‘Makumikomkayo Koma Unay’ iti Ministerioyo
1 No mabasatayo a nagtrabaho ni apostol Pablo kas agar-aramid iti tolda bayat ti kaaddana idiay Corinto, mabalin nga ipapantayo a daytoy ti nangkissay iti gundawayna a mangasaba. Ngem kuna ti Aramid 18:5: “Nangrugi a pakakumikoman unay ni Pablo ti sao, a nangsaksaksi kadagiti Judio tapno paneknekanna a ni Jesus isu ti Kristo.” Apay a makumikom unay idi ni Pablo iti trabaho a panangasaba? Uray adu idiay Corinto ti nagbalinen a manamati, pinasingkedan ti Apo nga adu pay ti agbalin nga adalan iti dayta a siudad. (Ara. 18:8-11) Adda kadi umasping a panggapuantayo a makumikom unay iti ministeriotayo? Adda. Adu pay a tattao ti mabalin a masarakan ken masursuruan iti kinapudno.
2 Mangbusbos iti Ad-adu a Panawen nga Agserbi iti Bulan ti Abril: Mabalin a kalatyo ti agtalinaed nga okupado a mangikasaba iti naimbag a damag iti kada bulan. Ngem adda bulbulan nga ad-adda a ‘makumikomtayo unay’ iti daytoy nga aktibidad. Karaman kadagitoy ti bulan ti Abril, aglalo ta agtultuloy agingga iti Abril 17 ti naisangsangayan a kampaniatayo a panagiwaras iti broshur nga Agtultuloyka nga Agbantay! Ipalubos kadi ti kasasaadyo a makapag-auxiliary pioneer-kayo wenno maparayrayyo ti aktibidadyo iti ministerio iti daytoy a bulan? Adu a nakaaramid iti kasta ti sibabaknang a nagunggonaan. (2 Cor. 9:6) No ar-aramidenyo ti amin a kabaelanyo, laglagipenyo a maay-ayo ni Jehova iti amin-kararua a panagserbiyo. (Luc. 21:2-4) Aniaman ti kasasaadyo, aramidenyo a kalat ti agbalin a ‘makumikom unay’ iti ministerioyo iti bulan ti Abril ken Mayo. Ken diyo liplipatan nga ited ti reportyo iti serbisio ti tay-ak iti ngudo ti bulan.
3 Sarungkaranyo Dagiti Kabbaro a Timmabuno iti Memorial: Idi napan a tawen, 438,418 ti timmabuno iti Memorial ditoy Pilipinas. Ditay pay ammo no mano ti timmabuno iti daytoy a tawen. Ngem ipakita dagiti report nga adda dakkel a posibilidad para iti ad-adu nga “anien.” (Mat. 9:37, 38) Gapuna, aginggat’ mabalin, sarungkaranyo a dagus dagiti kabbaro a timmabuno iti Memorial idi Marso 24 tapno tulonganyo ida iti naespirituan. No itantanyo ti sumarungkar, mabalin nga umay ‘daydiay nadangkes ket rabsutenna ti naimula iti puspusoda.’ (Mat. 13:19) Ti isasarungkar a dagus ipakitana a ‘makumikomkayo unay’ iti ministerioyo.
4 Itultuloyyo a Tulongan Dagiti Di Aktibo: Iyurnos koma dagiti panglakayen a sarungkaran ti siasinoman a di aktibo sakbay nga agngudo ti Abril tapno paregtaenda ida a makiraman iti ministerio no ipalubos ti kasasaadda. Ikagumaan nga ammuen dagiti panglakayen no ania ti makagapu iti parikut ti indibidual ken no kasano ti kasayaatan a panangtulong kenkuana tapno agbalin manen nga aktibo nga agserbi ken Jehova. Daytoy a naayat a panangtulong ipakitana a napasnek dagiti panglakayen a mangitungpal iti rebbengenda kas papastor “ti arban ti Dios.” (1 Ped. 5:2; Ara. 20:28) Namnamaentayo a ti dadduma kadagitoy ket agbalin manen nga aktibo iti ministerio iti tay-ak bayat daytoy a naisangsangayan a bulan ti Abril.
5 Tulonganyo ti Ad-adu Pay nga Agbalin a Di Bautisado nga Agibumbunannag: Kualipikado kadin dagiti annakyo nga agbalin a baro nga agibumbunannag iti naimbag a damag? Dagiti met ngay dadduma nga iyad-adalanyo iti Biblia? No dagita ket aprobaran dagiti panglakayen, saan kadi nga Abril ti maikanatad a tiempo a panangrugida a mangasaba? No rumangrang-ay ti maysa a tao ken naadalnan ti broshur a Kalikaguman ken ti libro a Pannakaammo, mabalin a maituloy ti panagadalna iti Biblia babaen ti libro nga Agdayawkayo iti Dios. Ti kalatyo ket tulongan ti estudiante a manggun-od iti naun-uneg a pannakatarus iti kinapudno, makualipikar kas di bautisado nga agibumbunannag, ken agbalin a dedikado ken bautisado a Saksi ni Jehova.—Efe. 3:17-19; 1 Tim. 1:12; 1 Ped. 3:21.
6 Ti agtultuloy ken napaypayso a pannakaseknanyo kadagiti iyad-adalanyo iti Biblia ket mabalin a tumulong kadakuada a mangipateg iti kinapudno inton agangay. Maysa a Saksi ti nakasarak iti lakay ken baketen nga agassawa a siraragsak nga immannugot nga agadal iti Biblia. Ngem tallo a lawas a nagsasaruno nga intantan ti agassawa ti panagadalda. Idi agangay, nairugi ti panagadal. Kalpasanna, kinanselar ti agassawa ti panagadal iti dandani tunggal maikadua a lawas. Ngem kamaudiananna, rimmang-ay ti asawa a babai agingga a nagpabautisar. “Kalpasan ti pannakabautisarna,” kuna ti kabsat a nangyadal kenkuana, “nagarubos ti luana gapu iti ragsak, ket nakaluakami met ken ni baketko gapu iti ragsakmi.” Wen, mangyeg iti napalaus a rag-o no ‘makumikomtayo unay’ iti naimbag a damag!
7 Ipakita ti padto ti Biblia ken dagiti pasamak iti lubong nga agbibiagtayon iti arinunos ti panawen ti panungpalan. Itan ti tiempo nga agtultuloytayo nga agbantay, a ‘makumikomtayo unay’ a mangipakaammo iti naimbag a damag kadagiti sabsabali. Adda nagsayaat nga alikamen a tumulong kadatayo a mangaramid iti daytoy iti espesial a broshur nga Agtultuloyka nga Agbantay! Usarenyo a naimbag daytoy iti ministerioyo. Impanamnama ni apostol Pablo a ti kasta a panagbannog ket sigurado a “saan nga ubbaw mainaig iti Apo.”—1 Cor. 15:58.