Paset 7—Panangikondukta Kadagiti Progresibo a Panagadal iti Biblia

Panagkararag Sakbay ken Kalpasan ti Panagadal

1. (a) Apay a maitutop ti agkararag sakbay ken kalpasan ti panagadal iti Biblia? (b) Iti panangyadal iti Biblia, kasanotay a mairaman ti kararag?

¹ Tapno rumang-ay iti naespirituan dagiti iyad-adalantayo iti Biblia, nasken ti pamendision ni Jehova. (1 Cor. 3:6) Maitutop ngarud ti agkararag sakbay ken kalpasan ti panagadal. Kaaduanna, mabalintay nga aramiden daytoy iti damo a pannakipagadal kadatayo dagiti relihioso a tattao. Kadagiti dadduma, mabalin a nasken a tingitingentayo no kaano a mayanatup ti agkararag. Mabalinmo nga usaren ti Salmo 25:4, 5 ken 1 Juan 5:14 tapno matulongam ti iyad-adalam a mangtarus no apay a nasken ti agkararag ken kasta met ti Juan 15:16 no ilawlawagmo ti pateg ti panagkararag ken ni Jehova babaen ken ni Jesu-Kristo.

2. No mangyadal iti Biblia ti kabsat a babai a kaduana ti bautisado a kabsat a lalaki wenno ti saan a bautisado a lalaki nga agibumbunannag, siasino ti mangikararag?

² Iti panangyadal iti Biblia, siasino ti rumbeng a mangikararag? No adda bautisado a kabsat a lalaki a kadua ti kabsat a babai a mangyadal, ti kabsat a lalaki ti mangikararag, nupay mabalin a ti kabsat a babai ti mangikondukta iti panagadal bayat a nakadalungdong. (1 Cor. 11:5, 10) Iti sabali a bangir, no saan a bautisado a lalaki nga agibumbunannag ti kadua ti kabsat a babai a mangyadal, ti kabsat a babai ti mangikararag. Iti kasta a kasasaad, rumbeng nga agdalungdong no mangikararag ken no mangikondukta.

3. Iti panangyadal iti Biblia, ania dagiti banag a mayanatup nga ikararagtayo?

³ No Ania ti Mabalin nga Ikararag: Iti panangyadal iti Biblia, saan a kasapulan nga atiddog dagiti kararag, ngem espesipiko koma dagitoy. Malaksid iti panangidawat iti pamendision ti Dios bayat ti panagadal ken panagyaman kadagiti kinapudno a maad-adaltayo, maitutop nga idaydayawtayo ni Jehova kas Gubuayan dagiti banag a masursurotayo. (Isa. 54:13) Mabalintay met nga iyebkas ti napasnek a pannakaseknantayo iti iyad-adalantayo ken ti apresasiontayo iti organisasion nga us-usaren ni Jehova. (1 Tes. 1:2, 3; 2:7, 8) Mabalin a matulongan ti iyad-adalantayo a mangbigbig iti kinapateg ti ‘panangtungpal iti sao’ no ikararagtayo a bendisionan ni Jehova ti panangikagumaanna a mangyaplikar kadagiti maad-adalna.—Sant. 1:22.

4. Ania dagiti pagsayaatan ti panagkararag sakbay ken kalpasan ti panagadal iti Biblia?

⁴ Adu ti pagsayaatan ti panagkararag. No agkararagtayo, bendisionannatayo ti Dios. (Luc. 11:13) Ipaganetgetna ti kinaserioso ti panagadal iti Sao ti Dios. Bayat a dumdumngeg ti estudiante kadagiti kararagtayo, masursurona no kasano ti agkararag. (Luc. 6:40) Maysa pay, dagiti kararag nga agubbog iti puso a napno iti ayat iti Dios ken panagyaman kadagiti di maartapan a galadna matulonganna ti iyad-adalantayo a mangpatanor iti personal a relasion ken ni Jehova.

No Ania ti Ibagayo Maipapan Kadagiti Magasin

Ti Pagwanawanan Abr. 15

“Nakaad-adu nga impormasion ti magun-odan iti kaaldawantayo, saan kadi? [Palubosanyo a sumungbat.] Ngem awanen ti napatpateg pay ngem iti nadakamat iti daytoy a teksto. [Basaenyo ti Juan 17:3.] Ilawlawag daytoy a magasin no ania ti kayat a sawen ti ‘agnanayon a biag’ ken no kasano a magun-odtayo ti pannakaammo a mangiturong iti dayta.”

Agriingkayo! Abr. 22

“Nupay nalabit a nalatlatak ni Jesu-Kristo ngem iti asinoman a tao a nagbiag, adu ti saan a makaammo iti pudno a kinasiasinona. Ammoyo kadi nga inut-utob met daytoy uray dagiti mismo nga apostol ni Jesus? [Palubosanyo a sumungbat sa basaenyo ti Marcos 4:41.] Usigen daytoy a magasin no ania ti kuna ti Biblia maipapan iti pudno a kinasiasino ni Jesus.”

Ti Pagwanawanan Mayo 1

“No adda matay nga ing-ingungotentayo, gagangay a kayattayo a makita manen dayta a tao. Umanamongkayo kadi? [Palubosanyo a sumungbat.] Adu ti naliwliwa iti kari ti Biblia maipapan iti panagungar. [Basaenyo ti Juan 5:28, 29.] Ilawlawag daytoy a magasin no kaano a mapasamak ti panagungar ken no siasino dagiti magunggonaan iti dayta.”

Agriingkayo! Mayo 8

“Napili ti kaaduan a nagannak no maipapan iti ipalubosda a buyaen dagiti annakda. Marigatankayo kadi a mangpili kadagiti maitutop a pelikula a buyaen ti pamiliayo? [Palubosanyo a sumungbat sa basaenyo ti Efeso 4:17.] Usigen daytoy a magasin no kasano a dagiti nagannak matulonganda dagiti annakda a mangpili kadagiti maitutop a paglinglingayan.”