo iti Mateo 6:9, 10 iti maysa a napeklan a Katoliko ken iti maysa a saan a pamiliar iti kararag nga “Amami.” No agpanunottayo a nasaksakbay, maibagaytayo dagiti presentasiontayo tapno agbalinda nga ad-adda a makaay-ayo kadagiti tattao a masarakantayo iti ministerio.—1 Cor. 9:20-23.

4. Apay a napateg ti panagsagana a naimbag?

⁴ Uray no tuladentayo ti naisurat a presentasion, nasaysayaat pay laeng ti panagsagana a naimbag. Masapul a basaentayo a naimbag ti artikulo wenno kapitulo a planotayo nga itampok ken sumapultayo kadagiti punto a mabalin a mangriing iti interes. Sa iramantayo dagita iti presentasiontayo. Maitukontayo laeng a sigagagar dagiti publikasiontayo no ammotayo dagiti nasayaat nga impormasion a linaon dagita.

5. Apay a mabalintayo ti mangisagana iti sabali a presentasion, ken kasano a maaramidtayo dayta?

⁵ Dadduma pay a Pamay-an: Dagiti laeng kadi naibalabala a pagtuladan a presentasion ti mabalin nga usarentayo? Saan. No nalaklakam nga usaren ti sabali a pamay-an wenno sabali a teksto, usarem dayta. Nangruna kadagiti magasin, alistoka koma a mangbirok kadagiti gundaway a mangitampok kadagiti dadduma pay nga artikulo a mabalin a paginteresan unay dagiti tattao iti teritoriayo. Iti Gimong ti Serbisio, no maidemostra dagiti presentasion iti panagserbi iti tay-ak, mabalin nga iyurnos ti pannakaidemostra ti aniaman a pamay-an nga epektibo iti teritoriayo. Iti kasta, matulongan ti amin a mangidatag a sieepektibo iti naimbag a damag.

No Ania ti Ibagayo Maipapan Kadagiti Magasin

Ti Pagwanawanan Ene. 15

“Tarigagayantayo amin ti maaddaan iti nasaysayaat a biag para kadatayo a mismo ken kadagiti annaktayo, ngem adu ti mangipagarup a saanda a maaramid dayta. Panagkunayo, maikeddengtayo ngata ti masakbayantayo? [Palubosanyo a sumungbat.] Daytoy a magasin ipakitana manipud iti Biblia nga adda maaramidantayo ket agpannuray ti masakbayantayo kadagiti desision nga aramidentayo ita.” Basaenyo ti Deuteronomio 30:19.

Agriingkayo! Ene. 22

“No maipasangotayo kadagiti parikut iti salun-at, apresiarentayo ti doktor a mangikabilangan iti rikriknatayo. Ngem iti panagkunayo, adu ngata a pasiente ti mangikabkabilangan iti rikrikna ti doktorda? [Palubosanyo a sumungbat.] Usigen daytoy a magasin dagiti karit a pakaipaspasanguan dagiti doktor ken no ania ti masakbayan ti kinadoktor.” Basaenyo ti Isaias 33:24.

Ti Pagwanawanan Peb. 1

“Saan kadi a makapadanag a nakaad-adu ita ti biktima ti panangirurumen ken kinaranggas? [Mangdakamat iti nabiit pay a pasamak a pagaammo iti lugaryo, sa palubosanyo a sumungbat.] Salaysayen daytoy a magasin no ania ti panangmatmat ti Dios iti biag ti tao. Ilawlawagna pay no kasano nga ispalennatayo iti panagsagaba a mapaspasamak ita.” Basaenyo ti Salmo 72:12-14.

Agriingkayo! Peb. 8

“Maysa kadagiti kadakkelan a karit a pakaipaspasanguantayo ita ket ti panangdaer iti sikor. Umanamongkayo kadi? [Palubosanyo a sumungbat.] Siuumiso nga impadto ti Biblia a kastoy ti mapasamak. [Basaenyo ti 2 Timoteo 3:1.] Mangipaay daytoy a magasin kadagiti praktikal a singasing a makatulong kadakayo ken iti pamiliayo a mangdaer iti sikor.”