Ti Maadal iti Marinero

MAKABANNOG iti marinero no agmaymaysa nga aglayag. No mapaksuyan, mabalin a nalaka a maiturong iti peggad ket makaaramid iti biddut ken di umiso a desision. Daytoy ti gapuna a napateg ti angkla iti napaksuyan a marinero, ta babaen iti dayta mabalinna ti aginana ken agpapigsa a di agtawataw ti barangayna. Saan la a dayta. No nayangkla, subaen ti barangay ti angin ken dagiti dalluyon tapno di maipalais.

Kas kadagiti marinero a maipaspasango iti adu a peggad iti taaw, kanayon a maipasango dagiti Kristiano kadagiti pakarigatan iti daytoy a lubong ket mariknada a kasapulanda ti inana. Kinapudnona, insingasing naminsan ni Jesus kadagiti adalanna: “Umaykayo, dakayo met laeng, iti pribado idiay maysa a langalang a lugar ket aginanakayo iti apagbiit.” (Marcos 6:31) Iti kaaldawantayo, mabalin nga agbakasion dagiti dadduma iti sumagmamano a lawas wenno kaduada nga agaliwaksay ti pamiliada iti ngudo ti lawas. Makapabang-ar ken makapagin-awa dagitoy a gundaway. Ngem kasanotay a masigurado a natalgedtayo iti naespirituan kadagita a tiempo? Ania ti agserbi a naespirituan nga angklatayo a tumulong kadatayo a di agtawataw ken agtalinaed a natibker?

Sipaparabur nga impaayannatayo ni Jehova iti maysa a probision, nga awan sabali no di ti Nasantuan a Saona, ti Biblia. No inaldaw a basaentayo, makapagtalinaedtayo a nadekket ken Jehova ket pulos a ditayto mayadayo kenkuana. Patalgedennatayo ti balakadna ken tulongannatayo a mangsaranget kadagiti pannulisog ni Satanas ken ti lubongna. Ti regular a panagbasa iti Biblia, uray no saantay nga eskediul, patalgedennatayo iti naespirituan.​—Josue 1:7, 8; Colosas 2:7.

Ipalagip kadatayo ti salmista a “nagasat [“naragsak,” NW] ti tao” a “ti pakaragsakanna adda iti linteg ni Jehova; ket iti lintegna imutektekanna iti aldaw ken rabii.” (Salmo 1:1, 2) ‘Makaparagsak’ ti inaldaw a panagbasa iti Sao ti Dios ta pudpudno a bang-aran ken papigsaennatayo tapno makapagtultuloytayo iti Nakristianuan a danatayo.

Kayatyo Kadi ti Masarungkaran?

Uray iti daytoy nariribuk a lubong, magun-odyo ti ragsak manipud iti umiso a pannakaammo iti Biblia maipapan iti Dios, iti Pagarianna, ken iti nakaskasdaaw a panggepna maipaay iti sangatauan. No kayatyo ti ad-adu pay nga impormasion wenno kayatyo nga adda sumarungkar kadakayo tapno libre nga iyadalannakayo iti Biblia iti pagtaenganyo, pangngaasiyo ta agsuratkayo iti Watch Tower, P.O. Box 2044, 1060 Manila, wenno iti maitutop nga address a nailista iti panid 2.