Panangikondukta Kadagiti Progresibo a Panagadal iti Biblia

Paset 3: Epektibo a Panangusar iti Kasuratan

1. Apay a masapul nga ipaganetgettayo ti Kasuratan no mangikonduktatayo kadagiti panagadal iti Biblia?

¹ Ti panggeptayo a mangikondukta kadagiti panagadal iti Biblia ket tapno ‘mangaramid iti ad-adalan’ babaen ti panangtulong kadagiti tattao a mangtarus ken mangawat iti sursuro ti Sao ti Dios ken mangipakat kadagita iti panagbiagda. (Mat. 28:19, 20; 1 Tes. 2:13) Gapuna, ti panagadal ket naisentro koma iti Kasuratan. Iti damo, mabalin a makatulong no ipakitatayo kadagiti iyad-adalantayo no kasano a biroken dagiti espesipiko a teksto iti bukodda a kopia ti Biblia. Ngem kasanotayo a mausar ti Kasuratan tapno matulongantayo ida a rumang-ay iti naespirituan?

2. Kasanotayo a maikeddeng no ania a teksto iti Biblia ti basaen ken ilawlawagtayo?

² Mangpili Kadagiti Teksto a Basaen. Iti panagsaganam, usigem no kasano nga agaplikar ti tunggal naisitar a teksto iti punto a mapagsasaritaan ken ikeddengmo no ania a teksto ti basaen ken ilawlawagmo bayat ti panagadalyo. Kaaduanna, nasaysayaat no basaenyo dagiti teksto a mangipakita iti Nainkasuratan a pangibatayan kadagiti patpatientayo. Mabalin a saanen a nasken a basaen dagiti teksto a mangipaay kadagiti kanayonan nga impormasion. Usigem dagiti kasapulan ken kasasaad ti tunggal iyad-adalam.

3. Ania ti pagimbagan ti panagusar kadagiti saludsod, ken kasanotayo a maaramid daytoy?

³ Agusar Kadagiti Saludsod. Imbes nga ilawlawagmo iti iyad-adalam dagiti teksto iti Biblia, pailawlawagmo dagita kenkuana. Matignaymo ti iyad-adalam a mangaramid iti daytoy babaen ti nasigo a panagusar kadagiti saludsod. No nabatad ti aplikasion ti teksto, mabalin a saludsodem laeng no kasano a suportaran ti teksto ti punto a nadakamat iti parapo. Iti dadduma a kaso, mabalin a kasapulan ti mas espesipiko a saludsod wenno salsaludsod tapno maiturong ti estudiante iti umiso a konklusion. Mabalinmo ti mangted kadagiti kanayonan a panangilawlawag no kasapulan, kalpasan a sumungbat ti iyad-adalam.

4. Kasano kaadu ti ilawlawagtayo maipapan kadagiti teksto a basaentayo?

⁴ Pagtalinaedem a Simple. Ti nasigo a pumapana masansan a maysa laeng a pana ti kasapulanna tapno mapuntaanna ti puntiriana. Umasping iti dayta, ti nasigo a mannursuro ket saan a nasken nga agusar iti adu a sasao tapno maipaganetgetna ti punto. Mabalinna nga ilawlawag ti impormasion iti pamay-an a simple, nalawag, ken umiso. No dadduma, mabalin a kasapulam ti agsukimat kadagiti Nakristianuan a publikasion tapno maawatam ti teksto ken mailawlawagmo a siuumiso. (2 Tim. 2:15) Ngem saanmo nga ilawlawag ti amin nga aspeto ti tunggal teksto iti panagadalyo. Dakamatem laeng daydiay kasapulan tapno mailawlawag ti punto nga ad-adalenyo.

5, 6. Kasanotayo a matulongan dagiti iyad-adalantayo nga agbiag a mayannurot iti Sao ti Dios, ngem ania ti saantayo nga aramiden?

⁵ Mangted iti Praktikal nga Aplikasion. No maitutop, tulongam ti iyad-adalam a mangkita no kasano nga agaplikar kenkuana dagiti teksto iti Biblia. Kas pagarigan, no ilawlawagmo ti Hebreo 10:24, 25 iti iyad-adalam a saan pay a tumabtabuno kadagiti Nakristianuan a gimong, mabalinmo nga ilawlawag kenkuana ti maysa kadagiti gimong ken awisem a tabunuanna dayta. Ngem saanmo a pilpiliten. Palubosam a ti Sao ti Dios ti manggutugot kenkuana a mangaramid iti kasapulan nga addang tapno maay-ayona ni Jehova.—Heb. 4:12.

⁶ Bayat nga itungtungpaltayo ti annongen a mangaramid iti ad-adalan, sapay koma ta babaen ti epektibo a panangusartayo iti Kasuratan, ‘itandudotayo ti kinatulnog babaen ti pammati.’—Roma 16:26.

No Ania ti Ibagayo Maipapan Kadagiti Magasin

Ti Pagwanawanan Nob. 15

“Kayat ti kaaduan a tattao ti maaddaan iti nasayaat a salun-at ken napaut a biag. Ngem no mabalin, kayatyo kadi ti agbiag iti agnanayon? [Palubosanyo a sumungbat. Sa basaenyo ti Juan 17:3.] Ilawlawag daytoy a magasin ti kari ti Biblia a biag nga agnanayon. Usigenna pay no anianto ti kasasaad ti biag inton matungpal dayta a kari.”

Agriingkayo! Nob. 22

“Iti napalabas a 20 a tawen, adun ti rimmang-ayan ti panangadal ken panangagas iti AIDS. Ngem adu a tattao ti saan pay laeng nga umiso ti pannakaammoda. [Ipakitayo ti kahon a “Dagiti Di Umiso a Pagarup Maipapan iti AIDS,” sa palubosanyo nga agkomento.] Ilawlawag daytoy a magasin no kasano a dagiti nagannak masalaknibanda dagiti annakda.” Basaenyo ti Deuteronomio 6:6, 7.

Ti Pagwanawanan Dis. 1

“Ti maysa a galad a mangiduma kadagiti tattao iti animal ket ti abilidadda a mangammo iti umiso ken di umiso. Nakalkaldaang ta adu a tattao ti agar-aramid iti dakes. Ania ti ammoyo a makagapu? [Palubosanyo a sumungbat. Sa basaenyo ti Jeremias 17:9 wenno ti Apocalipsis 12:9.] Dakamaten daytoy a magasin no ania ti makatulong kadatayo a mangammo ken mangaramid iti umiso.”

Agriingkayo! Dis. 8

“Dagiti rimmang-ayan ti teknolohia saanna a nabalbaliwan ti tarigagay ti tao a maaddaan iti gayyem. Ngem napaliiwyo kadi a dagiti panagbalbaliw iti kagimongan pagbalinenna ita a narigat ti maaddaan kadagiti nasinged a gagayyem? [Palubosanyo a sumungbat. Sa basaenyo ti Proverbio 18:24.] Ilawlawag daytoy a magasin no kasanotayo a maaddaan ken masalimetmetan dagiti pudno a gagayyem.”