Panangikasaba Iti Pagarian—Napateg a Pribilehio

¹ Binilion kadagiti agnanaed ditoy daga ti inaldaw a magunggonaan kadagiti nawadwad a probision ni Jehova a mangsustiner iti biag. (Mat. 5:45) Nupay kasta, manmano ti mangtagtagiragsak iti naisangsangayan a pribilehio a mangipakita iti apresasion iti Namarsua kadakuada babaen ti panangikasaba iti naimbag a damag ti Pagarian ti Dios. (Mat. 24:14) Kasano kapateg kenka daytoy a pribilehio?

² Ti panangikasaba iti pagarian ket pakaidayawan ti Dios ken mangted namnama ken talna kadagiti tattao a maburburiboran iti agdama a nariribuk a tiempo. (Heb. 13:15) Maaddaan iti namnama a biag nga agnanayon dagidiay dumngeg iti dayta a mensahe. (Juan 17:3) Ania a sekular a karera wenno propesion ti mangituktukon iti kasta a gunggona? Napateg ken apostol Pablo ti ministeriona ket nabatad dayta iti pamay-an a panangitungpalna iti dayta.—Ara. 20:20, 21, 24; 2 Cor. 4:1, 7.

³ Panangapresiar iti Napateg a Pribilehiotayo: Ti maysa a pamay-an a maipakitatayo ti panangapresiar iti trabaho a panangasaba ket ti panangpasayaat ti kualidad ti panagserbitayo. Iwaywayaantayo kadi ti mangisagana iti presentasion a manggutugot iti puso dagiti dumngeg kadatayo? Maparang-aytayo kadi ti abilidadtayo a mangusar iti Kasuratan ken makirinnason kadagiti tattao? Wanwanasentayo kadi ti naituding a teritoriatayo? Ammotayo kadi ti mangirugi ken mangikondukta iti panagadal iti Biblia? Kas kadagiti matalek a Kristiano, idi ken ita, natignaytayo babaen ti umiso a panangmatmat iti daytoy nga aktibidad, ket ipatpategtayo ti pribilehiotayo.—Mat. 25:14-23.

⁴ Makaliwliwa a maammuan a maapresiar unay ti kinaregtatayo a makiraman iti ministerio uray no makapaspasartayo kadagiti epekto ti panaglakay ken panagbaket, nakapuy a salun-at, wenno dadduma pay a narikut a kasasaad. Ipanamnama kadatayo ti Sao ti Dios a napateg ken Jehova dagiti kasta a panangikagumaan nga agserbi kenkuana nupay kasla saan a maapresiar dayta ti dadduma.—Luc. 21:1-4.

⁵ Gubuayan ti dakkel a pannakapnek ti panangikasaba iti Pagarian. Kinuna ti 92 ti tawenna a kabsat a babai: “Anian a pribilehio a lagipen ti nasurok a 80 a tawen ti dedikado a panagserbik iti Dios—awan a pulos ti pagbabawyak! No maisublik la koma ti napalabas, usarek ti biagko iti kasta met laeng a pamay-an, gapu ta ‘ti naayat a kinamanangngaasi ti Dios ket nasaysayaat ngem iti biag.’” (Sal. 63:3) Sapay koma ta apresiarentayo met daytoy napateg a pribilehio manipud iti Dios—ti trabaho a panangikasaba iti Pagarian.

Paset 11—Panangikondukta Kadagiti Progresibo a Panagadal iti Biblia

Panangtulong Kadagiti Estudiante a Mangaramid Kadagiti Panagsarungkar

¹ No irugin ti mayad-adalan iti Biblia ti makiraman iti trabaho a panangasaba, makasarakto kadagiti tattao a mangipakita iti interes iti naimbag a damag. Kasanotayo a matulongan ti kabbaro nga agibumbunannag a mangaramid kadagiti epektibo a panagsarungkar ken mangparayray iti interes dagiti makasaritana?

² Ti panagsagana para iti panagsarungkar ket mangrugi iti damo nga ibibisita. Paregtaenyo ti estudiante a maaddaan iti napasnek nga interes kadagidiay makasaritana. (Fil. 2:4) In-inut a sanayenyo ti kabbaro nga agibumbunannag a mangawis kadagiti bumalay a mangyebkas kadagiti kapanunotanda, dumngeg kadagiti komentoda, ken mangpaliiw kadagiti banag a pakaseknanda. No adda mangipakita iti interes, paisuratyo iti kabbaro nga agibumbunannag ti napateg nga impormasion maipapan iti ibibisita. Usarenyo dayta nga impormasion a tumulong kenkuana nga agsagana para iti kanayonan a panagsasarita.

³ Panagsagana nga Agsarungkar: Lagipenyo ti damo nga ibibisitayo, ken ipakitayo iti estudiante no kasano ti mangpili iti aspeto ti mensahe ti Pagarian a paginteresan ti bumalay. (1 Cor. 9:19-23) Duakayo a mangisagana iti ababa a presentasion a mangitampok iti maysa a teksto ti Biblia agraman ti maysa a parapo iti mapagadalan a publikasion. Kanayonanna, mangisaganakayo iti saludsod a mabalin nga iyimtuod iti ngudo ti saritaan tapno addanto pagsasaritaanyo iti sumaganad a panagsarungkar. Ipakitayo iti kabbaro nga agibumbunannag no kasanona a nayonan ti pannakaammo ti bumalay maipapan iti Sao ti Dios iti tunggal panagsarungkar.

⁴ Makatulong met no suruanyo ti estudiante iti simple nga introduksion. Kalpasan a makablaawanna ti bumalay, mabalinna a kunaen: “Tinagiragsakko ti napalabas a panagsaritata, ket nagsubliak tapno mangiranud iti kanayonan nga impormasion iti Biblia maipapan iti [mangdakamatkayo iti topiko].” Mabalinyo met nga isuro iti kabbaro nga agibumbunannag no ania ti aramidenna no sabali a tao ti manglukat iti ridaw.

⁵ Agsarungkar a Siaanep: Paregtaenyo ti iyad-adalanyo a mangipakita iti nasayaat nga ulidan iti dagus a panangsarungkar kadagiti amin a mangipakita iti interes. Tapno madanonyo dagiti tattao iti pagtaenganda, mabalin a kasapulan a naanepkayo nga agsarungkar. Isuroyo iti estudiante no kasano ti makitulag para iti panagsarungkar, ken tulonganyo a mangtarus a nasken ti panagsubli no inkarina ti agsubli. (Mat. 5:37) Sanayenyo ti kabbaro nga agibumbunannag nga agbalin a naasi, naanus, ken nadayaw bayat ti panangbirokna kadagiti marakarnero a tattao ken bayat ti panangsukayna iti interesda.—Tito 3:2.