Panangirugi Kadagiti Panagadal iti Biblia Kadagiti Ruangan ken Babaen ti Telepono

1, 2. Kasanotayo a mayadalan iti Biblia dagiti okupado a tattao?

¹ Okupado ita dagiti tattao. Ngem adu ti maseknan kadagiti naespirituan a bambanag. Kasanotayo a matulongan ida a mangpennek iti naespirituan a kasapulanda? (Mat. 5:3) Adu nga agibumbunannag ti nakairugi iti panagadal iti Biblia kadagiti tattao iti ruanganda wenno babaen ti telepono. Mapalawam kadi ti ministeriom iti kastoy a pamay-an?

² Tapno makairugi kadagiti panagadal, nasken a nakasaganatayo a mangidemostra iti dayta kaanoman nga adda gundaway. Kasano ken sadino a mabalin nga aramiden daytoy?

3. Apay nga idemostra ti panagadal iti Biblia iti damo nga isasarungkar, ken kasano a maaramid daytoy?

³ Iti Ruangan: No makasarakka iti tao a sidadaan a makisarita maipapan iti Biblia, ukagem laeng ti parapo nga insaganam, kas koma iti umuna a parapo ti leksion 1 ti broshur a Kalikaguman sa irugimon ti panagadal. Basaenyo ti parapo, usigenyo ti saludsod, sa pagsaritaanyo ti maysa wenno dua a nadakamat a teksto. Masansan a mabalin nga aramiden daytoy iti lima agingga iti sangapulo a minuto iti mismo a ruangan. No nagustuanna ti saritaan, agtulagkayo a pagsaritaanyonto iti sabali a gundaway ti sumaganad a maysa wenno dua a parapo.—Masarakan dagiti kanayonan a singasing iti direkta a panangirugi iti panagadal iti p. 6 ti Enero 2002 a Ti Ministeriotayo iti Pagarian.

4. Kasanotayo a makairugi iti panagadal iti Biblia iti ruangan no agsarungkartayo?

⁴ Kadagiti panagsarungkar, mabalin nga usaren ti kasta met la a pamay-an iti panangirugi kadagiti panagadal iti Biblia. Kas pagarigan, mabalin nga ipakitam ti broshur a Kalikaguman ken iyam-ammom ti nagan ti Dios, nga usarem ti leksion 2, parapo 1-2. Iti sumaganad nga isasarungkar, mabalinmo nga ilawlawag no ania ti ipalgak ti Biblia maipapan kadagiti kualidad ni Jehova, nga usarem ti parapo 3-4. Kadagiti sumaganad a panagsaritayo, mabalinmo nga isalaysay ti parapo 5-6 ken ti ladawan iti panid 5 a mangitampok no kasano a ti panagadal iti Biblia tulongannatayo a mangam-ammo ken Jehova. Mabalin nga aramiden amin dagitoy bayat a nakatakderkayo iti ruangan.

5, 6. (a) Apay a kaykayat dagiti dadduma ti agadal iti Biblia babaen ti telepono? (b) Ania a pamay-an ti mabalintayo nga usaren no mangitukontayo iti panagadal babaen ti telepono?

⁵ Babaen ti Telepono: Kaykayat ti dadduma a tattao ti agadal iti Biblia babaen ti telepono ngem iti personal. Usigentayo ti sumaganad a kapadasan: Bayat ti panangasaba iti binalaybalay, maysa a kabsat a babai ti nakasarak iti maysa nga agkabannuag a babai nga ina ken okupado iti trabahona. Idi saannan a madandanon iti pagtaenganna, inkeddeng ti kabsat nga awagan iti telepono. Inlawlawag ti babai nga awan ti panawenna a makisarita maipapan iti Biblia. Kinuna ti kabsat: “Iti 10 wenno 15 a minuto, adda masursurom a baro a banag uray iti telepono laeng.” “Bueno, no iti telepono, mabalin!” kinuna ti babai. Di nagbayag, naikondukta ti panagadal iti Biblia babaen ti telepono.

⁶ Adda kadi dagiti sinarungkaranyo a mayat nga agadal babaen ti telepono? Mabalinmo a padasen ti kadakdakamat a pamay-an, wenno mabalinmo a kunaen: “No kayatmo, mabalinta nga adalen ti Biblia babaen ti telepono. Mabalin kadi?” Babaen ti panangibagaytayo iti programa a panagadal iti Biblia kadagiti kasasaad ti sabsabali, matulongantayo ida a ‘mangbirok iti mismo a pannakaammo iti Dios.’—Prov. 2:5; 1 Cor. 9:23.

No Ania ti Ibagayo Maipapan Kadagiti Magasin

Ti Pagwanawanan Ago. 15

“Kalpasan ti nakalkaldaang nga ipapatay ti maysa a patpatgen, adu ti mangpampanunot no ania ti mapasamak kadagiti natay. Iti panagkunayo, posible ngata a matarusantayo ti ipapatay? [Palubosanyo a sumungbat.] Ilawlawag daytoy a magasin no ania ti kuna ti Biblia maipapan iti kasasaad dagiti natay. Isalaysayna pay ti kari ti Dios a pagungarenna dagiti natayen a patpatgentayo.” Basaenyo ti Juan 5:28, 29.

Agriingkayo! Ago. 22

“Ammoyo kadi a ti turismo ket maaw-awagan kas numero uno a mangipapaay iti panggedan iti lubong? [Palubosanyo a sumungbat.] Adda dagiti parikut ken gunggona nga itden ti irarang-ay ti turismo. Usigen daytoy a magasin dagiti pagsayaatan ken pagdaksan ti moderno nga industria ti turismo. Mangitukon pay kadagiti sumagmamano a praktikal a singasing kadagiti agbibiahe iti sabali a pagilian.”

Ti Pagwanawanan Set. 1

“Iti daytoy a lubong, ti kinasungdo ket naimbag a kababalin a masansan a mapadpadayawan ngem saan a maiparparangarang. Saan kadi a nagsayaat no ad-adu a tattao ti agbalin a kas iti gayyem a nailadawan ditoy? [Basaenyo ti Proverbio 17:17 sa palubosanyo a sumungbat.] Ibinsabinsa daytoy a magasin dagiti gunggona nga itden ti panagbalin a nasungdo iti pamilia ken kadagiti gagayyemtayo.”

Agriingkayo! Set. 8

“Nalabit masdaawkayo iti panagtutunos a makita iti nakaparsuaan. [Mangibagakayo iti maysa kadagiti pagarigan a nadakamat iti artikulo.] Saan kadi a nakalkaldaang a saantayo a makita ti ad-adda koma a panagtutunos kadagiti tattao? [Palubosanyo a sumungbat.] Ilawlawag daytoy a magasin no kasano nga asidegen nga iyeg ti Dios ti kappia ken panagtutunos ditoy daga.” Basaenyo ti Isaias 11:9.