Panangitukon iti Literatura iti Teritoria a Pagnanaedan Dagiti Tattao nga Agus-usar Kadagiti Sabali a Pagsasao

1. Apay nga adu a kongregasion ti agkasapulan iti literatura iti sabali a pagsasao?

¹ Iti adu a lugar, umad-adun dagiti agnanaed a ganggannaet. Al-alisto a makasursuro ti adu kadakuada ken naun-uneg ti pannakaawatda no ti bukodda a pagsasao ti mausar iti panagadalda. Ania dagiti naaramid nga urnos tapno maipaayan dagiti interesado kadagiti naibatay-Biblia a publikasion iti pagsasao a maawatanda?

2. Ania a kooperasion ti kasapulan no dua wenno ad-adu pay a kongregasion a nagduma a pagsasao ti us-usarenda ti mangtartrabaho iti maymaysa a teritoria?

² No Kaano nga Itukon ti Literatura: No dua wenno ad-adu pay a kongregasion a nagduma a pagsasao ti us-usarenda ti mangtartrabaho iti maymaysa a teritoria, dagiti bagi dagiti panglakayen makikooperarda kadagiti manangaywan iti serbisio iti panangipasdek kadagiti urnos nga awaten ti tunggal kongregasion tapno naan-anay a makasabaan dagiti tattao nga agus-usar iti sabali a pagsasao. No mangasaba iti binalaybalay, kadawyanna a saan a mangitukon dagiti agibumbunannag iti literatura iti pagsasao ti sabali a kongregasion. Nupay kasta, no mangasaba dagiti agibumbunannag iti di pormal a pamay-an wenno kadagiti publiko a lugar, mabalinda nga itukon ti literatura sigun iti pagsasao ti komunidad.

3. Kaano a mabalin a maaddaan ti kongregasion iti abasto a literatura iti ganggannaet a pagsasao?

³ No Kaano a Maaddaan iti Abasto a Literatura: Ania ti mabalin nga aramiden no adu ti ganggannaet ti pagsasaoda iti maysa a lugar ngem awan ti kongregasion nga agsasao iti dayta a partikular a pagsasao? Kadagita a kasasaad, dagiti kongregasion mabalinda ti maaddaan iti sumagmamano nga abasto kadagiti kangrunaan a maus-usar a literatura a magun-odan iti dayta a pagsasao, kas iti tract, dagiti broshur a Kalikaguman ken Makigayyem iti Dios, ken ti libro a Pannakaammo. Mabalin nga itukon dagiti agibumbunannag dayta a literatura no makasarakda kadagiti tattao a makabasa iti kasta a pagsasao.

4. Kasano a magun-odan ti literatura iti sabali a pagsasao no awan dayta iti kongregasion?

⁴ No Kasano ti Agpedido iti Literatura: No awanan iti abasto a literatura ti kongregasion iti pagsasao a mabasa ti maysa nga interesado, kasano a magun-odan ti literatura iti dayta a pagsasao? Ti agibumbunannag ammuenna iti mangay-aywan iti literatura no ania a publikasion ti magun-odan iti dayta a pagsasao tapno mapedido dagiti kasapulan a literatura iti sumaganad a panagpedido ti kongregasion. No ti pedido ket Arabe, Espaniol, Hapones, Koreano, wenno Tsino, mabalin a posible a maala dagitoy iti sanga nga opisina iti Pilipinas. Ngem no kadagiti dadduma pay a pagsasao, kasapulan nga agpedidotayo manipud kadagiti sabali a sanga nga opisina. Mabalin nga agpaut daytoy iti sumagmamano a bulan.

5. Ania ti kalattayo iti panangusar kadagiti Nakristianuan a publikasion?

⁵ Sapay koma ta usarentayo a naimbag dagiti Nakristianuan a publikasion a mangtulong kadagiti “amin a kita ti tattao,” aniaman ti pagsasaoda, a ‘dumteng iti umiso a pannakaammo iti kinapudno ken maisalakanda.’​—1 Tim. 2:3, 4.

No Ania ti Ibagayo Maipapan Kadagiti Magasin

Ti Pagwanawanan Hul. 15

“Adu ti nakapaliiw a kumarkaro ti pagannayasan dagiti tattao nga agputputong. Iti panagkunayo, nasayaat ngata dayta? [Palubosanyo a sumungbat.] Imutektekanyo dagitoy a nainsiriban a sasao maipapan iti kinapateg ti pannakikadua. [Basaenyo ti Eclesiastes 4:9, 10.] Ilawlawag daytoy a magasin no apay nga amintayo kasapulantayo dagiti sabsabali ken no kasano a masolbar ti parikut maipapan iti panagputputong.”

Agriingkayo! Hul. 22

“Adu ti madanagan iti panagsaknap ti pornograpia. Iti panagkunayo rumbeng kadi a pakadanagantayo dayta? [Palubosanyo a sumungbat.] Masalaknibannatayo ti praktikal a balakad a masarakan iti Biblia. [Basaenyo ti Efeso 5:3, 4.] Ipakita daytoy a magasin no kasanotayo a masalakniban ti bagbagitayo iti dayta nalmeng a peggad.”

Ti Pagwanawanan Ago. 1

“Ammoyo kadi a sigun iti maysa a report, nasurok a kagudua iti populasion ti lubong ti agbibiag iti awan pay $2 (U.S.) iti kada aldaw? Panagkunayo adda ngata maaramidan tapno marisut daytoy? [Palubosanyo a sumungbat.] Ipakita daytoy a ruar Ti Pagwanawanan ti permanente a solusion iti kinapanglaw kas mabasa iti Biblia.”​—Basaenyo ti Salmo 72:12, 13, 16.

Agriingkayo! Ago. 8

“Kadagiti kallabes a tawen, adu a dadael ti inyeg dagiti didigra mainaig iti paniempo iti intero a lubong. Panagkunayo, kasano a lumag-an ti saem a patauden daytoy? [Palubosanyo a sumungbat.] Sukimaten daytoy a magasin dagiti parikut iti panagbaliwbaliw ti paniempo kasta met ti solusion a nadakamat iti Biblia.”​—Basaenyo ti Isaias 35:1.