Usarenyo a Nainsiriban ti Tiempoyo

¹ Ti tarigagaytayo a mangay-ayo ken Jehova tignayennatayo a mangisentro iti biagtayo kadagiti naespirituan nga aktibidad. Isuronatayo ti Saona nga ‘agtultuloy a mangsapul nga umuna iti pagarian’ ken ‘mangsigurado kadagiti napatpateg a bambanag.’ (Mat. 6:33; Fil. 1:10) Kasanotayo a magatang ti tiempo para kadagiti banag a mainaig iti Pagarian ken pagbalinen a segundario laeng dagiti saan a napateg nga aktibidad?—Efe. 5:15-17.

² Iyun-unayo Dagiti Aktibidad a Mainaig iti Pagarian: Mangaramidkayo iti eskediul tapno saan a masayang ti tiempoyo kadagiti awan kaes-eskanna a bambanag. Iti rugi ti tunggal bulan, dadduma ti mangmarka kadagiti espesipiko nga aldaw iti kalendarioda para iti panagserbida iti tay-ak ket dida ipalubos ti aniaman a banag a makalapped kadagita nga eskediul. Mabalin a kasta met la ti aramidentayo tapno magatangtayo ti tiempo para kadagiti gimong, personal a panagadal, ken kombension. Adu ti nangyeskediul nga agbasa iti Biblia iti rugi wenno ngudo ti tunggal aldaw. Mangilatangkayo iti espesipiko a tiempo para iti tunggal napateg nga aramid, ket diyo palubosan ti aniaman a banag a manglapped iti dayta.—Ecl. 3:1; 1 Cor. 14:40.

³ Kednganyo ti Panangusaryo iti Lubong: Iti dadduma a pagilian nasaknap dagiti isport, paglinglingayan, pagesman, ken dadduma pay nga aktibidad. Adu dagiti mangbusbusbos iti nawadwad a tiempo nga agbuya iti telebision wenno agusar iti kompiuter. Ngem ti pannakakumikom kadagiti paglinglingayan ken baro nga alikamen nga ituktukon daytoy a lubong ket sigurado a mangituggod iti pannakapaay. (1 Juan 2:15-17) Gapuna, idagadag kadatayo ti Kasuratan a ditay usaren a naan-anay ti lubong. (1 Cor. 7:31) Babaen ti panangipangagyo iti daytoy a nainsiriban a balakad, maipakitayo ken Jehova a ti panagdayawyo kenkuana ti kangrunaan iti biagyo.—Mat. 6:19-21.

⁴ Asidegen nga agpatingga ti nabatbati a tiempo daytoy agdama a sistema. Dagidiay mangyun-una kadagiti interes ti Pagarian ket agbalin a naragsak ken magun-odanda ti anamong ti Dios. (Prov. 8:32-35; Sant. 1:25) Usarentayo ngarud koma a nainsiriban ti napateg a tiempotayo.

Paset 12—Panangikondukta Kadagiti Progresibo a Panagadal iti Biblia

Panangtulong Kadagiti Estudiante a Mangirugi ken Mangikondukta Kadagiti Panagadal iti Biblia

¹ No mangrugin a makiraman iti ministerio iti tay-ak dagiti iyad-adalantayo, mabalin a maamakda a mangirugi ken mangikondukta kadagiti panagadal iti Biblia. Kasanotayo a matulongan ida a mangpatanor iti positibo a kababalin iti daytoy nagpateg a paset ti ministeriotayo?—Mat. 24:14; 28:19, 20.

² No kualipikadon ti iyad-adalantayo nga agbalin a di bautisado nga agibumbunannag, mabalin a naipasalistan iti Teokratiko nga Eskuelaan ti Panagministro. Ti pannakasanayna nga agsagana ken mangiparang kadagiti paset ti estudiante ket tumulong kenkuana nga agbalin a nasigo a ‘mangmangged nga awan ti aniaman nga ibainna, nga aramatenna a siuumiso ti sao ti kinapudno.’—2 Tim. 2:15.

³ Mangisuroka Babaen ti Ulidanmo: Sinanay ni Jesus dagiti adalanna babaen ti panangtedna iti nalawag a bilin ken panangipakitana iti nasayaat nga ulidan. Kinunana: “Tunggal maysa a naan-anay a nasursuruan agbalinto a kas iti mannursurona.” (Luc. 6:40) Napateg ti panangtuladmo ken Jesus babaen ti panangipakitam iti nasayaat nga ulidan iti ministeriom. Bayat a palpaliiwennaka ti iyad-adalam, matarusanna a ti panggep dagiti panagsarungkar ket ti panangirugi kadagiti panagadal iti Biblia.

⁴ Ilawlawagmo iti estudiante a no mangitukontayo iti panagadal, saan a kasapulan nga ibagam amin a detalye ti panagadal. Masansan a kasayaatan no idemostra laeng ti panagadal babaen ti panangilawlawag iti maysa wenno nalabit dua a parapo iti mapagadalan a publikasion. Dagiti makatulong a singasing iti panangaramid iti daytoy ket masarakan iti panid 4 ti Agosto 2005 a Ti Ministeriotayo iti Pagarian ken iti panid 6 ti Mayo 2002 a Ti Ministeriotayo iti Pagarian.

⁵ No maitutop, awisem ti estudiante a kumuyog kenka wenno iti sabali pay nga aduan kapadasan nga agibumbunannag kadagiti panangyadalda iti Biblia. Mabalinna ti makiraman nga agkomento iti parapo wenno iti kangrunaan a teksto. Gapuna, babaen ti panagpaliiwna, adu ti masursuro ti estudiante maipapan iti panangikondukta kadagiti progresibo a panagadal iti Biblia. (Prov. 27:17; 2 Tim. 2:2) Komendaram ken ilawlawagmo no kasano a rumang-ay.

⁶ Ti panangsanay kadagiti kabbaro nga agibumbunannag nga agbalin a mannursuro iti Sao ti Dios isaganana ida agpaay iti “naimbag nga aramid” a panangirugi ken panangikondukta kadagiti panagadal iti Biblia. (2 Tim. 3:17) Anian a makapnek ti makipagtrabaho kadakuada iti panangiranud iti naayat nga awis: “Asinoman a mayat awatenna koma ti danum ti biag nga awan bayadna”!—Apoc. 22:17.