“Nataraonan iti Sasao ti Pammati”

¹ Ti panagbiag buyogen ti nadiosan a debosion kalikagumanna ti kinapinget. (1 Tim. 4:7-10) No agpannuraytayo iti bukodtayo a bileg a mangaramid iti dayta, mabannog ken maitibkoltayo. (Isa. 40:29-31) Ti maysa a pamay-an tapno maaddaantayo iti bileg nga aggapu ken ni Jehova ket babaen ti ‘panagtaraon iti sasao ti pammati.’—1 Tim. 4:6.

² Nabaknang a Naespirituan a Taraon: Mangipapaay ni Jehova iti nabaknang a naespirituan a taraon babaen ti Saona ken “ti matalek ken masirib nga adipen.” (Mat. 24:45) Ar-aramidentayo kadi ti pasettayo tapno magunggonaantayo iti dayta? Inaldaw kadi a basbasaentayo ti Biblia? Adda kadi intudingtayo a panawen para iti personal a panagadal ken panangutob? (Sal. 1:2, 3) Ti kasta a makapasalun-at a naespirituan a taraon pakirden ken salaknibannatayo manipud kadagiti makapakapuy nga impluensia ti lubong ni Satanas. (1 Juan 5:19) Adda kadatayo ni Jehova no punnuentayo ti isiptayo kadagiti nasayaat a banag ken iyaplikartayo dagita iti panagbiagtayo.—Fil. 4:8, 9.

³ Pabilgennatayo met ni Jehova babaen kadagiti gimong ti kongregasion. (Heb. 10:24, 25) Ti naespirituan a pannursuro ken nasayaat a pannakitimpuyog a masarakan kadagitoy a taripnong ti mangpabileg kadatayo nga agtakder a sititibker iti laksid dagiti pannubok. (1 Ped. 5:9, 10) Kuna ti maysa nga agtutubo a Kristiano: “Mabambannogak iti agmalmalem a panageskuela. Ngem dagiti gimong ket kasda la pagkamangan iti desierto, a sadiay a mabang-aranak tapno makapageskuelaak manen iti kabigatanna.” Sigurado a magunggonaantayo no ikagumaantayo ti tumabuno kadagiti gimong!

⁴ Panangiwaragawag iti Kinapudno: Imbilang ni Jesus kas pannakataraonna ti panangasaba kadagiti sabsabali. Dayta ti nangpakired kenkuana. (Juan 4:32-34) Mapabaro met ti pigsatayo no isarsaritatayo kadagiti sabsabali dagiti nakaskasdaaw a kari ti Dios. Ti panagbalin nga okupado iti ministerio pagtalinaedenna met ti isip ken pusotayo a naipamaysa iti Pagarian ken kadagiti bendision nga asidegen a dumteng. Pudno a bang-arannatayo.—Mat. 11:28-30.

⁵ Pudno unay a naparaburantayo iti nawadwad a naespirituan a taraon nga ipapaay ni Jehova kadagiti adipenna ita! Sapay koma ta itultuloytayo ti agdir-i a sirarag-o nga agpaay a pakaidayawanna.—Isa. 65:13, 14.

Paset 5—Panangikondukta Kadagiti Progresibo a Panagadal iti Biblia

Panangikeddeng No Kasano Kaadu ti Material a Saklawen

¹ Idi nangisuro ni Jesus, inkabilanganna dagiti limitasion dagiti adalanna, a nakisarsarita kadakuada “agingga iti kabaelanda nga imdengan.” (Mar. 4:33; Juan 16:12) Umasping iti dayta, dagiti mannursuro iti Sao ti Dios ita nasken nga ikeddengda no kasano kaadu ti material a saklawenda iti panangyadalda iti Biblia. Ti kaadu ti material a mausig ket agpannuray iti abilidad ken kasasaad ti mangyad-adal ken ti mayad-adalan.

² Mangbangon iti Natibker a Pammati: Adda dagiti estudiante a mamindua wenno mamitlo a mayadalan tapno maawatanda ti leksion. Ket dagiti dadduma maminsan laeng a mayadalanda. Napatpateg ti panangtulongtayo iti estudiante tapno matarusanda a naimbag ti leksion imbes a mangsaklaw iti nakaad-adu a material iti ababa a tiempo. Tunggal estudiante nasken nga adda natibker a pangibatayanna iti kabbaro a nasarakanna a pammati iti Sao ti Dios.—Prov. 4:7; Roma 12:2.

³ Bayat ti linawas a panangyadalmo, busbosem ti uray mano a minuto a kasapulan tapno matulongam ti estudiante a mangtarus ken mangawat kadagiti masursurona iti Sao ti Dios. Dika agap-apura tapno magunggonaan ti estudiante iti naan-anay a pateg dagiti kinapudno nga isursurom kenkuana. Mangilatangka iti umdas a tiempo a mangipamaysa kadagiti kangrunaan a punto ken mangusig kadagiti napateg a teksto a nakaibatayan dagiti isursurom kenkuana.—2 Tim. 3:16, 17.

⁴ Agtalinaedka iti Tema: Nupay ditay kayat ti agdardaras nga agadal, ditay met kayat ti masinga kadagiti punto nga awan ti pakainaiganna iti tema. No adu ti kayat nga ibaga ti estudiante maipapan kadagiti personal a bambanag, mabalin a pagsaritaanyo dagita kalpasan ti panagadal.—Ecl. 3:1.

⁵ Iti sabali a bangir, mabalin nga adu ti maibagatayo kabayatan ti panagadal gapu iti gagartayo iti kinapudno. (Sal. 145:6, 7) Mabalin a makagunggona iti panagadal ti panangiraman iti kanayonan a punto wenno kapadasan, ngem ditay kayat a nakaad-adu wenno nakaat-atiddog dagitoy nga uray la malapdanda ti pananggun-od ti estudiante iti umiso a pannakaammo maipapan kadagiti pamunganayan a sursuro ti Biblia.

⁶ No kalkalainganna ti kaadu ti leksion a masaklaw iti tunggal panagadal, matulongantayo ti iyad-adalantayo iti Biblia a ‘magna iti lawag ni Jehova.’—Isa. 2:5.