Paset 4—Panangikondukta Kadagiti Progresibo a Panagadal iti Biblia

Panangsanay Kadagiti Estudiante nga Agsagana

¹ Alisto a rumang-ay iti naespirituan ti estudiante a mangbasa a nasaksakbay iti leksion, manguged kadagiti sungbat, ken mangpanunot no kasano nga iyebkasna dagita iti bukodna a sasao. Gapuna, no naipasdeken ti regular a panagadal, duakayo a mangisagana iti leksion tapno maipakitayo iti iyad-adalanyo no kasano ti agsagana. Iti kaaduan a mayad-adalan, makatulong no duakayo a mangisagana iti intero a kapitulo wenno leksion.

² Pananguged ken Panaginotar: Ilawlawagmo no kasano a biroken dagiti direkta a sungbat dagiti nakaimprenta a saludsod. Ipakitam iti iyad-adalam ti bukodmo a kopia ti publikasion a pagad-adalanyo a dagiti laeng kangrunaan a sasao ti inugedam. Bayat nga usigenyo ti material, mabalin a kayatnaka a tuladen, nga ugedanna iti bukodna a kopia dagiti laeng napateg a sasao a tumulong kenkuana a manglagip iti sungbat. (Luc. 6:40) Sa kiddawem kenkuana a sumungbat iti bukodna a sasao. Daytoy ti tumulong kenka a mangkita no natarusanna a naimbag ti material.

³ Ti naannad a panangsukimat kadagiti saan a nakotar a teksto ket napateg a paset ti panagsagana ti estudiante para iti panagadal. (Ara. 17:11) Tulongam a mangkita a ti tunggal naisitar a teksto pasingkedanna ti punto iti parapo. Ipakitam kenkuana no kasano ti aginotar iti ababa iti pingir ti panid ti ad-adalenyo a publikasion. Ipaganetgetmo a ti Biblia ti nakaibatayan ti ad-adalenna. Iparegtam nga agusar kadagiti naisitar a teksto no agkomento bayat ti panagadal.

⁴ Panangkita iti Pakabuklan ti Leksion ken Panangrepaso: Sakbay nga irugi ti estudiante ti detalyado a panagsagana ken panangadalna iti material, makatulong kenkuana no ammona ti pakabuklan ti leksion. Ibagam kenkuana a mabalinna a kitaen ti pakabuklan ti material babaen ti panangusigna iti apagbiit iti paulo ti kapitulo, dagiti subtitulo, ken ilustrasion. Ilawlawagmo a sakbay nga ileppasna ti panagsaganana, nasayaat no iwayaanna a repasuen dagiti kangrunaan a punto a naidatag iti leksion, a nalabit usarenna ti kahon a pangrepaso no adda. Ti kasta a panangulit ti tumulong kenkuana tapno saanna a malipatan ti impormasion.

⁵ Ti panangsanaymo iti iyad-adalam nga agsagana a naimbag iti panagadalna ket makatulong tapno makaipaay kadagiti nabagas a komento kadagiti gimong ti kongregasion. Makatulong met dayta kenkuana a mangpatanor kadagiti ugali iti panagadal a makagunggonanto kenkuana uray no nabayagen a nalpas ti panagadalyo iti Biblia.

Baro a Probision a Tumulong Kadatayo nga Umadayo iti Dara

Inanamongan ti Bagi a Manarawidwid ti baro a dokumento a napauluan iti Durable Power of Attorney for Health Care (DPA) a kasukat ti dati nga Advance Medical Directive/Release card.

Nasken a suratanyo ti DPA card, nga awan ti naikeddeng a panawen a panagpasona ken agserbi kas dokumento a nakailanadan dagiti kalikagumyo uray no agbiahekayo kadagiti sabali a pagilian. Iti masanguanan, rumbeng a mangaramidkayo iti baro a DPA card no (1) adda dagiti nasken a baliwanyo iti DPA card-yo, kas koma no baliwanyo dagiti kalikagumyo, pannakabagiyo iti panagpaagas, adres, ken numero ti telepono, wenno (2) napukaw wenno naperdi ti DPA card-yo.

Nasken a sikakararag nga usigenyo ti DPA card ken siaannad a suratanyo iti pagtaenganyo. Ngem sakbay a pirmaanyo ti kard, siguraduenyo nga adda dagiti dua a saksi a piniliyo no pirmaanyo dayta. Mabalin a sagpaminsan a saludsoden dagiti manangaywan iti panagadal iti libro no adda dagidiay saan pay a nakaaramid iti baro a kard tapno maammuanda no agkasapulanda iti tulong.

Sakbay a kupinenyo ti DPA card, mangi-xerox-kayo kadagiti nalawag a kopia iti maysa laeng a bangir ti 8 1/2ʺ x 11ʺ a papel a nakasentro ti DPA card iti panid. Ikkanyo iti kopia ti pannakabagiyo iti panagpaagas, ti maikadua a pannakabagiyo, ti doktoryo, ken mangidulinkayo iti bukodyo a kopia. Mabalin a kayatyo met nga ikkan iti kopia ti dadduma a kameng ti pamiliayo, ken ti sekretario ti kongregasionyo. Ti orihinal a DPA card ti itugotyo, saan a ti xerox copy.

Saan a nagbaliw ti nayimprenta idi 3/99 nga Identity Card agpaay kadagiti annak dagiti Saksi. Masapul a siguraduen dagiti nagannak a siuumiso a nasuratan ken napirmaan ti kard ti tunggal menor de edad nga anakda ken itugot dayta ti anakda kadagiti maitutop a tiempo.

Mabalin a kopiaen dagiti di bautisado nga agibumbunannag ti DPA card ken ti Identity Card tapno maisuratda dagiti bilinda maipapan iti pannakaaywan ti salun-atda ken dagiti annakda. Ti sekretario masapul nga ikkanna iti DPA card ti amin a kabbaro nga agibumbunannag bayat ti tawen.