Paset 6—Panangikondukta Kadagiti Progresibo a Panagadal iti Biblia

No Agsaludsod ti Estudiante

¹ No naipasdeken ti panagadal iti Biblia, gagangay a kasayaatan no naurnos ken agsasaruno ti panangusigyo kadagiti sursuro ti Biblia imbes a laktalaktawanyo dagiti topiko. Tumulong daytoy iti estudiante tapno adda pangibatayanna iti umiso a pannakaammo ken tapno rumang-ay iti naespirituan. (Col. 1:9, 10) Ngem masansan nga agsaludsod dagiti estudiante maipapan iti nadumaduma a topiko bayat ti panagadal. Kasano a tamingen dagitoy?

² Agbalinka a Mannakaawat: Mabalin a sungbatan a dagus dagiti saludsod a mainaig iti maad-adal a material. No ti saludsod ket mausigto iti sumaganad, mabalin nga umdasen ti basta panangikuna a mapagadalanyonto dayta. Ngem no ti saludsod ket awan pakainaiganna iti maad-adal a material wenno agkasapulan iti panagsukimat tapno maammuan ti umiso a sungbat, nasaysayaat no usigen dayta a banag kalpasan ti panagadal wenno iti sabali a gundaway. Natakuatan dagiti dadduma nga agibumbunannag a ti panangisurat iti saludsod ipasiguradona iti estudiante a masungbatanto ti saludsodna ken makatulong dayta tapno saan a masinga ti panagadal.

³ Kadagiti kangrunaan a publikasiontayo a maus-usar iti panagadal, ababa laeng ti pannakailawlawag dagiti adu a sursuro ti Biblia. Kasanon no marigatan ti estudiante a mangakseptar iti maysa a sursuro wenno mamati pay laeng iti di umiso a sursuro? Mabalin a makagunggona no mangusigkayo iti kanayonan a material a naan-anay a mangilawlawag no ania ti kuna ti Biblia maipapan iti dayta a banag. No saan latta a kombinsido ti estudiante, pagsaritaanyonto dayta iti sabali a gundaway sa ituloyyo pay laeng ti regular a panagadalna. (Juan 16:12) Bayat nga umad-adu ti pannakaammona iti Biblia ken rumangrang-ay iti naespirituan, mabalin a maawatannanto dayta a sursuro ti Biblia.

⁴ Agbalinka a Naemma: No saanka a sigurado iti sungbat ti maysa a saludsod, saanka a mangted iti personal nga opinion. (2 Tim. 2:15; 1 Ped. 4:11) Ilawlawagmo nga agsukimatkanto pay ket sungbatamto dayta inton agsublika. Mabalin met a gundawayam dayta tapno isurom ti iyad-adalam no kasano ti agsukimat. In-inut nga ipakitam kenkuana no kasano nga usaren dagiti nadumaduma a katulongan iti panagsukimat nga ipapaay ti organisasion ni Jehova. Iti daytoy a pamay-an masungbatannanto dagiti bukodna a saludsod.—Ara. 17:11.

Tulonganyo Ida nga Umawat iti Kanayonan a Pammaneknek

¹ No iranudtayo ti naimbag a damag, masansan a makasaraktayo kadagiti tattao nga agnanaed kadagiti lugar a saan a sakup ti teritoriatayo wenno agus-usar iti sabali a pagsasao, a pakairamanan ti sign language. Mabalin nga umakar iti lugar a saan a sakup ti teritoriatayo ti dadduma a nakasarsaritatayon maipapan iti Biblia. Kasano a makaaramidtayo iti urnos tapno umawat dagiti kasta a tattao iti kanayonan a pammaneknek? Babaen ti panangusartayo iti porma a Please Follow Up (S-43).

² Masansan nga ad-adda nga umimdeng a naimbag dagiti tattao no maidatag kadakuada ti naimbag a damag iti bukodda a pagsasao. (Ara. 22:1, 2) Gapuna, kaaduanna a masapul a suratantayo ti porma no adda makasaritatayo a sabali ti pagsasaona uray no dayta a tao ket saan a nangipakita iti interes iti mensahe ti Pagarian. Ngem no adu dagiti ganggannaet ti pagsasaona a kanayon a makaskasabaan iti bukodda a pagsasao, mabalin a saanen a kasapulan a masuratan daytoy a porma malaksid no adda mangipakita iti interes.

³ Panangsurat iti Porma: Sitataktika a damagem ti nagan, adres, ken numero ti telepono ti maysa a tao. Isuratmo no kasano kapasnek ti interesna, no kaano a madanon, no ania a literatura ti naipaimam wenno kiniddawna, ken ti pagsasao a maawatanna. No nasuratamon ti porma, dagus nga itedmo dayta iti sekretario ti kongregasion ta isu ti mangipatulod iti maitutop a kongregasion wenno grupo.

⁴ Panangipatulod iti Porma: No saan nga ammo ti sekretario no ania a kongregasion wenno grupo ti pangtedanna iti porma wenno saanna nga ammo ti adres a pangipatulodanna, mabalinna nga ipatulod dayta iti sanga nga opisina tapno maited iti maitutop a kongregasion wenno grupo.

⁵ Kaanoman nga adda maawat ti kongregasion wenno grupo a nasuratan a porma a Please Follow Up, mangaramidda koma iti urnos tapno dagus a masarungkaran dayta a tao. Bayat a sigaganetget nga ar-aramidentayo ti pasettayo, makapagtalektayo a luktan ni Jehova ti puspuso dagidiay “siuumiso nga agannayas iti agnanayon a biag.”—Ara. 13:48.